Okotropa

Eje hi laka, thatre kö së la itre mekun ne la itre atr. Ngo ame pe, ijije hi tro sa thele troa trotrohni angatr me xatua angatr. (2 Kor. 11:29) Tha ceitu së kö memine la itre atr ne la fen laka, ka sipu meku angatre kö. Easa trongëne la hna qaja hnei Tusi Hmitrötr, ka hape: “The thele ewekë thatraqai nyipunieti hmekuj, ngo thele jë fe la ka loi koi itre xan.” (Fil. 2:4) Nyipiewekë troa wangatrune la itre xan hnene la itre qatre thup. Hnëqa i angatr qaathei Iehova troa thupëne la itre mamoe. (Heb. 13:17) Nyipiewekë troa pane thele hnene la itre qatre thup troa trotrohni angatr, matre hmaloi troa xatua angatr. Nemene la aqane tro la itre qatre thup a wangatrune la itre xan? Ame la qatre thup ka wangatrune la itre xan ke, nyidrëti a xomi ijin troa pane ce lapa memine la itre trejin. Nyidrëti a hnying me drenge hnyawa la aqane sa. Ame itre xaa ijin, thatreine kö la itre trejin fe la itre hni angatr. (Ite edomë 20:5) Maine tro la itre qatre thup a xomi ijine troa ithanata me ce mel memine la itre trejin, haawe, tro hë lai a acatrene la ihnim me aqane imelekeu i angatr.—Itre hu. 20:37. w19.03 17-19 par. 14-17

Ame la hni ne ole, tre, hna aceitunëne memine la xeni hna hnëkën hnyawa. Ame la easa atre laka, hetre hni ne ole itre xan kowe la itre hne së hna kuca, easa madrin. Nge ame pena la easa amamane koi itre xan la madrine së me hni ne ole së ke, angatr a madrin. Mama cile hë koi angatr laka, hetre thangane catr la ixatua i angatr. Nge kola acatrene la aqane imelekeu së me angatr. Tune la hna qaja ngöne la topik ne la drai celë, ka nyipiewekë catre troa amamane la hni ne ole së. Pane mekune jë së la emingömingöne me enyipiewekëne la itre wene pom gole hnine la itre trenge sileva! Nemene la thangan, e kola troa nyi ahnahna koi së la itre ewekë cili? Maine jë, troa ketr la hni ne la itre ka ham ngöne la easa olene koi angatr. Ka catr la itre wene pom gol. Ketre tune la aqane tro sa olen, tha tro jë kö angatr a thëthëhmin. w19.02 15 par. 5-6

Hnei Adamu me Eva hna xen la wene la sinöe ne atrehmekune la loi me ngazo. Nyidroti hi lai a amamane laka, tha mejiune kö nyidroti koi Iehova me kowe la itre trepene meköti Nyidrë. Hnei nyidroti hna ketre sipu iëne la loi qa ngöne la ngazo. Ngo pane mekune jë la itre ethane lai. Hnei nyidroti hna thë la aqane imelekeu i nyidroti me Iehova. Ketre, luzi hë la mel ka tha ase palua kö, nge ngazo me mec la pun kowe la itre matra i nyidro. (Rom. 5:12) Tha ceitune kö la aqane ujë i Adamu me Eva memine lo eunuka atre Aithiope. Hna ketr la hni angeic lo Filipo a cainöjëne la itre hna kuca hnei Iehova me Iesu. Ame hnei angeic hna xomi bapataiso. (Itre hu. 8:34-38) Haawe, tune la eunuka, ame la easa sa xepu me xomi bapataiso, ke, easë hi lai a amamane la hni ne ole së me mejiune së koi Iehova me Iesu. Iehova hmekuje hi la ka atre la ewekë ka loi qa ngöne la ka ngazo. w19.03 2 par. 1-2

Kola amamane tune kaa hnene la itre hlue i Akötresie laka, ka mele nyipici angatr? Angatr a hnimi Iehova cememine la hni ka pexej, nge pëkö ketre ewekë ka troa sewe angatr troa nyihlue i Nyidrë. Angatr a amë panëne la aja i Iehova ngöne la mele i angatr. Hanawang la aqane huliwane la hnaewekë “mele nyipici” e hnine la Tusi Hmitrötr. Ame la pane aliene la hnaewekë “mele nyipici,” tre, ka pexej maine ka pë ethan. Ame ekö, loi e troa pexej la itre öni hnei angetre Isaraela hna huujëne koi Iehova. (Lev. 22:21, 22) Tha tro kö a huujëne la ketre öni ka pej, maine ka caa hnangenyë maine caa alamek, maine ka wezipo pena. Ka nyipiewekë koi Iehova troa pexej me pë ethan la öni. (Mal. 1:6-9) Easa trotrohnine la kepin, matre aja i Iehova troa pexej me pë ethan la itre huuj. Ame la easa itöne la wene sinöe, me itus, maine ketre zuti pena, easa xome la ka pexej, nge ka pë ethan. Tha aja së kö troa xome la ka kaqa maine sin pena. Ceitune hi lai me Iehova. Nyidrëti a ajane tro sa mele nyipici, me hnimi Nyidrë hnene la hni së ka pexej. w19.02 3 par. 3

