Juun

Hnene la itre trengewekë i Iesu hna hamë trengecatre kowe la itre aposetolo! Tha nyipi trotrohnine kö la itre aposetolo laka, calemi hë la ijin tro Iesu a mec. Ngo tha kolo kö lai a hape, e meci hë nyidrë ke, pëhë ixatua. Aja i Iehova troa sa la itre thithi angatr, me xatua angatre troa cainöj. Nge, celë hi hnei Nyidrëti hna kuca. Thupene la meci Iesu, hnene la itre aposetolo hna sipo iele Iehova troa ithuecatre i angatr. Ame hnei Iehova hna sa la itre thithi angatr. (Itre hu. 4:29, 31) Celë hi ka mama enehila. Ame la easa catr cainöj tre, easë hi lai a amamane laka, itre sinee i Iesu së. Nge, loi e troa xecie koi së laka, tro kö Iehova a sa la itre thithi së. Tro Nyidrëti a xatua së ngöne la easa cil kowe la itre jol ngöne la hna cainöj. (Fil. 4:13) Easa olen atraqatr koi Iehova la hnei Nyidrëti hna sa la itre thithi së, me aijijë së troa itre sinee i Iesu. Kola hamë trengecatre së hnene la itre ahnahna qaathei Iehova matre, tro palahi sa wa wen.—Iako. 1:17. w18.05 14 par. 17-18

Tha faifi ju kö lao macatre thupen, nge mama cile ju hi koi angatr laka, easenyi hë tro Iehova a amekötine la traone Ierusalema. Hnei angatr hna trotrohnine laka, ijine hi la tro angatr a kötre qa cili, thenge lo hna qaja hnei Iesu. (Luka 21:20-22; Itre hu. 2:19, 20) Hna traqa lo drai Iehova lo macatre 70, lo kola lepe apatrenyi Ierusalema hnene la angetre Roma. Ame enehila, easë fe a troa qëmeke kowe la ‘drai atraqatre i Iehova, me nyine xouene atraqatr.’ (Ioela 2:11) Hnei Zefania perofeta hna qaja göne la hneijine së ka hape: “Eashenyi hë la drai ka tru i Iehova, eashenyi hë, nge saqe catë hë.” (Zef. 1:14) Celë hi kepine matre, nyipiewekë “tro fe sa imekunekeun, matre aciane la ihnim me itre huliwa ka loi.” (Heb. 10:24) Loi e tro sa nyipiewekëne la itre trejin, matre ijiji së troa ithuecatr ngöne la nyipi ijin. w18.04 21-22 par. 1-2

Hnene la itre trengewekë i Iehova hna hamë trengecatre koi Iosua, qëmekene tro la nöj a lö hnine la Nöje Hna Thingehnaean! Tha hnei Iehova hmekuje kö hna thuecatrene la itre hlue i Nyidrë, angatr isa ala cas. Ame la kola po hnei angetre Iudra e Babulona, atre hnyawa hi Nyidrë laka, angatr a aja ithuecatr. Matre, hnei Nyidrëti hna ithuecatre koi angatr asë. Hnei Nyidrëti hna perofetane ka hape: “The qou kö, ke ce ini me eö; the hlohlo kö, ke ini la Akötesi ’ö; tro ni a aegöcatenyi ’ö; he, tro ni a xatua eö; he, tro ni a sajuë eö hnene la ime macange ka meköt.” (Is. 41:10) Hnei Iehova fe hna hane ithuecatre kowe la itre pane keresiano ekö, nge celë fe hnei Nyidrëti hna kuca koi së enehila. (2 Kor. 1:3, 4) Hnei Iehova hna hane ithuecatre fe kowe la nekö i Nyidrë. Thupene lo Iesu a bapataiso, hnei nyidrëti hna dreng la kola ithanata qa hnengödrai, kola hape: “Nekönge hniminange lai, eni a madri nyën.” (Mat. 3:17) Hnene la itre trengewekë celë hna hamë trengecatre i Iesu, ngöne lo nyidrëti ekö e celë fen! w18.04 16 par. 3-5

Hetre itre atr ka mekun ka hape, tha hnei Iehova kö hna nue Adamu troa sipu axecië mekun. Tha trotrohnine kö angatr laka, tha ceitune kö la troa isa ië ewekë memine la troa iëne la loi qa ngöne la ngazo. Isa qanyi Adamu kö me Eva troa iën, tro nyidroti a drengethenge Iehova maine tha drei Nyidrëti pena. Ngo eje hi lai laka, Iehova hmekuje hi la ka troa amekötine göi loi me ngazo. Tha sihngödri kö la hna amekötine cili koi Adamu me Eva ke, hna nyihatrene hnene “la sinöe ne ate hmekune la loi me ngazo.” (Gen. 2:9) Ame la Iehova a wathebo Adamu me Eva troa xeni wene la sinöe, Nyidrëti hi lai a ini nyidro troa drengethenge Nyidrë, matre troa axecië mekune hnyawa. Hapeu, ka lolo hë la mele i Adamu me Eva thupene la hnei nyidro hna axecië mekun, tune lo aqane qaja i Satana? Ohea. Hnei Adamu me Eva hna isa sipu iën la loi qa ngöne la ngazo. Ngo, hetre thangane ka ngazo koi nyidro, kolo pe a hnöthe la mele i nyidro. Luzi hë lo mel hnei Iehova hna hnëkëne thatraqai nyidro. w18.04 5-6 par. 9-12

