Semitrepa

Hnei Iesu fe hna hnim me wangatrunyi Maretha me Maria, ngöne lo kola meci hnei Lazaro, xa i nyidro. Ame la Iesu a öhnyi nyidroti e treij me akötr ke, hnei ‘Iesu hna treij.’ (Ioane 11:32-35) Tha nyidrëti kö a treije pine la ehnemu i nyidrë. Nga atre hnyawa hi Iesu laka, tro kö nyidrëti a amele Lazaro hmaca. Trotrohnine hi nyidrëti la akötr ka eje thene la itre sinee i Lazaro. Tru la madrine së troa atre laka, Iesu a hnime la itre atr. Nyipici, tha ka pexeje kö së tui Iesu. Ngo easa hnimi nyidrë ke, hnei nyidrëti hna hnime la itre xan. Easa madrine ke, hna acili Iesu troa joxu hune la Baselaia i Akötresie, nge easenyi hë matre apatrene pi nyidrëti la nöjei akötr. Iesu hmekuje hi la ka ijij troa xatuane la itre atr hna akötrëne hnei Satana. Ketre manathith troa lapa fene la musi ne la Joxu ka “trotrohnine [ . . . ] la itre tria së.”—Heb. 2:17, 18; 4:15, 16. w19.03 17 par. 12-13

Nyipici laka, easa xatuane la itre atr, matre tro angatr a atrepengöi Iehova Akötresieti hnyawa. Ngo thei Nyidrëti kö la ixatua ka tru. (1 Kor. 3:6, 7) Iehova la ka eatrongëne la itre atr koi Nyidrë. Ngo isa qanyi angatre pë hë iën. (Mat. 13:4-8) Ame ekö, Iesu hi la Atre Ini ka sisitria e celë fen, ngo ame pe, hetre itre atr ka xele ma drei nyidrë! Celë hi matre, tha tro pi kö sa hnehengazo menu, e xalaithe hi la itre ka drenge la maca hne së hna tro fë. Nyipici laka, ka hetre thangane catr la easa wangatrune la itre xan ngöne la easa cainöj. Kola thue madrine së matre tro palahi sa tro fë la maca. Easë fe a öhne la eloine la troa ham. Ketre, tha jole hë koi së troa xatuane lo itre “hna hnëkëne kowe la mele ka tha ase palua kö.” (Itre hu. 13:48) Eje hi, “maine ijiji së, loi e tro sa kuca la loi kowe la nöjei atr asë.” (Gal. 6:10) Tro ha tru la madrine së troa atrunyi Iehova, Keme së e koho hnengödrai.—Mat. 5:16. w19.03 25 par. 18-19

Hnei Dravita Joxu hna cinyihan, ka hape: “Atraqate Iehova, nge troa nyipi atrun.” (Sal. 145:3) Dravita a hnimi Iehova. Celë hi ka upi nyidrë troa atrunyi Akötresie “nyipine la icasikeu.” (Sal. 22:22; 40:5) Atraqatre fe la ihnimi së koi Iehova, matre caasi hi la mekuna së me Dravita, lo kola hape: “Oleti koi enëtilai Iehova Akötesi Isaraela xötapane i anganyihunie, qan’ ekö palua uti hë epine palua.” (1 A. l. ite jo. 29:10-13; Sal. 40:5) Ame enehila, easa atrunyi Iehova ngöne la easa isa hamë mekun ngöne la hna icasikeu. Easa wangatrune la nöjei mekune hna hamëne ngöne la hna icasikeu. Ka tru koi së la itre hnaewekë hna hamën pine laka, ka hmaloi troa trotrohnine hnene la itre nekönatr nge ka nyipici itre ej. Ame la easa drenge la kola hamë mekun hnene la ketre trejin memine la aqane qejepengöne angeice la nyipici hna xötrei inin, tre, kola ithuecatre koi së. Easa haine la itre ka ‘catre’ hamë mekun, ngacama itre ka lapa pe hi maine itre ka xötrei inine la qene hlapa së. (1 Thes. 2:2) Nemene la aqane tro sa amamane la hni ne ole së kowe la itre trengecatre hnei angatr hna kuca? Ijije hi tro sa olene koi angatr thupene la hna icasikeu. Ketre, loi e tro fe sa hane hamë mekun. Easa kapa la itre ithuecatr ngöne la easa icasikeu nge easë fe a hamë trengecatr.—Rom. 1:11, 12. w19.01 8 par. 1-2; 9 par. 6

