Ogas

Ame ngöne la itre icasikeu, kola amekunë së la itre hnei Iehova me Iesu hna kuca thatraqai së. Easa olene atraqatr koi nyidro, matre easa thele troa nyitipu Iesu e nöjei drai. (2 Kor. 5:14, 15) Ketre, easa atrunyi Iehova pine laka, hnei Nyidrëti hna hamë së la thupene la mel. Ame la ketre aqane tro sa atrunyi Nyidrë ke, troa hamë mekun ngöne la itre icasikeu. Ijije hi tro sa amamane la etrune la ihnimi së koi Iehova me Iesu. Ame itre xaa ijin, easa nue trengecatre troa sine la itre icasikeu. Ame ngöne la wiik, tre, kola icasikeu thupene la huliwa, matre easa kucakuca. Nge hetre icasikeu mina fe e pune wiik, ngöne la ijine easa mano. Hapeu, öhne kö Iehova la easa sine la itre icasikeu, ngacama easa kucakuca? Eje hi! Madrine catre Iehova troa goeën, laka, easa nue trengecatre koi Nyidrë, me amamane la etrune la ihnimi së koi Nyidrë.—Mar. 12:41-44. w19.01 29 par. 12-13

Hnei Iesu fe hna hane akötre tu së. Tha ka trenamo kö la hnepe lapa i nyidrë. Hnei nyidrëti hna ce huliwa me Iosefa, keme i nyidrë, nge tha ka hmaloi kö la huliwa. (Mat. 13:55; Mar. 6:3) Ketre, tha fenesi palakö Iesu la huliwa ne cainöje i nyidrë, ngöne la kola meci hnei Iosefa. Atre hnyawa hi Iesu la akötr ka ej thene la atr ka meci sineen. Nge atre fe hi nyidrëti la akötre ne la atr ka trene sinee ka tha hmi kö. (Ioane 7:5) Celë hi matre, trotrohnine hi Iesu la itre jole së. Kola mama mina fe la aqane wangatrune Iesu la itre atr, ngöne la nyidrëti a kuca la itre iamamanyikeu. Tha hnei nyidrëti kö hna kuca la itre iamamanyikeu ke, hna upi nyidrë troa kuca. Hnene pe la ‘ihnimi’ nyidrëti kowe la itre atr ka akötr, matre nyidrëti a kuca la itre iamamanyikeu cili. (Mat. 20:29-34; Mar. 1:40-42) Hnei Iesu hna utipine la itre atr me xatua angatr.—Mar. 7:32-35; Luka 7:12-15. w19.03 16-17 par. 10-11

Hetre ewekë ka traqa ngöne lo jidri tixenuë i Iesu. Pane mekune jë lo Iesu a hnehengazo. Hapeu, hnei nyidrëti kö hna mele nyipici utihë la pun? Eloine hi hnei nyidrëti hna mec ke, maine ju pëkö ka troa mel. (Rom. 5:18, 19) Ketre, troa hetre thangane la aqane ujë i Iesu kowe la ëje i Akötresie. Maine jë, troa qaja angazo Iehova maine qaja aloinyi Nyidrëti pena. (Iobu 2:4) Thupene la pui ne xeni tixenuë i Iesu me itre aposetolo i nyidrë, hnei angatr hna iwesitrë me thele ka hape, “dei la ka troa sisitia e angat.” Ngo tha hnei Iesu kö hna elëhni. Hnei nyidrëti pe hna ithanata amenyikenyi koi angatr. Hnei Iesu hna amamane koi angatr la aqane troa ujë. Nge hnei nyidrëti fe hna qaja aloinyi angatr ke, hnei angatre palahi hna mele nyipici koi nyidrë. (Luka 22:24-28; Ioane 13:1-5, 12-15) Ngacama easa hnehengazo, ngo loi e tro sa nyitipu Iesu me hni ka menyik, me trotrohnine laka, easë asë hi la ka hane qaja maine kuca la ketre ewekë ka akötrë itre xan. (Ite edomë 12:18; Iako. 3:2, 5) Ketre, loi e tro palahi sa qaja aloine la itre xan.—Efe. 4:29. w19.02 11-12 par. 16-17

Ame la Wathebo, tre, ej a thupëne matre tha tro kö a upezön menun la atr. Ketre, kola aijijë angeic troa atre la atre iupezö. (Deu. 19:16-19; 25:1) Nge qëmekene troa upezö angeic, troa pane ithanata memine la lue atr ka öhne la hnei angeic hna kuca. (Deu. 17:6; 19:15) Ngo tune kaa e caasi hi la atr ka öhne la kola kuca la ngazo? Tha tro kö angeic a mekune laka, tha tro jë kö a ameköti angeic. Öhne hi Iehova la hnei angeic hna kuca. Eje hi, Iehova a amamai tulu; ka meköti asë hi la itre hnei Nyidrëti hna kuca. Nyidrëti a amanathithine la itre ka drengethenge la itre hnei Nyidrëti hna amekötin. Ngo Nyidrëti mina fe a amekötin la itre ka huliwane menune la hnëqa, maine göhnë hna cilën. (2 Sam. 22:21-23; Ezek. 9:9, 10) Ame itre xan, angatr a kuca la ngazo, ngo kösë pëkö ethan. Ngo tro kö Iehova a ameköti angatr ngöne la nyipi ijin. (Ite edomë 28:13) Maine tha ietra kö angatr, tro hë angatr a öhn laka, “nyine xouene la troa kei ngöne la iwanakoimene la Akötresie ka mel.”—Heb. 10:30, 31. w19.02 23-24 par. 20-21