Iehova a utipin me hnime la itre hlue i Nyidrëti ka akötr. Ngo Nyidrëti fe a xatua angatr. Hanawang la ketre ceitun. Hna apon ekö me thahluëne la angetre Isaraela e Aigupito. Öhne hi Iehova la akötre i angatr, matre hnei Nyidrëti hna xatua angatr. Öni Nyidrëti koi Mose: “Öhnë hë ni la aqan’ angazone la nöjeng . . . , nge dengë hë ni la latesi angate . . . Ate kö ni la aköte i angat. Nge uti hë ni troa thepe angate qa ngöne la ime i angete Aigupito.” (Eso. 3:7, 8) Hnei Iehova hna utipin me hnime la nöje i Nyidrë, matre hnei Nyidrëti hna thepe angatr qa Aigupito. Itre hadredre lao macatre thupen, hmekune lo angetre Isaraela ngöne la Nöje Hna Thingehnaean, hna thele troa lepi angatr hnene la itre ithupëjia. Nemene la hnei Iehova hna kuca? Hnei Iehova “hna ietrane la aqane awe i angat, pi angete axösisi angate me akötë angat.” Eje hi, hnei Iehova palahi hna utipin me hnime la nöje i Nyidrë. Celë hi matre hnei Nyidrëti hna xatua angatre hmaca. Hnei Nyidrëti hna upe la angetre amekötin, matre troa amelene la nöje i angatr qa ngöne la ime ne la ithupëjia me angatr.—A. ame. 2:16, 18. w19.03 15-16 par. 4-5

Ame la pane wathebo, tre, tro angetre Isaraela a atrunyi Iehova hmekuje hi. Nge ame la hnaaluen, troa thupë angatre kö qa ngöne la kuci idrola. (Eso. 20:3-6) Tha thatraqai Iehova kö la itre wathebo cili, ngo thatraqane pe la nöje i Nyidrë. Ame la angatr a nyihluene la itre xaa haze, angatr a akötr. Ngo Iehova a amanathithine la nöje i Nyidrë, e hnei angatr hna mele nyipici koi Nyidrë me thiina ka meköti koi itre xan. (1 Ite jo. 10:4-9) Tha zö i Iehova kö la kola tria la ketre trejin me thipetrije la itre wathebo i Nyidrë. Ame pe, Iehova a hnimi së, nge öhne hi Nyidrëti la kola qanangazo së. Tha sihngödri kö koi Iehova la akötre së, tune la thin a akötr ngöne la kola treije la medreng. Maine jë, tha tro kö Nyidrëti a canga xatua së. Ngo tro kö a traqa la ijine tro Nyidrëti a amekötine la itre atr ka ngazo, itre ka qanangazo së. w19.02 22 par. 13-15

Ame ngöne la itre wiik qëmekene la Drai Ne Amekunën ke, kola amexeje koi së la tulu ne ipië i Iesu. Hna huujëne la mele i nyidrë thatraqai së. Kolo fe a upi së troa nyitipune la tulu ne ipië i Iesu me kuca la aja i Iehova, ngacama tha ka hmaloi kö koi së. Easa mekune la aqane catre nyidrë, qëmekene tro nyidrëti a mec. Atre hnyawa Iesu laka, troa qanangazo nyidrë hnei itre ithupëjia, me lepi nyidrë, me humuthi nyidrë. (Mat. 20:17-19) Ngo tha hnei Iesu kö hna xou. Ame ngöne la ijine cili, hnei nyidrëti hna qaja kowe la itre aposetolo ka ce me nyidrë e Gethesemane: “Mejë jë, nge tro jë së, ke hanawang! Calemi hë la atre salemë ni.” (Mat. 26:36, 46) Ame ngöne la kola traqa troa othi nyidrë hnene la itre atr me itre sooc, hnei nyidrëti hna tro me qaja koi angatr, ka hape, troa nue pe la itre aposetolo i nyidrë. (Ioane 18:3-8) Drei la aqane catre i Iesu! Ame fe enehila, kola nyitipune la aqane catre Iesu hnene la itre Keresiano hna iën memine la itre xaa mamoe. w19.01 27-28 par. 7-8