Hna traqa la ketre ewekë ka ngazo kowe la treene lao trahmany. Hna tithi angatr hnei lepera, nge pëkö nyin la meci cili. Hna lapan asë la ngönetrei angatr. Ngo ame ngöne la ketre ijin, hnei angatre hna wangatrehmekunyi Iesu, lo Atre Ini Ka Tru, ngacama nanyi palakö nyidrë. Kola hlemu ekö ka hape, hnei Iesu hna aloine la nöjei meci asë. Öni angatr e sue: ‘Iesu, Joxu fe, epi hnimi hun!’ Nge hna aloinyi angatr asë lai ala treen. Maine jë, hnei angatr hna amamane la hni ne ole i angatr kowe la ihnimi Iesu. Ngo caasi hi la ka bëeke troa olene koi Iesu, ene lo atre Samaria. Angeic a atrunyi Akötresie “hnene la aqane ewekë atraqat.” (Luka 17:12-19) Eje hi, easa ajane troa olene kowe la itre ka loi thiina, tune la atre Samaria. Hnei Iehova hna amamai tulu göne la aqane troa olen. Hnei Iehova hna amamane lai, ngöne lo Nyidrëti a amanathithine la itre ka kuca la aja i Nyidrë. (2 Sam. 22:21; Sal. 13:6; Mat. 10:40, 41) Öni Tusi Hmitrötr e ithuecatre ka hape, “nyi tupu Akötesieti jë nyipunie, tune la ite nekö hnimina.” (Efe. 5:1) Haawe, maine easa ajane troa amamane la hni ne ole së, loi e tro sa nyitipu Iehova. w19.02 14 par. 1-2; 15 par. 4

Ame ngöne la hnaini, ketre neköjajiny a qaja cememine la metrötr kowe la porofesör ka hape, tha tro kö nyën a hane sine la ketre feet ke, tha ka ihmeku kö memine la itre trepene meköti Akötresie. Ketre trejine thöth ka xoue atr, a cainöj ngöne la itre hnalapa trootro. Angeic a traqa ngöne la hnalapa ne la ketre thöth, ka hnyima fë la Itretre Anyipici Iehova ngöne la hnaini. Ame pena la ketre trahmany, nyidrëti a huliwa catr, matre thupëne la hnepe lapa i nyidrë. Ngo ame ngöne la ketre ijin, hnene la maseta hna upi nyidrë troa kuca la ketre ewekë ka tha meköti kö, me huliwa atrekënö. Ngacama troa helë nyidrë, ngo hnei nyidrëti pe hna qaja la enyipiewekëne la troa thiina ka meköt, me metrötrëne la itre mus ke, celë hi aja i Akötresie. (Rom. 13:1-4; Heb. 13:18) Nemene la thiina hne së hna öhne thene lo lai köni trejin? Hnei angatr hna catr me nyipici. Ngo hetrenyi fe thei angatr la ketre thiina ka sisitria, ene la troa mele nyipici. Tha ajane kö angatr troa ena la ketre wathebo i Iehova. Angatr a ujë tune lai ke, angatr a ajane troa mele nyipici koi Nyidrë. Madrine catre Iehova la easa melëne la thiina cili. Nge ajan asë hi së troa amadrinëne la Keme së e koho hnengödrai. w19.02 2-3 par. 1-2

Ame la Wathebo, tre, ej a thupëne la itre ka thatreine thupë angatre kö, tune la neköeng, itre sine föe, me itre trenyiwa. Önine la itretre huuj e Isaraela, ka hape: “The tro kö a aqaline la hna amekötine kowe la tenyiwa memine la neköeng; nge the tro kö eö a xome la ixete ne la sine föe nyine haten.” (Deu. 24:17) Eje hi, Iehova a thiina ka menyik kowe la itre ka kucakuca. Nge Nyidrëti a amekötine la itre ka qanangazo angatr. (Eso. 22:22-24) Iehova a ajane tro la itre ka trene hnëqa a hnim me wangatrune la itre xan. Methi Nyidrëti la kuci ngazo me iangazo, nge Nyidrëti a ajane troa thupë së qa ngöne lai. (Lev. 18:6-30) Ame la easa öhne laka, Iehova a meköti koi së, kolo fe hi lai a kökötre la ihnimi së koi Nyidrë. Nge maine easa hnimi Akötresie me hniine la itre trepene meköti Nyidrë, kolo lai a upi së troa hnime la itre xan, me meköti koi angatr. w19.02 24-25 par. 22-26

Hanawang la nyine tro sa kuca, matre tha tro kö a löthi së hnene la itre mekuna i Satana. Hnei Iehova hna ini së ka hape, “Tha tro kö a drei mejene thei nyipunie la kuci ngazo, me nöjei huliwa ka sis, me nöjei aqane meciun.” (Efe. 5:3) Ngo hapeu e traqa ju la itre sine ce huliwa së maine itre ka ce ini pena me easë, a ithanatane la itre huliwa ka sisi cili? Ame la mekuthetheu së tre ka ceitu memine la atre thup. Ej a hmekë së me thuemacanyi së la itre ewekë ka ngazo. (Rom. 2:15) Ngo hapeu tro kö sa dreng? Maine jë tro sa drenge la sinee së me ka ce huliwa me easë. Easë hë e cili a goeëne la itre foto hnei angatr hna amë. Ngo loi e tro sa canga neën me kötrene la itupathe cili, ngöne la easa saze la porotrike së maine tro pena qaathei angatr. Nyipiewekë troa catr, matre tha tro kö sa kei thenge la itre mekune ka ngazo ne la itre sinee së. Loi e troa xecie e kuhu hni së laka, öhne hi Iehova la itre trengecatre hne së hna kuca. Tro kö Nyidrëti a hamë së la trengecatr memine la inamacan, matre tha tro kö a löthi së hnene la itre mekuna i Satana.—2 A. l. ite jo. 16:9; Is. 40:29; Iako. 1:5. w19.01 17-18 par. 12-13