Hnei Mose palahi hna catre thele ixatua thei Iehova. Tusi Hmitrötr a qaja ka hape, “hnei [Mose] hna cile catr kösë kola goeëne la Ka tha mama kö.” (Heb. 11:24-27) Hetre ewekë ka traqa, lue treu thupene la angetre Isaraela a tro qa Aigupito, nge qëmekene tro angatr a troa traqa kowe la Wetre Sinai. Kola nyiqane eetr hnene la nöj, ke, pëhë tim. Angatr a nyiulil me elëhni koi Mose. E cili, “hnei Mose hna teije koi Iehova me hape, Nemene la hnenge hna troa kuca kowe la nöje celë? Angatre hë la a troa tranyi ni hnei etë.” (Eso. 17:4) Hnei Iehova hna qaja koi Mose la nyine tro angeic a kuca. Hnei Nyidrëti hna upi Mose troa xome la sine tö i angeic me lepe la giti e Oreba. Öni Tusi Hmitrötr: “Ame hnei Mose hna kuca lai qëmeke ne la ite qate i Isaraela.” Ame hna neni pi la tim.—Eso. 17:5, 6. w18.07 10 par. 4-5

Iehova a ithuecatrenyi së jëne la ekalesia. Ame la easa hnime la itre trejin, easë hi lai a amamane la ihnimi së koi Iehova. Easa kuca asë la hne së hna atrein, matre amamane koi angatr laka, ka sisitria angatr koi së, nge Iehova a hnimi angatr. (1 Ioane 4:19-21) Hnei Paulo aposetolo hna cinyihan ka hape: “The mano kö ithuecatrekeu me itö ixatua, tune lo aqane kuca i nyipunie.” (1 Thes. 5:11) Eje hi, tha hnëqane hmekuje kö la itre qatre thup. Loi e tro së isa ala caasi a nyitipu Iehova me Iesu, ene la troa akeukawane la itre trejin. (Rom. 15:1, 2) Ame e hnine la ekalesia, hetre itre trejin ka akötre u (dépressifs), me ka canga hnehengazo. Nge nyipiewekë tro angatr a wai droketre. (Luka 5:31) Trotrohnine hi la itre qatre thup me itre trejin e hnine la ekalesia laka, tha itre droketre kö angatr. Ngo ame pe, ka nyipiewekë la ixatua i angatr. Ijiji së asë hi troa ‘haji angete hni ka ewë, xatuane la ite ka kucakuca, xomi hnine ahoeane la nöjei ate asëjëihë.’—1 Thes. 5:14. w18.09 11 par. 10-11

Easa acatrene la mejiune së koi Iehova, ngöne la easa atre Nyidrëti hnyawa. Nge tro sa atre Akötresieti hnyawa, e hne së hna e Tusi Hmitrötr me sine thel. Tusi Hmitrötr a qaja la aqane thupëne Iehova la nöje i Nyidrëti ekö. Celë hi ka acatrene la mejiune së laka, tro kö Nyidrëti a thupë së enehila. Hanawang la ketre ceitune ka lolo hna hamën hnei Isaia, nge ka amamane la aqane thupë së hnei Iehova. Hnei Isaia hna aceitunë Iehova me ketre atre thupë mamoe, nge itre mamoe la itre hlue i Nyidrë. Öni Isaia göi Iehova: ‘Tro nyidëti a engëne la itre nekö i mamoe i nyidrë ngöne la lue ime i nyidrë, me xepi nyudreni ngöne la imano i nyidrë.’ (Is. 40:11) Ame la Iehova a xepaconyi së, Nyidrëti hi lai a thupë së me akeukawane la itre hni së. Maine easa ajane troa atreine cile kowe la itre jol, loi e tro sa lapa mekune la xötre ne la topik enehila. Celë hi ka troa aegöcatrenyi së ngöne la kola traqa la itre jol. w19.01 7 par. 17-18

Hapeu, hetre mekune kö nyine tro epuni a eatrën? Maine jë, epuni a thele troa e Tusi Hmitrötr e nöjei drai, maine qeje mekune pena ngöne la hna icasikeu. Maine pena, epuni a ajane troa huliwane hnyawa la Tusi Hmitrötr ngöne la hna cainöj. Tune kaa ngöne la epuni a maca trootro? Nemene la mekuna i epun, ngöne la kola qaja koi epun ka hape, ka maca epun? Tro epuni lai a madrin! Pine nemen? Pine laka, epuni a kuca la aja i Iehova, tune lo aqane kuca i Iesu. (Ite edomë 27:11) Maine tro epuni a catre huliwa i Iehova, tro hë epuni lai a madrin. Hetre aliene hë la mele i epun. Öni Paulo: “Catre pi, nge the enienije kö, ngo loi e tro pala hi a tru hnei huliwa i nyipunie koi Joxu, ke tha gufa kö la itre trenge catre i nyipunie koi Joxu.” (1 Kor. 15:58) Pëkö madrinene la itre ka thele la itre ewekë ne fen, tune la manie maine troa hlemu pena. Maine jë hetrenyi angatr la nöjei ewekë, ngo ka gufa la mele i angatr.—Luka 9:25. w18.12 18 par. 12-13