Ame la atr ka desë, tre, angeic a xome la nöjei pengöne han, matre troa mingöming la desë. Ketre tu së fe, loi e tro sa pane eënyine la nöjei thiina ka lolo, matre hetrenyi së la thiina ka menyik. Kola qaja la troa hetre hni ka ipië, me idrengethenge, me thiina ka lolo me catr. Itre ka hni ka ipië hmekuje hi la ka aejëne la aja i Iehova. Nyidrëti a ajane tro sa thiina ka loi. (Mat. 5:5; Gal. 5:23) Ame la easa drengethenge Iehova, kola elëhni hnei Satana. Celë hi matre, ngacama hni ka ipië ju hë së me thiina ka menyik, ngo tro palakö a xele ma wai së hnei itre xan. (Ioane 15:18, 19) Haawe, nyipiewekë tro sa catr, matre tro sa atreine cile koi Satana. Ame la atr ka thiina ka menyik, tre, tha ka pi tru kö angeic. Ame la atr ka pi tru, tre, ka canga elëhni, nge tha ka drei Iehova kö. Celë hi itre thiina i Satana ka ifeketh memine la itre ka thiina ka menyik. Methi angeic la itre ka thiina ka lolo ke, pëkö thei angeic la itre thiina cili ke, ka ngazo angeic nge ka thoi. Nyimutre ju hë la itre hnei Satana hna qaja maine kuca, ngo thatreine kö angeic troa sawa la itre atr ka hni ka menyik troa nyihlue i Iehova!—Iobu 2:3-5. w19.02 8-9 par. 3-5

Atre hi Iehova laka, tro ha xou hnene la itre atrene la nöj e Babulona ke, tro ha lepe la nöj cili hnene la trongene isi angetre Madai me Peresi. Iehova a troa nyijëne la trongene isi cili, matre troa thapa la nöje i Nyidrë qa Babulona. (Is. 41:2-4) Ame la kola dreng hnei angetre Babulona me itre xaa nöj laka, kola easenyi la itre ithupëjia me angatr, angatr a thele troa ithuecatrekeu, me hape: “Catepi.” Ketre, hnei angatr hna kuca la nyimu idrola me mejiune laka, tro itre ej a thupë angatr. (Is. 41:5-7) Ngo Iehova a aupune la hni angetre Iuda ka po, me hape: ‘Eö Isaraela hlueng, [the tune kö la itre ka lapa ezi eö] . . . The hnehengazo menu kö, ke ini la Akötesi ’ö.’ (Is. 41:8-10) Öni Iehova: “Ini la Akötesi ’ö.” Jëne la trengewekë celë, Iehova a akeukawane la hni ne la itre hlue i Nyidrë. Nyidrëti a amamane laka, tha tro kö Nyidrëti a thëthëhmi angatr ke, angatre hi la nöje i Nyidrë. Öni Iehova koi angatr: “Tro ni a kapa . . . nge tro ni a amelen.” Celë hi itre trengewekë ka ithuecatre me ka akeukawane la hni ne la itretre Iuda ka po e Babulona.—Is. 46:3, 4. w19.01 4 par. 8

Könitre la itre ijine Iehova a ithanata meköti qa hnengödrai. Ame ngöne Mareko 1:9-11, tre, kolo pane ijine Nyidrëti a ithanata qa hnengödrai. Öni Iehova: “Hmunë la nekönge hniminang, eni a madri hmunë.” Drei jë kö la madrine i Iesu, la Iehova a qaja la ihnim me mejiune i Nyidrë koi Iesu! Iehova a anyipicin e celë la köni ewekë göi Iesu. Ame la hnapan, Iesu hi la Nekö i Nyidrë. Ame la hnaaluen, tru la ihnimi Iehova kowe la Nekö i Nyidrë. Nge ame la hnaakönin, Iehova a kapa la Nekö i Nyidrë. Ame la Iehova a qaja ka hape, “Nekönge hniminang,” Nyidrëti hi lai a amamane laka, ketrepengöne hë la aqane imelekeu i Nyidrëti me Iesu. Ame lo Iesu petre kö e koho hnengödrai ke, Nekö i Akötresieti hë nyidrë. Ngo, ame lo nyidrëti a xomi bapataiso, hna sië nyidrë hnei uati hmitrötr. Haawe, ijiji nyidrëti troa bëeke hnengödrai eë, troa Joxu me Atre Huuje Ka Tru. (Luka 1:31-33; Heb. 1:8, 9; 2:17) Celë hi kepin matre Iehova a qaja ngöne lo ijine bapataiso Iesu, ka hape: “Hmunë la Neköng.”—Luka 3:22. w19.03 8-9 par. 3-4

Hna hamëne hë ekö la pane eamo ka ngazo. Satana la ka pane hamë eamo ka ngazo kowe la itre atr. Öni angeic, ka hape, maine tro Adamu me Eva a ketre sipu iëne la aqane troa mel, tro hë nyidroti a madrin. (Gen. 3:1-6) Ka pi tru catre Satana! Ame la aja i angeic ke, tro Adamu me Eva memine la itre matra i nyidro a drei angeic me atrunyi angeic, ngo tha Iehova kö. Ngo ame la nöjei ewekë hna hetrenyi hnei Adamu me Eva ke, qaathei Iehova asë hi. Hnei Iehova hna hamë föi Adamu, memine la gatran ka mingöming nyine troa lapan. Ketre, lue atr ka pexeje nyidro, matre nyidroti a troa mel epine palua. Ngazo pe, tha hnei Adamu kö me Eva hna drengethenge Akötresie. Hnei nyidroti hna thë la aqane imelekeu nyidro, memine la Atre Xupi nyidro. Nge hetre ethane la hnei nyidroti hna tha idrei. Hna aceitunë nyidroti memine la ketre iengen hna jean. Kola qatre trootro hnei Adamu me Eva, uti hë la meci nyidro. Nge ketre tu së fe hi, itre matra i nyidro. (Rom. 5:12) Ame fe la itre atr enehila, angatr a wangesixane la itre hna qaja hnei Akötresie, me kuca la sipu mekuna i angatr. (Efe. 2:1-3) Haawe, kolo lai a anyipicine la hna qaja ngöne la topik enehila. w18.12 20 par. 3-4