Maine easa ajane troa thupëne la hni së, nyipiewekë tro sa thipëne la itre ewekë ka ngazo, ngo tro fe sa kapa la itre ewekë ka lolo. Ame ekö ngöne la itre traon hna ekögölith, itre atre thupë qënehlö a canga thinge la itre qënehlö ngöne la kola traqa la itre ithupëjia. Ngo ame itre xaa ijin, angeic a fe la itre qënehlö, matre alöne la itre ka salemë xen me itre xaa ewekë ju kö. Maine ka thinge palahi la itre qënehlö ne la traon, troa mecijine la itre atr. Ketre tune fe, nyipiewekë troa fe me lapane la itre hni së hnene la mekuna i Akötresie. Tusi Hmitrötr a qatreng la itre mekuna i Iehova. Ame la easa e Tusi Hmitrötr, easë hi lai a nue la itre mekuna i Iehova troa eatrongë së ngöne la aqane mekuna së, me aqane ujë së. Nemene la aqane tro sa kepe thangane qa ngöne la hna e Tusi Hmitrötr? Ka nyipiewekë la thith ke, kola xatua së troa “goeëne la ite nyine haine” qa hnine la Wesi Ula i Nyidrë. (Sal. 119:18) Nyipiewekë tro fe sa lapa mekune la itre hne së hna e. Ame la easa thith, me e, me lapa mekune la Wesi Ula i Akötresie, easë hi lai a ‘thupëne itre ej e kuhu hni’ së, me hniin la itre mekuna i Iehova.—Ite edomë 4:20-22. w19.01 18 par. 14-15

Atre hnyawa hi Iehova laka, isapengöne kö la itre hne së hna atrein me aqane mele së. Iehova a wangatrune la itre huuje hne së hna tro fë koi Nyidrë. Pane mekune jë la nöjei pengöne huuje hna tro fë ekö hnei angetre Isaraela, nge hna kapa hnei Iehova. Ame la itre xaa atre Isaraela, tre, ijiji angatre hi troa huujë arenio maine gootr. Ngo ame la itre ka puafala, tre, angatr a tro fë “lue piny, nge kete loi lue nekö i meketë.” Maine tha ijiji palaha troa tro fë la itre huuje cili, Iehova a kapa la “ca omera falawa.” (Lev. 5:7, 11) Ngacama tha ka tru thupene kö ekö la farine, ngo ketre huuje lai hna kapa hnei Iehova. Ngo loi e troa “falawa ka loi.” Tha saze kö la mekuna i Akötresie enehila. Tha ka nyipiewekë kö koi Iehova troa eköthe hnyawa la itre mekuna së, tui Apolo ekö ka atreine cainöj me Paulo ka atreine ithanata kowe la itre atr. (Itre hu. 18:24; 26:28) Ame la hnei Iehova hna ajan, tre, tro sa hamë mekun qa kuhu hni së, nge itre hne së hna atrein. Pane mekune jë së lo sine föe ka kuiëne ekö la lue mani ka co. Ka tru eahlo koi Iehova, pine laka hnei eahlo hna hamëne la hnei eahlo hna hetreny.—Luka 21:1-4. w19.01 8-9 par. 3-5

Kola xele ma wai së ke, easa xötrethenge Keriso. Ase hë Iesu perofetan ka hape, troa qanangazone la itretre drei nyidrë, ngöne la itre drai ne la pun. (Mat. 24:9; Ioane 15:20) Hnei Isaia fe hna perofetane laka, tro la itre ithupëjia me easë a xele ma wai së, me thele troa humuthi së. Angatr a silitrengathoi së, me iaö së me axösisi së. (Mat. 5:11) Tha tro jë kö Iehova a sewe angatr troa huliwane la itre jiane isi cili, nyine akötrë së. (Efe. 6:12; Hna ama. 12:17) Ngo tha tro kö sa xou. Hnei Iehova hna qaja ka hape, “pëkö ewekë hna kuca nyine ishi” me easë “hna troa ien.” (Is. 54:17) Tune la easa zae fene la ketre ngöne uma nge kola catrehnine la wene, easa fe a zae thei Iehova ngöne la kola ‘elëhni hnei angetre catre mek.’ (Is. 25:4, 5) Tha tro kö a huti la itre aqane iakötrë ne la itre ithupëjia me easë. (Is. 65:17) Ame la itre ithupëjia ne la nöje i Akötresie, tre, ‘tro angat’ a kösë pëkö me pate.’—Is. 41:11, 12. w19.01 6-7 par. 13-16

Itre thöthi fe, tha Iehova kö a ajane troa hnöthe la mele i epun. Hnei Nyidrëti hna xupi së memine la aja cili. Ngo Nyidrëti a ajane tro epuni a inamacane ngöne la aqane troa axecië mekun. Tro lai a thupën la mele i epun. Maine jë, atre hi epuni la itre xan ka goeë iatre ka sis, me ka kuca la itre huliwa ka sis, maine pena itre ka kuca la itre elo ka ngazo, maine ka xomi dorog me iji atrune la kahaitr. Maine jë ka pëkö engazone la itre ewekë cili koi epun ngöne la xötrei. Ngo ame pe, ka hetre ethane catr. Troa tithi epuni hnei mec, maine pena thatreine hë epuni nue la itre ewekë cili uti hë la meci epun. (Gal. 6:7, 8) Nyimutre la itre thöth ka mekun, ka hape, tha kolo kö a hnöthe la mele i angatr hnene la itre ewekë cili. Ngo ame pe, ka tria la mekuna i angatr. (Tito 3:3) Ame ngöne la ketre götran ke, hetre eloine la easa drengethenge Iehova. Lolo la mele së, nge pëkö ka xomehnöthe ej. (Sal. 19:7-11) Ame la epuni a drengethenge la itre wathebo me itre trepene meköti Iehova ke, epun hi lai a amamane koi Akötresie me kowe la keme me thine i epun laka, itre ka macaje hë epun. Tro angatr a mejiune koi epun me nue epuni troa ketre sipu axecië mekun.—Rom. 8:21. w18.12 19 par. 16-17