Ame Solomona tre, ketre atr ka trenamo me ketre joxu ka tru. Öni angeic: “Tro ni a tupathi ’ö hnei madin, nge tro eö a öhne la loi.” (Ate cai. 2:1-10) Hnei Solomona hna xupe la itre iuma ka tru, nge hna kuca la itre gatran me parc ka mingöming. Hnei angeice fe hna kuca la itre hnei angeice hna ajan. Hapeu, madrine kö angeic ngöne la mele i angeic? Ame la Solomona a goeëne la itre ewekë hnei angeice hna hetreny, angeic a qaja jë la xötre ne la topik enehila. Nemene la ini hnei epuni hna troa xome qa ngöne la hna melëne hnei Solomona? Ame la itre xan enehila, angatr a ujë qa ngöne la ngazo thupene la hna traqa la ketre ewekë ka ngazo, maine ketre akötr ka tru pena. Ngo tha celë kö hnei Iehova hna ajane koi epun. Aja i Nyidrëti tro epuni a drei Nyidrë. Loi e troa lapaune koi Nyidrë, matre tha tro kö epuni a luz. Tha tro kö Iehova a thëthëhmine la “ihnim hnei nyipunieti hna amamane kowe la ëje  i nyidrë.” (Heb. 6:10) Haawe, thele jë troa acatrene la lapaune i epun. Tro hë epuni a axecië mekune hnyawa ngöne la mele i epun. Ketre, tro ha mama koi epuni laka, aja i Iehova, Keme së e koho hnengödrai, tro epuni a madrin.—Sal. 32:8. w18.12 15 par. 14-15

Ame la atr ka catre lapaune koi Akötresie, tre, angeic a thele troa kuca la itre ewekë tui Nyidrë. Angeice fe a nue Iehova troa eatrongë angeic ngöne la mele i angeic, me drengethenge Nyidrë. (1 Kor. 2:12, 13) Davita la ketre atr ka catre lapaune koi Akötresie. Hnei angeic hna nyima, me hape: “Iehova la edöng.” (Sal. 16:5) Tru la hni ne ole i Davita kowe la ‘edrö’ i angeic, ene la aqane imelekeu i angeic me Akötresie. Hnei Iehova palahi hna thupë Dravita ke, hnei angeic hna zae fei Nyidrë. (Sal. 16:1) Celë hi matre, öni Davita: “Aciaci la lolong.” Caasi hi la ewekë ka amadrinëne la hni Davita, ene la aqane imelekeu i angeic me Iehova! (Sal. 16:9, 11) Ame la itre atr ka wangatrune menune la itre mo me itre nyine iamadrinë, tre, tha tro jë kö angatr a hane madrine tui Dravita. (1 Tim. 6:9, 10) Maine tro sa acatrene la aqane imelekeu së me Iehova me catre nyihlue i Nyidrë, tro ha hetre aliene la mele së, nge tro hë sa madrin. Haawe, nemene la nyine tro sa kuca matre troa acatrene la lapaune së? Nyipiewekë tro sa e Tusi Hmitrötr me goeëne la itre hna xup hnei Iehova. Tro fe sa lapa mekune la itre thiina i Nyidrë, tune la ihnimi Nyidrëti koi së.—Rom. 1:20. w18.12 23 par. 7-8

Paulo a qejepengöne la faipoipo. Nyidrëti a ithuecatre kowe la itre Keresiano troa wangatrune la faipoipo ke, ketre huliwa ka sisitria. Hapeu nyipunie itre trefën, celë kö lai aqane goeëne nyipunie la faipoipo? Nyipiewekë catr troa wangatrune la faipoipo. Hnei Iesu hna hane wangatrune la faipoipo. Ame la angetre Faresaio a hnying göi seihnacil, hnei Iesu hna amexeje lo hnei Akötresieti hna qaja, göne lo pane faipoipo. Öni nyidrë: “Celë hi matre, tro la trahmanyi a nue la keme me thine i angeic, nge tro nyidroti a ca ngönetrei.” Öni Iesu fe: “Ame la hnei Akötresieti hna isilekeun, tha tro kö a senge hnei ketre.” (Mar. 10:2-12; Gen. 2:24) Atre hi Iesu laka, Akötresieti la ka acile la faipoipo, nge tro ej a cile hut. Ame la Akötresieti a acile la pane faipoipo, tha hnei Nyidrëti kö hna nue Adamu me Eva troa seihnacil. Ame la aja i Nyidrë, tre, tro “nyidoti” a caas utihë epine palua. w18.12 10-11 par. 2-4