Ka inamacane Paulo aposetolo. Hnei nyidrëti hna ini, nge ka ithanatane nyidrëti la lue qene hlapa. (Itre hu. 5:34; 21:37, 39; 22:2, 3) Ngo hnei nyidrëti hna thipetrij la inamacane i fen, me axecië mekun thenge la Wesi Ula i Akötresie. (Itre hu. 17:2; 1 Kor. 2:6, 7) Ame la thangan, tru catr la itre manathithi hnei nyidrëti hna kapa ngöne la huliwa ne cainöj, nge nyidrëti a lapa treqene la ketre manathith ka epine palua. (2 Tim. 4:8) Eje hi, draië catre kö la mekuna i Iehova hune la mekuna i fen. Maine tro sa trongëne la itre hna amekötine hnei Akötresie, tro hë sa mele madrin me mele ka loi. Ngo tha tro kö Iehova a musinë së troa ce mekune me Nyidrë. Ame la “lue ka nyipici me ka inamacan,” tre, tha angatre kö a musinë së, ketre tune fe la itre qatre thup. (Mat. 24:45; 2 Kor. 1:24) Isa qanyi së kö amekötine la itre mekuna së, matre ce mekun me Iehova. w18.11 24 par. 12-13

Hnei Akötresieti hna perofetane jëne Isaia, ka hape, troa tingetinge la nöje Isaraela ngöne la angatr a troa bëeke hmaca qa Babulona. Tha tro kö angatr a xouene la itre atr maine itre öni pena. Tro la itre qatr me itre nekönatr a mele tingeting. (Is. 11:6-9; 35:5-10; 51:3) Ketre, hnei Isaia hna perofetan, ka hape, troa tiqa la fene hnengödrai “hnene la ate hmekunyi Iehova, tune la hnagejë a hetëne la tepen’ ej.” Ngo tha e Isaraela hmekuje kö. Hnei Isaia hna perofetan, ka hape, tha tro kö la angetre Isaraela ka bëeke qa Babulona, a xoue atr maine öni pena. Hnei angeice fe hna qaja ka hape, troa mana la xen ke, kola cia ezine la tim, tune e Edena. (Gen. 2:10-14; Iere. 31:12) Hapeu, hna eatre hmekuje kö la hna perofetan celë ngöne lo ijine i angetre Isaraela? Hna thingehnaeane fe laka, troa aloine la itre ka timek me itre sinatr me itre ka simi hnangenyë. Ngo tha eatre kö ngöne lo ijine angetre Isaraela a bëeke qa Babulona. Hnei Akötresieti hna qaja ka hape, tro Nyidrëti a apatrene la itre sine mec elany. w18.12 5 par. 11-12

Easa ajane tro palahi sa tro ngöne la nyipici utihë epine palua. Nemene la ka troa xatua së? Loi e tro sa xomi ijine matre troa catre inine me lapa mekune la hna qaja hnei Tusi Hmitrötr. Ame la easa ini tus, tre, kola acatrene la ihnimi së kowe la nyipici, nge e cili, tha tro kö sa nuetrij ej. Kola qaja ngöne Ite Edomë 23:23 ka hape, tro sa ‘itöne la nyipici,’ me itöne “la inamacan, me ini, me trotrohnin.” Tha kolo kö a qaja ka hape, tro hi sa atre la nyipici qa hnine la Tusi Hmitrötr. Loi e tro fe sa trongën ej ngöne la mele së. Ame la trotrohnin, tre, kola qaja la troa mekun la itre ewekë hne së hna atre hë memine la itre ewekë hne së hna inin. Ame la atr ka inamacan, tre, angeic a ujë thenge la itre hnei angeic hna atre. Ame itre xaa ijin, kola ameköti së hnene la nyipici, me amamane la itre nyine tro sa saze. Loi e tro sa kapa la hna amekötin hnene la nyipici ke, öni Tusi Hmitrötr, ka sisitria catre kö hune la sileva.—Ite edomë 8:10. w18.11 10 par. 3; 13 par. 13-14

