Miʼ mejlel lac taj lac tijicñʌyel cheʼ mucʼʌch lac jacʼben i mandar tac Dios.
Dios miʼ yʌqʼuen i bendición jiñi muʼ bʌ i jacʼbeñob i tʼan
Jiñi xʼaltʼan Moisés tsiʼ yʌlʌ chaʼan Dios mi caj i yʌqʼueñonla i bendición mi mucʼʌch lac jacʼben i tʼan (Deuteronomio 10:13; 11:27). Mi lac jacʼben i tʼan Dios mach ti cajic jach bʌqʼuen. An cabʌl utsʼatax bʌ i melbal, jin chaʼan mi laj cʼuxbin i mach la comic chaʼan miʼ yubin i chʼijiyemlel. «Come i cʼuxbintel Dios jiñʌch i chʼujbibentel i mandar» (1 Juan 5:3).
Pero ¿chuqui ti bendición mi lac taj cheʼ bʌ mi lac jacʼben i tʼan Dios? Laʼ laj qʼuel chaʼpʼejl.
1. MIʼ YɅQʼUEÑONLA LAC TAJ LAC ÑAʼTɅBAL
«Joñon a Yumon, a Dioson muʼ bʌ j cʌntesañet chaʼan maʼ taj chuqui wen. Joñon mic tojʼesañet ti a bijlel baʼ yom maʼ chaʼlen xʌmbal» (ISAÍAS 48:17).
Jehová jiñʌch tsaʼ bʌ i meleyonla (pʌtʌyonla) yicʼot i wen cʌñʌyonla i miʼ yʌqʼueñonla ticʼojel tac. Mi la com chaʼan jiñi i ticʼojel tac miʼ coltañonla, yom mi laj qʼuel yaʼ ti Chʼujul bʌ tsʼijbujel chuqui yom Dios chaʼan mi lac mel i cheʼ jaʼel yom mi lac jacʼ.
2. MIʼ YɅQʼUEÑONLA LAC TAJ LAC TIJICÑɅYEL
«Ñumen tijicñayob muʼ bʌ i yubibeñob i tʼan Dios muʼ bʌ i jacʼob» (LUCAS 11:28).
Ili ora, cabʌl wiñicob xʼixicob (quixtañujob) miʼ jacʼbeñob i Tʼan Dios i wen tijicñayob añob. Laʼ laj qʼuel tiʼ tojlel juntiquil wiñic chʼoyol bʌ ti España: Ili wiñic ti ora miʼ michʼan yicʼot mach weñic bajcheʼ miʼ pejcan yambʌlob, i cheʼto jaʼel tiʼ tojlel i yijñam. Pero ti jumpʼejl bʌ qʼuin tsiʼ pejca tsaʼ bʌ i tsʼijbu jiñi xʼaltʼan Moisés tiʼ tojlel José, i yalobil Jacob, tsaʼ bʌ i pʌsʌ utsʼatax bʌ melbalʌl. Anquese José tsaʼ chojñi chaʼan miʼ chaʼlen majtan eʼtel yicʼot tsaʼ toʼol otsʌnti ti cárcel, tsaʼʌch i chʌn pʌsʌ chaʼan an i yutslel yicʼot chaʼan mach yujilic michʼan (Génesis, capítulo 37 cʼʌlʌl ti 45). Jiñi wiñic chʼoyol bʌ ti España tsiʼ yʌlʌ: «Cheʼ bʌ tsaʼ c ñaʼta tsaʼ bʌ i ñusa José tsiʼ coltayon j qʼuel chaʼan yom mic pʌs cʼuxbiya, cutslel yicʼot chaʼan yom mic ticʼ bʌ. Ili tsiʼ coltayon chaʼan mic mejlel c taj c tijicñʌyel».
Yaʼ ti Chʼujul bʌ tsʼijbujel mi lac taj ticʼojel tac chaʼan bajcheʼ yom mi laj qʼuel yambʌlob. Yaʼ ti yambʌ artículo miʼ cajel lac ñumen cʌn.