Ame ngöne lo easa xötrei atre Iehova, ke, aqane ujë së hi lai. Easa inine laka, nyipiewekë troa drengethenge la itre trepene meköti Iehova. Ketre, ame la kola kökötre trootro la ihnimi së koi Iehova, ke, easa atre hnyawa la itre mekuna i Nyidrë. Itre hnei Nyidrëti hna ajan, me xelen, me aqane waiewekë i Nyidrë. Celë hi matre, easa axecië mekun me kuca la itre ewekë thenge la itre mekuna i Iehova. Eje hi laka, easa ajane tro palahi sa ce mekune me Iehova. Ngo ame pe, thatreine hnyawa kö së, pine laka itre atr ka ngazo së. Pane mekune jë së la aqane goeëne Iehova la kuci ngazo, me pi aja mo, memine la huliwa ne cainöj, memine la aqane huliwane menune la madra, me itre xane ju kö. Maine jë, jole koi së troa trotrohnine la mekuna i Iehova, göne la itre ewekë cili. Haawe, nemene la nyine tro sa kuca, matre troa atreine waiewekë tui Iehova? Loi e tro sa catre inine la Tusi Hmitrötr matre troa atre la itre mekuna i Iehova. Loi e tro fe sa lapa mekun itre ej, me nue trengecatre matre troa atreine waiewekë tui Iehova. w18.11 27-28 par. 2-4

Jole catre la mel ngöne lo hneijine i Habakuka. Ame la itre atr ekö, tre, itre ka iakötrë me ka ngazo thiina. Celë hi matre angeic a kucakuca. Öhne palahi angeic la angetre Isaraela kola iqanangazo me akötrë itre xan. Öni Habakuka e hnying ka hape: ‘Eu la ijine troa apatrene la ngazo? Hnauëne laka, hmitre Iehova troa kuca la ketre ewekë?’ Kösë ame koi angeic, hna nuaxöji angeice hnei Iehova. Celë hi matre, xëwe jë angeic koi Iehova. Maine jë, hnei Habakuka hna mekun ka hape, tha semesinene hë Iehova la nöje i Nyidrë, nge pëkö hnei Nyidrëti hna troa kuca. Hapeu, hane kö epuni mekune tui angeic? Hapeu, tha lapaune hë Habakuka koi Iehova me kowe la itre hnei Nyidrëti hna thingehnaean? Ohea! Hnei Habakuka hna sipo ixatua koi Iehova ke, hace catre angeic. Kolo lai a amamane laka, ka mejiune palahi angeic koi Nyidrë. Habakuka a xou ke, tha trotrohnine kö angeic la kepin matre Iehova a nue angeic troa akötr, nge pë palakö hnei Nyidrëti hna kuca. w18.11 16 par. 4-5

Ame Peteru me Anederea, ke, lue ka nyi ie nyidroti ekö. Ngo ame lo Iesu a hë nyidro troa xötrethenge nyidrë, hnei nyidroti hna nue la huliwa i nyidro. (Mat. 4:18-20) Tha kolo kö a qaja ka hape, ame la easa atre la nyipici, ke, tro hë sa nuetrije la huliwa së. Nyipiewekë tro sa hetre huliwa matre troa thupëne la hnepe lapa së. (1 Tim. 5:8) Ame la easa atre la nyipici, kola saze la aqane waiewekë së göne la itre mo. Öhne hë së la ka nyipiewekë ngöne la mele së. Hanawang la tulu i Maria. Ame la aja i Maria, tre, troa elo golf me kapa la itre trengene manie ka tru. Ngo hnei angeice hna nyiqane ini Tusi Hmitrötr. Madrine catre Maria la itre ini, matre angeic a trongëne ngöne la mele i angeic. Öni angeic, “Ame la eni a saze la aqane ujëng me mele thenge la itre trepene meköti ne la Tusi Hmitrötr, atraqatre la madrineng.” Trotrohnine hë Maria laka, jole troa acatrene la aqane imelekeu i angeic me Iehova me elo golf. (Mat. 6:24) E cili, hnei angeic hna nue la elo golf. Ketre pionie hë Maria enehila, nge öni angeic, “lolo nge hetre aliene hë la meleng.” w18.11 5-6 par. 9-10

Ame lo Iesu a 30 lao macatre, ke, hnei nyidrëti hna nue la huliwa ne tratrau sinöe, matre xome pena la huliwa ne cainöj. Atre hnyawa hi nyidrëti laka, celë hi huliwa ka sisitria. Hnei Akötresieti hna upi nyidrëti a tro e celë fen, matre troa cainöjëne la maca ka loi ne la Baselaia. (Mat. 20:28; Luka 3:23; 4:43) Hnei Iesu hna nue la mele i nyidrë, matre troa tro fë la itre maca ka lolo. Nge nyidrëti a ajane tro fe la itre xan a xome la huliwa cili. (Mat. 9:35-38) Eje hi laka, tha itre ka tratrau sinöe kö së, ngo easa tro fë me inine la itre maca ka lolo kowe la itre xan. Pine laka ketre huliwa lai ka sisitria, matre Akötresieti a xatua së. Celë hi matre, Tusi Hmitrötr a qaja ka hape, easa “ce huliwa me Akötresie.” (1 Kor. 3:9; 2 Kor. 6:4) Ce mekuna së hi memine la atre cinyihane la Salamo, kola hape: “Ame la nyipi eköne la wesi ula i cilie, te, nyipici.” (Sal. 119:159, 160) Eje hi, ame la trengewekë i Iehova, tre, celë hi nyipici. Nge easa ajane tro palahi a “maca troa tro fë la nyipici” ngöne la hna cainöj. (2 Tim. 2:15) Celë hi matre, easa thele troa atreine huliwane hnyawane la Tusi Hmitrötr, jiane huliwa së ka sisitria, matre xatuane la itre atr troa atre Iehova, me Iesu, memine fe la Baselaia. w18.10 9 par. 1-2