Nemene la ewekë ka sisitria ngöne la mele së? Ame koi së itre ka nyihlue i Iehova, tre, ene la aqane imelekeu së me Nyidrë. Thatreine kö së troa itöne trij ej. Ketre, easa wangatrune la nyipici qa hnine la Tusi Hmitrötr, pine laka, celë hi ka aijijë së troa ce sinee me Iehova Akötresie. (Kol. 1:9, 10) Iehova la Atre Ini së, nge Nyidrëti a hamë së la itre ini ka jui qa hnine Wesi Ula i Nyidrë, ene la Tusi Hmitrötr. Nyidrëti fe a qaja koi së la enyipiewekëne la ëje i Nyidrë, me amamane koi së la itre thiina ka lolo i Nyidrë. Ketre, hnei Iehova hna amamane la etrune la ihnimi Nyidrë, ngöne lo kola meci hnene la Neköne hnimina i Nyidrë. Hnei Iehova fe hna hamëne la itre ithuemacany göne la Baselaia i Nyidrë, me hamë mejiune së troa mel e celë fen ngöne la Paradraiso. Hnei Iehova hna qejepengöne la mele së elany. Celë hi matre, easa wangatrune la itre trenge nyipici celë, pine laka, kola acatrene la aqane imelekeu së me Nyidrë, Atre Xupi së. Itre eje fe a amamane koi së la sipu aliene la mel. w18.11 3 par. 1-2

Atreine hi së troa iaöne la itre atr, ngo thatreine kö së iaö Iehova. Öni Tusi Hmitrötr ka hape, “mama asë hi la nöjei ewekë, nge lualai asë kowe la lue meke [i Nyidrë].” (Heb. 4:13) Drei la ketre ceitun. Hnei Anania me Safaira hna thele troa iaöne la itre aposetolo. Hnei nyidro hna salemëne la hlapa i nyidro, ngo tha hamën asë kö nyidro la thupene kowe la itre aposetolo. Pine laka, aja i nyidro troa wangatrunyi nyidro hnene la itre trejin ne la ekalesia, matre öni nyidro, ase hë hamën asë la mani. Ngo atre hi Iehova laka, nyidroti a thoi, matre hnei Nyidrëti hna ameköti nyidro. (Itre hu. 5:1-10) Nemene la mekuna i Iehova göne la itre atr ka thoi? Ame asë hi la itre atr ka thoi nge ka tha ietra kö, tre, troa triji angatr e hnine “la hneopegejë eë,” tui Satana. Eje hi, kola troa lep apatrenyi angatr epine palua. (Hna ama. 20:10; 21:8; Sal. 5:6) Atre hi së laka, “tha ate Akötesie, mate thoi” nge “tha ’teine kö Akötesieti troa thoi.” (Num. 23:19; Heb. 6:18) “Hnei Iehova hna sisin . . . la sesepeneqë ate thoi.” (Ite edomë 6:16, 17) Maine easa ajane troa amadrinë Nyidrë, nyipiewekë tro sa qaja la nyipici. w18.10 5-6 par. 10-13

Tune kaa fe së enehila? Nemene la hne së hna troa kuca e traqa ju maseta sipo së troa kuië manie, thatraqane la ketre feete ne la hmi ka thoi? Loi e tro sa canga hnëkë me thel enehila la mekuna i Iehova. E cili, tha tro hë sa xou troa kuca me qaja la ka loi. Maine tro palahi sa thele troa atre la mekuna i Iehova, tro hë lai a xatua së troa mele nyipici koi Nyidrë, ngöne la kola tithi së hnei mec. Eje hi, thatreine kö tro sa nyinyine la meci së jëne la madra ka pexej, maine jëne lo foa lao aliene ka tru ne la madra. (Itre hu. 15:28, 29) Ngo, hetre itre xaa drösinöe laka, ka hetre mutine madra. E cili, isa qanyi së kö axecië mekun, thenge la itre trepene meköti ne la Tusi Hmitrötr. Eu la ijine tro sa iëne la nyine troa kuca? Ngöne la easë e pital, ngöne la easa akötr, maine pena ngöne la kola upi së troa axecië mekun? Ohea. Enehila hi la ijin ne tro sa ithel, me nyialiene la pepa ka qejepengöne hnyawa la aja së, me ithanata kowe la itre droketre. w18.11 28 par. 5; 30-31 par. 15-16

Ceitu hi Iehova memine la ketre atre thupë mamoe ka ihnim. Nyidrëti a thapa la nöje i Nyidrë, qaathene la nöjei ithupëjia me nyihnyawa angatr. Celë hi ka aegöcatrenyi së me akeukawanyi së, pine laka, easa mel ngöne la pune la fene celë. Iehova palahi a thupën me nyihnyawane la nöje i Nyidrë. Ketre, tro pala kö Nyidrëti a xatua angatr, ngöne la akötr atraqatr laka, calemi catre hë. (Hna ama. 7:9, 10) Ngacama hetre itre ka co maine ka tru, me itre ka egöcatr maine ka wezipo, ngo tha tro kö la nöje i Iehova a hmengöhmengöne hnei xou, ngöne la kola traqa la akötr atraqatr. Ame pe ngöne la ijine cili, tro la nöje i Iehova a mekune lo itre trengewekë i Iesu, lo kola hape: “Galajë nyipunie, me goeën; ke eashenyi hë la troa amele nyipunie.” (Luka 21:28) Eje hi, tro Gog, ene lo itre nöj ka catr hna acasin, a thele troa lepe la nöje i Iehova, ngo tha tro jë kö angatr a xou. Xecie hnyawa koi angatr laka, tro kö Iehova a thupë angatr. (Ezek. 38:2, 14-16) Pine nemen? Pine laka tha ka saze kö Iehova. Tro palahi Nyidrëti a amamane la ihnimi Nyidrë koi angatr me thupë angatr.—Is. 26:20. w18.09 26 par. 15-16

