Mei

Hnei Iehova hna amë e hnine la Tusi Hmitrötr la foa lao Evangelia, matre troa xatua së troa atrepengöi Iesu. Itre ej a qaja la mele i Iesu memine la huliwa ne cainöje i nyidrë. Kolo fe a amamane la itre hna qaja me kuca hnei Iesu, memine la itre aliene hni nyidrë. Itre ej a aijijë së troa mekune hnyawa la tulu i nyidrë. Jëne la itre Evangelia, kösë easa xötrethenge la itre thupa ca i Iesu. Celë hi matre loi e tro sa inine la itre Evangelia matre troa atrepengöi Iesu hnyawa me nyitipu nyidrë. Tha tro hmekuje kö sa e la itre Evangelia, matre troa atrepengöi Iesu hnyawa. Loi e tro fe sa xomi ijine matre troa inine me lapa mekun itre ej. (Wange ju fe la Iosua 1:8.) Ketre, nyipiewekë tro sa mekun ajuine la itre Evangelia. Loi e tro sa pane huliwane la mekuna së matre troa atre la itre ewekë ka traqa ekö, memine la itre aliene hni ne la itre atr. Nge pane ithele jë ngöne la itre itusi së hna hnëkën hnene la organizasio i Iehova. w21.04 4-5 par. 11-13

Itre macatre qëmekene tro Iesu a traqa e celë fen, hnei Iehova hna perofetan göne la Mesia laka, troa kuiëne la 30 lao manie sileva matre troa othi nyidrë. (Zak. 11:12, 13) Celë hi lai hna kuca hnene la ketre sipu sinee i nyidrë. (Sal. 41:9) Ketre, hnei Zakaria hna perofetan ka hape: “Lepejë la ate thupë mamoe mate isa ijepi la nöjei mamoe.” (Zak. 13:7) Maine ju, tha tro kö a athixötrëne la itre ka hnimi Iehova me Iesu, ngo tro pe a acatrene la lapaune i angatr. Hapeu, hna traqa fe la jole celë enehila? Eje hi. Hnene la itre xaa hlue i Iehova ka hlemu ekö hna nuetrije la nyipici, nge itre ka iamenumenu hë angatr enehila. Hnei angatr hna thele troa ajojezine la itre xan me silitrengathoi la itre hlue i Iehova ngöne la itre nuvel me Ëternet. Ngo tha hnene kö la itre ewekë cili hna sawa la itre hlue i Iehova troa catre mele nyipici. Eje hi, tha sesëkötre kö angatr ke, ase hë perofetane lai e hnine la Tusi Hmitrötr.​—Mat. 24:24; 2 Pet. 2:18-22. w21.05 11 par. 12; 12-13 par. 18-19

Öni Tusi Hmitrötr, troa mama trootro me lualai la nyipici ngöne la nyipi ijin. (Kol. 1:9, 10) Iehova la ka amamane la nyipici, matre nyipiewekë tro sa atreine itreqe hnyawa. Ame la kola öhne hnene la itre trejin ka elemekene la huliwa së laka, ka tria la aqane trotrohnine së la ketre ini, angatr a canga saze me amamane la nyipi aliene lai ini. Ame la itre xaa hmi, hnei angatr hna saze la itre xaa ini matre troa amadrinëne la itre atr me hane kepe angatr. Ngo ame pe la Itretre Anyipici Iehova, angatr a saze la itre xaa ini ka tria, matre troa easenyi koi Akötresie, me nyitipu Iesu. (Iako. 4:4) Ketre, tha easë kö a wange hmaca la ketre ini matre troa amadrinë itre xan, ngo pine laka, trotrohnine hë së la hna qaja hnei Tusi Hmitrötr. Easa hniine la nyipici!​—1 Thes. 2:3, 4. w21.10 22 par. 12