Hnei Davita hna qaja lo ijine tro la itre atr e celë fen, a trongëne la itre trepene meköti Akötresie. (2 Pet. 3:13) Kola qaja ngöne Isaia 65:22, ka hape: ‘Ame la itre drai ne la nöjeng, troa tune la itre drai ne la sinöe.’ Eje hi, tro la itre atr ka nyihlue i Iehova a mele ngöne la fene ka hnyipixe. Tro angatr a mele koi itre thauzane lao macatre. Celë hi hna qaja ngöne Hna Amamane 21:1-4. Tro Akötresieti a amanathithine la itre atr, nge “pë hmaca kö mec.” Nyipici laka, hnei Adamu me Eva hna aluzine la mele i nyidroti ekö ngöne la Paradraiso. Ngo easa lapa treqene la kola troa acile hmaca la Paradraiso e celë fen. Hnei Akötresieti hna thingehnaean, laka, tro Nyidrëti a amanathithine la itre atr. Hnei Davita lo hna qaja, ka hape, tro la itre ka hetre hni ne ipië me ka meköti a mel uti hë epine palua e celë fen. (Sal. 37:11) Ame ngöne la itre hna perofetan hnei Isaia, tre, kola amamane la mel ka lolo elany ngöne la paradraiso e celë fen. (Is. 11:6-9; 35:5-10; 65:21-23) Eue la troa acile la paradraiso cili? Kola troa acile la paradraiso cili ngöne la kola troa eatr elany, lo hnei Iesu hna thingehnaeane kowe la atr ka ngazo. (Luka 23:43) Ijije hi tro sa hane mel ngöne la Paradraiso. w18.12 7 par. 22-23

Hapeu, ijije kö tro sa neën asë la itre mekuna i fen? Ohea, thatreine jë kö së, pine laka, easa mel e hnine la fen. (1 Kor. 5:9, 10) Ame fe la easa cainöje trootro, itre atr a qaja la itre mekun me itre ini ka thoi. Thatreine kö tro sa neëne la itre mekun ka ngazo, ngo tha tro kö sa lapa mekun itre ej maine kapa pena. Tui Iesu, loi e tro sa canga tripetrije la itre mekuna i Satana. Maine tro sa thipetrije la itre mekuna i fen, tha tro kö lai a löthi së. Ketre, loi e tro sa iëne hnyawa la itre sinee së. Tusi Hmitrötr a hmekë së laka, maine tro sa nyisineene la itre atr ka tha nyihlue i Iehova kö, tro hë sa nyiqane mekun tui angatr. (Ite edomë 13:20; 1 Kor. 15:12, 32, 33) Ketre, loi e tro sa thipetrije la itre nyine iamadrinë ka amamane la ini évolution, me iakötrë, me kuci ngazo, easë hi lai a thupëne la mekuna së qa ngöne la itre mekune “ka cil kowe la atrehmekune qaathei Akötresie.”—2 Kor. 10:5. w18.11 25 par. 16-17

Nemene la nyine tro sa kuca matre tro palahi sa trongëne la nyipici? Ame la ketre aqan, tre, tro sa catre cainöjëne la nyipici qa hnine la Tusi Hmitrötr. Hna aceitunëne la Tusi Hmitrötr memine la taua. Ame la sooc, tre, angeic a hnöthe hnyawa la taua ngöne la gö i angeic. Ketre tune fe, loi e troa ej e kuhu hni së la Wesi Ula i Akötresie. (Efe. 6:17) Ijiji së asë hi troa “maca troa tro fë la nyipici.” (2 Tim. 2:15) Ame la easa xome la Tusi Hmitrötr matre troa inine la itre xan, tre, kola acatrene la ihnimi së kowe la nyipici. Nge e cili, kola acatrene la aja së troa cile hut ngöne la nyipici. Ame la nyipici, tre, ketre ahnahna lai qaathei Iehova. Kola aijijë së troa easenyi kowe la Keme së e koho hnengödrai. Celë hi ewekë hne së hna wangatrune catrën. Nyimutre hë la itre ini hne së hna kapa qaathei Iehova, ngo hetre itre xan palakö! Hnei Nyidrëti hna thingehnaean ka hape, Nyidrëti a troa ini së utihë epine palua. Haawe, hniine jë la nyipici, tune la ketre penina ka tru alameken. Catre jë së ‘itöne la nyipici, nge the salemëne hmaca kö.’—Ite edomë 23:23. w18.11 14 par. 16-17

