¿Chuqui tac mi caj i mel jiñi i Yumʌntel Dios?
I jacʼbal muʼ bʌ i yʌcʼ jiñi Biblia
Jiñi i Yumʌntel Dios mi caj i jisan pejtelel jiñi yumʌlob añoʼ bʌ ili ora i mi caj i yuman ili pañimil i (Daniel 2:44; Apocalipsis 16:14). Cheʼ bʌ tsaʼix ujti iliyi, jiñi i Yumʌntel Dios mi caj i mel iliyi:
Mi caj i jisʌntel jiñi jontoloʼ bʌ. «Jini xmulilob [...] mi caj i jilelob» (Proverbios 2:22).
Maʼañix miʼ chʌn cajel guerra. Dios mi caj i «yujtesan guerra cʼʌlʌl tiʼ pejtelel pañimil» (Salmo 46:9).
Miʼ cajel ñʌchʼtʌlel yicʼot maʼañix majqui miʼ cajel ti bʌqʼuen. «Jujuntiquil mi caj i yajñel tiʼ yotot tiʼ ñʌchʼtʌlel i pusicʼal. Maʼanic majch mi caj i bʌcʼtesan» (Miqueas 4:4).
Jiñi Lum mi caj i sujtel ti jumpʼejl paraíso. «Ti jim bʌ ora jini tiquin bʌ lum mi caj i yubin i tijicñʌyel. Miʼ caj ti nich yaʼ baʼ jochol jini lum» (Isaías 35:1).
Ti lac pejtelel mi caj lac taj la queʼtel i mi caj lac ñusan lac bʌ tiʼ melol. «Tijicñayob jini yajcʌbiloʼ bʌ c chaʼan, come i chaʼañobʌch pejtelel i wut i yeʼtel. Mach lolomic jach mi caj i chaʼleñob eʼtel» (Isaías 65:21-23).
Maʼañix miʼ cajel cʼamʌjel. «Maʼanix mi juntiquilic muʼ bʌ caj i yʌl: ‹Cʼamon›» (Isaías 33:24).
Maʼañix majqui mi caj i ñoxʼan. «Jini winic, [...] mi caj i chaʼ wenʼan. Lajal mi caj i sujtel i bʌcʼtal bajcheʼ chʼiton, wen chʼejl bʌ» (Job 33:25).
Jiñi chʌmeñoʼ bʌ mi caj i chaʼ cuxtʌyelob. «Mach yomic toj sajtel laʼ pusicʼal chaʼan iliyi, come tal i yorajlel cheʼ bʌ pejtelel jiñi añoʼ bʌ ti mucoñibʌl mi caj i yubibeñob i tʼan [Jesús] i mi caj i loqʼuelob» (Juan 5:28, 29).