Pane mekune jë lo ijine Iehova a qaja kowe la angetre Isaraela la topik ne la drai enehila. Iehova a nyipi së isa ala caas. Tusi Hmitrötr a thingehnaean ka hape: “Akötesi ’ö, ate cat, ate amelen; tro nyidëti a madi ’ö me aciacin.” (Zef. 3:16, 17) Iehova a thingehnaean ka hape, ngacama nyimutre la itre akötre së, ngo tro kö Nyidrëti a ithuecatrenyi së me akeukawane la itre hni së. Öni Nyidrë: ‘Tro ha hnapinyi nyipunie, me hiane ngöne la lue watingönecang. Kola aupune la nekönatr hnei thin, ketre tune tro ni a aupunyi nyipunie.’ (Is. 66:12, 13) Pane mekune jë la elolone la mele ne la medreng hna xepe maine ka elo me thin! Atraqatr la ihnimi Iehova koi së, nge Nyidrëti a ajane troa tingetinge la mele së. Iehova a nyipi së.—Iere. 31:3. w18.09 9 par. 6; 10 par. 7

Nyimutre ekö la itre aqane tro la angetre Isaraela a ham. (Eso. 36:2; Neh. 11:2) Ame fe enehila, ijije hi tro sa nue la traeme së, me itre mo së, me itre hne së hna atrein, matre troa xatuane la itre trejin. E cili, tro hë sa madrin, nge tro Iehova a amanathithi së. Ame la itre ka saen troa xupi Uma Ne Baselaia, tre, angatr a nyisineene la itre xa trejin. Hanawang la tulu i Margie. Kola traqa koi 18 lao macatre enehila ne angeic a ixatua troa xupi Uma Ne Baselaia. Hnei Margie palahi hna thele troa ce tro memine la itre trejine jajiny, matre ini nyudreni la huliwa. Öni angeic ka hape, jëne la huliwa cili, easa ithuecatrekeu. (Rom. 1:12) Eje hi, ame la kola traqa la itre jol koi Margie, itre trejin ka xupi Uma Ne Baselaia la ka xatua angeic. Hapeu, hnei epuni kö hna hane ixatua troa xupi Uma Ne Baselaia? w18.08 23-24 par. 9, 11

Maine jë, 30 hi lao macatre i Timoteo ngöne la Paulo a cinyanyine lai. Ngo hnei Paulo hna hamë hnëqa ka tru koi angeic. Nemene la ini koi së? Tha tro pi kö sa qeje gelene la itre trejine trahmany ka thöth, hnene la macatre i nyudren. Eje hi, nyimutre la itre huliwa hna kuca hnei Iesu lo nyidrëti a 33 lao macatre! Ame ngöne la itre xa nöj, tha hna metrötrëne kö la itre xötr ka co. Celë hi matre, ame kowe la itre xa qatre thup, thatreine kö tro la itre trejine thöth a cilëne la hnëqa ne drikona me qatre thup, ngacama ijiji nyudrene hi. Tha hna qaja kö e hnine la Tusi Hmitrötr ka hape, tro hi a drikona maine qatre thup la itre trejine ka qatre hë.—1 Tim. 3:1-10, 12, 13; Tito 1:5-9. w18.08 13-14 par. 15-16

Maine easa ajane troa axecië mekune hnyawa, nyipiewekë tro sa xome hi la itre nyipi ithuemacany. Celë hi matre, loi e tro sa hmek me iëne hnyawa la itre hne së hna e. (Fil. 4:8, 9) Tha tro kö sa aluzi traeme menu, troa e la itre ithuemacany hna amë ngöne la itre sit Ëternet maine ngöne mail. Loi e tro sa neëne la itre sit hna kuca hnene la itre ka iamenumenu. Angatr a silitrengathoi matre troa ananazijëne la lapaune ne la itre hlue i Akötresie. Eje hi, maine ka tria la itre ithuemacany hna kapa, tro ha qali la itre mekun hna axeciën. Ketre, loi e tro sa thupën hnyawa, wanga hetre ethane jë koi së la itre ithuemacany ka thoi. Ame ngöne lo ijine i Mose, hna tro juetrë la 12 lao atr troa waipengöne la Nöje Hna Thingehnaean. Treen la ka bëeke fë trengathoi. (Num. 13:25-33) Hnei angatre hna atrune la itre ithuemacany, matre hna xou me kucakuca la nöje i Iehova. (Num. 14:1-4, 6-10) Ketre, tha hnei angatre kö hna thele troa atre la nyipici me mejiune koi Iehova. Hnei angatre hna mejiune kowe la itre trengathoi hna qaja. w18.08 4 par. 4-5