Nyimutre la itre ewekë ka saze, thupene la hna tria hnei Adamu. Ame la ketre, tre, xulu hë la meci kowe la itre atr. Hetre thangane lai kowe la faipoipo. Hnei Paulo aposetolo hna qaja kowe la itre Keresiano, ka hape, meci la ka troa nyipune la faipoipo. Ijije hi troa faipoipo hmaca hnene la ka mele pe. (Rom. 7:1-3) Ame ngöne la Wathebo hnei Akötresieti hna hamëne koi angetre Isaraela, tre, hetre ithuemacanyi göne la faipoipo. Drei la ketre ceitun. Hna nue kowe la ketre atre Isaraela troa nyimu föe. Ketre ewekë lai hna kuca ha ekö, qëmekene tro Akötresieti a acile la Wathebo. Ngo, ame la Wathebo, tre, ej a thupëne la itre föe me itre nekönatr, matre tha tro kö a qanangazo nyudren. Maine ketre atre Isaraela a faipoipo memine la ketre hlu me xome hmaca la ketre föe, loi e tro angeic a thupëne hnyawa me metrötrëne la pane föe i angeic. Celë hi aja i Akötresieti kowe la trahmany. (Eso. 21:9, 10) Tha easë hmaca kö fene la Wathebo i Mose. Ngo ame pe, ej a amamane laka, ka tru palahi koi Akötresieti la faipoipo. Celë hi ka xatua së troa wangatrune la faipoipo. w18.12 10 par. 3; 11 par. 5-6

Thupene la Habakuka a fe la hni angeic koi Iehova, maine jë, hnei angeic hna hnyingëne thele la aqane tro Iehova a sa. Iehova la Keme ka ihnim. Trotrohnine hi Nyidrëti laka, Habakuka a sipo ixatua ke, tru la akötre i angeic. Tha hnei Iehova kö hna ameköti Habakuka. Hnei Nyidrëti pe hna qaja la hnei Nyidrëti hna troa kuca kowe la angetre Iuda ka tha mele nyipici. Maine jë, Habakuka hi la hnei Iehova hna pane qaja kow, ka hape, easenyi hë tro Nyidrëti a ameköti angatr. Hnei Iehova hna qaja koi Habakuka ka hape, tro Nyidrëti a lepi angetre Iuda, itre ka ngazo me ka iakötrë. Öni Iehova, troa traqa lai “ngöne la itre drai nyipunie.” Kolo lai a hape, tro Habakuka me angetre Isaraela a öhne la itre ewekë cili. Tha celë kö la hna mekun hnei Habakuka. w18.11 17 par. 7-8

Nemene la aqane goeëne së la itre atr ka thatre pala kö la nyipici? Hnei Paulo aposetolo hna cainöj kowe la angetre Iuda ka atre Iehova ha. Hnei nyidrëti fe hna cainöj kowe la itre ka thil koi itre haze. Eje hi, tha ka hmaloi kö koi Paulo troa cainöj koi angatr. Ame lo pane tronge i Paulo, hnei nyidrëti me Banaba hna ce tro Lusetara eë. Hnene la angetre Lukaonia ka mel e cili hna atrunyi nyidro, me ati ëje i nyidro ka hape, Zeus me Heremes, lue ëjene haze. Hapeu, hnei nyidroti kö hna pi mama fë lai? Hnei nyidroti kö hna pi mama fë laka, tha hna qanangazo nyidroti kö e cili, tune ngöne lo lue xaa nöj? Maine mekune pena ka hape, kaloi hi matre tha jole koi nyidroti troa qaja la maca ka loi e cili? Ohea! Hnei nyidroti hna elëhni me sue ka hape: “Hnauëne la nyipunie a ujë tun? Ketre lue atre fe hi nyio la, nge lue ka tria fe hi nyio tui nyipunie.”—Itre hu. 14:8-15. w18.09 5 par. 8-9

Ame la easa atre la nyipici, easa trongëne la itre hna amekötin hnei Tusi Hmitrötr, nge loi e tro fe sa saze la aqane mekuna së me aqane ujë së. Öni Peteru aposetolo: “Tune la itre nekönatre ka idrei, loi ju hë hna tro thenge la itre aja i nyipunie ekö, lo thatre Akötresieti petre kö nyipunie. Nge hmitrötre ju fe ngöne la nöjei aqane ujë i nyipunie.” (1 Pet. 1:14, 15) Ame e Korinito ekö, nyimutre la itre atr ka kuci ngazo. Nyipiewekë tro la itre atr e cili a saze matre troa wië xajawa i Iehova. Ame fe enehila, nyimutre la itre ka saze göne la nyipici. Celë hi hna qaja hnei Peteru ka hape: “Ase hë lo ijine nyipunie a kuca la itre aja ne la itre nöj, me nyinyape thel la itre huliwa nyine hmahman, me itre trenge aja hna thatreine xomehnöth, me hmo hnei ka haitr, me feete qenahmo, me ithikeu troa iji menu la ka haitr, me thili kowe la itre idrola ka sis.”—1 Pet. 4:3. w18.11 7 par. 13