Qëmekene troa traqa la Iwë Atraqatr, hnei Noa hna thuemacane la itre atr laka, troa lepe apatrene la fen. Öni Iesu: “Ke ngöne lo ijine patre pala kö la Iwë, itre atr a xeni me ij, nge kola faipoipo la itre trahmany, me ihamë föeë, uti hë la drai ne Noa a lö hnine la aka, nge tha semesinene kö angatr, uti hë traqa la Iwë me apatrenyi angatr asë. Haawe, tro fe a hane tune lai ngöne la ijine celë hë la Nekö i Atr.” (Mat. 24:38, 39) Ngacama tha semesine Noa kö hnene la itre atr, ngo hnei angeic hna catre tro fë la maca ne iameköti Iehova. Ame enehila, easa cainöjëne la maca ne Baselaia, maca ka aijijëne la itre atr troa atre la aja i Iehova thatraqane la itre atr elany. Easa ajane tui Iehova tro la itre atr a kapa la maca, “mate mel.” (Ezek. 18:23) Ame la easa cainöj ngöne la itre hnalapa trootro, me ngöne la gaa tru atr, easë hi lai a thel troa thuemacanyine la itre atr asë laka, calemi hë la Baselaia i Akötresie, nge tro ej a lep apatrene la fene celë.—Ezek. 3:18, 19; Dan. 2:44; Hna ama. 14:6, 7. w18.05 11-12 par. 8-9

Nemene la nyine tro sa kuca e traqa ju wathebone la hmi së hnei mus, me hnyingëne la pengöne la itre xaa trejin? Hapeu, tro kö sa qaja koi angatr? Nemene la hnei Iesu hna kuca la kola hnying koi nyidrë hnene la Gavena ne Roma? Hnei Iesu hna trongëne la hna qaja hnei Tusi Hmitrötr ka hape, hetre “ijine lapa thaupu, me ijine ewekë.” Eje hi, pëkö hnei nyidrëti hna qaja! (Ate cai. 3:1, 7; Mat. 27:11-14) Maine easë fe a melëne la jol cili, nyipiewekë tro sa hmek me thupëne la aqane ithanata së, wanga troa hetre ethane kowe la itre trejin. (Ite edomë 10:19; 11:12) Tune kaa e traqa ju së atre laka, hna kuca la ngazo hnene la ketre sinee së maine ketre trejin ne la ekalesia? ‘Qaja jë la nyipici.’ Hnëqa së troa qaja asë la nyipici kowe la itre qatre thup. Celë hi ka troa xatua angatr troa axecië mekune hnyawa, matre xatuane lai trejin troa acatrene la aqane imelekeu i angeic me Iehova.—Iako. 5:14, 15. w18.10 7-8 par. 17-18

Nemene la aqane tro sa itö ixatua me ithuecatrekeu? Loi e tro sa atreine dreng. (Iako. 1:19) Ketre hatrene ihnim, la troa drenge la ketre trejin ka kucakuca, cememine la utipin. Loi e tro sa hnyingëne thele la hnei angeic hna melën, matre troa trotrohni angeice hnyawa. Ketre, loi e troa mama ngöne la iqëmeke së laka, hetre aja së troa xatua angeic. Nge ame la angeic a ithanata, drei angeice hnyawa ju së, matre atre la aliene hni angeic. Loi e troa mama koi angeic laka, ijije hi tro angeic a mejiune koi së. E cili, tha jole hë koi angeic troa drenge la itre hne së hna qaja. Eje hi, maine easa ajane troa akeukawane la hni ne la itre xan, loi e tro sa pane hnehengazo angatr. w18.09 11 par. 10-11; 12 par. 12-13

Nyipiewekë troa xomi ijin, matre troa dreng la maca ne la Baselaia, me e Tusi Hmitrötr memine la itre itusi së. Tro fe sa xomi ijine matre troa ini Tusi Hmitrötr memine la Itretre Anyipici Iehova, me hnëkëne me sine la itre icasikeu. Itre ewekë lai ka troa xom la traeme së, matre easë pëhë a nue la itre xaa ewekë ka tha nyipiewekë kö. (Efe. 5:15, 16) Ije hawa ne tro sa inine la nyipici qa hnine la Tusi Hmitrötr? Tha ceitun asë kö la itre atr. Thatreine kö tro sa atre asë la inamacane i Iehova, me aja i Nyidrë, memine la itre xaa huliwa i Nyidrë. (Rom. 11:33) Ame ngöne lo pane Ita Ne Thup, hna aceitunëne la nyipici memine “la ketre neköi iengen.” Kola hape: “Ka tiqa hnei iengen, matre tha tro kö sa jeane hi la caas. Jean atrune jë.” Ngacama tro sa mel epine palua elany, ngo tro palakö sa inine troa atrepengöi Iehova hnyawa. Haawe, loi e tro sa xomi ijin enehila matre thele troa atre Nyidrëti hnyawa. w18.11 5 par. 7

Tusi Hmitrötr a qaja ka hape, nyipiewekë tro la itre trahmany a wangatrun me trotrohnine la itre föi angatr. (1 Pet. 3:7) Loi e tro la trahmany a trotrohnin laka, tha ceitu i angeice kö memine la föi angeic. Tha tro kö angeic a mekun laka, ka sisitria kö angeic hune la föi angeic. (Gen. 2:18) Loi e tro pe angeic a wangatrune la itre mekuna ne la föi angeic me metrötrë nyiidro. Ame la trahmany ka wangatrune me metrötrëne la föi angeic, tre, tha angeice kö a wesiwes kowe la itre xaa föe. (Iobu 31:1) Ketre, tha angeice kö a goeë Ëternet me thele troa iatre memine la itre xaa föe, maine tro pena kowe la itre xaa sit ka ngazo. Eje hi, angeic a nyipici kowe la föi angeic, ke, tru la ihnimi angeic koi nyiidro me koi Iehova, nge angeic a sisine la ngazo.—Sal. 19:14; 97:10. w18.09 28 par. 3-4