Nemene la nyine tro sa kuca e easë caas? Loi e tro sa lapa mekun la aqane xatua së hnei Iehova. (Sal. 55:22) E cili, tro hë sa atreine waiewekë hnyawa. Loi e tro fe sa lapa mekun la aqane xatuane Iehova la itre trejin ka pë sinee. (1 Pet. 5:9, 10) Celë hi hna kuca hnei Hiroshi. Nyimutre la itre macatre ne angeic ngöne la nyipici, nge tha ka hmi kö la itre atrene la fami angeic, matre pëkö sinee i angeic. Öni angeic: “Easë asë hi a cile kowe la itre jol. Ngo easa isa kuca la hne së hna atrein matre troa catre nyihlue i Iehova. Celë hi ka ithuecatr kowe la itre ka mele caas ngöne la nyipici.” Ketre, loi e tro sa acatrene la aqane imelekeu së me Iehova, me thith me fe la hni së koi Nyidrë. Nyipiewekë mina fe tro sa catre e me lapa mekun la aqane hnimi së hnei Iehova hnine la Tusi Hmitrötr. Hnene la itre xaa trejin hna inin me hnehen la itre xötr ka ithuecatr, tune la Salamo 27:10 me Isaia 41:10. Ame pena itre xan, angatr a dreng la kola e la Tusi Hmitrötr memine la itre itusi hna inin ngöne la itre icasikeu. Celë hi ka xatua angatr ngöne la angatr a e Tusi Hmitrötr caas, me hnëkëne la itre icasikeu. w21.06 9-10 par. 5-8

Hapeu, hna meci la ketre sinee i epun? Haawe, loi e tro epuni a e la itre xötr ka troa acatrene la lapaune i epun kowe la melehmaca. Hapeu, hna upetröneë la ketre sinee i epun? Maine eje hi, loi e tro epuni a ini Tusi Hmitrötr matre xecie koi epun laka, ka meköti la ihaji Iehova. Eje hi, nyipiewekë tro sa acatrene la lapaune së ngöne la easa cile kowe la itre jol. Loi e tro fe sa qaja koi Iehova la itre aliene hni së. Nge tha tro pi kö sa lapa caas, ngo loi e tro palahi sa ce tro memine la itre trejin. (Ite edomë 18:1) Ngacama akötre catre la hni epun, ngo kuca jë la itre huliwa me itre xaa ewekë ka amadrinë epun me xatua epun. (Sal. 126:5, 6) Nyipiewekë mina fe troa catre sine la itre icasikeu, me cainöj, me e la Tusi Hmitrötr. Ketre, the thëthëhmine kö la itre manathith hne së hna troa kapa elany qaathei Iehova. Ame la epuni a öhne la ixatua i Iehova, kola acatrene la lapaune i epun. w21.11 23 par. 11; 24 par. 17

Pine nemene matre kola aceitunëne la itretre drei Iesu memine la itre “nekönatr”? Ame ngöne la fene celë, kola wangatrune la itre ka trenamo, ka hlemu me ka trene mus. Nge kola wangacone la itretre drei Iesu, kösë tha nyipiewekë kö angatr. Hna aceitunë angatr me itre “nekönatr.” (1 Kor. 1:26-29) Ngo tha celë kö lai mekuna i Iehova. Hnauëne la Iesu a qaja la itre “nekönatr”? Pine laka, hnene la itretre dreng hna hnying ka hape: “Drei la ka tru ngöne la Baselaia ne hnengödrai?” (Mat. 18:1) Ame ekö, nyipiewekë koi angetre Iudra troa cilëne la itre göhnë ka tru. Önine la ketre ka inamacan: “Ame la ka sisitria kowe la itre atr ekö, tre, troa hlemu e cailo fen me cilëne la itre hnëqa ka tru, nge tro fe a metrötrë angatr hnei itre xan.” Atre hi Iesu laka, nyipiewekë tro la itretre dreng a xometrije qa kuhu hni angatr la thiina cili. w21.06 20 par. 2; 21 par. 6, 8; 22 par. 9

Ame Paulo aposetolo ke, ketre qatre thup nge hnei nyidrëti hna amamai tulu ka loi. Ame lo kola aja ixatua hnene lo itre trejin ne Thesalonika, hnei Paulo hna hamë eamo koi angatr. Ngo qëmekene troa hamë eamo koi angatr, hnei Paulo hna pane qaja aloine la itre huliwa i angatr, me ihnimi angatr, me aqane mele nyipici angatr. Hnei nyidrëti fe mekune la aqane mele i angatr laka, tha ka hmaloi kö ke, angatr a cile kowe la iaxösisi me itre jol. (1 Thes. 1:3; 2 Thes. 1:4) Ketre, hnei nyidrëti fe hna qaja koi angatr ka hape, itre tulu angatre kowe la itre xaa trejin. (1 Thes. 1:8, 9) Madrine catre angatr ngöne lo Paulo a qaja aloinyi angatr! Eje hi, tru la ihnimi Paulo kowe la itre trejin. Celë hi matre, ijiji nyidrëti hi troa hamë eamo ngöne la lue tusi nyidrë kowe la angetre Thesalonika.​—1 Thes. 4:1, 3-5, 11; 2 Thes. 3:11, 12. w22.02 15 par. 6