Nemene la ka troa xatua së troa thele la itre “hna hnëkëne kowe la mele ka tha ase palua kö”? Hnene la itre pane Keresiano ekö hna catre cainöj. Öni Iesu kowe la itretre drei nyidrë: “Ame hë la nyipunie a lö kowe la ketre traon, maine ketre hunahmi, thele jë e cili la itre atr ka ijije troa kapa la maca.” (Mat. 10:11) Nyipiewekë tro sa kuca tune lai enehila. Ngo, tha tro kö sa sesëkötr, e hetre atr ka xele ma drenge la itre maca ka lolo ke, nyimutre la itre ka pëkö hni ne ipië me ka pë aja troa thele Akötresie. Easa thele la itre atr ka hni ka ipië me ka thele la nyipici. Ceitune hi la huliwa cili memine la huliwa ne tratrau sinöe i Iesu ekö. Qëmekene troa cane la ketre ewekë, tune la qëhnelö maine nyine isilikeun, hnei Iesu hna pane tro troa thele sinöe. Thupene lai, nyidrëti a xome la keesi zuti i nyidrë, me mekune hmaca lo itre hnei nyidrëti hna inin. Ketre tune mina fe enehila, nyipiewekë tro sa pane thele la itre atr. Thupene lai, tro sa xome la keesi zuti së me pane mekune lo itre hne së hna inin, matre xatua angatr troa hane drengethenge Iesu.—Mat. 28:19, 20. w18.10 10 par. 3-4

Fillipo la ketre tulu ka lolo. Hnei angeic hna tro fë maca ka loi. Hnei angeic palahi hna catre cainöj, ngacama kola traqa la itre jol. Hna hamë angeic la ketre hnëqa e Ierusalema. (Itre hu. 6:1-6) E cili, hna saze la mele i angeic. Thupene la kola humuthi Setefano, hna nyiqane qanangazone la itre Keresiano. Celë hi matre, hna kötr hnene la itre Keresiano a tro Ierusalema. Ngo aja i Filipo tro palahi a catre huliwa i Iehova. Celë hi matre hnei angeic hna fek a tro Samaria, ke, nyimutre la itre atr e cili ka aja itre maca ka lolo. (Mat. 10:5; Itre hu. 8:1) Aja i Filipo troa nue la uati hmitrötre i Akötresie troa eatrongë angeic. Celë hi matre, hnei Iehova hna upi angeic kowe la itre nöj, matre troa cainöj kowe la itre atr ka thatre la itre maca ka lolo. Nyimutre la itre atre Iuda ka wangacone la angetre Samaria, me ka qanangazo angatr. Ngo tha ka iwangatrehmekunyi atr kö Filipo. Hnei angeic hna catre tro fë la itre maca ka lolo koi angatr. Nge hnei angetre Samaria hna “ce kapa” la maca i angeic! (Itre hu. 8:6-8) Hnei Filipo palahi hna catre cainöj, nge hnei Iehova hna amanathithi angeic me hnepe lapa i angeic.—Itre hu. 21:8, 9. w18.10 25 par. 14-16

Ame la ketre ijine nyidrëti e Dekapoli, “hna traqa fë koi Iesu la ketre simi hnangenyë, nge ka thatreine ithanata hnyawa.” (Mar. 7:31-35) Hnei Iesu hna xomi angeic kowe la gaa co me aloine la meci angeic. Pine nemen? Pine laka, ka simi hnangenyë angeic, nge maine jë, tro angeic a hmahma, ke, tru la atr. Trotrohnine hi Iesu la mekuna i angeic, celë hi matre “nyidëti a e angeic” matre aloinyi angeic ngöne la gaa pë atr. Eje hi laka, thatreine kö së troa kuci iamamanyikeu, ngo loi e tro pe sa wangatrune la itre mekun me itre aliene hni ne la itre trejin, me thiina ka menyik koi angatr. Trotrohnine hi Iesu la aliene hni ne la atr ka simi hnangenyë, nge hnei nyidrëti hna thiina ka menyik koi angeic. Ketre tune mina fe së, loi e tro sa wangatrune la itre trejin ka qatre hë me itre ka sinatr. Ame la ka sisitria ngöne la ekalesia, tre, ihnim, ngo tha ene kö la etrune la hna kuca. (Ioane 13:34, 35) Kola upi së hnene la ihnim troa kuca asë la hne së hna atrein, matre xatuane la itre trejin ka qatre hë me itre ka sinatr. Tha ka hmaloi kö koi nyudren troa sine la itre icasikeu memine la huliwa ne cainöj. Ngacama hetre jole së ju hë nge tha tru kö la hnei nyudren hna troa kuca, ngo easa xatua nyudren.—Mat. 13:23. w18.09 29 par. 7-8

