2 Timoteo

4 Caride majepacʉ Jʉ̃menijicʉ, maje jabocʉ Jesucristomaque, jápiaibi iye ji coyʉiyede mʉre. Jesucristo copaidacʉyʉme ijãravʉi. Ñájine đacʉyʉme põeva apʉrivʉre aru yaivʉ bácavʉre máre, ne ãmeina teiye boje. Aru jabotecʉyʉme caivʉ põevare. Que baru parʉrõreca đaicõjeivʉ yʉ mʉre yópe ji coyʉiyepe. 2 Coyʉjacʉ Jesús ʉ̃i yávaiye méne põevare. Me jã́ri coreni buejacʉ náre cainʉmʉa, ne jápiaiyʉru aru ne jápiaiyʉbedu máre. Coyʉjacʉ mʉ põevare aipe ne ãmeina teiyede. Aru dajocaicõjejacʉ náre diede. Buejacʉ aipe đaiye jaʉrõre náre máre. Aru buejacʉ napiyeque. 3 Eaquiyebu apejãravʉa ãmejãravʉa. Ãnijãravʉa baquiyéde põeva jápiabenajarama bueiye méne. Quénora ne baju ʉrõpe vorãjarama obedivʉ bueipõevare, ne buenajiyepe aivʉ náre yópe ne baju jápiaiyʉepe, ne đarãjiyepe aivʉ ãmeina teiyede yópe ne baju ʉrõpe. 4 Que teni jápiabenajarama iye bueiyede jãvene. Ʉbenita jápiarãjarama néñecuva mácavʉi coyʉiye báquede. 5 Aru parʉrõreca đaicõjeivʉ yʉ mʉre cojedeca. Mʉ́capũravʉ đaicõjejacʉ me mi baju, coreóvayʉpe cainʉmʉa. Napijacʉ mi ñájiyede. Aru coyʉjacʉ Jesús ʉ̃i yávaiye méne põevare máre. Que teni mi memecaiyede maje jabocʉ Jesucristore đajacʉ caiyede yópe mʉre đaiye jaʉrõpe.

6 Aru yʉ́capũravʉ joabejĩnotamu ji yaiquíno. Maumena yʉre boarĩ́ jarʉvarãjarama, ji memecaiye boje Jesucristore. 7 Iye Jesús ʉ̃i yávaiye méne coyʉiyede coyʉivʉ yʉ oabecʉvacari. Que teni đaivʉ yʉ yópe ñai cúyayʉ apevʉque ʉ̃i cúyaiyepe oabecʉvacari. Aru iye Jʉ̃menijicʉi ʉrõpe đaiyede đaivʉ yʉ oabecʉvacari. Que baru bʉojaivʉ yʉ yópe ñai cúyayʉ apevʉque ʉ̃i cúyarĩ bʉojaiyepe tʉrʉvaita. Aru iye maje jʉ aiyede Jesucristore dajocabevʉ yʉ. Quénora jʉ aivʉ yʉ ʉ̃́re cainʉmʉa. 8 Que baru yópe ñai cúyayʉ ʉ̃i jacopʉiyepedeca ʉ̃i cúyaiye bojede eayʉ apevʉ jipocai, yʉre máre jícʉyʉme maje jabocʉ Jesucristo ʉ̃i daquijãravʉ baquinóre, ji mearo đaiye báque boje. Aru yʉ cũinácʉra ãmevʉ, quénora jícʉyʉme caivʉ ina ʉ̃́re ʉrivʉ napini coreivʉre ʉ̃i daquijãravʉ baquinóre.