Pine nemene matre tha ka hmaloi kö troa trongëne la itre ini qa hnine la Tusi Hmitrötr? Pine laka, ame la troa kuca la itre ewekë ka loi, ke, nyipiewekë troa hetre hni ne ipië. Ketre, easa mele ngöne la “itre drai ne la pun,” matre tha ka hmaloi kö troa hetre hni ne ipië. Nyimutre la itre atr ka “hnimi angatre kö, me hni koi mani, me pi draië, me pi tru, me thatreine xomehnöth.” (2 Tim. 3:1-3) Ame koi së, itre hlue i Akötresie, tre, itre aqane ujë lai ka ngazo. Ngo ame e itre xaa ijin, easa piine la madrin me mele ne la itre atr ka ujë tune lai. (Sal. 37:1; 73:3) Celë hi matre, tro sa isa hnying ka hape: ‘Ka nyipiewekë kö troa amë panëne la itre aja itre xan, nge pine pë hë la itre sipu ajang? Tro kö la itre atr a metrötrë ni, e hnenge hna hni ka ipië?’ Eje hi, maine tro sa nyitipune la itre aqane ujë ne la fene celë ka pi tru, tro ha ngazo la aqane imelekeu së memine la itre trejin. Tro ha jol e cili kowe la itre xan troa atrehmekune laka, itre nyipi Keresiano së. Celë hi matre, nyipiewekë tro sa pane ce wange la tulu ne la itre hlue i Akötresieti ekö, ka hni ka ipië. Maine tro sa thele troa nyitipu angatr, tro hë së lai a kepe thangane ka loi. w18.09 3 par. 1

Ame ngöne la qaan, Iehova caasi hi. Mekune jë hi Nyidrë troa xupe la nöjei ewekë asë e koho hnengödrai me e celë fen. Atraqatr la madrine i Iehova troa ham. Celë hi matre hna hë Nyidrë ka hape, “Akötresie ka madrin.” (1 Tim. 1:11; Iako. 1:17) Iehova a ajane tro fe sa hane madrin. Celë hi matre, Nyidrëti a ini së troa ham. (Rom. 1:20) Hnei Iehova hna xupe la itre atr hnaiji Nyidrë. (Gen. 1:27) Hnei Nyidrë hna xupi së cememine la itre thiina i Nyidrë. Haawe, maine easa ajane troa madrin me kepe manathith qaathei Iehova, nyipiewekë tro sa wangatrune la itre xan me hetre hni ne ham, tui Nyidrë. (Fil. 2:3, 4; Iako. 1:5) Celë hi aqane xupi së hnei Iehova. Ngacama itre atr ka ngazo së, ngo ijije hi tro sa nyitipu Iehova me hetre hni ne ham. Iehova a ajane tro sa nyitipu Nyidrë. Atraqatr la madrine i Nyidrë la easa ham.—Efe. 5:1. w18.08 15-16 par. 1-2, 4

Itretre drei Iesu a drengethenge nyidrë, me trongëne la itre hna qaja. Tha angatre kö a “hnehengazone la itre ewekë thatraqane la mel.” (Luka 21:34) Ngacama nyimutre la itre jol, ngo ka nyipiewekë koi angatr troa drengethenge Iesu. Pëkö ewekë ka troa sewe angatr troa catre mele nyipici koi Iehova. Ame la ketre aqane tro sa drengethenge Iesu, tre, ene la troa ce huliwa memine la itre ka elemekene la ekalesia. (Heb. 13:7, 17) Ame ngöne la itre macatre, nyimutre la itre ewekë ka saze ngöne la organizasio i Iehova. Ame enehila, hetrenyi hë së la itre jiane huliwa me aqane cainöj ka hnyipixe. Hna saze la pepa thatraqane la icasikeu e nyipine la wiik, nge hna saze fe la aqane troa xup me nyihnyawane la itre Uma Ne Baselaia. Easa kapa madrin la itre ewekë ka saze! Maine tro sa catre trongëne la itre hna amekötin e hnine la organizasio, tro kö Iehova a amanathithi së. w19.03 10-11 par. 11-12

