Mei

Ame enehila, nyimutre la itre atr ka kötr qa ngöne la nöje i angatr, troa mele ngöne la itre xa nöj. Loi e tro sa pane inine troa ibozu ngöne la qene hlapa i angatr. Ijije hi tro sa inine la itre xa hnepe hnaewekë nyine nyiqane ithanata. Loi e tro fe sa amamane la itre video me itre itus ngöne la sipu qene hlapa i angatr, hnine la sit jw.org. Iehova a xatua së troa maca ngöne la huliwa ne cainöj. Jëne la icasikeu hna hape, Mel Me Huliwa Ne Cainöj Ne La Keresiano, Nyidrëti a ini së me xatua së troa wange hmaca la itre atr, me nyiqane ini Tusi Hmitrötr. Loi e tro sa inine la itre nekö së troa sipu qaja la mekuna i nyudren. Hnene la itre xan hna kapa la nyipici qa ngöne la hna cainöj koi angatr hnene la itre nekönatr.—1 Kor. 14:25. w18.06 22-23 par. 7-9

Tha tro pi kö sa thëthëhmine laka, ka iananyi catre së ekö me Akötresie. (Efe. 2:12) Ngo jëne la “eno ne ihnim,” hnei Iehova hna ee së koi Nyidrë. (Hos. 11:4; Ioane 6:44) Ketre tui Keriso, hnei nyidrëti hna kepe së me aijijë së troa itre atrene la lapa ka casi Akötresie. Ngacama itre atr ka ngazo së, ngo hna kepe së hnyawa hnei Iesu. Haawe, loi e tro fe sa kapa la nöjei atr asë! Easenyi hë la pune la fene celë ka ngazo, matre kola isa mele la itre atr, me iwangatrehmekunyi atr me imethinë. (Gal. 5:19-21; 2 Tim. 3:13) Ngo pine laka itre hlue i Iehova së, easa ajane troa hetrenyi la “inamacan qaa hnengödrai,” ka troa xatua së troa thipetrije la iwangatrehmekunyi atr me thele tingeting. (Iako. 3:17, 18) Madrine catre së troa nyi sineene la itre atr ka mele ngöne la itre xa nöj, me kapa la aqane mele i angatr, me inine la qene hlapa i angatr. E cili, tro ha “tune la hneopegejë” la tingetinge së, me “tune la ite hoke ne gejë” la thiina ka meköti së.—Is. 48:17, 18. w18.06 13 par. 18-19

Thatreine kö la sooce ne Roma troa tro ngöne la hnë isi, nge pëkö ibutre i angeic. Hna cane ngöne la trepene ibutr la könitre lao xötr ne kupeine öni, matre catrecatre lai ibutr. Ketre, hna cane hnyawa ej nyine trongë ihnadro, nge tha tro kö a ucic memin. Tune la aqane xatuane la sooce hnene la lue ibutre i angeic troa hun ngöne la isi, tro la lue ibutre ne la ixetre ne isi a xatua së troa qaja “la maca ka loi ne tingeting.” (Is. 52:7; Rom. 10:15) Ame itre xa ijin, nyipiewekë tro sa hetre trengecatr troa cainöj. Öni Bo, ka 20 lao macatre: “Ame ekö, eni a xou troa cainöj kowe la itre sine xötreng. Ma eni jë a hmahma. Ame la eni a mekun hmaca tre, thatre kö ni la kepin matre eni a ujë tun ekö. Ngo ame hë enehila, madrine catre ni troa cainöj kowe la nöjei atr.” Alanyimu la itre thöth ka mekune laka, ka hmaloi troa cainöj, e hna pane hnëkë hnyawa. w18.05 23-24 par. 9-11

Öni Iesu kowe la itre aposetolo: “Thei nyipunieti hë la tingetingeng.” (Ioane 14:27) Nemene la aqane tro la tingetinge i Iesu a xatua së troa catre cainöj? Ame la easa catre cainöj, kola tingetinge la hni së ke, atre hi së laka, easë hi lai a amadrinë Iehova me Iesu. (Sal. 149:4; Rom. 5:3, 4; Kol. 3:15) Thupene la hnei Iesu hna qaja kowe la itretre dreng la aja i nyidrë tro angatr a madrin, nyidrëti a qaja jë la enyipiewekëne troa ihnimikeu. (Ioane 15:11-13) Thupene lai, öni nyidrë: “Eni pe a hë nyipunie ka hape, sinee.” Drei la ketre ahnahna ka tru, e tro sa enehmu i Iesu! Ngo, nemene la nyine tro la itre aposetolo a kuca matre tro palahi angatr a itre sinee i Iesu? Öni Iesu: “Troa hamë wen, nge tro ha cile huti la itre wene cili.” (Ioane 15:14-16) Lue macatre qëmekene lai, öni Iesu kowe la itre aposetolo ka hape: “Ame ngöne la nöjei jë i nyipunie, cainöjëne jë ka hape: ‘Calemi hë la Baselaia ne hnengödrai.’ ” (Mat. 10:7) Celë hi matre, ame lo hej qëmekene tro Iesu a mec, hnei nyidrëti hna thuecatrene la itretre drei nyidrë troa cile hut ngöne la huliwa ne cainöj.—Mat. 24:13; Mar. 3:14. w18.05 13-14 par. 15-16

