4. ÑusɅben laʼ bɅ laʼ mul

¿CHUQUI YOM I YɅL?

Yom i yʌl chaʼan yom mi lac mel tiʼ sujm i maʼañic mi lac lot lac michʼajel ti lac pusicʼal. Ili mach yomic i yʌl chaʼan maʼañic mi lac chʼʌm ti ñuc chuqui tsaʼ ujti o chaʼan mi lac mel cheʼ bajcheʼ maʼañic chuqui tsaʼ ujti.

PRINCIPIO AM BɅ TI BIBLIA: «Chʌn cuchben laʼ bʌ laʼ sajtemal yicʼot ñusʌben laʼ bʌ laʼ mul tiʼ pejtelel laʼ pusicʼal cheʼto jaʼel mi an majqui miʼ taj i sajtemal ti laʼ tojlel» (Colosenses 3:13).

«Cheʼ bʌ an majqui maʼ cʼuxbin, mach jiñic maʼ qʼuel jiñi mach bʌ weñic miʼ mel, jiñʌch cheʼ miʼ chaʼlen wersa chaʼan miʼ weñʼesan majlel i bʌ» (Aaron).

¿CHUCOCH ÑUC I CʼɅJÑIBAL?

Mach weñic cheʼ mi lac lot lac michʼajel ti lac pusicʼal come miʼ mejlel i cʼamʼesañonla yicʼot chaʼan mach weñic mi la cubin lac bʌ, i cheʼ jaʼel, miʼ mejlel i ticʼlan lac ñujpuñel.

«Ti jumpʼejl bʌ qʼuin, jiñi c ñoxiʼal tsiʼ cʼajtibeyon chaʼan mic ñusʌben i mul come tsiʼ lowbeyon c pusicʼal. Wocolʌch tsaʼ cubi chaʼan mic ñusʌben i mul, pero ti wiʼil tsaʼʌch c mele. Cojach mic chaʼ ñaʼtan c bʌ cheʼ mach ti orajic tsaʼ c mele, machiqui maʼañic tsaʼ lon c wen taja wocol» (Julia).

¿CHUQUI MIʼ MEJLEL A MEL?

ÑAʼTAN ILIYI

Ñaʼtan ili cheʼ jiñi a piʼʌl miʼ mel muʼ bʌ i low a pusicʼal:

• ¿Ti ora ba cʼux maʼ wubin chuqui maʼ subentel?

• ¿Wersa baʼ wom chaʼan miʼ cʼajtibeñet chaʼan maʼ ñusʌben i mul, o mejl jach a ñusan maʼ wubin?

TEM ALɅLA

• ¿Muʼ ba lac wen jalʼan chaʼan mi lac ñusʌben lac bʌ lac mul? ¿Bajcheʼ jalel?

• ¿Chuqui miʼ mejlel lac mel chaʼan orajach mi lac ñusʌben lac bʌ lac mul?

MUʼ BɅ MEJLEL LAʼ MEL

• Cheʼ bʌ jiñi a piʼʌl miʼ mel muʼ bʌ i low a pusicʼal, mach a ñaʼtan chaʼan yilol jach tsiʼ mele.

• Chʼʌmben i sujm jiñi a piʼʌl, cʼajtesan chaʼan «ti lac pejtelel mi lac wen taj lac sajtemal» (Santiago 3:2).

«Mach wocolic mi la cubin chaʼan mi lac ñusʌben lac bʌ cheʼ bʌ laja lac mulʌch, pero ñumen wocol mi la cubin cheʼ juntiquil jach jiñi am bʌ i mul. Yomʌch wen an lac pecʼlel chaʼan mi lac ñusʌben i mul lac piʼʌl» (Katy).

PRINCIPIO AM BɅ TI BIBLIA: «Chaʼlen wersa a tojʼesan ti ora jiñi a wocol» (Mateo 5:25).