Sori Naaŋmen Naaloŋ Naŋ Na Tu A Sɛgre Te Libi-Yɛlɛ Velaa Zaa

A donɛɛ lombori zaa, a eɛ kpeɛŋaa ko noba ka ba nyɛrɛ libie a toɔ̃ de kaara ba menne velaa zaa. Bebiri la bebiri zaa, a yɛlɛ ŋa ba waana ka a seɛ.

• Yɛlɛ mine ba naŋ peɛrea a yi a donɛɛ lombori zaa aŋ ba kɔɔre wuleeŋ ka, “saŋyɔɔ na noba naŋ nyɛrɛ na eɛ fẽẽ, azuŋ ba ba toɔ̃nɔ daara boma na yɛlɛ naŋ ferɛ ba.” Noba naŋ peɛre a yɛlɛ kpãã teŋ ka, ka nobaŋ ba de gbɛre a e yelkaŋa “bondaaneba na maaleŋ nyɛrɛɛ libie yaga, kyɛ ka nandaaneba maaleŋ dire naŋ yaga zaa.” Ka lɛŋ wa e, “tontonneba ane ba booree deme koŋ lɛ taa zeŋ laafeɛ.”

Ka lɛ a gɔmenantere na baŋ sɛgrɛɛ a yelnimizeɛ ŋa bee? Ba na toɔ̃ vɛŋeŋ ka noba zemmo soma fẽẽ lɛ gba bee?

A Baabole wuli teŋ ka gɔmenante kaŋa bebeŋ a na toɔ̃ sɛgre te libi-yɛlɛ velaa zaa, ka neɛzaa taa bonzaa ka a seŋ o soba. A Baabole yeleeŋ ka, “a sazu Naaŋmen na na biŋ [la] naaloŋ kaŋa,” a gɔmenante ŋa la na kaara a teŋɛzu yɛlɛ zaa. (Daaniel 2:44) Ka a gɔmenante ŋaŋ wa dire naaŋ a kaara a teŋɛzu, ba koŋ inni kyɛbee a zagre neɛ kaŋa bare. (Yieme 9:18) Naaŋmen Naaloŋ na na ko la noba naŋ be a Naaloŋ puliŋ na bonzaa naŋ na vɛŋ ka ba taa popeɛloŋ. Neɛzaa na maŋ nyɛɛ saŋyɔɔ kpoŋ a yi o tonkpeɛne zaa poɔŋ.​—Aizeeya 65:21, 22.