Иисус патне астрологсем килеҫҫӗ

Хӗвелтухӑҫ енчен ҫӑлтӑрҫӑсем, е астрологсем, килеҫҫӗ. Вӗсем ҫӑлтӑрсем тӳпере ӑҫта тӑнине тӗпчеҫҫӗ тата ҫавӑн тӑрӑх этем пурнӑҫӗнчи событисен пӗлтерӗшне ӑнлантарса пама пулать теҫҫӗ (Исаия 47:13). Хӑйсем патӗнче хӗвелтухӑҫра вӗсем «ҫӑлтӑр» курнӑ та ун хыҫҫӑн ҫӗр-ҫӗр ҫухрӑм утнӑ. Ҫав «ҫӑлтӑр» вӗсене Вифлеема мар, Иерусалима илсе ҫитернӗ.

Иерусалима ҫитсен астрологсем ыйтаҫҫӗ: «Иудейсен халӗ ҫуралнӑ Патши ӑҫта? эпир тухӑҫ енче Унӑн ҫӑлтӑрӗ тухнине куртӑмӑр та Ӑна пуҫҫапма килтӗмӗр» (Матфей 2:1, 2).

Ҫакӑн ҫинчен Иерусалимра патшара ларакан Ирод илтет, ҫакӑ ӑна аптратса ӳкерет. Вӑл аслӑ священниксемпе иудейсен ытти тӗн пуҫлӑхӗсене чӗнет те Христос ӑҫта ҫураласси пирки ыйтать. Сӑваплӑ Ҫыру тӑрӑх вӗсем Вифлеемре тесе хуравлаҫҫӗ (Матфей 2:5; Михей 5:2). Вара Ирод хӑйӗн патне астрологсене вӑрттӑн илсе килме хушать те вӗсене калать: «Кайӑр та Ача ҫинчен тӗплӗн тӗпчесе пӗлӗр; Ӑна тупсан мана хыпар тӑвӑр, эпӗ те кайса пуҫҫапам Ӑна» (Матфей 2:8). Анчах та, тӗрӗссипе каласан, Ирод ачана шыраса тупса вӗлересшӗн!

Астрологсем ҫула тухсан тӗлӗнмелле ӗҫ пулса иртет: хӗвелтухӑҫра курнӑ «ҫӑлтӑр» вӗсен умӗнче пырать. Паллах ӗнтӗ, ҫакӑ ахаль ҫӑлтӑр мар, мӗншӗн тесен ӑна вӗсене ҫул кӑтартма янӑ. Астрологсем ҫав ҫӑлтӑр Иосиф, Мария тата вӗсен ывӑлӗ пурӑнакан ҫурт тӗлӗнче чарӑнса тӑриччен ун хыҫҫӑн пыраҫҫӗ.

Астрологсем пӳрте кӗрсен Марийӑна пӗчӗк Иисуспа кураҫҫӗ. Вӗсем Иисуса пуҫҫапаҫҫӗ те ӑна ылтӑн, латӑн тата смирна парнелеҫҫӗ. Каярахпа, Ирод патне таврӑнма шутланӑ чухне, вӗсене тӗлӗкре Турӑ ҫавна ан тӑвӑр тесе асӑрхаттарать. Ҫавӑнпа вӗсем хӑйсен ҫӗршывне урӑх ҫулпа каяҫҫӗ.

Сирӗн шутпа, астрологсене ҫул кӑтартма ҫав «ҫӑлтӑра» кам янӑ? Вӑл вӗсене тӳрех Иисус патне Вифлеема илсе килменнине аса илӗр-ха. Ун вырӑнне вӑл вӗсене Иерусалима, Иисуса вӗлересшӗн пулнӑ Ирод патне, илсе пынӑ. Астрологсене Иисус ӑҫта пулнине Ирода калама хушман Турӑ хута кӗмен пулсан, вӑл ҫавна тунӑ пулӗччӗ. Апла пулсан, ҫакӑ Туррӑн тӑшманӗ, Иисуса вӗлерме шут тытнӑ Сатана пулнӑ, вӑл вара хӑйӗн тӗллевне пурнӑҫа кӗртес тесе ҫав «ҫӑлтӑрпа» усӑ курнӑ.