Mateo

Juan Bautista ʉ̃i coyʉino Jʉ̃menijicʉi yávaiyede põecʉbenoi

(Mt 4.17, 7.19, 12.34, 23.33; Mr 1.1-8, 15; Lc 3.1-9, 15-17; Jn 1.19-28, 8.33)

3 Obediʉjʉa yóboi, Juan Bautista coyʉrĩ bʉ́rejameđa Jʉ̃menijicʉi yávaiyede. Judea ãmicʉrijoborõcarõ põecʉbenoi, põeva vaivʉre coyʉre curejameđa nore. 2 Yópe arĩ, coyʉrejameđa:

—Chĩori dápiarĩ mʉje ãmeina teiyede, oatʉvajarã mʉje đaiyede. Mʉje nópe đaiyede, maumena mʉjare jabotecʉyʉme Jʉ̃menijicʉ, arejameđa, coyʉyʉ náre.

3 Ñai Juan Bautista barejaquémavʉ Jʉ̃menijicʉi yávaiyede coyʉcaipõecʉ bácʉ Isaías ʉ̃i coyʉimʉ mácʉ. Javede yópe arĩ, Isaías bácʉre coyʉicõjenejaquemavʉ Jʉ̃menijicʉ Juan Bautista bacʉyʉ́rã:

Jʉ̃menijicʉre coyʉcaipõecʉ cođoboboyʉre jápiarãjarama põecʉbenoi: “Meađajarã mʉje ũmene copʉ etaburĩ maje jabocʉre, nopedeca mʉje meađaiyepe daimare ñai ʉ̃mʉ, mʉje pueđaimʉ, ʉ̃i daquiye jipocai. Que đarĩ dajocajarã mʉje ãmeina teiyede Jʉ̃menijicʉi daroimʉ macʉyʉ́ ʉ̃i daquiye jipocai, Jʉ̃menijicʉi copʉ etaquiyepe ayʉ mʉjare”, arejaquemavʉ Isaías bácʉ, coyʉyʉ Juan Bautista bacʉyʉ́rã.

4 Juan Bautista dorejameđa camello ãmicʉcʉi pođaque đaicajede ʉ̃i cuitótecaje. Aru ʉ̃i jãrióicãva máre ãimacajeque đaicãva marejávʉ̃ya. Ʉ̃ ãre curejameđa mujuñuvare aru mumicorore máre, yópe apevʉ nócavʉ cʉve cʉvabevʉpe. 5 Obedivʉ põeva, Jerusalén ãmicʉriĩmarocavʉ, Judea ãmicʉrijoborõcavʉ, aru Jordán ãmicʉriya jia ẽcarʉacavʉ máre jápiarãnʉrejaimađa Juan Bautista yebai. 6 Aru jiai, Jordán ãmicʉriyai, na coapa “Ãmecʉbu yʉ” ne arĩburu yóboi Jʉ̃menijicʉre, ne chĩori dápiaiye boje ne ãmeina teiyede, jã́đovarejameđa Jʉ̃menijicʉque.

7 Obedivʉ judíovai jabova, fariseo ãmicʉriyajubocavʉ aru saduceo ãmicʉriyajubocavʉ máre, jã́đovaranʉrejaimađa Jʉ̃menijicʉque jiai. Ʉbenita na eaivʉre jã́ri, yópe arejameđa Juan Bautista:

—¡Mʉja jʉjovaivʉbu, mʉje đaiye boje mearape! ¡Aru ãđavape paivʉbu mʉja, mʉje ãmeđaiye boje apevʉre! Jʉ̃menijicʉi jorojĩquijãravʉ eaiyede, jãve dupini bʉojabenamu mʉja. 8 Ðajarã mʉja yópe põeva chĩoivʉ ne ãmeina teiyede, oatʉvaivʉ ne đaiyepe. 9 Yópe arĩ, “Majeñecu Abraham mácʉ meacʉ barejaquémavʉ. Jʉ̃menijicʉ yóvarejaquemavʉ ʉ̃ mácʉre. Que baru meara bajutamu maja Jʉ̃menijicʉi jã́inore. Aru ʉ̃i jorojĩquinore dupini bʉojarãjaramu maja”, arĩ dápiabejarã mʉja. Jãve coyʉyʉbu mʉjare: Mʉja oatʉvabevʉ baru, Jʉ̃menijicʉi jorojĩquijãravʉ eaiyede dupini bʉojabenamu mʉja. Jápiajarã. Jʉ̃menijicʉ ʉcʉ baru, bʉojaibi oatʉvayʉ iboá cʉ̃raboare Abraham mácʉi pãramena márajivʉre đacʉyʉ, ne đarãjiyepe ayʉ yópe ʉ̃i ʉrõpe. 10 Yópe jiore memeipõecʉ ʉ̃i jã́iyede jocʉcʉa jẽidʉa mearʉa cʉbecʉre ʉ̃i jioi, ʉ̃i jarʉvajʉroepe dicʉáre toaboi, nopedeca Jʉ̃menijicʉ jã́ñʉ mʉjare mearo đabevʉre, jarʉvacʉyʉme mʉjare toabo cũiméboi.