Maine tro la trahmany a nyitipune la aqane ihnimi Iesu Keriso, tha jole hë kowe la föe “troa metrötrë” angeic. (Efe. 5:22-25, 33) E cili, tro hë la föe a thele troa trotrohnine la mekuna ne la trahmany. Ame la itre kem me thin a wangatrune la itre xan, angatre hi lai a amamai tulu kowe la itre nekönatr. Nyipiewekë tro fe nyidroti a inine la itre nekönatr troa thiina ka menyik me meku itre xan. Drei la ketre ceitun. Kem me thin a inine la itre nekönatr laka, tha tro kö a nyinyap e hnine la Uma Ne Baselaia. Ketre, ame la angatr a ce xen, nyidroti a ini nyudren laka, troa pane nue la itre qatr troa eli xen. Loi e tro sa olene kowe la nekönatr la nyën a kuca la ketre ewekë ka lolo, tune la troa fe la qëhnelö koi së. Tro hë lai a amadrinë nyën me xatua nyën troa trotrohnin laka, “sisitria catre kö la madrine ne la atre ham, hune la atre kapa.” w18.09 28 par. 5-6

Iesu Keriso Joxu së a eatrongë së. Nge celë hi ka troa xatua së enehila me elanyi fe. Pane mekune jë la eloine la troa kapa la ketre ewekë ka saze e hnine la organizasio. Ame la epuni a kuca la hmi ne hnepe lapa, qaja jë la thangane ka loi hnei epuni hna kapa, qa ngöne la itre ewekë ka saze ngöne la itre icasikeu me ngöne la huliwa ne cainöj. Maine tro palahi sa lapa mekune la eloine la troa trongëne la itre hna amekötin hnene la organizasio i Iehova, haawe, tro hë lai a hmaloi koi së troa drengethenge me madrin. Pine laka, tha easë hmaca kö a fejane la itre itus tune ekö, haawe, ijiji hë troa huliwane la manie ngöne la itre xaa götrane la huliwa ne cainöj. Ketre, easa huliwane la itre mobilis, matre canga ketr la itre atr e cailo fen, hnene la maca ka loi. Hapeu, tro kö sa huliwane la itre jiane huliwa ka hnyipixe cili? Celë hi ketre aqane tro sa sajuëne la musi Keriso. Nge aja i nyidrë tro sa huliwane hnyawa la itre jiane huliwa qaathene la organizasio. Ame la easa trongëne la itre hna amekötin hnei Keriso, easë hi lai a xatuane la itre trejin troa caas me acatrene la lapaune i angatr. w18.10 26 par. 17-19

Ame la easa thiina ka menyik, easë hi lai a hamën kowe la ketre trejin la ixatua hnei angeic hna sipone jëne la thith. (2 Kor. 1:3-6) Ketre, loi e tro sa mekun ka hape, tha ka pexeje kö la itre trejin. Maine tro sa mekun ka hape, pëkö engazo i angatr, tro hë së lai a kucakuca. (Ate cai. 7:21, 22) Easa ajane troa nyitipu Iehova. Atre hi Nyidrë laka, hetre ifego së. Celë hi matre, loi e tro sa ixomihnikeu. (Efe. 4:2, 32) Tha tro kö sa qaja kowe la itre trejin ka hape, tha ijije kö la hnei angatr hna kuca. Loi e tro pe sa ithuecatre me olene koi angatr la itre huliwa hna kuca. Celë hi ka troa xatua angatr troa madrin troa nyihlue i Iehova.—Gal. 6:4. w18.09 12 par. 16; 13 par. 17

Ame la troa kuca la aja i Akötresie, tre, ceitune hi memine la xen koi Iesu. Tune la thangan la nyipi xen kowe la ngönetrei, ame la easa kuca la aja i Akötresie, tre, kolo mina fe a acatrene la lapaune së. Drei la ketre ceitun. Ka kucakuca së, ngo easë kö a tro troa hane sine la icasikeu göi cainöje trootro. Ka inamacane la atre drengethenge Iehova. (Sal. 107:43) Nyimutre la itre manathith hnei angeic hna troa kapa. “Ame la nöjei tenge nyi ’ö asë tha ijije kö ej. . . . Sinöe ne mele angeice koi angete xomi angeic, nge manathithi angete xölehuji angeic.” (Ite edomë 3:13-18) Öni Iesu: “Maine atre hë nyipunieti lai, tro hë nyipunie a madrin e tro nyipunie a kuca.” (Ioane 13:17) Maine tro palahi a drengethenge Iesu hnene la itretre drei nyidrë, tro hë angatr a mele madrin. Nyipiewekë tro angatr a xötrethenge la itre ini me tulu i nyidrë ngöne la mele i angatr. w18.09 4 par. 4-5