Jëne la itre ini ka thoi, Satana a thele matre tro sa upezö Akötresie la itre akötre së. Ame la kola meci la ketre nekönatr, itre xan a qaja ka hape, hnei Akötresie hna xomi nyën matre troa ketre angela i Nyidrë. Drei la ketre trengathoi ka tru! Atre hnyawa hi së laka, ketre Keme ka tru ihnimine Iehova. Tha easë kö a upezö Akötresie ngöne la kola tithi së hnei mec, maine meci pena la ketre sinee së. Xecie koi së laka, tro Nyidrëti elanyi a aloine la itre sine mec me amelene hmaca la itre ka mec. Easë fe a cainöje kowe la itre atr ka hape, Akötresieti ka ihnimi Iehova. Celë hi lai ka aijijë Iehova troa sa mekötine koi Satana, atre upezö Nyidrë. (Ite edomë 27:11) Iehova la Akötresieti ka tru ihnimin me utipin. Nyidrëti a treij me hleuhleu ngöne la kola qanangazo së, me ngöne la kola tithi së hnei mec. Ketre, Nyidrëti a akötr ke, itre atr ka ngazo së. (Sal. 22:23, 24) Nyipici, trotrohni së hi hnei Iehova; Nyidrëti a ajane troa akeukawane la hni së; nge tro kö Nyidrëti a apatrene la itre akötre së.​—Wange ju fe la Esodro 3:7, 8; Isaia 63:9. w21.07 9-10 par. 9-10

Easenyi hë la ijine tro la itre ka idrengethenge a hnimi Iehova me nyihlue i Nyidrë uti hë epine palua. Tro Iesu a nyinyine la nöjei jol qa ngöne la aqane axecië mekune i Adramu me Eva. Nge tro Iehova a amelene hmaca la itre milio lao atr, matre troa mele palua ngöne la Paradraiso e celë fen. (Luka 23:42, 43) E cili, tro ha pexej la mele ne la itre ka sine la lapa i Iehova. Nge tune la hna qaja hnei Dravita, tro ha ‘petrë angatr hnene la lolo me atrun.’ Mingöminge catre la mejiune së, itre ka sine la “ka ala nyimu atraqatr.” (Hna ama. 7:9) Iehova a hnimi së nge Nyidrëti a ajane tro sa sine la lapa i Nyidrë. Celë hi matre, loi e tro sa kuca la hne së hna atrein matre troa amadrinë Iehova, me lapa mekun la itre hnei Nyidrëti hna thingehnaean. Ketre, tro fe sa wangatrune la göhnë së ngöne la lapa i Iehova, memine la mejiune së troa atrunyi Nyidrë uti hë epine palua! w21.08 7 par. 18-19

Nyimutre la itre macatre ne xomihni Ieremia perofeta la itre atr ka icilekeu. Ame la ketre ijin, hnei angatr hna “qaqa [Ieremia] me jele ngazo” angeic. Kucakuca catre angeic, nge hnei angeic hna mekun troa nue la hnëqa i angeic. (Iere. 20:8, 9) Ngo tha hnei Ieremia kö hna nue la huliwa ne cainöj! Nemene la ka thue trengecatre me madrine koi angeic ngöne la huliwa cili? Hnei angeic hna lapa mekun la lue ini ka sisitria. Ame la hnapan, angeic a tro fë la maca i Akötresie ka hamëne “la pune memine la mejiun” kowe la itre atr. (Iere. 29:11) Ame la hnaaluen, angeic la qeneqaja i Iehova. (Iere. 15:16) Ketre tu së fe, easa tro fë la maca ka hamë mejiune kowe la itre atr, nge easa nyitrengewekë i Akötresie. Maine tro sa lapa mekun la itre ini cili, tro hë sa madrin ngacama tha kapa kö itre xan, la maca hne së hna tro fë. Haawe, tha tro pi kö sa kucakuca e tha canga saze kö angatr. Tune la easa eëny, nyipiewekë tro sa atreine xomihni aqeany ngöne la easa inine la itre atr.​—Iako. 5:7, 8. w21.10 27 par. 12-13