11 ’Yʉ jãve mʉjare jã́đovaivʉ Jʉ̃menijicʉre ocoque, mʉje chĩori dápiaiye boje mʉje ãmeina teiyede. Ʉbenita dacʉyʉme ji yóboi cũinácʉ, ji pʉeno parʉcʉ. Ʉ̃ macʉyʉ́me jã́đovañʉ mʉjare Jʉ̃menijicʉque Espíritu Santoque, ʉ̃i cʉquiyepe ayʉ mʉjaque aru ʉ̃i cađatequiyepe ayʉ mʉjare máre. Aru ʉ̃ macʉyʉ́me jã́đovañʉ mʉjare Jʉ̃menijicʉque toaque máre, mʉje meara tenajiyepe ayʉ yópe põeva ne meađaiyepe tãure toaque, aru ʉ̃i ñájine đaquiyepe ayʉ mʉjare, meara tebedu. Que baru caivʉ pʉeno meacʉ bajube ʉ̃. Yʉ́capũravʉ pare ʉ̃i cãchinocacʉbu. Que baru ʉ̃́re cađateni bʉojabevʉ yʉ. Pʉ oarĩ bʉojabevʉ yʉ nʉvacayʉ ʉ̃́re ʉ̃i cʉraidoare. 12 Yópe oteiye memeipõecʉ ʉ̃i veoiyepe jaraboque, oteiyede epecʉyʉ ʉ̃i epeiñami, aru oteiye cajeáre juacʉyʉ, nopedeca Jʉ̃menijicʉ ʉ̃́re jʉ aivʉre epecʉyʉme ʉ̃i jaboteinoi aru ʉ̃́re jʉ abevʉre jarʉvacʉyʉme toabo cũiméboi, arĩ buedejameđa Juan Bautista.

Juan Bautista ʉ̃i jã́đovaino Jesúre Jʉ̃menijicʉque

(Mt 12.18, 17.5; Mr 1.9-11; Lc 3.21-22, 9.35)

13 Dinʉmʉre Jesús nʉrejameđa, etacʉyʉ Galilea ãmicʉrijoborõre jocarĩ, pʉ Juan Bautista yebaita, Jordán ãmicʉriya jiai, ʉ̃i jã́đovaquiyepe ayʉ ʉ̃́re Jʉ̃menijicʉque. 14 Juan Bautistacapũravʉ ʉ̃́re jã́đovaiyʉbedejameđa. Que baru arejameđa Jesúre:

—Yʉre jaʉvʉ mi jã́đovaino ocoi Jʉ̃menijicʉque, ji ãmeina teiye boje. Mʉrecabu meacʉ baju. Que baru mʉre jaʉbevʉ ji jã́đovaino ocoi Jʉ̃menijicʉque, arejameđa Jesúre Juan Bautista.

15 Ʉbenita Jesúcapũravʉ arejameđa:

—Yópe Jʉ̃menijicʉi đaicõjeiyepe đaiye jaʉvʉ majare. Que baru mʉre jaʉvʉ mi jã́đovaino yʉre ocoi Jʉ̃menijicʉque, arejameđa ʉ̃́re Jesús.

Que baru Juan Bautista jã́đovarejameđa Jesúre Jʉ̃menijicʉque no jiai. 16 Ʉ̃i jã́đovariburu yójĩboi, maumena marejameđa Jesús jiare jocarĩ. Dinʉmʉmiareca vorĩ nʉrejavʉ̃ya cavarõ mearo Jʉ̃menijicʉi cʉrõ. Aru Jʉ̃menijicʉi Espíritu jurecope ẽmeni tubacodađore ʉ̃i pʉenora jã́rejameđa Jesús. 17 Aru ina cʉrivʉ noi jápiarejaimađa apeno yávainore, cavarõ mearo Jʉ̃menijicʉi cʉrõque aiyede yópe: “Ñainecabe jímacʉ, ji ʉmʉ. Me torojʉvʉ yʉ ʉ̃́re”, arejameđa Jesúre Jʉ̃menijicʉ.