Iehova me Iesu a wangatrunyi së. (Gal. 2:20) Pine laka, atraqatr la ihnimi së kowe la itre trejin, matre easa thiina ka menyik koi angatr. “Epi tro pala hi sa thele la itre ewekë ne tingeting, me itre ewekë nyine thuecatrene la itre xan.” (Rom. 14:19) Easa trengeneun la mel ngöne la Paradraiso laka, tha tro hmaca kö sa kucakuca me hleuhleu! Pë hmaca kö mec me isi. Tha tro hmaca kö a meci la itre atr, nge pëhë iakötrë, pëhë jol ngöne la mele së, tune la itre jol e hnine la hnepe lapa. Thupene la caa thauzan lao macatre, troa pexej la itre atr. Ame pë hë la itre ka mele nyipici ngöne la itupath tixenuë, angatre hi la itre hna troa kapa hnei Iehova. Nge troa “nuamacanyi angatr tune la itre nekö i Akötresie.” (Rom. 8:21) Haawe, catre pi së ihnim me ithuecatrekeu me itö ixatua, utihë la fene ka hnyipixe elany. w18.09 13 par. 18

Ame la easa inine la Tusi Hmitrötr, tre, tha easë hmekuje kö a e la itre ithuemacanyi hna hamën, maine sija pena la itre mekun ka sa mekötine la itre hnying. Ngo easa mekune la itre ini hne së hna xom, göne la pengöi Iehova. Ketre tune la kepin matre Nyidrëti a kuca la itre ewekë, memine la aqane waiewekë i Nyidrë. Loi e tro fe sa thele troa trotrohnine la kepin, matre Iehova a upi së troa kuca la ketre ewekë maine sewe së pena. Nyipiewekë troa thele la aqane tro sa trongëne la itre hne së hna inin. Maine jë troa saze la aqane ujë së me itre mekuna së. Eje hi laka, tha ijiji së kö troa lapa mekune la nöjei ini hne së hna troa xom ngöne la easa ini tus. Ngo ame pe, kola ithuecatre koi së troa xomi ijin, matre troa lapa mekune la itre hne së hna e. (1 Tim. 4:15) Ame la easa catre lapa mekune la itre ini qa hnine la Tusi Hmitrötr, easë hi lai a amamane laka, ka xecie hnyawa e kuhu hni së laka, ka pexeje la itre mekuna i Iehova. Ketre, easa trotrohnine la aqane waiewekë i Iehova, nge easë fe a kapa asë la itre mekuna i Nyidrë. (Rom. 12:2) Easa saze la aqane waiewekë së, utihë la caasi la mekuna së me Iehova. w18.11 28 par. 5-6

Hnei Paulo hna qaja göi nyidrë me itre pane Keresiano ka hape, itre ka “ce huliwa . . . me Akötresie” angatr. Hnei angatr hna catre cainöj me inine la nyipici kowe la itre atr. (1 Kor. 3:6) Ketre tune mina fe enehila, easa “ce huliwa . . . me Akötresie.” Easa nue la traeme së me trengecatre së me itre mo së, matre troa eatrëne la huliwa hna ahnith hnei Akötresie. Drei la ketre manathith ka tru! Atraqatr la madrine së la easa nue la traeme së me trengecatre së ngöne la huliwa ne cainöj. Celë hi hna qaja hnene la itre trejin ka ini Tusi Hmitrötr me itre xan. Eje hi, madrine catre së troa öhne la Tusi Hmitrötr e ketri la hni ne la hnainin. Kola kökötre la lapaune i angeic nge angeic a saze aqane mel. Ketre, angeic a ce thawa me itre xan la hnei angeic hna inin. Tru la madrine i Iesu, la nyidrëti a öhne lo ala 70 lao atr ka cainöj. Angatr a bëeke hmaca me “madrin” ke, hetre thangane la huliwa ne cainöje i angatr.—Luka 10:17-21. w18.08 18 par. 11-12

Tha ka hmaloi kö troa öhne la itre nyipi ithuemacany. Ketre, itre atr ka ngazo së. Ame e itre xa ijin, itre xan a metrötrë së ke, ekö hë së ngöne la nyipici, nge ka inamacane la aqane waiewekë së ngöne la itre xa götran. Ngo nemene la ejolene lai? Maine tha hmeke kö së, tro hë sa mekun laka, tha nyipiewekë kö troa thel la itre nyipi ithuemacany, matre trotrohnine la ketre jol. Tha ka hmaloi kö troa axecië mekune hnyawa, ngöne la kola traqa la jol kowe la ketre trejin hne së hna iwesitrë memin. Maine tro palahi sa mekune la iwesitrë cili, tro hë sa luelu. Canga tro hi sa kapa la hna qaja göi angeic, ngacama pëkö ka anyipicine lai. Nemene la ini koi së? Maine tha canga iloi kö së memine la ketre trejin, tro hë sa mekuhni angeic, nge thatre pe së la itre nyipi ithuemacany. (1 Tim. 6:4, 5) Tha tro kö sa nue la itre mekun ka ngazo troa lapane la hni së, tune la troa meciun. Iehova a ajane tro sa hnime la itre trejin me easë, me nue la itre ngazo i angatr cememine la hni ka pexej.—Kol. 3:12-14. w18.08 7 par. 15; 8 par. 18