Maine easa xötrei atre la nyipici maine ekö hë së pena, ngo loi e tro palahi sa acatrene la lapaune së. Pine nemen? Wanga troa nanazij. Atre hi së laka, ame la lapaune ke, ej a anyipicine la nöjei ewekë ka tha mama kö koi luemek. Ngo canga tro hi sa thëthëhmine la itre ewekë cili. Öni Paulo ka hape, ame la kola nanazije la lapaune së ke, “ngazo ka canga ajolë së.” Nemene la ka troa thupë së qa ngöne la hnö cili? (2 Thes. 1:3) Ame la hnapan, loi e tro sa sipo Iehova la uati hmitrötre i Nyidrë. Pine nemen? Pine laka, ame la lapaun, tre, ketre igötranene la wene ne la ua. (Gal. 5:22, 23) Maine tha sipone kö së la uati hmitrötr, thatreine kö së troa lapaune kowe la Atre Xup. Nyipiewekë tro sa catre sipone ej koi Iehova, matre tro Nyidrëti a hamë së. (Luka 11:13) Tha tro kö sa xou troa qaja koi Nyidrë ka hape: “Nyixane jë la lapaune hun.” (Luka 17:5) Ketre, loi e tro palahi sa inine la Tusi Hmitrötr.​—Sal. 1:2, 3. w21.08 18-19 par. 16-18

Ka sisitria catre la itre trejin qatr me qatre föe ngöne la organizasio i Iehova. Ngacama pëhë trengecatre i angatr tune ekö, ngo nyimutre la itre ini hnei angatr hna kapa ngöne la mele i angatr. Celë hi matre, Iehova palahi a hamë hnëqa i angatr. Tusi Hmitrötr a qaja la itre xaa hlue i Iehova ekö ka catre mele nyipici uti hë la angatr a qatr. Hanawang la tulu i Mose. Ame lo kola 80 lao macatre i nyidrë, hnei Iehova hna ië nyidrë troa perofeta me eatrongëne la nöje Isaraela. Ame Daniela perofeta, nyidrëti la qeneqaja i Iehova ngacama 90 hë lao macatre i nyidrë. Ketre tui Ioane aposetolo, 90 lao macatre i nyidrë ngöne lo nyidrëti a cinyihane la tusi Hna Amamane jëne la uati hmitrötr. Ame Simeona, lo atr ‘ka meköt nge ka catre nyihlue i Akötresie,’ ke, tha hna anyimua qeje angeice kö e hnine la Tusi Hmitrötr. Ame pe, öhnyi angeice hi hnei Iehova, nge hnei Nyidrëti hna aijijë angeic troa öhnyi Iesu medreng, me perofetan göi Iesu me thine i nyidrë.​—Luka 2:22, 25-35. w21.09 3-4 par. 5-7

Nyipiewekë tro la itre kem me thin a hnime ceitune la itre nekönatr. Tha tro kö angatr a goeëne la eisapengöi nyudren me upi nyudren troa kuca la hna thatrein, wanga tro nyudreni a elëhni me kucakuca. (Efe. 6:4) Öni Sachiko, ketre trejine föe: “Aja i nenë ekö tro ni a huliwa catr ngöne la hna ini, ngacama jol. Eje hi, itre macatre ne tha ini hë ni, ngo eni palahi a luelu laka, ma tha ijije kö la itre hnenge hna kuca koi Iehova.” Hnei Dravita joxu hna qaja ka hape, tha hnei nyidrëti kö “hna kuca la ite ewekë ka tru” me itre hna thatrein. Hnei nyidrëti pe hna hetre hni ne ipië, matre hna ‘amenyikene me aupune la hni’ nyidrë. (Sal. 131:2) Nemene la ini koi itre kem me thin? Loi e tro epuni a hetre hni ne ipië me atreine waiewekë hnyawa, göne la hnei epuni hna atreine kuca, ngo itre nekö i epuni fe. Nyipiewekë tro epuni a atrepengöi nyudreni hnyawa, me ithuecatre koi nyudren troa iëne la itre mekun hna atreine troa eatrën elany. w21.07 21-22 par. 5-6