Ame lo Adamu me Eva e hnine la hlapa e Edena, tro hi nyidroti ekö a mekune la itre matra i nyidro. Pine nemen? Hnei Iehova hna upi nyidro troa hnaho matre nyialiene me aparadraisone la ihnadro. (Gen. 1:28) Tui Iehova, aja i Adamu me Eva tro la itre nekö i nyidroti elany a mele madrin. Maine ju, tro asë hi angatr a ce huliwa matre aparadraisone la ihnadro. Drei la ketre hnëqa ka tru! Maine ju, tro la itre atr ka pexej a ce huliwa me Iehova, matre aparadraisone la ihnadro me kuca la aja i Nyidrë. E cili, tro hë angatr a lö kowe la hnamano i Nyidrë. (Heb. 4:11) Pane mekune jë la elolone la huliwa cili! Maine ju, tro Iehova a amanathithine la aqane ihnim me aqane mekune angatr la itre xan. w18.08 15-16 par. 2; 17 par. 8-9

Nemene la nyine tro sa kuca e traqa ju silithanata së? Hna hane fe silithanata Iesu me Ioane Bapataiso. (Mat. 11:18, 19) Nemene la hnei Iesu hna kuca? Tha hnei Iesu kö hna aluzi traem me trengecatr, matre troa jelethoine la itre hna qaja. Hnei nyidrëti pe hna ithuecatre kowe la itre atr troa thele la nyipici. Iesu a ajane tro la itre atr a nyipiine la itre hnei nyidrëti hna kuca memine la itre ini hna hamën. Öni Iesu: “Kola mama la inamacan hnei huliwa.” (Mat. 11:19) Hetre ini koi së qa ngöne la tulu i Iesu. Ame e itre xa ijin, kola qeje së me silithanata së, matre easa xou troa goeën angazonyi së hnei itre xan. Ngo tune la hna amaman hnene la tulu i Iesu, ijije hi tro sa amamane jëne la aqane mele së laka, itre trengathoi lo hna sil. w18.08 6-7 par. 11-13

Hna aijijë Kaina ekö me Solomona me angetre Isaraela, troa ietra me saze la aqane ujë i angatr ka ngazo. (Ite hu. 3:19) Eje hi, tha hnei Iehova kö hna canga nuetrije la itre atr, pine la hnei angatr hna tha idrei. Pane mekune jë la aqane nue Nyidrëti ekö la ngazo i Arona. Ame enehila, Iehova a nyijëne la Tusi Hmitrötr me itre xa itusi së me itre trejine fe, matre troa thupë së qa ngöne la itre ewekë ka ngazo. Maine tro sa wangatrun me trongëne la itre hnei Iehova hna amekötin, haawe, tro hë Nyidrëti a hnimi së. Ka hetre thangane la ihnimi gufa i Akötresie. (2 Kor. 6:1) Kola aijijë së troa “thipetrij la itre thiina hnei [Akötresieti] hna xelen, me itre aja i fen.” (Tito 2:11-14) Eje hi laka, tro palahi a hetrenyi ngöne la fene celë la itre ewekë ka troa tupathe la aqane mele nyipici së koi Iehova. Celë hi matre, loi e tro palahi sa thele troa ce xöle me Iehova! w18.07 20 par. 20-21

Nemene la nyine tro sa kuca matre troa wangatrunyi së hnei Iehova, ngo tha hnei fene kö? Loi e tro sa lapa mekune hnyawa la lue mekun ka nyipiewekë catr. Ame la hnapan, tre, Iehova palahi a wangatrune la itre atr ka catre nyihlue i Nyidrë. (Heb. 6:10; 11:6) Pine laka, ka tru koi Iehova la itre hlue i Nyidrëti asë, “tha meköti kö” e troa thëthëhmi angatr. Ketre, atre fe hi Nyidrëti la itre “jë i ange ka meköt” memine la aqane troa amele angatr. (Sal. 1:6; 2 Pet. 2:9) Ame la hnaaluene mekun, tre, easa sesëkötr e itre xa ijin la aqane wangatrunyi së me amanathithi së hnei Iehova. Maine ketre atr a kuca la loi göne hi matre troa goeë angeic, tha tro jë kö Iehova a nyijune me amanathithi angeic. Pine nemen? Pine laka, celë hi la thupe i angeic. (Mat. 6:1-5) Ame ngöne la ketre götran, öhne hi Iehova ‘ngöne la ga sihngödr,’ la itre atr ka kuca la loi ngacama tha öhne kö hnei itre xan. Öhne hnyawa hi Iehova la itre hnei angatr hna kuca, nge Nyidrëti a amanathithi angatr. w18.07 5 par. 8, 10