Ketre tu së fe, itre atre i Iehova së, ke, Nyidrëti la ka xupi së. (Sal. 100:3; Hna ama. 4:11) Ngo ame thene la nöjei atr, hetre hnei Iehova hna iën matre troa cilëne la ketre hnëqa ka tru. Ame ngöne Salamo 135, kola qaja la itre hlue i Iehova ka mele nyipici ekö e Isaraela ka hape, itre “nyine tenge nyi nyidë.” (Sal. 135:4) Ketre, hnei Hosea hna perofetan ka hape, tro fe angetre ethen a hane sine la nöje i Iehova. (Hos. 2:23) Hna eatre la hna perofetane cili, ngöne lo Iehova a iëne la itre atr ka xulu qa ngöne la itre xa nöj, matre troa hane musi e koho hnengödrai me Keriso. (Itre hu. 10:45; Rom. 9:23-26) Ame la itre hna siëne hnei uati hmitrötr, tre, itre hna hën ka hape, “nöje ka hmitrötr.” Angatre hi la “nöj ewekë i Akötresie” hnei Iehova. (1 Pet. 2:9, 10) Ngo tune kaa la itre hlue i Akötresie ka troa mele pe epine palua e celë fen? Hnei Iehova hna hë angatre mina fe ka hape, “nöjeng” me “ite hnenge hna iën.”—Is. 65:22. w18.07 21 par. 1-2

Easë mina fe a nyitipune la aqane hame i Iesu. (Mat. 20:28) Loi e tro sa isa hnying ka hape: ‘Ijijinge kö troa xötrethenge hnyawa la thupa ca i Iesu?’ (1 Pet. 2:21) Tru la madrine i Iehova la easa nyitipu Nyidrë me Iesu. Easa wangatrune la itre xan me thele la aqane troa xatua angatr. Celë hi hna amaman hnei Iesu, ngöne lo nyidrëti a qaja la tulu ne la atre Samaria. (Luka 10:29-37) Hnei Iesu hna inine la itretre drei nyidrë troa xatuane la itre xan, ngacama ka mele angatr ngöne la ketre nöj. Mekune hi epun la kepin matre qaja jë Iesu la tulu cili? Hnene lo atre Iuda hna hnyingë nyidrë ka hape: “Drei la atre lapa easenyi ni?” Jëne la tulu ne la atre Samaria, Iesu a ini së laka, maine easa ajane troa amadrinë Iehova, nyipiewekë tro sa hetre hni ne ham. w18.08 16 par. 5-6

Hnei Iehova palahi hna wangatrunyi Maria. Pine laka hnei nyiidro hna hetrun me thupë Iesu hnyawa, hapeu hna amanathithi Maria kö hnei Iehova? Eje hi. Hnei Akötresieti hna thupëne matre cinyihan e hnine la Tusi Hmitrötr, la itre hna qaja me kuca hnei Maria. Maine jë tha hane pë hë Maria ce tro me Iesu ngöne lo köni macatre nge sin ne cainöj nyidrë. Kola mekune laka, sine föe hë nyiidro, matre hna lapa pe hi e Nazareta. Haawe, tha hane kö nyiidro öhne la elolone la troa cainöj me Iesu. Ngo ame pe, ce nyiidro me Iesu lo ijine nyidrëti a mec. (Ioane 19:26) Thupene lai, hna lapa hnei Maria e Ierusalema ce memine lo itretre drei Iesu, qëmekene tro angatr a kapa la uati hmitrötr ngöne lo Penetekos. (Itre hu. 1:13, 14) Hna kapa fe hnei nyiidro la uati hmitrötr, tune lo itre xa angetre drei Iesu. Kola amamane e cili ka hape, Iesu hë me Maria a mel epine palua e koho hnengödrai. Eje hi, hnei Iehova hna amanathithi Maria, ke, hnei nyiidro hna catre mele nyipici! w18.07 5-6 par. 11; 7 par. 14

Jëne la itre trepene meköt, hnei Iesu hna inine la itretre drei nyidrë troa trotrohnine laka, ka hetre ethane la itre aqane ujë me itre huliwa ka ngazo hna kuca. Öni nyidrë, ame la thangane la elëhni, tre, iakötrë. Nge ame la thangane la troa hetre mekun ka ngazo, tre, nyixetë. (Mat. 5:21, 22, 27, 28) Ame la easa nue la itre trepene meköti Iehova troa eatrongë së, easë hi lai a inine la mekuthetheu së. E cili, tro hë sa axecië mekune hnyawa me atrunyi Iehova. Ngacama casi hi la aqane inine la mekuthetheu ne la itre Keresiano, ngo isapengöne kö la aqane axecië mekune i angatr. Ceitune hi lai memine la kahaitr. Tha Tusi Hmitrötre kö a qaja ka hape, ka ngazo troa iji kahaitr. Ngo eje pe a hmekë së ka hape, tha loi kö troa iji atruny maine pena troa hmo hnei kahaitr. (Ite edomë 20:1; 1 Tim. 3:8) Maine nyipici laka, tha ka iji atrunyi kö la ketre trejin, ngo hetre ketre ewekë kö nyine tro angeic a thupëne ngöne la angeic a axecië mekun. Ngacama tha kolo kö a huliwa la mekuthetheu i angeic göi kahaitr, ngo loi e tro palahi angeic a wangatrune la mekuthetheu ne la itre xan. w18.06 17-18 par. 10-11

Thupene la hnene la nöj hna sipo Iesu troa joxu, hnei nyidrëti hna hmekëne la itretre drei nyidrë qa ngöne la “leven,” ene la itre ini ne la itre Faresaio, me itre Sadukaio me itre sine xöle i Herodra. (Mat. 16:6, 12) Ame la pune la kola ce xöle la hmi me politik, tre, isi me iakötrë. Hnei Iesu hna inine la itretre drei nyidrë ka hape, tha tro kö angatr a lö hnine la kuci politik. Celë hi kepin matre, itre tane i angetre huj me itre Faresaio a thele troa humuthi Iesu. Angatr a xou tro la itre atr a drei Iesu me nuetriji angatr. E cili, tro ha pë mene i angatr ngöne la hmi me politik. Öni angatr: “Maine pëkö hne së hna kuca, tro hë la itre atr asë a lapaune koi angeic, nge tro la itretre Roma a traqa me thapa la itre ewekë së, me nöje së.” (Ioane 11:48) Celë hi matre, hnei Kaiafa, lo atre huuje ka sisitria, hna thele troa humuthi Iesu.—Ioane 11:49-53; 18:14. w18.06 6-7 par. 12-13

