ХУПЛАШКА ҪИНЧИ ТЕМА | МӖНШӖН ТӲРӖ ПУРӐНМАЛЛА?

Мӗнле майпа тӳрӗмарлӑх сирӗн ҫине витӗм кӳрет

«Пурнӑҫра йывӑрлӑхсем яланах пулаҫҫӗ, вӗсене татса памашкӑн кӑштах суйма тивет» (Саманта, Кӑнтӑр Африка Республики).

Эсир ҫакӑнпа килӗшетӗр-и? Саманта пурнӑҫӗнчи пекех, пирӗн пурнӑҫра та йывӑр самантсем пулкалаҫҫӗ. Лару-тӑру пире суйма-улталама хистенӗ чухне эпир хамӑра мӗнле тытни пурнӑҫра пирӗншӗн мӗн хаклӑ пулнине кӑтартса парать. Сӑмахран, ята ярас мар тесе эпир тем тума та хатӗр пулсан, тӳрӗмарлӑх пирӗншӗн ҫав тӗллеве пурнӑҫа кӗртмелли тепӗр май ҫеҫ пулса тӑнӑ пулӗччӗ. Анчах та суяна тӑрӑ шыв ҫине кӑларсан, ҫакӑ пирӗншӗн питӗ хакла ларӗ.

ТӲРӖМАРЛӐХА ПУЛА ПӖР-ПӖРНЕ ШАНМА ПӐРАХАҪҪӖ

Пӗр-пӗрне шанмасӑр ҫынсем хушшинче лайӑх хутшӑнусем пулма пултараймаҫҫӗ. Икӗ ҫын пӗр-пӗрне шаннӑ чухне вӗсем хӑйсене шанчӑклӑ хӳтлӗхре пулнӑ пек туяҫҫӗ. Анчах та пӗр-пӗрне шанасси вӑл пӗр самантра пуҫланса каймасть. Ҫынсем вӑхӑта пӗрле ирттереҫҫӗ, пӗр-пӗрне тӗрӗссине калаҫҫӗ тата пӗр-пӗриншӗн чунтан тӑрӑшаҫҫӗ пулсан, вӗсем пӗр-пӗрне ытларах та ытларах шанма пуҫлаҫҫӗ. Анчах та пӗр тӳрӗ мар ӗҫ ҫавна пурне те пӗтерсе хума пултарать. Шанӑҫран тухсан, каллех шанӑҫа тивӗҫлӗ пулма йывӑр пулӗ.

Сире хӑҫан та пулин эсир ҫывӑх тус тесе шутланӑ ҫын улталанӑ-и? Улталанӑ пулсан, эсир ун чухне хӑвӑра мӗнле туйнӑ? Паллах ӗнтӗ, ҫакӑ сирӗн чуна ыраттарнӑ, вӑл сирӗнпе сутӑнчӑкла хӑтланнӑ пек туйӑннӑ сире. Сирӗн туйӑмсене ӑнланма пулать. Чӑнах та, тӳрӗмарлӑха пула ҫынсем пӗр-пӗрне шанма пӑрахаҫҫӗ, ҫакӑ вара вӗсем хушшинчи туслӑха аркатма пултарать.

ТӲРӖМАРЛӐХРАН ТӲРӖМАРЛӐХ ҪУРАЛАТЬ

Роберт Иннес, Калифорни университетӗнчи экономика профессорӗ, тунӑ тӗпчев ӗҫӗ «тӳрӗмарлӑх ерекен чир евӗрлӗ» пулнине кӑтартса панӑ. Тӳрӗмарлӑха вируспа танлаштарма пулать: ҫын суеҫӗсемпе мӗн чухлӗ нумайрах хутшӑнать, ӑна тӳрӗмарлӑх «чирӗ ерес» хӑрушлӑх ҫавӑн чухлӗ пысӑкрах пулӗ.

Тӳрӗмарлӑх пире ан ертӗр тесе эпир мӗн тума пултаратпӑр? Ҫав тӗлӗшрен пире Библи пулӑшма пултарать. Айтӑр Библири хӑш-пӗр принципсене пӑхса тухар.

Тӳрӗмарлӑхӑн тӗрлӗ енӗсем

Суя

МӖН ВӐЛ? Камӑн тӗрӗссине пӗлме ирӗк пур, ҫавна тӗрӗс маррине калани. Суя шутне ҫаксем кӗреҫҫӗ: кама та пулин пӑтраштарса ярас тесе фактсене пӑсса калани, ыттисене улталас тесе кирлӗ хыпара пӗлтерменни тата ыттисем умӗнче лайӑх курӑнас тесе ӳстерсе калани.

БИБЛИ МӖН КАЛАТЬ. «Ҫӳлхуҫа аскӑнчӑк [«чее», ҪТ] ҫынран йӗрӗнет, Вӑл тӳрӗ ҫынсемпе хутшӑнать» (Ытарӑшсем 3:32). «Пурсӑр та суяна пӑрахса хӑвӑра ҫывӑх ҫынна чӑннине калӑр» (Эфес 4:25).

Элек

МӖН ВӐЛ? Камӑн та пулин ятне варалас тесе ун ҫинчен сӗмсӗр суя сарни.

БИБЛИ МӖН КАЛАТЬ. «Ултавлӑ ҫын харкаштарса ярать, элек саракан — туссене уйӑрать» (Ытарӑшсем 16:28). «Вутӑ ҫук ҫӗрте кӑвар сӳнет, элекҫӗ ҫук ҫӗрте хирӗҫӳ лӑпланать» (Ытарӑшсем 26:20).

Ултавлӑ ӗҫ

МӖН ВӐЛ? Ҫынсен укҫине е пурлӑхне улталаса ярса илни.

БИБЛИ МӖН КАЛАТЬ. «Тара тытнӑ ҫынна, нуша курса чухӑн пурӑнаканскере, ан ултала» (Саккуна астутарни 24:14, 15, ҪТ). «Нуша куракана улталакан ӑна Пултаракана хурлать, чухӑна хӗрхенекен Ӑна мухтава кӑларать» (Ытарӑшсем 14:31, ҪТ).

Вӑрласси

МӖН ВӐЛ? Ҫыннӑн япалине ыйтмасӑр илни.

БИБЛИ МӖН КАЛАТЬ. «Вӑрласа пурӑннӑскерӗ малашне ан вӑрлатӑр, ҫитменнипе асапланакана памалӑх та пултӑр тесе, аллипе усӑллӑ ӗҫ тума тӑрӑштӑр» (Эфес 4:28). «Ан улталанӑр... вӑрӑсем те, сӑптӑрҫӑсем те, ӗҫке ернисем те, элекҫӗсем те, ҫаратакансем те Турӑ Патшалӑхне кӗреймӗҫ» (1 Коринф 6:9, 10).