Itre thöthi fe, amë panëne jë la itre ewekë ka troa amadrinë Iehova ngöne la mele i epun, memine la itre mekun hnei epuni hna mekun troa eatrën. Alanyimu la itre sine xötre i epun ka thel troa isa kuci aja. Nge, tro fe angatr a hane hë epun troa nyitipu angatr. Troa traqa la ijin laka, loi e tro epuni a amamane hnyawa koi angatr laka, ame la ka tru koi epun tre, ene la troa eatrëne la itre hnei epuni hna mekun. The nue kö la ketre troa sewe epuni troa eatrën itre ej. Haawe, nemene la nyine tro epuni a kuca e kola huli epun hnene la itre atr troa ujë tui angatr? The easenyine kö la itre ewekë ka troa huli epun kowe la ngazo. (Ite edomë 22:3) Pane mekune jë la itre ethanyine la itre huliwa ka ngazo. Loi e troa hetre hni ne ipië me kapa laka, nyipiewekë la ihaji. Drenge ju la hna qaja hnei keme me thin, memine la itre trejin ka macaj ne la ekalesia. (1 Pet. 5:5, 6) Hapeu, hetre hni ne ipië i eö kö troa kapa la ihaji? w18.04 28-29 par. 14-16

Ame ngöne la tusi Iesu kowe la itre ekalesia e Asia, hnei Iesu hna qaja la hni ne ole i nyidrë kowe la huliwa hna kuca hnene la itre hlue i nyidrë. Hnei Iesu hna pane qaja la ekalesia ne Thuataira, me hape: “Atre hi ni la itre hnei eö hna kuca, me ihnim, me lapaun, me huliwa i eö koi Akötresie, me aqane cile huti eö, nge atre fe hi ni laka, tru catre hmaca kö la itre huliwa i eö enehila hun ekö.” (Hna ama. 2:19) Hnei Iesu hna qaja aloine la nöjei huliwa memine la itre thiina i angatr ka lolo. Ngacama hnei Iesu fe hna hajine la itre xan e Thuataira, ngo hnei nyidrëti hna nyiqaane me nyipune la tusi nyidrë me hamë ithuecatr. (Hna ama. 2:27, 28) Pane mekune jë la men ka eje thei nyidrë pine laka, nyidrëti la tane la nöjei ekalesia. Maine ju, tha tro kö nyidrëti a olene koi së la huliwa hna kuca. Ngo nyidrëti a madrine troa amamane la etrune la hni ne ole i nyidrë. Drei la ketre tulu ka lolo kowe la itre qatre thup! w19.02 16 par. 10

Hnei Iehova hna nyijëne la lapa ne xomi meköt ekö matre troa thuecatrene la itre keresiano, ene mina fe la itre ka elemekene la itre ekalesia. Hnei angatr hna upi Peteru me Ioane, lue atrene la lapa ne xomi meköt, troa thith thatraqane la itre trejin e cili, matre tro angatr a hane kapa la uati hmitrötr. (Itre hu. 8:5, 14-17) Hna thuecatrenyi Filipo memine la itre trejine cili hnene la ixatua qaathene la lapa ne xomi meköt! Ame enehila, hnene la Lapa Ne Xomi Meköt ne la Itretre Anyipici Iehova hna hamë ithuecatre kowe la itre ka lapa Bethela, me itre ka xome la ketre pengöne huliwa koi Akötresie o drai. Nge, kolo fe a hamë ithuecatre koi së asë. Tune la itre pane keresiano, madrine catre së troa kapa la itre ithuecatr! Ame lo 2015, hna mama lo boroshür hna hape, Bëeke Jë Koi Iehova. Jëne la boroshüre cili, hnene la Lapa Ne Xomi Meköt hna thelejëne troa ithuecatre kowe la itre ka trotrije la nyipici. w18.04 19 par. 18-20

Hetre itre ka mekun ka hape, loi e troa nue la itre atr troa isa kuci mekun. Ngo pane mekune jë la pengöne la fen, e pëkö ifego hna acil. Önine lo itus hna qaja ha e caha ka hape, ka jole catr la itre wathebo hna acil hnene la itre mus ke, kola thupëne la atr, ngo ame pe, kolo fe a hnöthe la mele i angatr. Haawe, tha ka hmaloi kö troa trongën. Celë hi kepin matre nyimutre catr la itre wathebo hna acil. Ketre, alanyimu catre la itre ka thel troa qejepengöne ej, me upe la itre atr troa trongëne itre ej. Matre, lue ewekë nyine tro sa kuca. Ame la hnapan, loi e tro sa kapa la nyipici hna tro fë hnei Iesu. Nge ame la hnaaluen, loi e tro sa hane atre drei nyidrë. Maine tro sa ujë tune lai, tro ha nuamacanyi së. Ngo, troa nuamaca së qa ngöne nemen? Öni Iesu: “Ame la nöjei atr ka kuca lapane la ngazo, itre hlue ne la ngazo angatr.” Öni nyidrëti hmaca jë hi: “Maine tro la nekön a nue xecië nyipunie, ka mele hë nyipunieti lai.”—Ioane 8:34, 36. w18.04 6-7 par. 13-14