Tha tro kö sa thëthëhmine laka, hnei Iehova hna hamë së la ketre ahnahna, ene la atreine troa ië ewekë. Eje hi, isa qanyi së kö iëne troa drengethenge Iehova maine tha drei Nyidrëti pena. Ame la itre xaa nekönatr, ngacama tha loi kö la thiina ne la itre kem me thine i nyudren ngo hnei nyudreni hna iëne troa nyihlue i Iehova. Ame itre xan, kola ini nyudren hnei itre kem me thin troa hnimi Iehova, ngo nyudreni pe a trotrije la nyipici. Celë hi matre, isa qanyi së kö iën troa nyihlue i Iehova. (Ios. 24:15) Itre kem me thine fe, tha tro kö epuni a mekun laka, zöi epun matre kola trotriji Iehova hnene la itre nekö i epun! Ame itre xaa ijin, ketre kem maine thine la ka trotriji Iehova memine la hnalapa. (Sal. 27:10) Eje hi, ketre akötr ka tru kowe la itre nekönatr ke, nyudreni a hnim me metrötrë angatr. Itre nekönatre fe, maine hna upetröneë la kem me thine i epun, the luelue kö laka, trotrohnine hi Iehova la akötre i epun. Nyidrëti a hnimi epun nge madrine catre Nyidrë ngöne la epuni a mele nyipici. Ketre, tha zöi epuni kö e ngazo la aqane axecië mekun ne la itre kem me thin. w21.09 27 par. 5-7

Ijije hi tro sa aceitunëne la itre atr hna upetröneë memine la ketre mamoe hna tithi hnei mec, ke angeic a kucakuca ngöne la götrane u. (Iako. 5:14) Ijije hi troa ixötrekeu la meci angeic, matre loi e troa pane ananyi angeic qa ngöne la ekalesia. Ketre hatrene ihnimi Iehova lai kowe la itre xaa hlue i Nyidrë. Ketre, kola xatuane la trejin hna upetröneë troa trotrohnine laka, ka ngazo la hnei angeic hna kuca, nge loi e tro angeic a ietra. Ngacama hna upetröneë angeic, ngo ijije hi tro angeic a sine la itre icasikeu matre acatrene hmaca la aqane imelekeu i angeic me Iehova. Loi e tro fe angeic a e me inine la itre itusi së, me goeëne la JW Télédiffusion. Maine tro angeic a saze la aqane ujë i angeic, tro hë la itre qatre thup a hamë eamo koi angeic. E cili, tro hë angeic a acatene la lapaune i angeic me bëeke hmaca koi Iehova. w21.10 10 par. 9, 11

Ame ngöne la hmi së enehila ke, hetre itre götrane ka ceitu memine la aqane hmi ne la itre pane Keresiano ekö. Celë hi ka mama ngöne la aqane eköthe la hmi së. Ame ekö, hna acile la itre aposetolo. Nge ame enehila, hna acile la itre trejin ka iwai trootro, itre qatre thup, me itre atre ixatua. (Fil. 1:1; Tito 1:5) Ketre, easë fe a metrötrëne la itre wathebo i Iehova göne la ce meköle trefën, me faipoipo, me aqane troa huliwane la madra, memine la aqane troa thupëne la ekalesia qa ngöne la itre ka tha ietra. (Itre hu. 15:28, 29; 1 Kor. 5:11-13; 6:9, 10; Heb. 13:4) Öni Tusi Hmitrötr, “casi hi la lapaun” hna kapa hnei Akötresie. (Efe. 4:4-6) Drei la madrin ka tru troa sine la nöje i Iehova, me atre la nyipici göi Nyidrë me aja i Nyidrë! Haawe, the luelue kö së. Easë hnyawa hi ngöne la nyipi hmi! w21.10 22-23 par. 15-17

Hna traqa la ketre jol ka tru koi Iehosafata joxu. Hnene la trongene isi angetre Amona me Moaba me itre xan qa ngöne la wetr e Seira hna thel troa lepe la traon. E cili, Iehosafata a xou me hnehengazo kowe la nöj me kowe la itre sinee i angeic. (2 A. l. ite jo. 20:1, 2) Ngo nemene la hna kuca hnei Iehosafata joxu? Ame ngöne 2 Aqane lapa ite Joxu 20:5-12, hnei angeic hna thithi koi Iehova, me sipo Nyidrë troa aegöcatrenyi angeic. Hnei Iehova hna upi Iaziela, ketre atre Levi troa qaja koi Iehosafata la itre trengewekë ka mama ngöne la topik ne la drai. Celë hi matre, hnei Iehosafata hna mejiune koi Iehova me idrengethenge. Ame la Iehosafata joxu me trongene isi angeic a mejë troa isi, hnei angeic hna acile la itretre nyima qëmeken, ngo pëkö jiane isi angatr. E cili, hnei Iehova hna eatrëne la hnei Nyidrëti hna thingehnaean me ngaan la ithupëjia me Iehosafata.​—2 A. l. ite jo. 20:18-23. w21.11 15-16 par. 6-7

