Okotropa

Hnei Iehova hna nyiqaane iëne la itre keresiano hnei uati hmitrötr thupene la hna amele Iesu hmaca. Ame ekö, itre hna iën asë lo itre keresiano. Ame hë la itre macatre thupene lai, tha trongëne hë la itre keresiano la tulu i Keriso, matre tha ala nyimu hë la itre nyipi keresiano, itre hna iën hnei Iehova. Ceitui angatre me itre qitr hna qaja hnei Iesu, ka cia e nyipine la zizania. (Mat. 13:​24-​30) Ame hë ngöne la itre drai ne la pun, Iehova pala hi a iëne la itre keresiano troa hane sine la ala 144 000. Matre, e mekune hë Iehova elanyi troa iëne la keresiano qëmekene troa nyipune la fene celë, pëkö nyine tro sa qaja. (Is. 45:9; Dan. 4:​35; Rom. 9:​11, 16) Tro sa thupën matre tha tro kö sa ujë tune lo itre ka huliwa nge ka eetr, ke casi hi la aqane nyithupe i angatre memine lo itre ka traqa pi troa huliwa.​—Mat. 20:​8-​15. w16.01 4:​15

Tha Iehova kö a ajane tro së enehila a huujëne la itre nekö së. Nyidrëti pe a upi së troa drengethenge la itre wathebo i Nyidrë. Ame itre xa ijin, tha nyipi trotrohnine kö së la kepine matre loi e tro sa drengethenge itre ej, ke, jole pi hë troa trongën. ­Hapeu, celë hi lai hnei epuni hna hane mekun? Ame kowe la itre xa trejin, jole catre koi angatr troa cainöje trootro. Maine jë, itre ka lapa thaup, matre jole koi ­angatre troa ithanata kowe la itre trenyiwa. Ame itre xan, angatr a hmahmane la aqane troa goeë angatr hnene la itre sine huliwa, maine itre sine ini angatr. (Eso. 23:2; 1 Thes. 2:2) E upi së jë troa kuca la ketre ewekë ka jole pi hë koi së, mekune ju së la lapaune ka tru i Aberahama me aqane catre i nyidrë. E tro sa mekune hnyawa la aqane mele nyipici ne la itre hlue i Iehova ekö, itre trahmanyi me föe, tro lai a upi së troa nyitipu angatr, me aeasenyi së catre koi Iehova, enehmu së.​—Heb. 12:​1, 2. w16.02 1:​3, 14

Ame la Saulo a mekune troa humuthi Davita, hetre mekune ka hace nyine tro Ionathana a axeciën. Aja i angeic troa nyipici koi keme i angeic, ngo hetre aja i angeice fe troa nyipici koi Davita. Xecie hnyawa koi Ionathana laka, ce Iehova me Davita, matre mekune jë hi angeic e cili troa nyipici koi Davita. Hnei angeice hna canga thuemacanyi Davita troa kötre me zae Saulo. Nge thupene lai, angeic a ithanata me Saulo göi troa hnimi Davita. (1 Sam. 19:​1-6) Tha tro kö sa nue la ketre ewekë tune la ekip ne kuci elo, maine uma ne ini, maine ketre nöje pena troa tro pa ngöne la mele së, nge pi Iehova pë hë. Iehova kö la nyine tro sa nyipici kow. Ka tru koi Henri la troa kuci elo (jeu d’échecs) me pi mama fë la uma ne ini angeic, matre angeic a thele jëne matre tro la uma ne ini angeic a hun. Qa ngöne laka, ka elo angeic e nöjei mecixeni me sabath, haawe, pëhë ijine i angeic troa cainöje trootro me hane sine la itre icasikeu. Öni Henri, ka tru hë koi angeic troa nyipici kowe la uma ne ini hune la troa nyipici koi Iehova. Matre, mekune jë hi angeic troa hmaca e cili.​—Mat. 6:​33. w16.02 3:​10, 12

Tune la thöth, hetre aqane tro eö a amamane ka hape, qa kuhu hni eö la mekun troa xomi bapataiso, tre ene la troa waipengöne la itre thithi eö. Eö kö a thithi lapa koi Iehova? Mama cile kö la itre mekuna i eö ngöne la eö a thith? Tro la aqane sa i eö a amamane la ecatrene la aqane imelekeu i eö me Iehova. (Sal. 25:4) Nyimu ijine Iehova a sa la itre thithi së jëne la Tusi Hmitrötr. Matre, ame la ketre aqane tro eö a amamane la pengöne la imelekeu i eö me Iehova, tre, ene la troa waipengöne hnyawa la porogaram ne ini Tusi eö. (Ios. 1:8) Ketre sipu waipengöi eö jë me hape: ‘Tune kaa, eni kö a inine lapane la Tusi Hmitrötr? Eni kö a hane sine me qeje mekun ngöne la Hmi Hnepe Lapa?’ Ame la aqane sa i eö la itre hnyinge celë, tre, kolo hi lai a qajaqaja ka hape, sipu aja i eö, maine tha mekuna i eö pena la troa xomi bapataiso. w16.03 1:11, 13