Madrine catre së troa ce mel memine la itre atr ka wangatrunyi së me ka hnehengazo së. Tha angatre kö a thele la itre sipu aja i angatr. Angatre pe a wangatrune la itre mekuna së me itre hne së hna ajan. Tha angatre kö a treqene tro sa sipo ixatua. Ame la angatr a öhne la itre jole së, angatr a canga hamë ithuecatr me ixatua. Tru la hni ne ole së koi angatr ke, angatr a amamane la ‘ihnimi’ angatr koi së. Ame easë itre Keresiano, easa hnim me utipin la itre xan. Ngo tha ka hmaloi kö e itre xaa ijin. Pine nemen? Pine laka, itre atr ka tha pexeje kö së. (Rom. 3:23) Canga tro hi sa isa meku së. Celë hi matre, loi e tro sa inin troa meku itre xan, nge pi së pë hë. Ame itre xan, jol koi angatr troa utipin me iwangatrunyi ke, hnene la itre ewekë hnei angatr hna melën, maine aqane hetru angatr pena. Ketre, ijije hi troa ajojezi së hnene la aqane ujë ne la itre atr. Easë ngöne la itre drai tixenuë, matre itre atr a ketre sipu meku angatre kö. Angatr a “hnimi angate kö.” (2 Tim. 3:1, 2) Ngo ame pe, ijije hi tro sa tui Iehova Akötresieti me Nekö i Nyidrë, Iesu Keriso, me wangatrune la itre xan. w19.03 14-15 par. 1-3

Ame ngöne la wathebo tixenuë ne lo 10 lao Wathebo, kola qaja laka, tha tro kö a piine la ifekë ewekën. (Deu. 5:21; Rom. 7:7) Hnei Iehova hna cinyihane la wathebo celë, matre troa hamëne koi së la ketre ini ka tru. Loi e tro la nöje i Nyidrë a thupëne la itre hni angatr, ene la itre mekun me itre aliene hni angatr ka ngazo. Atre hnyawa hi Iehova laka, hna nyiqaane la ngazo hnene la itre mekun, nge kolo pë hë a mama pe ngöne la itre huliwa. Celë hi ka traqa koi Davita joxu. Ketre atr ka lolo angeic. Ngo ame la ketre ijin, hnei angeic hna piine la ifekë föen, me kei kowe la ngazo. (Iako. 1:14, 15) Hnei Davita hna nyixetë me thele troa juetrëne la ngazo, me humuthi Uria. (2 Sam. 11:2-4; 12:7-11) Tha Iehova hmekuje kö a goeë së. Nyidrëti fe a goeëne la pengö së e kuhu hni së. (1 Sam. 16:7) Öhn asë hi Nyidrëti la itre mekuna së, itre aliene hni së, me itre aqane ujë së. Pëkö ka sihngödri koi Nyidrë. Öhne kö Nyidrëti la ka loi the së. Nyidrëti a upi së tro palahi a kuca la loi. Ngo aja i Nyidrëti fe tro sa canga lepetrije la itre mekun ka ngazo, wanga kei pi së.—2 A. l. ite jo. 16:9; Mat. 5:27-30. w19.02 21 par. 9; 22 par. 11

Öni Tusi Hmitrötr, ketre atr “ka nyipi menyike Mose hune la nöjei ate asë e celë fen.” (Num. 12:3) Hapeu, kolo kö lai a hape, Mose a xou troa axecië mekun ngöne la kola icilekeu? Celë hi aqane goeëne itre xan, la atr ka thiina ka menyik. Ngo tha eje kö lai. Mose la hlue i Akötresie ka catr me ka atreine axecië mekun. Jëne la ixatua i Iehova, hnei Mose hna cile kowe la joxu ne Aigupito ka catr, me eatrongëne la 3 milio lao atr ngöne la hnapapa. Hnei angeice fe hna xatuane la nöje Isaraela troa lepe la itre ithupëjia. Eje hi laka, tha easë kö a melëne la itre jole hnei Mose hna cile kow ekö. Ngo, ame ngöne la nöjei drai, easa cile kow la itre jol me itre atr ka ajolë së troa thiina ka menyik. Nyipiewekë tro sa eënyine la thiina cili ke, öni Iehova, “tro la ange ka menyike a hetenyi la nöj.” (Sal. 37:11) Hapeu, ka thiina ka menyike kö së? Itre xane kö a goeë së ceitu me ketre atr ka thiina ka menyik? w19.02 8 par. 1-2

Hnei Iehova hna xupe la itre atr cememine la mekuthetheu. Pine nemene matre, qaja jë së ka hape, ka hetre mekuthetheu i Adamu me Eva ekö? Thupene la hnei nyidroti hna tha idrei, hnei nyidroti hna zae Nyidrë. Kolo ha huliwa la mekuthetheu i nyidro. Ame la mekuthetheu, tre, kola qaja la troa atrein atrehmekune la loi me ngazo. Ej a eatrongë së. Hna aceitunëne la mekuthetheu memine la kabas (boussole). Canga tro hi a ufe enyin la he me hule hnei gejë, matre triane hë la gojeny. Eloine pe, ka loi la kabas, matre kola xatuane la kapen troa bëeke kowe la gojeny. Ceitune hi lai memine la mekuthetheu. Maine tro sa catre inine ej, haawe, tro hë ej a eatrongë së hnyawa. Maine tha hna inine hnyawa kö la mekuthetheu së, thatreine kö tro ej a sewe së troa kuca la ngazo. (1 Tim. 4:1, 2) Tro pena ha sa mekun ka hape, ame la “ngazo, te, loi.” w18.06 15 par. 1-3