Xecie koi së laka, tro kö Iehova a xatua së ngöne la easa cile kowe la itre jol, me hamë trengecatre së matre troa mele nyipici. (2 Kor. 4:7-9) Haawe, the luelue kö së. Tro kö Iehova a amamane la ihnimi nyipici Nyidrëti koi së. Önine la atre cinyihane la Salamo: “Eje la lue xajawa i Iehova hui angete qoue nyidë, lo angete teqene la ihnimi nyidë.” (Sal. 33:18-22) Nemene la nyine tro sa lapa mekun? Qëmekene tro sa atre la nyipici, hnei Iehova hna hnimi së, tune la aqane hnime Nyidrëti la nöjei atr. Ngo pine laka itre hlue i Nyidrëti hë së enehila, easa kepe eloine qa ngöne la ihnimi nyipici Nyidrë. Eje hi, Iehova a thupë së me ekögölithi së hnene la lue ime i Nyidrë. Tro Iehova a eatrëne la itre hnei Nyidrëti hna thingehnaean ke, aja i Nyidrë tro sa mele madrin! (Sal. 46:1, 2, 7) Ketre, tro Iehova a hamë së la trengecatre ka ijij, matre tro sa atreine mele nyipici ngöne la itre jol. w21.11 7 par. 17-18

Maine jë, hetre ketre atr hne së hna atre, ka lapa fë trengehni koi nyimu macatre. Maine jë, angeic a wesitr kowe la ketre sine huliwa, maine sine ini, maine ketre sinee pena. Celë fe hi la hna kuca hnene lo 10 lao trejin me Iosefa. Hnei angatr hna wesitr koi Iosefa me akötrë angeic. (Gen. 37:2-8, 25-28) Ame pe, tha hnei Iosefa kö hna lapa fë trengehni. Ngacama ketre atr ka tru angeic e Aigupito, ngo tha hnei angeice kö hna të la ngazo i angatr. Hnei Iosefa pe hna trongëne la Levitiko 19:18, ngacama hna cinyihan e thupen la wathebo cili. (Gen. 50:19-21) Maine easa ajane troa amadrinë Iehova, nyipiewekë tro sa nyitipu Iosefa. Tha tro kö sa lapa fë trengehni, ngo loi e tro pe sa nue la ngazo hna kuca koi së. Hnei Iesu hna upi së troa nue la ngazo ne la itre ka akötrë së. (Mat. 6:9, 12) Ketre, öni Paulo: “The të kö la ngazo hna kuca koi nyipunie ange hnimina.”​—Rom. 12:19. w21.12 11 par. 13-14

Ame lo 14 Nisan 33 M.K., ene lo jidri tixenuë i Iesu e celë fen, hnei nyidrëti hna tro kowe la gatran e Gethesemane. Nge hnei nyidrëti hna catre thithi koi Iehova. (Luka 22:39-44) Eje hi, Iesu a cile kowe la itre jol ka tru, matre hnei nyidrëti hna “tro fë . . . la itre xëwe me itre sipo hna sue catre fë ce me trenge timidra.” (Heb. 5:7) Nemene la hna sipon hnei Iesu? Hnei nyidrëti hna sipo trengecatre koi Iehova, matre troa atreine mele nyipici me kuca la aja i Nyidrë. Öhne hi Iehova la kola hnehengazo hnene la Nekö i Nyidrë, matre hnei Nyidrëti hna upe la ketre angela troa aegöcatrenyi Iesu. Atre hi Iesu la hnëqa ka tru hna ahnithe koi nyidrë, ene la troa cilëgöline la ëje ne la Keme i nyidrë. Hnei Iehova hna dreng la itre thithi Iesu. Pine nemen? Pine laka, ame la ka sisitria koi Iesu ke, troa mele nyipici koi Iehova me cilëgöline la ëje i Nyidrë. Maine celë fe hi lai hne së hna hnehengazon, tro Iehova a sa la itre thithi së me xatua së.​—Sal. 145:18. w22.01 18 par. 15-17