Ame la itupath i Satana, tre, kolo ajane troa goeëne la kuci iöni. Ame enehila, Satana a nyijëne la hmi ka thoi, memine la itre nyine iamadrinë, matre tro la itre atr a thele troa atre pengöne la itre dremoni. Itre film, me itre elo, me itre xa nyine iamadrinë a amamane la kuci iöni ceitu me ketre ewekë nyine madrin. Nemene la aqane tro sa cile kowe la itupath cili? Tha tro kö sa treqene tro la organizasio i Iehova a amë wengëne la itre nyine iamadrinë ka loi me ka ngazo. Nyipiewekë tro sa inine la mekuthethewe së, matre tro sa atreine axecië mekun thenge la itre trepene meköti Iehova. (Heb. 5:14) Ngo, maine tro sa trongëne la eamo hnei Paulo hna hamën ngöne la topik enehila, tro së lai a iëne hnyawa la itre nyine iamadrinë. Ame la atr ka lue ialamek tre, angeice hi a qaja, ngo tha ka kuca kö. Celë hi matre, ame la easa iëne la ketre nyine iamadrinë, loi e tro sa isa hnying ka hape: ‘Eni kö a trongëne la itre trepene meköt hnenge hna inine kowe la itre atr? Nemene la mekuna ne la itre hnenge hna ini Tusi memin, maine itre hnenge hna cainöje kow, e tro angatr a öhne la nyine iamadrinë hnenge hna iën?’ E tro sa trongëne la itre trepene meköt hne së hna inine kowe la itre atr, haawe, tro ha hmaloi koi së troa thipetrij la itre itupathi Satana.—1 Ioane 3:18. w18.05 18-19 par. 13

Nemene la aqane tro sa nyitipu Paulo? Ame la hnapan tre, loi e hetre aja së troa thel la itre hni ka ajan “la mele ka pë pun.” Ame la hnaaluen tre, tro sa sipo iele Iehova troa xatuan la itre atr ka hetre hni ka ajan troa dreng la maca hne së hna tro fë. (Itre hu. 13:48; 16:14) Celë hi hna kuca hnei Silvana, ketre trejin ka 30 hë lao macatre ne pionie. Öni angeic, “Qëmekene tro eni a fenafena la ketre qëhnelö, eni a thith koi Iehova, me sipo Nyidrë troa xatua ni troa atreine waiewekë hnyawa.” Easë mina fe a thith matre tro la itre angela a xatua së troa öhne la itre atr ka pi drei së. (Mat. 10:11-13; Hna ama. 14:6) Hna qaja fe hnei Robert, ketre trejine ka 30 hë lao macatre ne pionie, ka hape, “Ketre madrine ka tru la troa ce huliwa memine la itre angela, itre ka atre la mele ne la itre atr ne la teritoar.” Ame la hnaakönin, tro sa thel la ka loi thene la itre atr, memine la hnei angatr hna troa atreine kuca ngöne la huliwa i Iehova. Öni Karl, ketre qatre thup, “Eni a thel la ketre ewekë ka amaman laka, hetre aja thene la atr troa kapa la maca. Maine jë, kola hnyimahnyima, nge lolo la aqane goeë së, maine pena ka lolo la itre hnying.” Maine tro sa kuca la itre ewekë celë, tro hë së lai a “wa wene hnyawa ngöne la xomihni” tui Paulo. w18.05 7 par. 13; 8 par. 15

Tru la madrine së la easa atre ka hape, hetre atr hne së hna xatuan ekö, nge ka nyihlue i Iehova ha enehila. Öni Ioane aposetolo: “Pëkö madrinenge ka tru hune la: ene la troa drenge ka hape, itre neköng a catre trongëne la nyipici.” (3 Ioane 4) Atraqatre la madrinene la itre pionie la angatr a itronyi memine la ketre atr hnei angatr hna xatuan ekö troa atre Iehova. Nge ame enehila, ka bapataiso hë angeic, nge maine jë ka pionie fe. Haawe, maine kola kucakuca hnene la ketre pionie, loi e tro sa amekunë angeic la itre ewekë ka lolo hnei angeic hna kuca göi troa xatua itre xan. Thupene la hna wange la itre ekalesia, alanyimu la itre ka iwai trootro me föi angatr ka kepe tusi ne ole qaathene la itre trejin. Öni angatr, ka ithuecatre la itre hnepe tusi cili. Celë fe hi mekuna ne la itre qatre thup, me itre mesinare, me itre pionie, me itre ka lapa Bethela, me itre ka catre mele nyipici koi Iehova. Troa elitrauje la madrine i angatr e tro sa amamane la hni ne ole së! w18.04 23 par. 14-15