Nyine haine la itre thangane la hna cainöj e cailo fen, kola mama lai ngöne la itus, Annuaire. Pane mekune jë fe la aqane casi së e cailo fen, la easa sine la itre asabele së. Ame e cili, casi hi la itre ithuemacanyi hne së hna kapa. Kola xatua së jëne la itre cainöj, me itre hna elon, me itre iamacany, troa hamëne koi Iehova la ka sisitria. Kolo fe a mama la aqane casi së me itre trejine e cailo fen, la easa sine la Drai Ne Amekunën e nöjei macatre. Ame ngöne lai drai cili, 14 Nisan thupene la kola lö la jö, easa ce icasikeu troa amamane la hni ne ole së kowe la hnei Iehova hna kuca thatraqai së. (1 Kor. 11:​23-​26) Nge ame lo itre wiik qëmekene la drai cili, easa ce huliwa troa könëne la ka ala nyimu troa hane ce sine me easë la drai cili. Thatreine kö troa cainöje kowe la nöjei atr asë hnene hi la ala cas. Ngo hnene laka itre ka ce huliwa së, ene pe, tha jole kö koi së troa qeje Iehova kowe la itre milio lao atr, me aijijë angatr troa hane atrunyi Nyidrë. w16.03 3:​4, 6, 7

Ame la kola upe la ketre trejine trahmanyi troa kuca la ketre huliwa hnene la qatre thup, loi e troa amamane la kepin e hnine la Tusi Hmitrötr matre nyipi ewekë la huliwa cili. Hanawange la ketre ceitun: Maine tro la qatre thup a upe la ketre trejine trahmanyi troa thupëne matre tro pala hi a porop la hnë lö kowe la Uma Ne Baselaia, loi e tro la qatre thup a amamane la xötre ne Tito 2:​10. Qaja jë la aqane tro la huliwa i angeic a amingömingöne la maca ne la Baselaia. Ketre, upi angeice jë fe troa mekune la itre ka qatre hë e hnine la ekalesia, memine la thangane la huliwa cili koi angatr. Tro la itre mekune celë hna ce thawakeun a ini angeic, me xatua angeic troa mekune catrëne la itre atr hune la tro hi a trongëne la itre hna amekötin. E tro angeic a goeëne la eloine la huliwa i angeic kowe la itre trejine trahmanyi me föe, tro hë angeice lai a madrine troa huliwa thatraqane la itre trejin. Ketre, the thëthëhmine kö troa qaja aloine la hna inin hnene la hna trongëne la itre ixatua hna hamën. Pine nemene matre ka nyipi ewekë troa qaja aloinyi angeic? Tune la tim kola aciane me akökötrene la feja, tro fe lai a aijijë angeic troa kökötre hnyawa ngöne la huliwa i Iehova. w15 15/4 2:​7, 8

Hane fe hë epuni melëne la ketre jol me drenge ka hape, pëkö ka atreine troa xatua epun? Tune la pë huliwa, maine ketre jole hna cile kow ngöne la hna ini, maine hna tithi epuni hnei mec, maine ketre jole pena. Maine hnei epuni hë hna sipo ixatua kowe la ketre atr, ngo tha loi kö la hni epun, ke, itria kö la ixatua i angeic memine la mekuna i epun. Ketre, hetre itre xa jole fe hna thatreine nyinyine hnei atr. Matre, nemene ju hë la hnei epuni hna troa kuca? Öni Tusi Hmitrötr ka hape, ‘mejiune ju koi Iehova.’ (Ite edomë 3:​5, 6) Ngo, xecie kö koi epuni laka tro Nyidrëti a xatua epun? Eje hi! Nyimutre la itre ceitun e hnine la Tusi Hmitrötr ka acatrene la mejiune së laka, tro kö Iehova a xatuane la itre hlue i Nyidrë. The wesitre kö e tha hamëne kö hnene la itre atr la ixatua hnei epuni hna ajan. Ngo, loi e troa tui Paulo, troa wange la itupath ceitu me ketre ijine troa acatrene la mejiune i epuni koi Iehova. Ketre ijine mina fe tro epuni a goeëne la aqane thupëne la mele i epuni hnei Nyidrë. Ame hë cili, tro ha acatrene hnyawa la mejiune i epun koi Iehova memine la aqane imelekeu i epuni me Nyidrë. w15 15/4 4:​3-5

Ame la aqane kuca i Satana matre troa ananyi së qaathei Iehova, tre, ene la troa iaö së. (1 Ioane 4:8) Pine laka Satana a catre amenune la itre atr, thatre hë angatr ka hape, “ite ka pë ewekë [angatr] ngöne la u,” kola hape tha öhne hë angatr la enyipiewekëne la troa hane imelekeu me Akötresie. (Mat. 5:3) Hnei Diabolo hna “atimekëne la ite hni angete tha lapaune kö,” matre tha öhne fe kö angatr la nyipici göi Iehova. Hnei Satana hna amenune la itre atr jëne la hmi ka thoi. Atre hnyawa hi angeice ka hape, “ka isaxolo” lehova. (Eso. 20:⁠5) Pane mekune jë la etrune la madrine i Satana, ngöne lo angeic a öhne la itre atr ka hane hmi kowe la itre xötrapan, maine kowe la itre hna xup, maine koi itre öni pena, nge triji Iehova ju pë hë. Kola mama laka, ala nyimu la itre ka mekune ka hape, hna kapa hnei Akötresieti la hmi angatr, ngo thatre pe angatr ka hape, hna amenu angatr hnene la itre ini me itre hna majemine kuca ka thoi. Hna traqa tune lai koi angetre Isaraela ngöne lo hneijine i Isaia. Öni Iehova koi angatr: “Ue lae nyipunie a hamë mani thupene la tha areto ? memine la huliwa i nyipunie thupene la tha hna amejin ? denge hnyawa ju koi ni, nge xeniju la ka loi, nge tro la ite hni nyipunie a madine la ka pipixenyë.”​—Is. 55:2. w15 15/5 1:​14, 15