Tha trotrohnine kö Peteru la hna qaja. Thupene lai, hna traqa la itre qeneqaja i Konelio. Hnene la uati hmitrötr hna upi Peteru kowe la hnalapa i Konelio, matre ce tro jë hi angeic me angatr. Maine hnei Peteru ju hna axecië mekun thenge hi la hna goeën ke, tha tro jë kö angeic a tro kowe la hnalapa i Konelio. Tha hna hane fe kö tro hnene la ketre atre Iuda kowe la uma ne la ketre atre ethen. Ngo pine nemene kö matre tro jë Peteru koi Konelio? Ngacama ka sisine Peteru la angetre ethen, ngo hna saze la mekuna i angeic hnene la hnei angeic hna meköle goeën. Thupene la hnei Peteru hna drei Konelio, öni angeic: “Qaane enehila, mama cile hnyawa ha koi ni laka, tha ka ië hna hnime kö Akötresie, ngo nyidrëti a kapa la nöjei atr qa ngöne la nöjei nöj, e ka xoue nyidrë me thiina ka meköt angatr.” (Itre hu. 10:34, 35) Atraqatr la madrine i Peteru la angeic a trotrohnine la mekun celë. w18.08 10 par. 3-4

Loi e tro sa thipetrije la itre ewekë hna methinëne hnei Akötresie. Ngo nemene la nyine tro sa kuca, e pëkö wathebo hna hamën hnei Tusi Hmitrötr? Nemene la aqane tro sa atre la aja i Akötresie? Maine tro sa inine la mekuthetheu së jëne la itre hna qaja hnei Tusi Hmitrötr, haawe, tro hë sa atreine axecië mekune hnyawa. Tru la ihnimi Iehova koi së. Hnei Nyidrëti hna hamëne la itre trepene meköt, matre troa inine la mekuthetheu së. Öni Nyidrë: “Ini Iehova Akötesi ’ö, ate ini ’ö troa hete thangan, ate e eö ngöne la gojenyi tro eö a trongën.” (Is. 48:17, 18) Maine tro sa lapa mekun me hniine la itre trepene meköti Akötresie, tro hë sa wenë amekötine la mekuthetheu së, me atreine axecië mekune hnyawa. Kola xatua së hnene la itre trepene meköt, troa axecië mekune hnyawa. Maine tro sa atre la itre trepene meköti Iehova, tro hë lai a xatua së troa trotrohnine la mekuna i Nyidrë, memine la kepin matre Nyidrëti a hamëne la itre wathebo. w18.06 16 par. 5; 17-18 par. 8-10

Ame lo ka thele troa tupathi Iesu, tre, “angete Herodian,” ene lo itre ka sajuëne la politik i Heroda. Angatr a ajane tro Iesu a qaja ka hape, tha tro kö a hamëne la hotr. E cili, tro hë angatr a upezö nyidrë ka hape, ketre ithupëjia memine la musi Roma. Ngo maine tro pena Iesu a upe la itre atr troa hamëne la hotr, haawe, tha tro hmaca kö a drei nyidrë hnene la nöj. Matre nemene la hna kuca hnei Iesu? Hnei Iesu hna thupën matre tha tro kö a lö hnine la jol cili. Atre hi Iesu laka, ka atrekënö la itre telona. Ngo, ame la ka nyipiewekë koi nyidrë, tre, ene la Baselaia i Akötresie ka troa nyinyine la itre jol. Ketre tulu lai koi së. Tha tro kö sa lö hnin maine sajuëne la kuci politik, ngacama ka lolo la ketre nge ngazo la ketre. Ame la itre Keresiano, tre, angatr a sajuëne la Baselaia i Akötresie memine la trengewekë i Nyidrë ka nyipici. Tha tro pi kö sa hane qeje mekun göne la itre huliwa thoi ne la itre ka kuci politik, me qeje gele angatr. (Mat. 6:33) Nyimutre la Itretre Anyipici Iehova ka lepetrije la itre mekuna i angatr ekö göne la politik. w18.06 6 par. 9-11

Hnei Satana hna tupath la itre angela hnene la kuci ngazo, me qaja fe koi angatr ka hape, troa catre la mene i angatr hune la itre atr. Ame e cili, Satana a thel matre tha tro kö a eatr la hna perofetane hnei Iehova göne la ‘matra ne la föe.’ (Gen. 3:15) Ngo, tha hnei Iehova kö hna nue angeic troa hun. Hnei Nyidrëti hna axulune la Iwë Atraqatr, matre sewe Satana me itre dremoni troa eatrëne la aja i angatr. Haawe, ame la kuci ngazo memine la pi tru tre, lue itupathe lai ka ie catre kö hune la itre xan. Ame la itre angela ka xötrethenge Satana tre, itre macatre ne ce mele angatr me Iehova e hnengödrai. Ngo, hnei angatr hna nue la itre aja ka ngazo troa kökötr, utihë la kola lapane la itre hni angatr. Tha tro pi kö sa thëthëhmine laka, itre macatre ne nyihlue i Iehova ju hë së, ngo ijije hi tro la itre aja ka ngazo a lapane la hni së. (1 Kor. 10:12) Celë hi kepin matre, loi e tro palahi sa waipengö së, me thel ka hape, tha cia kö e kuhu hni së la itre aja ka ngazo, maine pi tru pena.—Gal. 5:26; Kol. 3:5. w18.05 18 par. 11-12

