Ырӑ хыпар сарас ӑсталӑха лайӑхлататпӑр. Чӑнлӑхпа интересленекен ҫынсем ҫинчен мӗн-мӗн ҫырса пымалла

«Хӑвна ху та, мӗн вӗрентнине те асӑрхаса тӑр» (1 Тим. 4:16). Павел Тимофее Турӑ хавхалантарнипе панӑ канашран пирӗн, евангели хыпарҫисен, ырӑ хыпара тахҫанах е халӗ кӑна сарма пуҫланине пӑхмасӑрах, лайӑхланса пымалли курӑнать. Ҫакна тума пире «Пирӗн сӑваплӑ ӗҫ» хутӗнчи «Ырӑ хыпар сарас ӑсталӑха лайӑхлататпӑр» ятлӑ ҫӗнӗ рубрика пулӑшӗ. Ҫак рубрикӑри кашни статьяра сӑваплӑ ӗҫре питӗ кирлӗ ҫӗнӗ ӑсталӑх ҫинчен сӳтсе явӗҫ тата унта ҫав ӑсталӑха мӗнле лайӑхлатмалли пирки канашсем те пулӗҫ. Уйӑх тӑршшӗпе пурне те ку е вӑл пултарулӑха лайӑхлатма хавхалантарӗҫ. Уйӑх вӗҫӗнче сӑваплӑ ӗҫӗн тӗлпулӑвӗнче ятарлӑ пункт пулать, ун чухне эпир хамӑр тунӑ ҫитӗнӳсем ҫинчен каласа пама пултаратпӑр. Ҫак уйӑхра эпир чӑнлӑхпа интересленме пуҫланӑ ҫынсем ҫинчен мӗн-мӗн ҫырса пымаллине вӗренӗпӗр.

Мӗншӗн ҫакӑ питӗ кирлӗ. Хамӑра хушнӑ ӗҫе пурнӑҫлас тесен пирӗн ырӑ хыпар сарса ҫӳренинчен те ытларах тумалла. Чӑнлӑхпа интересленнине кӑтартнӑ ҫынсем патне тепӗр хут каймалла тата акса хӑварнӑ чӑнлӑхӑн вӑрлӑхне шӑварса вӗсене вӗрентмелле (Матф. 28:19, 20; 1 Кор. 3:6—9). Ҫакӑ пирӗн ҫынпа тепӗр хут тӗл пулса ӑна хумхантаракан темӑна сӳтсе явмаллине тата унӑн интересне аталантармаллине пӗлтерет. Ҫавӑнпа чӑнлӑх ҫинчен лайӑх итлекен ҫынна тӗл пулсан ун ҫинчен ҫырса хуни питӗ кирлӗ.