Tha tro pi kö sa mejiune kowe la itre ithuemacany hna qaja sinën. Hanawang la hna melën ekö hnei angetre Isaraela, ka mele ngöne la götrane kuë ne la Hneopegejë e Ioridano. (Ios. 22:9-34) Hnei angatre hna dreng ka hape, hnene la angetre Isaraela ka lapa ngöne la götrane kohië, hna cane la ketre ita ne huuj ka tru. Ka nyipici hi la hna qaja, ngo tha ka pexeje kö la ithuemacany. Celë hi matre, hnene la angetre Isaraela ne kuë hna mekuhni angatr ka hape, kola icilekeu me Iehova. (Ios. 22:9-12) Ngo qëmekene troa isi, hnei angetre Isaraela hna pane upe la itre xa trahmany, matre troa hnyingëne thele la nyipici. Nemene la hna qaja koi angatr? Hetre ita ne huuj hna acil, ngo tha thatraqane kö la itre haze, ngo göne tro pe a amekunën ka hape, Iehova la Akötresi angatr. Tru la madrinene la angetre Isaraela, ke, tha isi ju kö angatr memine la itre trejin me angatr. Hnei angatre pe hna pane thele la nyipici. w18.08 6 par. 9-10

Tune la hna amexeje hnei Paulo, ijije fe hi troa kuca hnene la itre hlue i Iehova la itre ewekë ka ngazo. Nge maine jë ame koi angatr, hna kepe angatre palahi hnei Iehova. Ngo tha hnene kö laka, hetre aja thene la ketre atr troa nyi sinee i Iehova, maine ka mele nyipici pena koi Nyidrë, ke tro ha kepe angeic. (1 Kor. 10:1-5) Hnene laka, tha canga uti kö Mose qa hune la Wetr Sinai, haawe, kola hnehengazo menu hnei angetre Isaraela. Ketre tu së mina fe. Maine tro sa mekun ka hape, hmitre palaha la pune la fene celë, tro hë sa hnehengazo menu. E cili, tro fe hë sa mekun ka hape, nanyi palakö maine pena tha tro kö sa öhne la mele ka lolo hna thingehnaean hnei Iehova Akötresie. Ketre, easë pena ha amë panëne la itre mekuna së, nge pine pë hë la itre aja i Iehova. Celë hi matre, maine tha hmeke kö së, canga tro hi sa nanyi qaathei Iehova me kuca la itre ewekë tha hne së kö hna mekun. w18.07 19 par. 17-18

Atre së hnyawa hi hnei Iehova. Nemene la nyine tro sa kuca matre tro sa ce sinee me Iehova? Loi e tro sa hnii Nyidrë, me nue la mele së koi Nyidrë ngöne la easa sa xepu me xomi bapataiso. (1 Kor. 8:3) Loi e tro palahi sa acatrene la aqane imelekeu së memine la Keme së e koho hnengödrai. Tha tro kö sa tune lo itre pane Keresiano ne Galatia ekö. Tha tro kö sa bëeke kowe la “aqane waiewekë i fen, itre ewekë ka pë eloin me ka ngazo” ne la fene celë, tune la troa thele troa trenamo me hlemu ngöne la fen. (Gal. 4:9) Atre Akötresieti hnyawa hi hnene la itre Keresiano ne Galatia, nge ketre, atre angatre hnyawa hi hnei Nyidrë. Ngo hnei Paulo hna qaja ka hape, angatr a “bëeke hmaca” kowe la itre ewekë ka gufa. Kösë Paulo a hnyingë angatr, ka hape: ‘Hnauëne laka, epuni a bëeke hmaca troa kuca lo itre ewekë ne fen ka ngazo nge ka gufa?’ w18.07 4 par. 5-6

Tha nyipiewekë kö troa ena la itre wathebo i Akötresie, matre troa atre la loi me ngazo. Ngo loi e tro pe sa xomi ini qa ngöne la itre hna melën ekö e hnine la Tusi Hmitrötr. Ka nyipiewekë catre la ithuecatre celë! Pane mekune jë la akötre i Davita, ngöne la angeic a ena la wathebo i Akötresie me kuci ngazo me Batheseba. (2 Sam. 12:7-14) Ame la easa e la itre ewekë ka traqa ngöne la ijine cili, isa hnyinge jë së ka hape: ‘Nemene jë la aqane tro Davita a neëne la itre jole cili? Maine troa hane traqa koi ni, nemene la aqane tro ni a ujë? Maine kola tupathi ni troa kuci ngazo, hapeu, tro kö ni a tui Davita, maine tui Iosefa?’ (Gen. 39:11-15) Eje hi, maine tro sa mekune hnyawa la itre ethanyine la itre ewekë ka ngazo, haawe, tro hë sa “methinëne la ngazo.”—Amosa 5:15. w18.06 16 par. 5, 7

Ame enehila, nyimutre la itre atr ka lö hnine la kuci politik, ke, angatr a öhne la nöjei huliwa thoi. Ame ngöne lo hneijine i Iesu, itre atr a lö hnine la kuci politik, ke, ketre jol ka tru la troa hamëne la hotr. Nyimu hotr pena nyine hamën, tune la hotr göi dro me hnalapa. Ketre, ka atrekënö la itre xa telona. Ame itre xa ijin, angatr a nyithupene la itre gavena, matre troa cilëne la itre göhnë ka tru me thele manie. Tui Zakaio, ketre tane la itre telona e Ieriko, ka trenamo angeic, ke, hnei angeic hna atrekënö la itre atr ne la nöj. (Luka 19:2, 8) Hnene la itre ithupëjia me Iesu hna thele troa tupathi nyidrë, göne la aqane troa hamëne la hotr. Hnei angatr hna hnyingë nyidrëti la pengöne la “mani” nyine troa hamën hnene la angetre Iuda asë laka, isa ca denari. (Mat. 22:16-18) Xele catr la angetre Iuda troa hamëne la hotr cili, ke, kola amekunë angatr laka, angatre fene la musi angetre Roma. w18.06 6 par. 8-10