Pablo ʉ̃i đaicõjeino Timoteore

(Hch 12.12, 25, 13.13, 15.37-39, 20.4, 6; Ro 2.6; 2 Co 8.23; Gá 2.3; Ef 6.21-22; Col 4.7-8, 10, 14; Tit 1.4, 10; Flm 24)

9 Caride meatejacʉ, jã́cʉdacʉyʉ maumena ji yebai. 10 Ãñʉ Demas dajocame yʉre ʉ̃i ʉe boje ijãravʉquede aru nʉameđa Tesalónica ãmicʉriĩmaroi. Crescente nʉameđa Galacia ãmicʉrijoborõi. Aru Tito máre nʉameđa Dalmacia ãmicʉrijoborõi. 11 Ñai Lucas quécʉrabe cʉcʉ yʉ́que caride. Vorĩ davajacʉ mʉ́que Marcore, ʉ̃i coreóvaiye boje cađateiyede ji memeinore. 12 Jarocacʉ yʉ Tíquicore Éfeso ãmicʉriĩmaroi. 13 Mʉ dayʉ, davacajacʉ yʉre ji pʉenocacaje cuitótecajede, ji dajocaino mácarõre Troas ãmicʉriĩmaroi, Carpoi cʉ̃rami. Aru davacajacʉ ji paperatucuboare aru ji toivaiyocare máre. Ʉvʉ yʉ iye toivaiyocare pʉeno baju.

14 Ñai Alejandro, tãure memeipõecʉ, đarejame ʉrarõ ãmeno yʉre. Maje jabocʉ Jesucristo ñájine đacʉyʉme ʉ̃́re ʉ̃i nópe đaiye báque boje. 15 Que teni mʉ́vacari máre me jã́jacʉ ʉ̃́re, ʉ̃i maucʉvae boje parʉrõreca maje yávaiye méne.

16 Mamarʉmʉre ji nʉiye báquede jabova ne ãmeina teivʉre jẽniari jã́iñami, coyʉcʉyʉ ji đaiye báquede ne boro coyʉrĩ ađaiye báque boje yʉre, põecʉ cʉbeteame yóvayʉ yʉre. Quénora caivʉ dajocaima yʉre. Jẽniaivʉ Jʉ̃menijicʉque ʉ̃i ãrʉmetequiyepe ayʉ yo ne ãmeno đaino mácarõre yʉre. 17 Ʉbenita maje jabocʉ Jesucristo cađateame yʉre aru parʉre đáme yʉre, ji coyʉquiyepe ayʉ caiye iye ʉ̃i yávaiye méne. Aru cainoa joborõacavʉ nore cʉrivʉ bácavʉ jápiaima diede. Que teni maje jabocʉ Jesucristo meađame yʉre ʉrarõ ãmenore jarʉvarĩ, yópe jẽni ĩ́yepe põecʉre yavide jocarĩ. 18 Que baru jãve coreóvaivʉ yʉ maje jabocʉ Jesucristo meađacʉyʉre yʉre cainʉmʉa. Aru cʉre đacʉyʉme yʉre ʉ̃i meađaimʉpe ʉ̃i jaboteinʉmʉre cavarõ mearo ʉ̃i cʉrõi. Que baru mearore jínajarevʉ ʉ̃́reca cainʉmʉa, jã́đovarajivʉ ʉ̃́re meacʉ bajure. Quédecabu.

Pablo ʉ̃i meaicõjeino Timoteojãre

(Hch 18.2, 18, 19.22, 20.4, 21, 29; Ro 16.23; 2 Ti 1.16-17)

19 Meajarari Prisca, aru Aquila, aru caivʉ ina Onesíforo ʉ̃i cʉ̃ramicavʉ máre. 20 Ñai Erasto mauteameđa Corinto ãmicʉriĩmaroi. Aru ñai Trófimo ijimʉre dajocacacʉ Mileto ãmicʉriĩmaroi. 21 Me đarĩ jã́jacʉ, dacʉyʉ ji yebai ʉracoro jipocamia. Eubulo, Pudente, Lino, Claudia, aru caivʉ apevʉ Jesúre jʉ aipõeva meaicõjeđama mʉre.

22 Maje jabocʉ Jesucristovacari cʉjacʉrĩ mʉ́que. Aru Jʉ̃menijicʉ mearo đacajacʉrĩ caivʉ mʉjare bojecʉbeda ʉ̃i me boje. Quénoramu.