Thatre pengöne hnyawa kö Abela la aqane troa eatre la hna perofetane cili. Ngo maine jë hnei angeice lai hna pane mekune hnyawa la itre hnaewekë. Hnei angeice jë hna hnyinge ka hape, ‘Drei la atr ka troa apatrene la un me xatuane la itre atr troa pexeje hmaca?’ Atraqatre la lapaune i Abela kowe la itre hnei Iehova hna thingehnaean, matre ame lo angeic a huuje koi Iehova, hnei Nyidrëti hna kapa madrin. (Gen. 4:​3-5; Heb. 11:4) Noa la ketre atr ka lapaune koi Iehova, matre tha hane fe kö apatrenyi angeice hnene la iwë atraqatr. (Heb. 11:7) Hnene la lapaune i angeic, matre hnei angeice hna huuje koi Iehova. (Gen. 8:​20) Ngo thupene la iwë atraqatr, hna ngazo hmaca la fen. Hnei Nimeroda hna nyiqaane musinëne la itre atr, me uku angatr troa icilekeu me Iehova. (Gen. 10:​8-​12) Ngo tha hane fe kö enienijëne la lapaune i Noa! Ceitune hi la hna lapaune kow hnei Noa me Abela laka, tro kö Akötresie a apatrene la ngazo me mec. Hnei Noa fe hna lapa mekune la drai ne troa apatrene la itre atr ka ngazo nge ka imusinë. Ketre tu së mina fe, loi e tro fe sa lapa mekune la itre manathithi cili, laka, easenyi catre hë matre traqa pi!​—Rom. 6:​23. w15 15/5 3:​4, 6

Tro ha traqa koi së itre xa sine mec, me angazone la lapaune së e hna hnehengazo menu pala ha. Nyipi ewekë pe tro sa mejiune laka, tro kö Iehova a xatua së. Haawe, e traqa ju epuni hnehengazone la ketre ewekë, pane fe pi la mekuna i epuni kowe la ketre trejin ka mele nyipici, nge ka hnimi epuni catr. Maine jë keme me thine i epun, föi epun, maine ketre sinee i epuni pena, itre ka troa ithuecatre koi epuni tro pala hi a mejiune koi Iehova, me xatua epuni matre nango lapa kötre ju la itre hnei epuni hna hnehengazon. Pëkö atr ka atreine troa trotrohni së hnyawa, Iehova hmekuje hi. Nyidrëti a akeukawane la hni së ngöne la ijine easa hnehengazo menu. Öni Paulo: “The kuke hnine kö la kete ewekë ; ngo loi e cengöne amamane koi Akötesie la ite aja i nyipunie hnene la thith, me sipo, me ole. Nge tro ha thupëne la ite hni nyipunie me ite mekune i nyipunie göi Keriso Iesu, hnene la tingetinge ka sisitia qa thei Akötesie hune la nöjei mekun’ asë.” (Fil. 4:​6, 7) Mekune ju lo aqane xatua epuni hnene la itre trejin, me itre qatre thup, me hlue ka nyipici me ka inamacan, me itre angela me Iesu, matre tro pala hi a catre la aqane imelekeu i epuni me Iehova. w15 15/5 4:​16, 17

Ame ngöne la götrane kolopi ne la ēnē e Ierusalema hetrenyi la ketre an, hnepe tim, hna hëne ka hape, Betheseda. Ala nyimu catre la itre trene meci ka tro kowe la an angatr a mekune ka hape tro ha loi la meci angatr, e tro angatr a uti hmekune la kola emuemu la tim. E cili hi la Iesu a öhne la atr ka wezipo hë qaane ekö lo tha traqa petre kö nyidrë e celë fen. (Ioane 5:​6-9) Hnei Iesu hna hnyinge kowe la atr maine aja i angeice kö tro hmaca angeic a tro. Pane mekune jë la hleuhleu ka eje thene lai atr la angeic a qaja koi Iesu ka hape, aja i angeic troa aloinyi angeic, ngo tha ijije kö, ke pëkö ka xatua angeice troa uti kowe la an. Ame hnei Iesu hna upe lai atr troa kuca la ketre ewekë hnei angeice hna thatrein. Hnei Iesu hna upi angeic troa mejë fë la igöhne i angeic me tro. Ame hna mejë fë hnene la atr la igöhne i angeic me tro hë! Ketre iamamanyikeu la ka mingöming nyine anyipicine la nyine tro Iesu elanyi a kuca ngöne la fene ka hnyipixe. Ketre, eje fe a amamane la ejuine la ihnimi Iesu kowe la itre atr. Nyidrëti a thele la itre atr ka aja ixatua. Tro la tulu i Iesu a xatua së troa thele pala hi la itre atrene la teritoare së hna akötrëne hnene la itre ewekë ka ngazo ka traqa enehila. w15 15/6 2:​8-10