Atre hi së laka, ame lo kola thipetrije la maca ne Baselaia hnene la angetre Iudra, hna kucakuca hnei Paulo. Ngo, tha hnei angeice kö hna cile troa cainöj koi angatr. Angeic a qaja la ihnimi angeic kowe la angetre Iudra, lo kola hape: “Ame la aja ka ej e kuhu hning me itre xëwenge koi Akötresie, tre thatraqai angatr, matre tro angatr a hane mel. Nge eni a anyipicine göi angatr ka hape, angatr a catre huliwa koi Akötresie, ngo tha thenge kö la nyipi atrehmekun.” (Rom. 10:1, 2) Hnene la ‘aja ka ej e kuhu hni angeic,’ matre Paulo a cainöj kowe la angetre Iudra. Aja i angeic tro angatr a mel. (Rom. 11:13, 14) Paulo a sipo iele Iehova troa xatua angatr isa ala cas, matre troa kapa la maca ne Baselaia. Öni Paulo: “Angatr a catre huliwa koi Akötresie.” Loi la hna goeën hnei Paulo thene la itre atr, nge tha sihngödri kö koi angeic laka, ijiji angatre fe troa hane nyihlue i Iehova. Mama hnyawa hi koi angeic laka, itretre Iudra ka catre hmi, nge tro fe angatr elanyi a hane xötrethenge Iesu tui angeic. w18.05 4 par. 4; 6-7 par. 13-14

Loi e tro sa atre la hna ajane hnene la itre trejin, matre ijiji së troa xatua angatr. Öni Paulo kowe la itre keresiano ne Heberu: “Aegöcatrene jë la itre ime ka thip, me itre watingöneca ka geny. Nge catre jë amekötine la itre gojeny thatraqane la lue ca i nyipunie, matre tha tro kö a jole catr kowe la itre ka peje ca, ngo tro pe a aloinyi angatr.” (Heb. 12:12, 13) Ijiji së asë hi troa hamë ithuecatr jëne la itre ithanata së, ngacama thöthi ju hë së. Öni Paulo: “Haawe, pine laka casi hë nyipunieti me Keriso, nge maine nyipunieti a hamë ithuecatr me keukawa cememine la ihnim, nge maine nyipunieti a akötrehni itre xan, me hnimi angatr, me utipi angatr, apexejene jë la madrineng koi nyipunie qa ngöne la hna ce hni, me ihnimikeu, me cas, me ca mekun. The kuca kö la ketre ewekë matre thele iwesitrë maine pi draië, ngo ipië ju nge mekune ju ka hape, sisitria kö itre xane hui nyipunie. Haawe, the thele ewekë thatraqai nyipunieti hmekuj, ngo thele jë fe la ka loi koi itre xan.”—Fil. 2:1-4. w18.04 23 par. 10; 24 par. 12

Pine nemen matre Iehova a upi Iesu troa thepe së qa ngöne la ngazo me mec? Atre hi Nyidrëti laka, ijiji së hi troa nue la mele së ka pexej troa nyihlue i Nyidrë. Ame la easa nue la traem, me trengecatre së troa nyihlue i Iehova, tre, easë hi lai a amamane hnyawa laka, hetre thangane la aqane nuamacanyi së. Celë hi ka troa sewe së troa amë panëne ngöne la mele së, la itre aja ne fen, memine la itre sipu aja së. (Gal. 5:16) Pane mekune jë la pengöi Noa me hnepe lapa i angeic. Angatr a mel ezine la itre atr ka iakötrë, nge ka kuci ngazo. Ngo, tha hnei angatre kö hna nue la itre aja, memine la itre huliwa ne la itre atr cili troa ajojezi angatr. Hnei angatre pe hna catre kuca la huliwa hnei Iehova hna athipe koi angatr. Hnei angatr hna cane la aka, me hnëkë xeni thatraqai angatr memine la itre öni. Ketre, hnei angatr hna thuemacane la itre atr laka, troa traqa la Iwë. “Ame hnei Noa hna kuca asë tune lo hnei Akötesieti hna ahnithe koi angeic ; tune hi lai hnei angeice hna kuca.” (Gen. 6:22) Haawe, mele ju pe kö Noa me hnepe lapa i angeic ngöne la kola lepe apatrene la fen.—Heb. 11:7. w18.04 12 par. 8; 13 par. 11-12

Satana me itre dremoni a nyijëne la hmi ka thoi, memine la fen ka salem matre troa “amenune la fen asë.” (Hna ama. 12:9) Jëne la hmi ka thoi, Satana a sil la itre trengathoi göi Iehova, me thel troa asihngödrine la ëje i Nyidrë. (Iere. 23:26, 27) Ame la thangane lai, alanyimu la itre atr ka mekun laka, angatr a thil koi Akötresie, ngo kolo pe a thili koi itre dremoni. (1 Kor. 10:20; 2 Kor. 11:13-15) Nge, jëne la fen ka salem, Satana a ajojezine la atr matre, tro la atr a mekun laka, manie me mo la jëne madrin. (Ite edomë 18:11) Ame la itre hna ajojezine tre, angatr a nue la mele i angatr troa nyihluene la mani, ngo tha Akötresieti kö. (Mat. 6:24) Ngacama angatr a hnimi Akötresie, ngo tro la aja mo a thahe la ihnimi angatr koi Nyidrë.—Mat. 13:22; 1 Ioane 2:15, 16. w18.05 17 par. 6-7