Loi e tro sa thupëne me thipetrij la itre mekuna i fen, ke, tha ka canga mama kö koi lue mek. Drei la ketre ceitun. Hna kuca la itre xaa reportage matre troa qaja atrune la ketre politik. Maine jë, kola upi së troa thele huliwa me wangatrune la itre ewekë ne fen. Hna kuca la itre xaa film me itre xaa itus, matre upe la itre ka goeëne troa ketre sipu meku angatre kö me itre hnepe lapa i angatr. Ngo tha celë kö lai hna qaja hnei Tusi Hmitrötr. Ej a qaja ka hape, tro hi sa madrin e hne së hna catre hnimi Iehova. (Mat. 22:36-39) Tha kolo kö a qaja ka hape, ka ngazo la kuci madrin. Ngo loi e tro sa isa hnying, ka hape: ‘Atreine kö ni wangatrehmekune la mekuna i fen, ngacama tha ka canga mama kö? Eni kö a thupën, eni me itre neköng, matre tha tro kö a goeëne la itre xaa film me itus? Eni kö a xatuane la itre neköng troa ce mekun me Iehova, matre tha tro kö nyudreni a mekune la itre ewekë ne fen, ngöne la kola dreng maine öhne pena?’ w18.11 25 par. 18-19

Iehova a amamane laka, ce Nyidrëti me easë, la Nyidrëti a wangatrunyi së me hnimi së. Hanawang la aqane amamane Iehova la aliene hni Nyidrëti koi së. Öni Nyidrë: “Eö la hniminang, tro ni a atrunyi ’ö; nge hnenge hna hnimi ’ö.” (Is. 43:4) Pëkö ewekë e celë fen me e koho hnengödrai, ka atreine troa thapa la ihnimi Iehova kowe la itre ka mele nyipici koi Nyidrë. (Is. 54:10) Tha hnei Iehova kö hna qaja ka hape, tro Nyidrëti a xometrije la itre jol hne së hna cile kow. Öni Iehova, tha tro kö Nyidrëti a nue la “ite hneopegejë” ne la itre jol troa tranyi së. Ketre, tha tro kö la “ukahlokin” ne la itre itupath a akötrë së. Hnei Iehova hna thingehnaean laka, tro kö Nyidrëti a ceme easë, me xatua së troa “trongëne” me cile kowe la itre jol. Nemene la hna troa kuca hnei Iehova? Nyidrëti a troa apatrene la xou së, matre tro palahi sa catr, ngacama kola thele troa humuthi së. (Is. 41:13; 43:2) Maine tro sa mejiune kowe la hna thingehnaeane hnei Akötresie ka hape, “Ce ini me eö,” haawe, tha tro hë sa xou, ngo tro pe sa cile catr ngöne la itre jol. w19.01 3 par. 4-6

Maine ketre thöthi hi epun, nyimutre la itre eamo hnei epuni hna kapa qaathene la itre porofesör me itre xan, matre troa kuca la itre ini ka tru maine thele huliwa hna nyithupene hnyawa. Ngo tha celë kö mekuna i Iehova. Nyipici laka, Iehova a ajane tro epun a ini hnyawa, matre troa hetre huliwa ka loi, me hetrenyi la ka ijij thatraqane la mele i epun. (Kol. 3:23) Ngo atre hi Nyidrë, laka, hetre mekune ka tru hnei epuni hna troa xom thatraqane la mele i epun elany. Celë hi matre, hnei Iehova hna hamëne la itre trepene meköt, matre troa eatrongë epun. Tro fe lai a xatua epun troa amadrinë Nyidrë, ngacama epuni a melëne la itre drai hnapine celë. (Mat. 24:14) Pëkö ewekë ka sihngödri koi Iehova. Atre hnyawa hi Nyidrëti la itre ewekë ka troa traqa elany, memine la aqane troa nyipune la fene celë. (Is. 46:10; Mat. 24:3, 36) Atre epuni hnyawa hi hnei Iehova. Atre hi Nyidrëti la itre ewekë ka amadrinë epun me akötrë epun. Maine jë, tha ka ngazo kö la itre eamo hna hamëne hnene la itre xaa atr. Ngo maine tha hna nyitrepene kö hnei Tusi Hmitrötr, tha itre eamo kö lai ka inamacan. w18.12 19 par. 1-2

“Tro la ange ka menyike a hetenyi la nöj, nge tro angat’ a madine la tingetinge atraqat.” Öni Davita mina fe: “Tro ha la ange ka meköti a hetenyi la nöj, me lapa palua kö ngön’ ej.” (Sal. 37:11, 29; 2 Sam. 23:2) Nemene la thangane la itre hna thingehnaeane celë, kowe la itre ka thele troa kuca la aja i Akötresie? Angatr a mejiune laka, troa traqa la ijine tro la itre atr ka meköti a mel e celë fen ngöne la paradraiso, tune ekö e Edena. Nyimutre la itretre Isaraela ekö, ka trotriji Iehova me nuetrije la nyipi hmi. Celë hi matre, hnei Akötresieti hna nue angetre Babulona troa thapa me lepe me thahluëne la nöje i Nyidrë. (2 A. l. ite jo. 36:15-21; Iere. 4:22-27) Ngo, hnene la itre perofeta i Akötresie hna perofetane ka hape, thupene la 70 lao macatre, tro hmaca la nöje i Nyidrë a bëeke kowe la nöje i angatr. Nge hna eatrëne hnyawa la itre hna qaja. Ka hetre aliene fe koi së enehila la itre hna perofetane cili ke, itre ej a acatrene la mejiune së kowe la paradraiso elany. w18.12 4 par. 9-10