Hane hi la aqane nyiqaane Iesu la thith, “Tetetro i Anganyihunieti.” Kolo lai a amekunë së ka hape, Iehova a nyi keme ne la nöjei trejin, trahmanyi me föe ngöne la fen asë. (1 Pet. 2:​17) Ame la itre hna iëne hnei Iehova troa mele e hnengödrai, tre, hna xomi angatre nyine itre nekö i Nyidrë, matre itre kuku hë angatr. (Rom. 8:​15-​17) Ijije fe tro la itre ka troa mele palua e celë fen a hë Nyidrë ka hape, “Tetetro.” Iehova a hamëne koi angatre la mel, me nöjei hnei angatre hna ajan. Tro ha hë angatre fe ka hape, “ite nekö i Akötesie” e traqa pi angatre kowe la pexej, me mele nyipici koi Iehova ngöne la itupathe tixenuë. (Rom. 8:​21; Hna ama. 20:​7, 8) Ketre ahnahna koi itre kuku qaathei keme me thin, la kola xatua nyudreni troa atrehmekune ka hape, Iehova la Tretretro i nyudren. Ame la ahnahna ka sisitria nyine tro la itre keme me thin a hamëne kowe la itre nekö i angatr, tre ene la troa ini nyudreni ka hape, ka mele Iehova, nge ijiji nyudreni troa nyi sinee i Nyidrë. Ngo nyipi ewekë fe tro la itre nekönatr a isa acatrene la aqane imelekeu i nyudreni me Iehova. w15 15/6 4:​4-​6

Tro sa amamane tune kaa ka hape, aja së tro Iehova a “thepe [së] qaathene la atr ka ngazo”? Tha tro kö sa ‘nyi sineene la fen,’ nge tha tro kö sa ‘ajane la fen, memine fe la ite ewekë ne ej.’ (Ioane 15:19; 1 Ioane 2:​15-​17) Mano hë së elanyi e apatrenyi Satana pi memine la fene ka ngazo celë hnei Iehova! Ngo ame petre kö enehila, nyipi ewekë tro sa mekune laka, “ka tru tenge elëhni [Satana], ke trotrohninë hë nyëne laka, xoxopate pe hi la ijine i nyën.” Tro angeic a kuca asë la hnei angeice hna atreine matre tro sa hmaca hna nyihlue i Iehova. Celë hi matre loi e tro sa catre thithi matre tro Iehova a thepe së qaathei Satana. (Hna ama. 12:​12, 17) Hapeu, ajane kö epuni troa mele ngöne la fen, nge patre hë Satana? Haawe, catre jë thithi matre traqa pi la Baselaia i Akötresie, nge matre troa hmitrötre la ëje i Nyidrë, nge matre troa eatre la aja i Nyidrë kowe la fen. Catre jë qale koi Iehova, Atre thupë epun, me hamëne la nöjei ewekë ka ijije matre atreine epuni mele nyipici pala hi koi Nyidrë. Haawe, catre jë kuca asë la hnei epuni hna atreine matre troa mele thenge la tulu ne thith.​—Mat. 6:​9-​13. w15 15/6 5:​12, 17, 18

Tha nyipi atre kö së la itre ewekë ka troa traqa ngöne la ijine itupathi cili. Ngo, ame la hne së hna atre tre ijine ka jole catre lai, nge nyipi ewekë tro sa nue hnyawa la mele së koi Akötresie. Ame ekö, hnene la itre pane Keresiano hna trotrije la itre uma i angatr me cile kowe la itre itupath göi troa kötre mel. (Mar.13:​15-​18) Loi e tro sa isa waipengö së me hape: ‘Hapeu, tro kö ni a nuetije la itre mong? Tro kö ni a kuca la ka ijije matre troa mele nyipici koi Iehova?’ Pane mekune jë! Ame ngöne la ijine cili, easë hmekuje pe hi la itre ka nyihluene la Akötresi së ngacama traqa ju hë la nöjei pengöne jol, tune la ka traqa koi Daniela perofeta. (Dan. 6:​10, 11) Ame ngöne la ijine akötre atraqatr, tha ijine tro hmaca kö lai a “cainöjëne la maca ka loi . . . ne la baselaia.” Fenesi hë la ijine troa cainöjëne la maca cili. Traqa ha kowe “la pun”! (Mat. 24:14) Ame hë e cili, tro la itre hlue i Iehova a catre qaja la ketre maca ne iameköti ka troa hetre thangane kowe la nöjei atr. Maca nyine ithuemacanyine laka, tro ha lepe apatrene asë la fene i Satana. w15 15/7 2:​3, 8, 9