Nyimutre la itre ka thipetrije la maca hne së hna tro fë pine laka, tha easë kö a sine la kuci politik. Angatr a ajane tro sa hane voot. Ame pe, atre hi së la aja i Iehova. Maine tro sa iën la ketre atr troa mus, kösë easë hi lai a thipetriji Nyidrë. (1 Sam. 8:4-7) Ame koi angatr, loi e tro sa xupe la itre uma ne ini, me pital, me itre xaa ewekë ju kö. Angatr a nuetriji Iesu pine laka, sisitria catre koi së la maca ka loi hune la troa nyinyin la itre jol ne la fen. Nemene la nyine tro sa kuca matre tha tro kö sa nuetriji Iesu? (Mat. 7:21-23) Ame la ka sisitria koi së, tre, troa eatrëne la hnëqa hna ahnithe koi së hnei Iesu. Tha tro kö sa nue la kuci politik me itre ewekë ne fen troa ajolë së qa ngöne la hnëqa së. Eje hi, easa hnime la itre atr me meku angatr. Ngo maine easa ajane troa xatua angatr, loi e tro sa cainöjëne la Baselaia i Akötresie, me amamai angatr la aqane troa nyisinee i Iehova. w21.05 7 par. 19-20

Önine la itre xaa ka mus ka hape, angatr a nyihlue i Akötresie, ngo xele pe angatre ma nue la musi angatr. Celë hi kepin matre, angatr a icilekeu memine la Joxu hna acile hnei Iehova. Nge tune lo hneijine la itre pane Keresiano, angatr a qanangazone la itretre drei nyidrë. (Itre hu. 4:25-28) Nemene la hna kuca hnei Iehova? Kola qaja ngöne Salamo 2:10-12: “Qa ngöne lai, inamacanejë nyipunie ite joxu, nge ame nyipunie itete amekötine la fene, te, kapaju. Nyi hlue jë koi Iehova memine la qou, nge madinejë memine la hmengöhmengön. Idemijë nyipunie memine la Nekön, wanga elëhnijë nyidë, nge patepi nyipunie e kuhu gojeny, ke tha hmite kö cia la elëhni nyidë. Manathithi angat’ asë angete lapaune koi nyidë.” Eje hi, Iehova a utipine la itre nöj, matre Nyidrë a nue ijine koi angatr troa saze me kapa la Baselaia i Nyidrë. Ngo xoxopatre pe hi la ijin. (Is. 61:2) Haawe, enehila hi la ijine troa thele la nyipici me axecië mekune hnyawa. w21.09 15-16 par. 8-9

Paulo a qaja ka hape, loi e tro sa mejihnine la itre hne së hna hetreny. (Fil. 4:12) Eje hi, ka sisitria catr koi së la aqane imelekeu së me Iehova, ngo tha ene kö la itre hne së hna hetreny. (Hab. 3:17, 18) Hanawang la hna qaja hnei Mose kowe la angetre Isaraela thupene la 40 lao macatre ne lapa angatr ngöne la hnapapa. Öni angeic: “Hnei Iehova Akötesi ’ö hna amanathithinyi ’ö ngöne la nöjei huliwa asë ne la iwanakoime i ’ö . . . hna ce me eö hnei Iehova Akötesi ’ö ngöne la nöjei macate ka luate; nge tha pate kö thei ’ö la kete ewekë.” (Deu. 2:7) Ame ngöne la 40 lao macatre, hnei Iehova hna hamë mana kowe la angetre Isaraela, nge goi tha hnyeqetre fe kö la itre iheetre i angatr qa Aigupito. (Deu. 8:3, 4) Ketre tu së fe, loi e tro sa mejihnine la hne së hna hetreny, me olen me kapa la itre manathith qaathei Iehova. E cili, tro hë sa amadrinë Nyidrë. w22.01 5 par. 10-11