Nyimutre la itre eamo hna hamëne hnene la itre atrene fen, ngo ka ifeketh memine la hna qaja hnei Tusi Hmitrötr. Ngo hapeu, ka loi kö la itre eamo ne fen hune la itre eamo hna hamën hnei Tusi Hmitrötr enehila? Öni Iesu: “Kola mama la inamacan hnei huliwa.” (Mat. 11:19) Ngacama kolo palahi a elë la inamacane i fen, ngo hna hmaca pe hi la inamacane i angatr göne la aqane troa mele madrin, me aqane troa apatrene la itre isi, me iwangatrehmekunyi atr, me iakötrë. Ketre, ame kowe la itre atrene fen, pëkö engazone la troa kuci ngazo. Itre xan a mekun laka, celë hi ka thë la itre hnepe lapa. Ketre kepine lai matre hetre ethane kowe la mele së. Tune kaa la itre eamo qaathei Iehova? Ame la itre keresiano ka kapa la mekuna i Iehova, tre, ka madrine la hnepe lapa i angatr, angatr a egöcatr, nge lolo la aqane imelekeu i angatr memine la itre trejin e cailo fen. (Is. 2:4; Itre hu. 10:34, 35; 1 Kor. 6:9-11) Kolo lai a amamane laka, ka draië catre kö la mekuna i Iehova hune la mekuna i fen. w18.11 23 par. 8-10

Eje hi laka, aja së troa lolo la aqane imelekeu së memine la itre fami së. Ngo thatreine kö tro sa wangesixane la itre hna amekötin hnei Iehova, ke, easa ajane troa amadrinë angatr. Loi e tro sa ce sinee memine la itre ka hnimi Iehova. Maine easa ajane tro palahi a tro ngöne la nyipici, nyipiewekë tro sa wië xajawa i Iehova. (Is. 35:8; 1 Pet. 1:14-16) Ame lo easa atre la nyipici, hne së hna saze aqane mel, matre trongëne la hna qaja hnei Tusi Hmitrötr. Ame itre xan, tru catre la itre ewekë hnei angatre hna saze. Ngo nyipiewekë tro sa hmek, matre tha tro kö sa kei kowe la ngazo, me kuca la itre huliwa ka sis. Nemene la ka troa xatua së troa cile catr kowe la itre itupath, me thupë së qa ngöne la itre huliwa ka sis? Pane mekune jë së la itre hna hamën hnei Iehova, matre tro sa wië xajawa i Nyidrë. Hnei Iehova hna huujëne la mele i Iesu Keriso, Nekö Hnimina i Nyidrë! (1 Pet. 1:18, 19) Eje hi, maine tro sa lapa mekune la enyipiewekëne la meci Iesu, tro palahi sa wië xajawa i Iehova. w18.11 12 par. 10-11

Nyimutre la itre trejin ka huliwa i Iehova ngöne la drai ka pexej. Alanyimu la itre ka qaja ka hape, ame la troa catre cainöj, tre, celë hi jëne madrine i angatr, ngacama hetre ewekë ka saze ngöne la mele i angatr. Tui angatr, loi e tro palahi sa catre huliwa i Iehova me mejiune koi Nyidrë, matre troa tingeting la mekuna së ngöne la itre ijine jol. Ame la easa kapa hnyawa la ewekë ka saze ngöne la mele së, tre, kolo fe a acatrene la aqane imelekeu së me Iehova. Ijije hi tro sa hane saze la aqane mele së ngöne la fene celë. Maine jë, troa saze la hnëqa së ngöne la huliwa i Iehova, maine pena troa tithi së hnei mec. Maine jë, tro sa thupëne la hnepe lapa së. Ngacama traqa ju hë la itre jol, ngo mejiune jë koi Iehova, ke, Nyidrëti a wangatrunyi epun, nge aja i Nyidrëti troa xatua epun. (Heb. 4:16; 1 Pet. 5:6, 7) Catre pi. Thithi jë koi Iehova, Keme së, nge mejiune jë koi Nyidrë. E cili, troa thupëne la itre mekuna i epun hnene la tingeting ka sisitria qaathei Iehova. w18.10 26 par. 17; 26-27 par. 19, 22