Tha tro pi kö sa thëthëhmine ka hape, ame la itre ka icilekeu me easë, tre, thatre fe kö angatre la pengöne la Baselaia i Akötresie. Haawe, tha trotrohnine kö angatre la kepine matre nyipi ewekë tro sa nyipici kowe la Baselaia, ngo tha kowe kö la itre musi ne la atr. Maine easa ajane troa nyipici pala hi koi Iehova, nyipi ewekë tro sa drengethenge Nyidrë, ngacama qeje së ju hë maine kuca pena hnene la itre atr la ketre ewekë koi së. (Dan. 3:​16-​18) Maine jë troa jole kowe la itre thöth troa ketre pengöne la aqane ujë i angatr. Loi e tro la itre keme me thin a xatuane la itre nekö i angatr troa catre ngöne la hna ini. Maine jë tro la itre nekö i epun a xou ngöne la kola upe iele nyudren troa sali koi darapo. Ame ngöne la ijine hmi hnepe lapa, ce wange ju me nyudren la aqane mekune Iehova göne la itre ewekë cili. Ini angatre jë la aqane tro angatr a qeje pengöne la itre ini hnei angatre hna mejiune kow, me metrötrën. (Rom. 1:​16) Xatuane nyudrene jë troa hane qeje pengöne itre ej kowe la itre ka hamë ini koi nyudren. w15 15/7 3:​15, 16

Ahnahna i Iehova koi së la thupene mel “mate melepi shë.” (1 Ioane 4:9) Öni Paulo aposetolo e ithanatane la hatrene ihnimi Akötresie cili ka hape: “Hna mec hnei Keriso ngöne la nyipi ijine thatraqane la itre ka ngazo. Ka hace kowe la atr troa meci thatraqane la atre kuca la meköt, ngo ka hmaloi catre kö e troa mec thatraqane la atr ka thiina ka loi koi së. Ngo ame Akötresie, pai Nyidrëti kö hnimi së, ngöne laka hna meci hnei Keriso thatraqai së, nge itre ka ngazo petre kö së.” (Rom. 5:​6-8, MN ) Thupene mel la hatrene ka sisitria ne la ihnimi Akötresie, nge celë hi ka aijijëne la itre atr troa imelekeu hnyawa me Nyidrë. Kola mama jëne la thupene mele la ihnimi Iehova kowe la nöjei atr asë. Ketre madrine ka tru la troa atre ka hape, e tro sa nyihlue nyipici koi Akötresie, tro hë së lai a kapa la mele ka sisitria qaathei Nyidrë ngöne la fene ka hnyipixe! Celë hi matre tro sa amamane la enyipiewekëne la thupene mel, hatrene ka sisitria ne la ihnimi ka cile huti Iehova koi së. w15 15/8 1:13, 15

Nyimutre la itre manathith hne së hna troa kapa elanyi fene la musi ne la Baselaia! Celë hi matre, tru la madrine së troa ce huliwa memine la organizasio i Ie­hova enehila, me kuca la nöjei huliwa hna athipe koi së. Ngo eje hi laka, ame itre xa ijin, troa saze la itre huliwa hna athipe koi së. Hna traqa tune lai kowe lo itre ka huliwa Bethela e Etazini. Hna upi angatre kowe la huliwa ne cainöj. Ketre, ame pena ha la itre ka iwai trootro, nge ka qatre hë, tre hna upi angatre pena troa pionie hut. Ka madrine angatr ngöne la itre huliwa i angatre ka hnyipixe, nge Iehova a amanathithi angatr. E tro sa sipone la ixatua i Iehova, me catre huliwa i Nyidrë, me kapa madrine la itre hnëqa së ka hnyipixe, tro hë së lai a madrin, nge tro fe Iehova a amanathithi së. (Ite edomë 10:22) Tune kaa ju hë elanyi e hetre götrane hne së hna pi mele ngön, ngo kolo pena a upi së kowe la ketre götrane kö? Ame e cili, tha götrane hnë tro kö sa mele ngön, maine huliwa hne së hna troa kuca la ka nyipi ewekë. Ngo tro pe sa olene laka, traqa ha së kowe la fene ka hnyipixe. w15 15/8 3:8

Hnei Noa hna mele ngöne la hneijine kola, “atraqate la ngazo i atr e celë fen” nge tha hnei angeice kö me hnepe lapa i angeic hna nyi sinatrongene la itre atr ka tha hni kö koi Iehova. Tha mano kö angatre cane la aka, nge öni Tusi Hmitrötr e qeje Noa ka hape, ketre “ate cainöjëne la thina ka meköt.” (2 Pet. 2:5) Hnei angatre pala hi hna kuca la itre ewekë ka amadrinë Akötresie, matre mele pe kö angatre qa ngöne la Iwë Atraqatr. Easë asë hi la itre matra i angatr enehila, matre tru la madrine së koi Noa me hnepe lapa i angeic laka, hnei angatre hna drengethenge Iehova, nge tha hnei angatre kö hna nyi sinatrongene la itre atr ka xele ma drei Iehova. Hna hane ujë tune fe hnene lo itre pane Keresiano ekö. Hnei angatre hna drengethenge Iehova, matre me­le pe kö angatre la kola lepe apatrenyi Ierusalema lo macatre 70 thupe i Iesu.​—Luka 21:​20-​22. w15 15/8 4:​17, 18