Tro palahi a hetre thangane ka ngazo e troa xötrethenge Satana. Pëkö ca eloin. (Iobu 21:7-17; Gal. 6:8) Pine nemene matre, nyipiewekë koi së troa atre laka, Satana la ka musinëne la fen? Celë hi ka troa xatua së troa atreine waiewekë hnyawa göne la itre mus, me upi së troa catre cainöjëne la maca ka loi. The thëthëhmine kö së laka, aja i Iehova tro sa metrötrëne la itre mus. (1 Pet. 2:17) Ketre, aja i Nyidrë tro sa trongëne la itre wathebo, e tha ka icilekeu kö memine la itre trepene meköti Nyidrë. (Rom. 13:1-4) Nge, tha easë kö a hane kuci politik, maine sajuëne pena la ketre parti, maine ketre atr ka kuci politik. (Ioane 17:15, 16; 18:36) Atre hi së laka, Satana a thel troa asihngödrin, me adrone la ëje i Iehova, haawe, loi e tro sa isin troa inine la nyipici göi Akötresie kowe la nöjei atr. Hetre madrine së troa xom, me qaja la ëje i Nyidrë. Ka sisitria kö la ihnimi së koi Akötresie hune la ihnimi së kowe la manie me mo.—Is. 43:10; 1 Tim. 6:6-10. w18.05 17-18 par. 8-9

Ame la kola traqa la itre jol e hnine la faipoipo, hapeu, tro kö nyidroti a isa lapa? Tha hnei Tusi Hmitrötre kö hna qaja la itre kepin, matre tro la lue trefën a isa lapa. Öni Paulo: “Maine ketre trejine föe a föene la ketre trahmanyi ka tha lapaune kö, ngo aja i trahmanyi troa ce mele me angeic, haawe, the tro kö angeic a trotriji trahmany.” (1 Kor. 7:12, 13) Tha saze kö la hna amekötine celë koi së enehila. Ngo ame itre xaa ijin, xele hë la trahmany “ka tha lapaune kö” troa “ce lapa” memine la föe i angeic. Ame itre xan, angatr a qanangazone la itre föe i angatr, uti fe hë la angatr a troa humuthi nyudren. Ketre, tha angatre kö a thupëne la hnepe lapa i angatr. Angatr a sawa la itre föe troa nyihlue i Akötresie. E cili, ijije hi tro la trejine föe a mekun ka hape, xele kö la föi eahlo troa “ce lapa” me eahlo, matre nyipiewekë tro nyidroti a isa lapa. Ngo hetrenyi kö la itre trejin ka ce lapa memine la itre föi angatr. Hnei angatr hna xomihnine la itre jol, me thele matre tro palahi a cile huti la faipoipo. w18.12 13 par. 14, 16; 14 par. 17

Ame ngöne la ceitune göne lo atre eëny, hna qaja ngöne Luka 8:5-8, 11-15, Iesu a amamane laka, ame la itine feja, tre, kola qaja la “Trengewekë i Akötresie,” ene la maca ne la Baselaia i Nyidrë. Ame la hnadro, tre, kola qaja la hni ne la atr. Ame la kola mala la itine feja hune la hnadro ka loi, tre ej a cia wan me cia hlöeë. Thupene lai, kola “wa wene pi hi kösë 100 hmaca kö lo etrun.” Tune la qitr hna qaja ngöne la ceitun ne la atre eëny, tha eje kö a xöl, ngo eje pe a hamë itre itin. Haawe, tha easë kö a wa wen la easa eatrongëne la ketre atr matre troa nyihlue i Iehova. Ngo, easa wa wen la kola wa the së la itre itine feja ka hnyipixe. Kola hapeue lai? Ame la easa qaja la maca ne la Baselaia i Akötresie, tre, kösë easë hi lai a jume la itre itine feja ka cia e kuhu hni së. (Luka 6:45; 8:1) Haawe, ame la easa catre cainöjëne la maca ne la Baselaia, tre, easë hi lai a “catre wa wene pala hi.” w18.05 5-6 par. 10-11

Aja i Paulo ‘troa ase la itre ewekë i angeic me umuthi’ angeic thatraqane la itre trejin. Hnei angeic hna amamane jëne la aqane ujë i angeic ka hape, aja i angeic troa kuca asë la hnei angeic hna atrein thatraqane la itre trejin. (2 Kor. 12:15) Ketre tune mina fe, loi e tro la itre qatre thup a ithuecatre kowe la itre trejin jëne la aqane ithanata i angatr, ngo memine la aqane ujë. Celë hi aqane tro angatr a amamane laka, ka tru koi angatr la itre trejin. (1 Kor. 14:3) Ame itre xa ijin, tro la itre qatre thup a hamë eamo. Loi e tro palahi la itre qatre thup a thel e hnine la Tusi Hmitrötr la aqane troa ithuecatre ngöne la angatr hamë eamo. Thupene lo kola amele Iesu hmaca, hnei nyidrëti hna amamai tulu ngöne lo nyidrëti a iupi fë maca kowe la itre ekalesia ne Asia. Ka catre la itre eamo hnei nyidrëti hna hamëne kowe la itre ekalesia e Efeso, me Peregamo, me Thuataira. Ngo qëmekene troa hamë eamo, hnei nyidrëti hna pane qaja aloinyi angatr kowe la itre huliwa hnei angatr hna kuca. (Hna ama. 2:1-5, 12, 13, 18, 19) Haawe, itre qatre thup a thel troa nyitipu Keriso ngöne la aqane troa hamë eamo. w18.04 22 par. 8-9