Ame e hnine la Tusi Hmitrötr, kola mama la aqane wangatrune Iehova la nöje i Nyidrë. Pane goeëne jë ngöne 1 Samuela 3:1-18, la aqane xatua Samuela hnei Iehova, troa tro fë la maca ne iameköti koi Eli, atre huuj ka sisitria, ngacama thöthi petre kö angeic. Itre wathebo i Iehova a qaja kowe la itre nekönatr troa metrötrëne la itre qatr ka trene hnëqa. (Eso. 22:28; Lev. 19:32) Eje hi, maine jë, ketre hace ka tru koi Samuela troa hlë e hmakany, troa qaja koi Eli la maca ne iameköti qaathei Akötresie. Tusi Hmitrötr a qaja ka hape, Samuela “a qou troa thue macanyi Eli la hna amaman.” Ngo hnei Akötresieti hna amamane hnyawa koi Eli laka, Nyidrëti hi la ka hë Samuela. Hnei Eli e cili hna upi Samuela troa amamane koi nyidrëti la nöjei hna qaja hnei Akötresie, pëkö hna juetrën. Ame hnei Samuela “hna thue macanyi nyidëti la nöjei ewekë asë,” nge ka ihmeku memine la hna qaja ha koi Eli la maca cili. (1 Sam. 2:27-36) Kola amamane hnene la ceitune celë, la aqane ujë i Iehova memine la inamacane i Nyidrë. w18.09 21 par. 2; 22 par. 4-5

Nyimutre hë la itre atr enehila ka silitrengathoi. Kola qaja ngöne la tane mekun hna hape, “Pourquoi nous mentons” (National Geographic) ka hape, “hnahone pi la atr a ka thoi.” Ame kowe la itre atr enehila, pëkö engazone troa thoi. Itre atr a thoi matre troa thupëne la mele i angatr, maine juetrën la itre huliwa ka ngazo hna kuca. Angatre fe a thoi göi manie maine göi thupen. Önine lai tane mekun ka hape, tha jole kö kowe la itre atr troa thoi “kowe la itre trenyiwa, itre sine huliwa, itre sinee, me itre atr hna hnim.” Nemene la thangane la itre trengathoi cili? Öni Davita e thith, ka hape: “Hnei cilieti hna ajane la nyipici e kuhu hni.” (Sal. 51:6) Atre hi Davita laka, ame la ka sisitria, tre, aliene hni së. Hnene palahi la itre nyipi Keresiano hna “iqajakeun la nyipici.”—Zaka. 8:16. w18.10 4 par. 4; 5 par. 9-10; 8 par. 19

Ame ngöne lo 1513 M.P.K., tre, hna sasaithe la 3 milio lao angetre Isaraela ka feke qa Aigupito. Hetrenyi la itre nekönatr me itre qatr, me itre ka wezipo me sinatr. Eje hi, alanyimu catr angatr, matre nyipiewekë troa elemekene la nöj hnene la ketre atr ka loi thiina me ka atreine itrotrohni. Celë hi kepin matre kola ië Mose hnei Iehova. E cili, tha hnene kö la angetre Isaraela hna xou troa fek qa Aigupito, kowe la ketre nöj hna thatre. (Sal. 78:52) Nemene la aqane wangatrune Iehova la nöje i Nyidrë? Ame ngöne lo ijine kola fek hnene la angetre Isaraela qa Aigupito, ke, hetre hnei Nyidrëti “hna hnëkën.” (Eso. 13:18) Eje hi, lolo la aqane eköthe Iehova la nöje i Nyidrë, matre mama hnyawa laka, ce Nyidrëti me angatr. Ketre, hnei Iehova hna “e angate hnene la iaw e lai” memine la “hudumene eë ngöne la jidi ka pexej.” Iehova a ajane troa amamane kowe la nöj laka, Nyidrëti palahi la ka eatrongë angatr me thupë angatr.—Sal. 78:14. w18.09 24 par. 11-12

Ame fe ekö, nyimutre la itre hlue i Iehova ka hleuhleu me akötr ke, tru palaha la itre jol hnei angatr hna cile kow. Pëhë aliene la mele i angatr. Hanawang la ketre ceitun. Iobu la ketre atr hna akötrën. Öni angeic: “Sisi ni it’ ej; tha ajange kö la tro pala kö a mel.” (Iobu 7:16) Hnei Iona mina fe hna qaja ngöne lo ijine angeic a akötr, ka hape: “Iehova fe, enehila epi xomejë la meleng; ke loi e tro ni a meci ngo ngazo e troa mel.” (Iona 4:3) Ketre tui Elia perofeta, öni nyidrë: “Iehova fe, loi hë enehila, xomi ni jë.” (1 Ite jo. 19:4) Tru la ihnimi Iehova kowe la itre hlue i Nyidrë, matre aja i Nyidrë tro angatr a mel. Tha hnei Iehova kö hna ameköti angatr pine la hnei angatr hna qaja. Ngo hnei Nyidrëti pe hna akeukawan la itre hni angatr, matre madrine hmaca jë angatr troa catre nyihlue i Nyidrë. w18.09 9 par. 4

Ka hnimi trenyiwa la itre hlue i Akötresie. (Heb. 13:2) Hetrenyi e hnine la Tusi Hmitrötr, la itre tulu ka xatua së troa hnimi trenyiwa. (Gen. 18:1-5) Maine ijij, loi e tro palahi sa xatuane la itre atr, tune “la itre trejin ngöne la lapaun” me itre xane ju kö. (Gal. 6:10) Hapeu, ijije kö tro sa ce huliwa me Iehova me kapa la itre trejin ka huliwa i Nyidrë o drai? (3 Ioane 5, 8) Öni Tusi Hmitrötr, easa troa “ithuecatrekeu.” (Rom. 1:11, 12) Hetre ketre aqane tro la itre trejin trahmany a ce huliwa me Iehova. Tusi Hmitrötr a ithuecatre koi angatr troa thele troa hane drikona maine qatre thup. (1 Tim. 3:1, 8, 9; 1 Pet. 5:2, 3) Angatr a ajane troa xatuane la itre trejin troa imelekeu hnyawa me Iehova. (Itre hu. 6:1-4) Tru la madrin hna kapa hnene la itre trejin trahmany ka xome la itre huliwa ne la ekalesia. w18.08 22-23 par. 6-7; 24 par. 10