Ngacama ka hetre eloine la itre nyine kuci madrin, ngo tha ka loi asë kö itre ej. Loi e tro fe sa thupën matre tha tro kö a xome atrune menun la traeme së hnei kuci madrin. Nemene la nyine tro sa kuca matre tro sa xome la itre nyine iamadrinë ka loi, matre kepe eloine qa ngön? Kola hmekë së hnei Tusi Hmitrötr qa ngöne la “ite huliwa ne la ngönetei.” Kola qaja la “kuci ngazo, me thina ka sis, me qene tratraij, me hmi kowe la idola, me nyi haze, me ithupëjia, me iwatratra, me ikucany, me iwesitë, me ikelikelë, me kaqa, me isathë, me iqenehelë, me hmo hnei ka hait, me pelulu, me ite ka tune lai.” Öni Paulo, “ame angete kuca la ite ewekë ka tune lai, tha tro kö a hetenyi la baselaia i Akötesie.” (Gal. 5:​19-​21) Celë hi matre, loi e tro sa isa waipengö së me hape: ‘Mekuthetheunge kö a sewe ni troa kuca la itre elo ka amamai kuci isi, me ka pi mama fë nöj, me ka pi hun? Mekuthetheunge kö a sewe ni troa goeëne la ketre film ka amamai iatr ka sis, maine pena ka troa upi ni troa kuci ngazo, me iji menu la kahaitr, me kuci haze?’ w15 15/9 2:​11, 12

Tusi Hmitrötr a amamane hny­awa ka hape, tha hnei Akötresieti kö hna xupi së matre tro sa isa kuci mekun. Atre hnyawa kö Iehova la ka loi koi së. Nge maine easa ajane troa tingetinge me mele ka loi, nyipi ewekë catre tro sa lapa fene la musi Nyidrë, me drengethenge Nyidrëti hnyawa. Ame hi la Iehova a hamëne la ini celë, tre, Nyidrëti hi lai a amamane la etrune la ihnimi Nyidrëti koi së. Ame la keme ka ihnim, tre, angeic a hnehengazone la mele ne la itre nekö i angeice elany. Aja i angeic tro nyudreni a mele ka loi. Ngazo pe, ala nyimu la itre atr enehila ka xouene la itre drai elany, nge ala nyimu fe la itre ka huliwa mec troa hetrenyi la itre ewekë ka troa patr. (Sal. 90:10) Easa olene pe koi Iehova Keme së laka, hnei Nyidrëti hna amamane koi së la aqane troa mele ka loi enehila, nge hnei Nyidrëti fe hna thingehnaeane koi së la ketre mele ka sisitria elany! w15 15/9 4:​10, 11

Ame ekö, nyimutre la itre atr ka hane öhne me drenge la aqane xatua angetre Isaraela hnei Akötresie. Hnei Iehova hna thepe angatr qaa Aigupito jëne la itre iamamanyikeu, me ngaane la itre joxu ithupëjia ngöne la Nöje Hna Thingehnaean. (Ios. 9:​3, 9, 10) Haawe, hna ngaane la itre ithupëjia me Isaraela, ke xele kö angatr ma kapa ka hape, Iehova hi la ka isigöline la nöje i Nyidrë. Ahaba la ketre Joxu ka ngazo, nge nyimu ijine koi angeic troa goeëne la ime i Akötresie. Hnei Elia lo hna thithi koi Iehova, ame hnei Nyidrëti hna upe la eë qaa hnengödrai matre troa sa koi angeic. Öhne hnyawa hi Ahaba la ewekë cili. Elia a qaja jë koi Ahaba ka hape, tro kö Iehova a nyipune la qaqacil, me axulune la mani ka tru. (1 Ite jo. 18:​22-​45) Tha sihngödri kö koi Ahaba la itre iamamanyikeu cili, ngo xele pala hi angeice ma kapa ka hape, ime i Iehova hi lai. Nemene la ini koi së qa ngöne la itre tulu celë? Nyipi ewekë tro sa thele la itre ijine mama la ime i Akötresie ngöne la mele së. w15 15/10 1:​4, 5

Loi e eje the së ka hape, e tro sa xötrethenge hnyawa la itre hna amekötine hnei Iehova, tro kö Nyidrëti lai a xatua së. Celë hi matre loi e tro sa catre lapaune kowe la Atre ka ijij troa xatua së. Paulo fe a amexeje koi së ka hape, Akötresieti la “ate ateine kuca la nöjei ewekë asë ka sisitia hune la hne shë hna sipone me mekune kow, thenge la mene ate huliwa e kuhu ite hni shë.” (Efe. 3:​20) Itre hlue i Iehova a catre kuca la aja i Akötresie, ngo, atre hnyawa fe angatr laka, hna nyi ifegone hi la hnei angatre hna atreine kuca. Matre, tru la ole së laka, ce Akötresieti pala hi me easë, nge Nyidrëti a amanathithine la itre trenge catre hne së hna kuca. Hapeu, tro fe kö a kapa la sipo së, ene la troa nyixane la lapaune së? Iehova a thingehnaeane koi së ka hape, troa kapa lai e hne së hna sipo “thenge la aja i nyidë.” (1 Ioane 5:​14) E ka pexeje la mejiune së koi Iehova, troa tru la madrine i Nyidrëti koi së. Tro Nyidrëti lai a kapa la sipo së troa nyixane la lapaune së. Ame hna troa kökötre catre la lapaune së, nge tro fe hë a hane kepe së hnei Nyidrë.​—2 Thes. 1:​3, 5. w15 15/10 2:​16-​18

