ˈWɔn ˈˈgbɩɩ˗ ˗kɔŋ do ˗naan

Moizö ˗ya ˗pö Fadhaɔn ˗dhɛ ꞊dhɛ yö ˈti dho dɔ ˗a ˗kuu ˈˈdhiʋ̈ ˈzü. ˈˈKɛɛ ˈˈsanni ˗yö ʒiö, ˗ya ˗pö Fadhaɔn ˗dhɛ: ‹Gbeŋ ꞊zinŋgü, ˈnën ˗blɛɛsü ˗nu ꞊gban ˈwo Ezitö, ˈö sü Fadhaɔn gbö ꞊blɛɛsü ˗bha ˈö dho ˈö yö˗ ˈka ˗a ˗bha ꞊dhuëŋ gbö ˗blɛɛsü ˗nu ˗bha, ˗an ꞊gban ˗dho ga.›

Zoova ˗ya ˗pö Izraɛdhömɛn ˗nu ˗dhɛ ˗wo ˗bhöpë ˈbha ˈö ö ˗de ˗ta ˗a ˗bhö. ˗Ya ˗pö ˗an ˗dhɛ: ‹˗Ka ˈˈbhlaa ɛɛnˈˈ ˗bho ˈö˗ ˗kwɛ ˈdho do ˗a zë kö ˈkaa˗ ꞊ɲɔɔn ˈbha ˈsü ˈka˗ ʒiö ka ˗bha ˈˈkwee ˗nu ˗bha. ˗Kaa ˗pia kö ˗a ˗wü ˈö bhë ˈka˗ ˗bhö ˈbluu˗ ˈö ˈˈsɛkɛ ˈyaa˗ ˈˈpiʋ̈ ˗a ˈka. ˗Ka kë baaˈˈ ˗sü ˈka kö ˈka ka ˗bha ˗sabha yö ka ˗gɛn ˗bha ꞊dhɛ mɛn ˗nu ˈö woo ˈdho ˈˈta ˈgü, ˗an ˈdhö. A ˗dho ka bho ˈˈgan ˈgü gbeŋ do ˈö yö ˗a ˈgü. Zuʋ̈gblüdhi ˈö kun ˗an ˗gɔ bhë, ˗bhö ü ˗zota ˗a ˈgü!

Gbeŋ ꞊zinŋgü, Zoova ˗bha ˈˈkië ˗yö ˗bɔ ˈkɔ ˗nu ˈwo kun Ezitö ˗an ˈgü. ˈKɔ ˗nu ˈö ꞊ɲɔɔn ˈti kë ˗an ˈˈkwee ˗bha, ˈnën ˗blɛɛsü ˗nu ˈwo kun ˗an ˈgü ˗an ꞊gban ˈˈpɛpɛ ˗wo ˗ga. ˈKɔdhi ˈˈpɛpɛ ˈwo kun Ezitö, ˗yö ˗kë ˗a ꞊nɔɔnmɛn ɛɛnˈˈ ˈˈflɛɛmɛn ˗bha ˈka oo, ˗an ꞊gban ˗bha ˈnën ˗nu ˗wo ˗ga. ˈˈKɛɛ Izraɛdhömɛn ˗nu ˗bha ˈnën ˗blɛɛsü ˗nu ˗wo ˗dha.

Fadhaɔn ˗de ga gbö ˗yö ˗ga. ˈWɔn ˈˈgbɩɩ˗ ˗nu ˈwo ˈˈdhʋ̈, Fadhaɔn ˗kɔ ˈti ꞊mɔn ˗an bun ˗sü ˗bha. ˈYö Moizö waa Aadhɔn ˗an ˗dhɛ ˈö˗ pö: ‹˗Ka luuˈˈ ˈka ʒiö. ˗Ka ˈdho ˈka ka ˗bha ˗Zlan ˗dhɔkë. ˗Ka ka ˗bha ˗tuëë ˗nu ˈsü ˈka ʒiö!›

Gbeŋ, kö ˈˈsu ˗yö ˈbhü ˗ni ˈgü, Izraɛdhömɛn ˗nu ˗bha ˈkɔdhi waa ˈˈkwɛɛnŋdhɛ ˗dhɛ ˈö ˈdhö ˗wo ˗ya ˈgo ˗sü ˗bha Ezitö ˗sɛ ˈgü. Gɔɔn˗ ˗nu ˈwo kun mü, ˗wo ˗kun ꞊mɔɔn ˗ni ˈgü mɛn 600.000 ˗bha, ˈyö dhoo ˗nu waa ˈnën ˗nu ꞊va ˗wo ˗kun ˗an ꞊kee˗. Mɛn ˈˈwɛɛ ˈbha ˗nu ˗wo ˗ʒiö ˗an ꞊kee˗ kö ˈwo Zoova ˗dhɔkë wo ˈˈkwëë. Izraɛdhömɛn ˗nu ˗wa ˈgo ˈˈgan ˈgü.

˗Kwɛ ˈˈpɛpɛ ˈka, Izraɛdhömɛn ˗nu dua ˗mü kö ˗wo ˗bhöpë ˗detasü ˈö ˗an ˗zobuö ˗kɔ ˈö Zoova ˗yö ˗an dha ˗a ˈka bhë, ˗a ˗bhö wo ˈkwëë˗. ˗Bhöpë ˈö ˈˈdhʋ̈, ˗wa ˗dhɛ Pakö ˗bhöpë.