Ngacama nyimu hnëqa i Timoteo kö hune la itre trejine qatr ne la ekalesia, ngo hnei angeic palahi hna hetre hni ne utipin me metrötr koi nyudren. Tune kaa e traqa ju kuca hnene la ketre trejine qatr, la ketre ewekë hna methinën hnei Iehova? Ngacama ketre qatr hna metrötrën, ngo tha tro kö Iehova a nue la ngazo i nyidrë, e atre hi nyidrë laka, ka ngazo. Hane hi la hna qaja ngöne Isaia 65:20: “Ame la ate ka ngazo ka ca hadede la o macaten, te, tro hë hnëjin.” Celë fe hi hna qaja hnei Ezekiela. (Ezek. 9:5-7) Ame la ka nyipiewekë, tre, tro sa metrötrë Iehova, lo Qatr Atre Ka Hekö. (Dan. 7:9, 10, 13, 14) Maine tro sa metrötrë Iehova, tha tro kö sa xou troa hajine la ketre trejin ka aja ixatua, ngacama tru catre kö la macatre i angeic.—Gal. 6:1. w18.08 13 par. 13-14

Nyipiewekë tro asë hi sa inine troa xom me huliwane hnyawa la itre ithuemacany, matre meköt la aqane tro sa axecië mekun. (Ite edomë 3:21-23; 8:4, 5) Maine tha hmeke kö së, canga tro hi a amenune la mekuna së hnei Satana memine la fene i angeic. (Efe. 5:6; Kol. 2:8) Maine easa ajane troa axecië mekune hnyawa, nyipiewekë tro sa xome la itre nyipi ithuemacany. Nyimutre la itre ithuemacany hne së hna kapa enehila, jëne Ëternet me mail me tele me sms, me qaathene fe la itre sinee së. Celë hi matre, nyipiewekë tro sa hmek. Eje hi laka, pëkö engazone la hna iupi fë hnene la itre sinee së. Ngo ame pe, hetre itre ka iupi fë la itre ithuemacany ka thoi. w18.08 3 par. 1; 4 par. 3

Hnei Iehova hna ië Maria, ketre jajinyi ka hni ka ipië, troa nyi thine i Iesu, Nekö i Nyidrë. Ka mele Maria e Nazareta, ketre neköi traon ka nanyi qa Ierusalema memine la ēnē. (Luka 1:26-33) Jëne la hna qaja hnei Maria koi Elisabeth, ijij tro sa qaja ka hape, ketre sinee i Iehova nyiidro. (Luka 1:46-55) Tha sihngödri kö koi Iehova la etrune la ihnimi Maria. Öhne hi Nyidrë laka, ketre atr ka mele nyipici Maria. Celë hi matre, Nyidrëti a amanathithi nyiidro. Tha ase kö Maria mekune ka hape, troa eatrë nyiidro la ketre manathith ka tru, nge ka ketrepengöne kö. Ame ngöne la ijine hnaho Iesu, drei la hnei Iehova hna thuemacane ka hape, ase hë hnaho nyidrë? Tha itre taane kö maine itretre musi pena ne Ierusalema me Bethelema. Hnei Nyidrëti pe hna upe la itre angela kowe la itretre thupë mamoe, ngöne la hlapa tröne la traon e Bethelema. (Luka 2:8-14) E cili, hna tro hnene la itretre thupë mamoe troa iöhnyi memine la medreng. (Luka 2:15-17) Maine jë, hna sesëkötre hnei Maria me Iosefa la aqane wangatrunyi Iesu ngöne la ijine cili. w18.07 5-6 par. 11-12

Pine nemene matre hnei Iehova hna elëhni koi Solomona? Tusi Hmitrötr a qaja ka hape: “Hnei Iehova hna elëhni koi Solomona pine la hna aukene la hni angeice qa thei Iehova.” Hnei Iehova hna tupathe troa xatua Solomona. Hnei Nyidrëti hna “a lu a amamai nyidëti kö koi angeic nge ate ahnithe koi angeice ngöne ewekë ce laka tha tro kö angeic’ a xöte thenge la ite haze; ngo tha hnei angeice hna thupëne la hnei Iehova hna ahnithe koi angeic.” E cili, tha kepe angeice hmaca kö me xatua angeic hnei Akötresie. Ame fe lo itre matra i Solomona tre, tha hnei angatre kö hna musinën asë la nöje Isaraela. Nge itre hadredre lao macatre ne angatr a akötr. (1 Ite jo. 11:9-13) Eje hi, maine tro sa ce sinee memine la itre atr ka tha trotrohnine kö maine ka tha wangatrune kö la itre trepene meköti Akötresie, haawe, tro hë angatr a ajojezi së. Nge e cili, tro ha thë la aqane imelekeu së me Iehova. Kola qaja la itre atrene la ekalesia, ngo tha ka lolo kö la aqane imelekeu i angatr me Iehova. Kolo fe a qaja la itre atr ka tha nyihlue i Iehova kö, tune la itre sinee së, me itre atr ka lapa easenyi së, me itre sine huliwa së, me itre sine ini së. Eje hi, maine tro palahi sa ce lapa memine la itre atr ka tha melëne kö la itre trepene meköti Iehova, haawe tro ha ajojezi së uti hë la thë la aqane imelekeu së me Iehova. w18.07 17-18 par. 9-10