Maine aja së troa macaj me acatrene la lapaune së, loi e tro sa lapa mekune hnyawa la pengöi Iehova me Iesu. (Heb. 5:⁠12–6:1) E co hi la traeme hna xome göi troa lapa mekune hnyawa la pengöi Akötresie, tro ha luzi elanyi la aqane imelekeu së me Ieho­va, maine tro pena sa nuetriji Nyidrë. (Heb. 3:​12) Ase hë Iesu thuemacanyi së ka hape, e tha kapa kö së la Wesi Ula i Akötresie “hnene la hni [së] ka loi”, tha tro hë eje lai a cile hut. Ngo, tro ha “cia thahe hnene la ite jol, me ite mo, me aciacine la mele celë.”(Luka 8:​14, 15) Haawe, catre jë së lapa mekune hnyawa la hne së hna e ngöne la Tusi Hmitrötr, matre tro sa atrepengöi Iehova hnyawa. Tro lai a upi së troa nyitipune la itre thiina i Nyidrë me pengöi Nyidrë. (2 Kor. 3:​18) Loi e tro pala hi sa thele troa atrepengöi Nyidrë, me nyitipu Nyidrë uti hë epine palua. Pëkö ketre ewekë ka sisitria hune lai!​—Ate cai. 3:​11. w15 15/10 4:​13, 14

Eje hi laka, aja i epuni hi lai itre keme me thin tro la nekö i epun a lapa qale koi Iehova. Nge, aja i Iehova tro epuni a ini nyën me haji nyën. Hnëqa i epuni hi lai qaathei Nyidrë. (Efe. 6:4) Celë hi matre, loi e tro epuni a hmekëne matre tro pala hi la nekö i epun a kapa la ini qaathei Iehova. Pane mekune ju la ewekë celë: Epuni a thupëne matre tha tro kö nyën a triane la ca drai ne ini ngöne uma ne ini, ke aja i epuni tro pala hi la neköi epun a inine la itre ewekë ka hnyipixe. Nge ka tru koi epuni la götrane cili. Ketre tune mina fe, epuni a thupën matre tha tro kö a triane la itre icasikeu, me asabele, me hmi hnepe lapa. Ke, ame la ini hna kapa qaathei Iehova, tre iamele hi lai. Haawe, xatua nyëne jë troa atrepengöi Iehova hnyawa, me atrehmekune laka, Nyidrëti hi a ini nyën troa inamacan. Ketre, ini nyëne jë troa cainöje lapa. Xötrethenge hnyawa jë la tulu i Iesu la epuni a xatua nyën troa hamë ini kowe la itre xa atr. w15 15/11 2:6

Ase hë Iehova acile la atr ka troa musi ngöne la hnepe lapa. Ngo, aja i Iehova tro la itre trahmanyi a ihnim ngöne la aqane tro angatr a mus. Ngacama trahmanyi la he ne la föe, ngo Tusi Hmitrötr a upi angeic troa metrötrëne hnyawa la föe. (1 Pet. 3:7) Troa mama tune kaa? Loi e tro angeic a mekune hnyawa la hna ajan hnei föe me nyipi ewekën. Öni Tusi Hmitrötr mina fe: “Ange trahmany hnimeju la ite fö’ i nyipunie, tune lo hnei Keriso hna hnime la ekalesia, me hamë nyidëti kö thatraqan’ ej.” (Efe. 5:​25) Hnei Iesu lo hna meci pine la itretre drei nyidrë. Haawe, maine ka tru ihnimi ne la trahmany tui Iesu, tha jole kö koi föe troa hnime me metrötrëne la föi angeic, me sajuëne la itre mekune hna axecien hnei trahmany.​—Tito 2:​3-5. w15 15/11 4:​6, 7

Hnene laka, qene Heleni la qene hlapa hna ithanatan lapan, haawe, hna tro fë trongëne la itre tusi Mataio, me Mareko, me Luka, me Ioane qene Heleni. Ketre, hna cinyihan fe la itre tusi Paulo aposetolo, me itre xa tusi ne Tusi Hmitrötr qene Heleni. Hnene la itre ka cinyihane la itre tus qene Heleni hna majemine huliwane la Septan­te, ngöne la angatr a amexeje la itre hna cinyihan qene Heberu. Ame itre xa ijin, tha nyipi ceitune kö la aqane amexeje hmaca lo itre hna qaja ekö ngöne qene Heberu. Matre, ame la Tusi Hmitrötr hne së hna hetreny enehila, tre huliwa ne la itre ka ujë qene hlapa ka tha pexeje kö. Kolo lai a ini së laka, tha Iehova kö a wa­ngatrune la ketre qene hlapa maine ketre qenenöje pena hui ketre.​—Ite hu. 10:34. w15 15/12 1:​8, 9

Ame itre xa ijin, loi e tro sa lapa thaup. Öni Tusi Hmitrötr, hetre “ijine lapa thaupu.” (Ate cai. 3:7) Matre, ame la kola ithanata hnene la itre atr, easa lapa thaup, ke, easa metrötrë angatr. (Iobu 6:​24) Ketre, tha loi kö tro sa kötre fë ithanata. (Ite edomë 20:19) Nge, e nango jele hë la trenge hni së hnei ketre, loi e tro sa xomihni, me lapa thaup. (Sal. 4:4) Ngo hetrenyi fe la itre ijine troa ithanata. (Ate cai. 3:7) Hetre ijine troa atrunyi Iehova, me ithuecatre kowe la itre atr, me qaja la itre mekuna së, memine la itre aja së.​—Sal. 51:15. w15 15/12 3:​4, 5

