Yɛlɛ Naaŋmen Naaloŋ Naŋ Na E Kyaare Laafeeloŋ Yɛlɛ

“Ka a COVID-19 baaloŋ sigi teŋɛ a donɛɛ lombori zaa, a ba lɛ lɔnnɔ noba yaga zaa ba wuli ka a baaloŋ gaa yɛŋ kpɛlɛŋkpɛlɛŋ.. . . Aseŋ ka te baŋ ka baaloŋ kaŋa na baŋ lɛ waŋ nendaare kaŋa a yaare ta a donɛɛ lombori zaa aŋa a COVID-19 baaloŋ, azuŋ aseŋ ka te nare te menne a kyɛnlɛ.”​—Dr. Tedros Adhanom Ghebreyesus, director-general of the World Health Organization, May 22, 2023.

A naŋ wa ta zenɛ, a COVID-19 baaloŋ vɛŋɛɛŋ ka noba yaga beɛrɛ, ka teɛroŋ gyɛre meŋ kpɛ ba mine. Ka a baaloŋ ŋa tɔŋ lɛ iri a donɛɛ poɔŋ, gɔmenantere ane laafeeloŋ tomaziiri narɛɛ ba menne a na toɔ̃ soŋ noba bee? Ba na toɔ̃ soŋ teŋ a kaa laafeeloŋ yɛlɛ na teŋ tuoro pampana na bee?

A Baabole wuli teŋ gɔmenante kaŋa naŋ na wa kaa te laafeeloŋ yɛlɛ velaa zaa. A Baabole yeleeŋ ka: “A sazu Naaŋmen na na biŋ [la] naaloŋ kaŋa,” kyɛbee gɔmenante kaŋa. (Daaniel 2:44) Saŋa na a gɔmenante ŋa naŋ na wa dire naaŋ a kaara nensaaleba zaa na, “neɛzaa koŋ yelka: ‘N beɛrɛŋ.’” (Aizeeya 33:24) Neɛzaa na taaɛ laafeeloŋ naŋ paale, a lɛ taa ba baapaaloŋ saŋa faŋa meŋ.​—Joob 33:25.