Ame enehila, Satana a jëne la itre film me televizio, matre troa haöthe la fen hnene la itre mekuna i angeic. Atre hi Satana laka, ka hetre thangane catre la itre ifejicatre. Itre ej a amamai së la aqane troa mekun me ujë. Hnei Iesu hna hane qaja la itre ceitun, matre troa hamëne la itre ini ka tru. Hnei nyidrëti hna hamëne la ceitun ne la atre Samaria, memine lo nekön ka trotrije la hnalapa me aluzine la itre mo i angeic. (Mat. 13:34; Luka 10:29-37; 15:11-32) Ngo jëne la itre ifejicatre, ijije hi tro la itre hna ajojezine hë hnei Satana a ananyi së qaathei Iehova. Celë hi matre, loi e tro sa atreine waiewekë hnyawa. Eje hi laka, hetre itre film me emisio ka lolo, nge pëkö ethane koi së. Ngo ame pe, loi e tro sa hmek. Qëmekene troa iëne la ketre nyine iamadrinë, loi e tro sa isa hnying ka hape, ‘Hapeu la film maine emisio celë, eje kö a upi ni troa kei thenge la itre aja ne ngönetrei?’ (Gal. 5:19-21; Efe. 2:1-3) Nemene la nyine tro sa kuca, e kola sajuëne la itre mekuna i Satana hnene la ketre film? Loi e tro sa canga neën, tune la ketre mec ka ixötrekeu! w19.01 15-16 par. 6-7

Tune la aqane thupëne la atuat ne la sooce hnene la itrapetr, tro la “mejiune la mel” ka ej the së a thupëne la itre mekuna së. (1 Thes. 5:8; Ite edomë 3:21) Nemene la aqane ajojezi së hnei Satana matre tro sa una la itrapetre së? Pane mekune jë së la aqane tupathi Iesu hnei angeic. Atre hnyawa hi Satana laka, tro Iesu a joxu ne la fen asë. Ngo, qëmekene lai, tro Iesu a pane akötr me mec. Ketre, atre fe hi Satana laka, tro Iesu a pane itreqe ke, troa acili joxu nyidrë ngöne la ijine hna sa hnei Iehova. Ame hnei angeic hna iaö Iesu matre tro hë nyidrëti a joxu. Nge, e tro Iesu a thili koi Satana ke, tro fe hë nyidrëti a musinëne la fene hnengödrai asë. (Luka 4:5-7) Atre hnyawa hi Satana la itre hnei Iehova hna thingehnaean thatraqai së ngöne la fene ka hnyipixe. Ngo, tro sa pane itreqe. Ketre, nyimutre la itre jol hne së hna troa melën qëmekene troa kapa la itre manathithi cili. Celë hi matre Satana a ajojezi së, me iaö së matre tro sa hetre mele ka loi enehila. Aja i angeic tro sa amë panëne la aja mo ngöne la mele së, nge pine pë hë la Baselaia i Akötresie.—Mat. 6:31-33. w18.05 25 par. 15-17

Iehova a ajane tro eö a madrin ngöne la ijine eö a thöth. Trotrohnine hë eö jëne la tane mekune celë laka, tro eö a madrin, e tro eö a amë panëne la itre mekun nyine tro eö a eatrën ngöne la mele i eö. Ketre, tro fe eö a trongëne la itre hna amekötin hnei Iehova ngöne la eö a axecië mekun. Maine celë hi hnei eö hna kuca tre, canga tro hi eö lai a öhne la aqane thupë eö hnei Iehova, me eatrongë eö, me amanathithi eö. Pane mekune jë la itre eamo hnei Nyidrëti hna hamë eö ngöne la Wesi Ula i Nyidrë, nge trongëne jë la hna hape: “Mekuneju la ate xupi ’ö ngöne la ite drai e [thöthi] ’ö.” (Ate cai. 12:1) Loi e troa qaja aloine la itre thöth ke, nyudreni palahi a amë panëne la huliwa i Iehova ngöne la mele i nyudren. Ketre, nyudreni a eköth la itre mekun nyine troa eatrën ngöne la huliwa i Iehova, nge ka tru koi nyudreni la huliwa ne cainöj. Nge, tha hnei nyudreni kö hna nue la fen troa thahe la itre mekuna i nyudren. Tha tro pi kö a gufa la trengecatre hnei epun hna kuca. Atraqatre la ihnimi ne la itre trejin koi epun, nge aja i angatr troa xatua epun. Haawe, “nuepi la nöjei huliwa i ’ö koi Iehova; nge troa acatene la nöjei mekune i ’ö.” w18.04 31-32 par. 17; 32 par. 19