Ame enehila, pëkö ca trejine ka atreine troa kuca la ketre iamamanyikeu ka troa aloine la meci së. (1 Kor. 12:9) Ngo hnene laka, hetre aja ne la itre trejin troa xatua së, itre xan a hamëne la itre xa aqane nyinyin la meci së ngacama tha hne së kö hna sipon. Eje hi laka pëkö engazone la itre xa aqane nyinyin hna hamën, ka tune lo Paulo a upi Timoteo troa nango iji waina. Timoteo a meci fë trengenan, hnene jë laka hna iji la tim ka dro. Ngo nyipi ewekë tro sa thupën, ke, ame itre xa ijin, tro la ketre trejin a musinë së troa xome la ketre wene kas, maine ketre trepe drösinöe, maine ketre aqane xeni pena. Tro jë angeice lai a qaja ka hape, casi hi la meci epun memine la ketre atrene la hnepe lapa i angeic hna aloine hë hnene lai drösinöe cili. Ngo, tha kolo kö lai a hape, tro fe lai a hane ie koi epun. Tha tro kö sa thëthëhmine laka, maine ala nyimu ju hë la ka xome lai drösinöe cili, ngo ijije hi troa hetre ethanyin.​—Ite edomë 27:12. w15 15/12 4:​13

Easë asë hi a kapa qaathei Adamu la ngazo, nge meci la pun. (Rom. 5: 12) Eloine pe, hnene la ihnimi Iehova koi së, hna uku Nyidrëti troa upi Iesu troa meci pine la nöjei atr asë, me “xome la aköte ne la mec.” (Heb. 2:9) Ngo tha eje hmekuje kö la eloine lai! Eje fe a aijijëne troa apatrene la mec, epine palua. (Is. 25:​7, 8; 1 Kor. 15: 22, 26) Nge tro pë hë la itre ka lapaune koi Iesu a tingeting me mele madrin. Kola qaja la itre ka troa ce musi me Keriso e hnengödrai, me itre ka troa mele e celë fen, fene la musi nyidrë. (Rom. 6:​23; Hna ama. 5:​9, 10) Nemene fe la itre xa manathith hna troa kapa jëne la ahnahna ka sisitria i Iehova? Ame la itre xa manathithi hne së hna troa kapa, tre, ene la troa paradraiso hmaca la fen, nge tro la itre ka wezipo a egöcatre hmaca, nge tro fe a amelene hmaca la itre ka mec. (Is. 33:24; 35:​5, 6; Ioane 5:​28, 29) Kola acatrene catrëne la ihnimi së koi Iehova me Iesu, pine la elolone la ahnahna cili “hna tha’teine qaja asë.”​—2 Kor. 9:​15. w16.01 2:​5, 6

Nyipici laka, qëmekene tro Ie­hova a hëne la ketre keresiano troa mel e hnengödrai, ka mejiune angeic troa mele palua e celë fen. Angeic ekö a trengeneune la ijine tro Iehova a aparadraisone la ihnadro elany, me apatrene la iangazo. Maine jë, hnei angeice hna lapa mekune la ijine tro angeic a iöhnyi hmaca memine la ketre atrene la hnepe lapa i angeic, me ketre sinee i angeice pena ka meci hë. Maine angeice pena a lapa mekune la ijine tro angeic elany a xupe la uma i angeic, me tra feja, me xeni wen ej. (Is. 65:​21-​23) Pine nemene matre ujë ju hi la mekune me hni angeic? Tha hnene kö laka, ka hace la mele i angeic, matre ujë jë tune lai. Ketre tha hnene kö laka, ka pëkö aliene la troa mele palua e celë fen. Maine pena, tha angeice kö a thele troa tupathe la mel e hnengödrai. Kolo pe a ujë la mekune me hni angeic, ke hnei Akötresieti hna amekötine lai koi angeic. Ame la Iehova a hë angeic, Nyidrëti hi lai a ujëne la mekune me hni angeic, me edrö hnei angeic hna trengeneun jëne la uati hmitrötre i Nyidrë. w16.01 3:​11, 13

Iehova la Kapucatinasë. Hnei Nyidrëti hna xupe la nöjei ewekë, nge ka pëkö ifegone la inamacane me mene i Nyidrë. Hnei Nyidrëti hna xatua Iobu troa trotrohnine lai, matre öni Iobu koi Nyidrë ka hape, ‘Atre hë ni laka, ka pucatinasë kö enëtilai, nge pëkö mekuna i enëtilai hna thatreine eatrën.’ (Iobu 42:2) Ijije hi tro Iehova a ketre sipu eatrëne casine la nöjei mekuna i Nyidrë. Ngo, Nyidrëti a aijijëne la itre atr troa ce huliwa me Nyidrë matre troa eatrëne la aja i Nyidrë; hatrene hi la ihnimi Nyidrëti lai koi angatr. Hnei Akötresieti hna pane xupi Iesu, Hupuna i Nyidrë, me aijijë Iesu troa xatua Nyidrëti troa xupe la nöjei ewekë asë pë hë. (Ioane 1:​1-3, 18) Tha hnei Iehova hmekuje kö hna hamëne la ketre huliwa ka tru kowe la Nekö i Nyidrë, ngo hnei Nyidrëti fe hna hane amamane la huliwa i Iesu kowe la itre atr.​—Kol. 1:​15-​17. w16.01 5:​1, 2