ˈWɔn ˈˈgbɩɩ˗ ˗yaaga ˗blɛɛsü ˗nu

˗Wo ˈˈgbɩɩdhɛ ˗wɔ Izraɛdhömɛn ˗nu ˗ta kö ˗wo yökë ꞊dhɛ ꞊dhuëŋ ˗nu ˈdhö. Zoova ˗yö Moizö waa Aadhɔn ˗an ˗bɔ Fadhaɔn ˈˈpiʋ̈ kö ˗wa pö ˗a ˗dhɛ: ‹˗Bhö ü ꞊kwaa n man ˈˈsɛgümɛn ˗nu ˗zü kö ˗wo ˈdho ˗wo n ˗dhɔkë ˈˈyɛɛtadhɛ ˈgü.› Fadhaɔn ˗ya ˗yɔ ˗bɔ ˗desüva ˈka ˈö˗ pö: ‹N ˈti ˈdho n ꞊kwaa ˗an ˗zü kö ˗wo ˈdho.› ˈYö Fadhaɔn ˗yö ˗an ˗bha yö ˗dadhiʋ̈ ˈzü. ˈˈKɛɛ Zoova ˗dho ˈwɔn bho Fadhaɔn ˈgü. ˗Kɔ ˈö˗ ˗kë ˗a ˈka, ü˗ ˗dɔ ˗ee? ˗Yö ˗nu ˈwɔn ˈˈgbɩɩ˗ ˗kɔŋ do ˈka Ezitö ˗mɛn ˗nu ˗ta. Zoova ˗ya ˗pö Moizö ˗dhɛ: ‹Fadhaɔn ˈyaa˗ ˈˈpiʋ̈ kö ˈö ö ˈˈtʋ ˈto n ˗bha. Dhiʋ̈ˈˈ dhiapiʋ̈, ˗yö ˗dho kë Nilö ˈˈkpɔnŋ ˈˈdhiʋ̈. ˗Bhö ˈdho kö ˈü˗ pö ˗a ˗dhɛ, ˈdhɛ ˗kë ꞊dhɛ yö ˈti ö ꞊kwaa n man ˈˈsɛgümɛn ˗nu ˗zü kö ˗wo ˈdho bhë, Nilö ˈˈyi ˗dho ˗kë ꞊ɲɔɔn ˈka. Moizö ˗yö ˈwɔn ˗man Zoova ˗ta ˈö dho Fadhaɔn ˈˈpiʋ̈. Fadhaɔn ˗yö ˗kpan Aadhɔn ˗bha kö ˗yö Nilö ˗man ˗ni ˈgü ö ˗bha ˈˈdhü ˈˈkpla ˈka, ˈö Nilö ˗kë ꞊ɲɔɔn ˈka. ˈYuö˗ ˗nu ˗wo ˗ya ga ˗sü ˗bha, ˈö Nilö ˈˈtëë ˗yö ˗ya dɔ ˗sü ˗bha yaa ˈka. ˗A ˗wɔn ˈgü mɛn ˗nu ˈwaa kun ꞊mɔɔn ˗ni ˈgü ˗a ˗bha ˈzü kö ˗wa mü. ˈˈKɛɛ Fadhaɔn yö ˈti ö ꞊kwaa Izraɛdhömɛn ˗nu ˗zü kö ˗wo ˈdho.

ˈDhɛ ˗dhɛkpaɔyi ˈˈsɔɔplɛ ˗yö ˗ʒiö, ˈö Zoova ˗yö Moizö bɔ kö ˗ya pö Fadhaɔn ˗dhɛ: ‹˗Ya kë ꞊dhɛ ü ˈti ü ꞊kwaa n man ˈˈsɛgümɛn ˗nu ˗zü kö ˗wo ˈdho, a ˗dho ˗a kë ˈö Ezitö ˗sɛ ˗yö pa ˈˈdrɔɔ ˗nu ˈka. ˈYö Aadhɔn ˗yö ö ˗bha ˈˈdhü ˈˈkpla ˗luu ˈö ˈˈdrɔɔ ˗nu ˈwo ˗ya ˈsɔ ˗sü ˗bha Ezitö. ˈˈDrɔɔ ˗nu ˗wo ˗da ˗an ˗bha ˈkɔdhi, ˗an ˗bha pë ˗kpa ˗a ˈgü pë ˗nu waa ˗an wɔdhɛ ˗nu ˈgü. ˈˈDrɔɔ ˗nu ˗kun ˗dhɛ ꞊gban ˈˈpɛpɛ ˈgü. ˈYö Fadhaɔn ˗ya pö Moizö ˗dhɛ ˗yö bhɛɛˈˈ Zoova ˗dhɛ kö ˗yö ˈwɔn ˈˈgbɩɩ˗ bhë˗ ˈduannu kö ˈö ö ꞊kwaa Izraɛdhömɛn ˗nu ˗zü ˈwo ˈdho. ˈYö Zoova ˗yö ˈwɔn ˈˈgbɩɩ˗ ˈö bhë ˗a ˈduannu. Ezitömɛn ˗nu ˗wo ˈˈdrɔɔ ꞊gee ˗nu ˈwo bhë ˗an ˗lo ˈko ˗ta, ˈyö ˗an ꞊druun ˗kë ꞊va ꞊dedewo Ezitö ˗sɛ ˈgü. ˗An ꞊fii ˗kun ˈya˗.

Zoova ˗ya ˗pö ˈzü Moizö ˗dhɛ: ‹Aadhɔn dua ˗mü kö ˗yö ö ˗bha ˈˈdhü man ˈˈshia˗ kö ˗bobi ˗nu ˗wo kë ˈˈzɛnŋpë ˗nu ˈka.› ˗Wo ˗to ˗dhɛ do bhë ˗a ˈgü ˈö ˈˈzɛnŋpë ˗nu ˗wo sɔ Ezitö ˗dhɛ ꞊gban ˈˈpɛpɛ ˈgü. ˈYö Ezitömɛn ˗nu ˗wa pö Fadhaɔn ˗dhɛ: ‹ˈWɔn ˈˈgbɩɩ˗ ˈö yö, ˗Zlan ˈnën nu˗ ˈka.› ˈˈKɛɛ Fadhaɔn ˈyaa kun ˗a ˈˈpiʋ̈ ꞊dhɛ ˈö ö ꞊kwaa Izraɛdhömɛn ˗nu ˗zü kö ˗wo ˈdho.