Nyimutre la itre atr enehila ka thina ka loi. Ame la itre xa atr ka tha hane kö nyihlue i Iehova, ke, pëkö ewekë ka ngazo hnei angatr hna kuca. Maine jë, atre hi epuni la itre xan e angatr. Ngo hapeu, itre nyipi sinee kö angatr? Maine tro palahi sa ce tro me angatr, nemene la thangan elany kowe la aqane imelekeu së me Iehova? Hapeu, angatre kö a xatua së troa qale catre koi Iehova? Nemene la ka nyipiewekë koi angatr? Angatr palahi a porotrikë iheetr, me manie, me mobilis, maine itre nyine iamadrinë pena? Ka majemine kö angatr ixöjetrij? Nge tune kaa la aqane ihnyima? Hnei Iesu hna hmekë së me hape: “Kola ewekë la që qa kuhu hni.” (Mat. 12:34) Maine epuni a öhne laka, hetre ethane lai kowe la aqane imelekeu i epun me Iehova, haawe trotriji angatre pi! Thupëne kö la aqane ce tro, maine pena the ce tro hmaca kö me angatr.—Ite edomë 13:20. w18.07 18 par. 11

Ame ngöne lo kola 80 lao macatre i Mose, hnei Iehova hna upi angeic troa thapa la nöje i Nyidrëti hna thahluën e Aigupito. (Eso. 3:10) Hnei Mose hna anyimua thele kepin, matre tha tro kö a kuca la hnëqa cili. Ngo hnei Iehova hna xomihni ahoean. Ketre, hnei Nyidrëti hna aijijë Mose troa kuca la itre iamamanyikeu. (Eso. 4:2-9, 21) Maine ju, ijiji Iehova hi troa kuca la ketre ewekë matre troa xou hnei Mose, me drei Nyidrë. Ngo hnei Iehova hna xomihni me qaja koi angeic ka hape, tro Nyidrëti a ce me angeic. Hapeu, hetre thangane kö? Eje hi! Mose la hna iëne matre troa elemekene la nöje i Akötresie. Hnei angeice fe hna thele troa thiina ka menyik me wangatrune la itre xan, tune la aqane kuca Iehova koi angeic. Maine jë, hetre hnëqa së me musi së, ngo ame pe, nyipiewekë tro sa nyitipu Iehova. Loi e tro sa thiina ka menyik me atreine xomihni kowe la itre föe së me itre nekö së me kowe fe la itre trejin. (Kol. 3:19-21; 1 Pet. 5:1-3) Maine tro sa nyitipu Iehova Akötresie me Iesu Keriso, ene lo Mose Ka Tru, tro hë itre xan a canga ithanata me easë. Tro fe angatr a kapa la itre ithuecatre qaathe së.—Mat. 11:28, 29. w18.09 23-24 par. 7-10

Ame la easa nyipiewekëne la itre trejine qatr, easë hi lai a ithuecatre koi angatr. E cili, kola acatrene la cas e hnine la ekalesia. Nemene la nyine tro epuni a kuca matre troa imajemikeu memine la itre xaa trejin? (2 Kor. 6:11-13) Ijije hi troa hudrume la lai së, ngöne la götrane hne së hna mele ngön. Tro la aqane ujë së a hamë aja kowe la itre ka lapa ezi së, troa hane atrepengöi Iehova. Loi e tro sa isa hnying, ka hape: ‘Nemene la aqane goeë ni hnei angatr? Hna nyidrawane kö la hnalapang? Ka mingöminge kö ej nyipine la tribu? Eni kö a xatuane la itre ka lapa easenyi ni?’ Sipone jë kowe la itre xa trejin troa qaja la thangan la hnei angatr hna thiina ka loi kowe la itre sinee i angatr. Tune kaa fe la itre ka lapa ezi angatr, me itre sine ce huliwa i angatr me sine ini angatr?—Efe. 5:9. w18.06 24 par. 13-14

Ka nyipici la hna qaja ngöne la topik. Celë hi aqane mekune ne lo itre ka humuthi Setefano. (Itre hu. 6:8, 12; 7:54-60) Nyimutre la itre ka hmi ka ihumuth me ka qaja ekö ka hape, aja i Akötresieti lai. Ngo ame pe, ka isazikeu la hnei angatr hna kuca memine la wathebo i Akötresie. (Eso. 20:13) Eje hi, tha hna inine hnyawa kö la mekuthetheu i angatr! Nemene la ka troa thupëne la mekuthetheu së? Hetrenyi e hnine la Wesi Ula i Akötresie, la itre wathebo me itre trepene meköt ka “nyipiewekë göi troa hamë ini, me hmekën, me xom amekötine la nöjei ewekë, me hajin ngöne la thiina ka meköt.” (2 Tim. 3:16) Maine tro sa catre inine la Tusi Hmitrötr, me mekun ajuin ej, me trongëne ngöne la mele së, tro hë sa hane xome la aqane mekune i Iehova. E cili, tro ha eatrongë së hnyawa hnene la mekuthetheu së. w18.06 15-16 par. 3-4