Itre keme me thin fe, hnëqa i nyipunie troa thupëne hnyawa la itre nekönatr, wanga löthi nyudreni jë hnene la itre mekuna i Satana. Maine jë, epuni a kuca la itre hnei epuni hna atrein, matre troa thupëne la itre nekö i epun qa ngöne la itre mec. Celë hi matre, epuni a nyihnyawane la hnalapa me trije la itre ewekë ka hetre ethane kowe la mele i epun me itre nekönatr. Ka ceitune hi lai memine la epuni a thupëne la itre nekö i epun, qa ngöne la itre film, me emisio, maine qa ngöne pena la itre jeux vidéos, me Ëternet. Itre ewekë hi lai ka troa aijijë Satana troa löthe la itre mekuna i nyudren. Iehova a upi nyipunie troa xatuane la itre nekönatr, matre troa hane itre sinee i Nyidrë. (Ite edomë 1:8; Efe. 6:1, 4) The cile kö troa ami ifego e hnine la hnepe lapa. Nge loi e troa nyitrepene la itre ifego, hnene la itre trepene meköti qa hnine la Tusi Hmitrötr. Qaja jë kowe la itre nekönatr la itre nyine tro nyudrene a goeëne maine tha goeëne pena. Xatua nyudreni jë troa trotrohnine la itre eloine la itre ifego cili. (Mat. 5:37) Ame ngöne la kola tru trootro la itre nekö i epun, ini angatre jë troa atreine ië ewekë hnyawa, thenge la itre trepene meköti Iehova. (Heb. 5:14) Nge the thëthëhmine kö laka, ame la itre nekönatr, tre, nyudreni a goeëne la itre hnei epuni hna kuca.—Deu. 6:6, 7; Rom. 2:21. w19.01 16 par. 8

Maine ketre thöthi epun, loi e tro epuni a thele troa nyi sineene la itre trejine qatr me qatre föe. Sipone jë koi angatr troa qaja la ka aijijë angatr troa catre nyihlue i Iehova ngöne la itre macatre. Ijije hi tro epuni a xomi ini qa ngöne la tulu i angatr. Celë hi ka troa ithuecatre koi angatr, nge koi epuni fe! Qatre ju hë së maine thöth, ngo loi e tro sa kapa hnyawa la itre atr ka traqa kowe la Uma Ne Baselaia. Maine epuni a iujine la huliwa ne cainöj, ijije hi tro epuni a xatuane la itre trejin ka qatre hë troa hudrume tune la lai. Loi e troa hamë nyudren la ketre teritoar ka tha jole kö, me ce ami nyudren memine la itre trejine thöth. Tha ka hmaloi kö kowe la itre trejine ka qatre hë me itre ka kucakuca, ke, thatreine hmaca kö nyudren cainöj tun ekö. Celë hi matre, nyipiewekë troa meku nyudren me trotrohnine la jol ka eje thei nyudren. Nyipici laka, qatre hë nyudren nge ekö hë nyudren ngöne la nyipici. Ngo maine tro palahi sa thiina ka menyik, tro hë lai a xatua nyudren troa catre cainöj.—Lev. 19:32. w18.06 23-24 par. 10-12

Tha tro pi kö sa thëthëhmine la aqane thepe së hnei Iehova qa ngöne la ngazo me mec. Eloine hi, hna aijijë së hnene la thupene mel troa nyihlue i Iehova cememine la mekuthetheu ka wië. Nge, celë hi ka thue madrine së lai. (Sal. 40:8) Tha tro hmekuje kö sa qaja la ole së koi Iehova, ngo loi e tro fe sa thupën wanga troa gufa la aqane nuamacanyi së hnei Nyidrë. Hnei Peteru aposetolo hna hmekë së me xatua së matre tha tro pi kö sa mekune ka hape, pine laka, ase hë nuamacanyi së, haawe, ijiji së hi troa kuca la ngazo. Kola amekunë së lo ewekë ka traqa kowe la angetre Isaraela ngöne la hnapapa. Ngo, nyipiewekë catre kö la eamo celë koi së itre ka mel enehila. Satana me fene i angeic a amamane la itre ewekë nyine heetrën, me nyine xen, me nyine ij, me itre nyine iamadrinë. Nge, itre ka kuci publicité a amamane la itre atr ka mingöming matre tro sa itön la itre ewekë ka tha nyipiewekë kö. Haawe, canga tro hi së lai a piine la itre ewekë ne fen, nge tro ha gufa la aqane nuamacanyi së! w18.04 11 par. 7-8