Hnei Solomona hna ena la wathebo cili. Hetrenyi la 700 lao föi angeic nge 300 lao föe ka ce lapa me angeic! (1 Ite jo. 11:3) Nge alanyimu thene la itre föe cili la itre ka thili kowe la itre xa haze. Eje hi, hnei Solomona hna ena la ketre wathebo i Akötresie. Tha tro kö a faipoipo memine la itre föe ka tha nyihlue i Iehova kö. (Deu. 7:3, 4) Thupene lai, kola ha paatre trootro la ihnimi Solomona kowe la itre wathebo i Iehova. Nge hnei angeice hna kuca la itre ewekë ka ngazo ka akötrë Iehova. Hnei angeice hna cane la itre ita ne huuj, thatraqane la lue haze Aseira me Kemosa. Hnei angeice hna ce atrune la lue haze cili memine la itre föi angeic. Nge goi cane fe Solomona la itre ita ne huuj hune la ketre wetr ka qëmeke kowe la traon e Ierusalema, lo hna hnen la ēnē i Iehova! (1 Ite jo. 11:5-8; 2 Ite jo. 23:13) Maine jë, ame koi Solomona ke, tro Iehova a thëthëhmine la itre ewekë ka ngazo hnei angeice hna kuca, e tro palahi angeic a tro fë la itre huuje i angeic e hnine la ēnē. Pëkö ngazo ka sihngödri koi Iehova. w18.07 16-17 par. 7-9

Nemene la “itre ewekë hna hna koi nyipunie” hnei Satana hna xale së memin? Maine jë, itre trengathoi hna sil göi Iehova nyine akötrë së. Aja i Satana tro sa mekun ka hape, tha hnimi së kö hnei Iehova, nge tha ka nyipiewekë kö së koi itre atr. Öni Ida, ka 19 lao macatre: “Ame itre xa ijin, kösë nanyi catre Iehova koi ni, nge tha aja i Nyidrëti kö troa ce sinee me eni.” Nemene la hnei angeic hna kuca ngöne la itre ijine cili? Öni angeic: “Ketre ixatua ka tru koi ni la itre icasikeu, nge celë hi ka acatrene la lapauneng. Ame ngöne la itre xa ijine icasikeu, hnenge hna majemine lapa thaup ke, eni a mekun ka hape, tha ajane kö la itre trejin troa drei ni. Ame hë enehila, eni a hnëkëne la itre icasikeu, me thel troa alu maine akönia hamë mekun.” Ame la petre ne la sooc tre, casi palahi la eqeane ej. Ngo, tune la hne së hna ce wang ngöne la hna melën hnei Ida, tha ceitune kö la petr memine la lapaune së. Tro la lapaune së a kökötr, maine nanazij pena. Isa qanyi së pë hë. (Mat. 14:31; 2 Thes. 1:3) Ame “la petr ka tru ne la lapaun,” tre, ka thupë së nge loi e tro palahi sa acatrene ej! w18.05 24-25 par. 12-14

Thupene la sa, hna saze la aqane ujë ne la atre thupëne la kalabus, nge hnei angeic hna sipo ixatua. (Itre hu. 16:25-34) Ceitune hi lai memine la itre atr ka xele ma dreng la maca ne la Tusi Hmitrötr. Ame la kola traqa la ketre ewekë ka ngazo koi angatr, tre, saze pi hi la aqane ujë i angatr, nge angatr fe hi lai a sipo ixatua. Ame itre xan, pëhë huliwa i angatr. Maine jë, hna tithi angatr hnene la ketre mec ka pëkö nyin, maine pena hna meci la ketre sinee i angatr. Hnene la itre ewekë cili, matre hane jë angatre hnying göne la pengöne la mel. Maine jë, angatr a hape, ‘Nemene la nyine tro ni a kuca matre troa mel?’ Ame e cili, tro hë angatr a hane ajan troa dreng la maca ne mejiun. Haawe, e tro sa catre cainöj, tro hë së lai a traqa ijij la itre atr a aja ixatua, nge tro angatr e cili a kapa la maca hne së hna tro fë.—Is. 61:1. w18.05 12 par. 10-12

Ame enehila, Satana a atimekëne la itre atr, matre tha tro kö a mama koi angatr laka, hna thahluë angatr hnene la hmi ka thoi, memine la aja mo, me kuci politik. (2 Kor. 4:4) Loi e tro sa tui Iesu, ene la troa xatuane la itre atr troa atre Iehova, me nyihlue i Nyidrë, Atre Nuamacanyi së. (Mat. 28:19, 20) Tha huliwa ka hmaloi kö la troa cainöje trootro. Ame ngöne la itre xa götran, tha ajane kö la itre atr troa atrepengöi Akötresie, nge alanyimu la itre ka wesitr ngöne la easa cainöj koi angatr. Ngo, hnene laka, hnei Iehova hna upi së troa cainöj, loi e tro sa isa hnying, me hape, ‘Pine laka, ase hë nuamacanyi ni, nemene hë la thangane lai ngöne la aqane tro ni a huliwa i Iehova?’ Alanyimu la itre hlue i Iehova ka trotrohnine laka, easenyi hë la pune la fene celë. Celë hi matre angatr a ahmaloeëne la mele i angatr, me hane xome la huliwa ne pionie. Ketre ithuecatre ka tru koi së la aqane ujë i angatr. (1 Kor. 9:19, 23) Hetrenyi la itre trejin ka pionie ngöne la itre sipu teritoare i angatr, nge ame itre xan, angatr a tro kowe la ketre ekalesia ka aja ixatua. Ketre manathithi ka tru la troa nyihlue i Iehova tune lai!—Sal. 110:3. w18.04 13 par. 13-14