Ame la itre sooce ne Roma, tre, hetrenyi angatr la taua ka 50 lao centimètre la eqean. Nge, hnei angatr hna inin e nöjei drai troa huliwane la taua matre, maca hnyawa ha koi angatr troa isi. Öni Paulo aposetolo, ceitune hi la Wesi Ula i Akötresie memine la taua. Iehova la ka hamë së la Tusi Hmitrötr. Ngo, nyipiewekë tro sa inin la aqane troa huliwane hnyawane ej matre tro sa atreine isigöline la lapaune së, me wenë amekötine la itre mekuna së. (2 Kor. 10:4, 5; 2 Tim. 2:15) Tha tro pi kö sa xoue Satana me itre dremoni. Nyipici laka, hetre mene i angatr, ngo sisitria kö la mene i Iehova. Ketre, tha tro kö angatr a mele palua. Troa traqa la ijin laka, troa akalabusi angatr ngöne la Itre Macatre Ka Ca Thauzane Ne Musi Keriso, nge tha tro hmaca kö angatr a iakötrë. Thupene lai, tro ha lepe apatrenyi angatr. (Hna ama. 20:1-3, 7-10) Atre hnyawa ha së la pengöi Satana, memine la itre nyinyithiina i angeic, me aja i angeic. Jëne la ixatua i Iehova, ijiji së hi troa thipetrije la itre nyinyithiina i Satana! w18.05 25 par. 15; 26 par. 19-21

Atre hnyawa hi Adamu laka, tha ka ithanata kö la un. Celë hi matre, ame la Adamu a dreng laka, hnei Eva hna ithanata memine la ketre un, canga trotrohnine ju hi Adamu laka, ketre u la ka ithanata me Eva. (Gen. 3:1-6) Thatre kö Adamu me Eva la ëjene la u cili. Ngo, hnei Adamu hna iën troa ce xöl me ej, me icilekeu memine la Keme angeic e hnengödrai. (1 Tim. 2:14) Qaane ju hi lai, hnei Iehova hna amamane trongëne la pengöne la ithupëjia cili, me thingehnaean laka, tro kö a lep apatrene ej elany. Ngo, hnei Iehova hna hmekë së laka, tro la u ka ithanata jëne la un, a icilekeu memine la itre ka hnimi Akötresie. (Gen. 3:15) Tha hnei Iehova kö hna qaja amamane la ëjene lo ka icilekeu me Nyidrë. Ngo, 2 500 lao macatre thupene la hna icilekeu e Edena, hnei Nyidrë hna amamane la ithupëjia cili.—Iobu 1:6. w18.05 15-16 par. 1-2

Maine jë, hna hane traqa koi epun la kucakuca ke, hna xele ma dreng la maca ne la Baselaia hnene la itre atr ne la teritoare i epun. Haawe, casi hi la mekuna i epun me Paulo aposetolo. Traqa koi 30 lao macatre ne cainöje Paulo. Hnei angeic hna xatuane la itre atr ka alanyimu troa hane nyihlue i Akötresie. (Itre hu. 14:21; 2 Kor. 3:2, 3) Ngo, nango jole pi hë koi angeic troa xatuane la itretre Iudra. Alanyimu e angatr ka xele ma drei angeic, nge ame itre xan, kola icilekeu me angeic. (Itre hu. 14:19; 17:1, 4, 5, 13) Tune kaa Paulo ngöne la kola icilekeu me xele ma drei angeic? Öni angeic: “Eni a hleuhleu, nge hace pala hi la hning.” (Rom. 9:1-3) Pine nemen matre kola akötre tune lai hnei Paulo? Pine laka, atraqatr la aja i angeic troa cainöj, nge tru la ihnimi angeic kowe la itre atr. Tru mina fe la hnei angeic hna mekune la itretre Iudra. Nge kola hace la hni angeic, ngöne la angatr a thipëne la utipine i Akötresie. Ceitu së hi me Paulo, easa cainöje kowe la itre atr ke, easa hnimi angatr me ajane troa xatua angatr.—Mat. 22:39; 1 Kor. 11:1. w18.05 4 par. 4-5

Hnei Paulo hna amamane laka, ame la itre hna acil troa hamë ithuecatr, tre, angatre fe a aja ithuecatr. Öni angeic kowe la itre trejin ne Roma ka hape: “Tru catre la ajange troa iöhnyi me nyipunie me xatuane la lapaune i nyipunie, matre tro nyipunie a catre huliwa koi Akötresie, ngo loi e tro sa itö ithuecatrekeu qa ngöne la isa lapaune së, lapauneng me lapaune i nyipunieti mina fe.” (Rom. 1:11, 12) Haawe, kola mama laka, Paulo fe a hane aja ithuecatr e itre xa ijin. (Rom. 15:30-32) Ame enehila, loi e tro sa ithuecatre kowe la itre ka huliwa i Akötresie o drai, tune la itre pionie. Drei la nyine tro sa ithuecatre kow? Loi e tro sa ithuecatre kowe la itre trejin ka lapa cas ke, aja i angatr troa drengethenge Iehova me faipoipo “thei Joxu hmekuje hi.” (1 Kor. 7:39) Loi e tro fe sa thuecatre kowe la itre trejin hna akötrën, me itre ka wezipo.—2 Thes. 1:3-5. w18.04 21 par. 3-5