Itre trahmanyi fe, hnëqa i epun troa nyihnyawane la mele ne la fami epun. Celë hi matre, epuni a kuca la hnei epuni hna atrein matre troa thupë angatr. Ngo ame ngöne la itre jol, epuni a mekun laka, ijije hi tro epuni a nyinyine itre ej. Ame pe, tha tro kö a mejiune kowe la sipu trengecatre së. Loi e tro pe a sipo ixatua koi Iehova ngöne la thith. Nge ame la epuni a ce thith memine la föe i epun, qaja amamane jë la itre jol. Ketre, loi e tro epuni a ithel me trongëne la itre eamo i Iehova e hnine la Tusi Hmitrötr me itre itusi së. Ame koi angatr, nyipiewekë troa hetre manie me mo. Ngo goeëne la tulu i Joxu Iehosafata. (2 A. l. ite jo. 20:1-30) Hnei angeic hna catre lapaune koi Iehova, nge tha hnei Iehova kö hna nuaxöji angeic. Ketre tune fe, tha tro kö Iehova a nuaxöji epun.​—Sal. 37:28; Heb. 13:5. w21.11 15 par. 6; 16 par. 8

Hnei Iehova hna xupi së hnaiji Nyidrë, matre tha madrine kö së la kola kuca la ketre ewekë ka tha meköti kö kowe la ketre atr. (Gen. 1:26) Ngazo pe, itre atr ka tha pexeje kö së, matre ijije hi troa ajolëne la aqane axecië mekune së. Pane mekune jë lo ka traqa koi Iona. Hnei angeic hna elëhni ke, tha trotrohnine kö angeic la aqane axecië mekune i Iehova. Eje hi, hnei Nyidrëti hna utipine la angetre Nineve. (Iona 3:10–4:1) Nemene la ka traqa e thupen? Hna sasaithe la 120 000 lao angetre Nineve ka ietra nge hna amelen. Nyipici, tha ka loi kö la aqane waiewekë i Iona, matre hnei Iehova hna ameköti angeic. Tha nyipiewekë kö tro Iehova a qejepengöne koi së la aqane ameköti ewekë i Nyidrë. Hnei Iehova ekö hna aijijëne la itre hlue i Nyidrë troa qaja la itre aliene hni angatr göne la itre mekuna i Nyidrë, me itre hnei Nyidrëti hna troa kuca. (Gen. 18:25; Iona 4:2, 3) Nge ame itre xaa ijin, hnei Nyidrëti hna qejepengöne la itre aqane axecië mekune i Nyidrë. (Iona 4:10, 11) Eje hi, tha nyipiewekë kö tro sa qaja la itre mekuna së, göne la aqane axecië mekune i Iehova.​—Is. 40:13, 14; 55:9. w22.02 3-4 par. 5-6

Maine easa ajane troa tune la ka “co,” loi e tro sa ‘mekun ka hape, sisitria kö itre xan hui easë.’ (Fil. 2:3) E cili, tha tro hë sa athixötrëne la itre xan. Maine tro sa goeëne la itre thiina ka lolo ne la itre trejin, tro hë sa öhne laka, hetre hnei angatr hna atreine kuca hui easë. Öni Paulo aposetolo koi angetre Korinito: “Drei la ka aisa pengönë eö me ketre? Nemene la hnei eö hna hetreny nge tha hna hamë eö? Haawe, maine hna hamë eö, hnauëne la eö a sipu selë eö kösë tha hnei eö hna kapa?” (1 Kor. 4:7) Eje hi, tha ajane kö së troa pi mama me qaja ka hape, sisitria catre kö së hui itre xan. Maine ketre trejin trahmanyi a atreine cile fë cainöj, maine ketre trejine föe pena a ini Tus koi nyimu atr, loi e tro nyidroti a olene me atrunyi Iehova. w21.06 22 par. 9-10

Alanyimu la itre hlue i Iehova ka catre cainöj, ngacama paatre kö la itre atr ngöne la itre hnalapa. Itre xan a thele troa cainöj ngöne la itre batima hna thing nge hna thupëne hnyawa. Ame la itre xaa trejin, angatr a cainöj ngöne la itre götran gaa nany, nge xalaithe hi la itre atr ka mel e cili. Maine jë, caasi hi la atr hnei angatr hna troa cainöje kow. Ngo ame la angatr a traqa, paatre kö lai atr! Maine hna traqa fe koi së la itre jole cili, tha tro pi kö sa kucakuca. Loi e tro sa cainöj ngöne la nöjei ijin. Ijije hi tro sa iöhnyi memine la itre atr ngöne la itre hnalapa i angatr. Itre xaa trejin a cainöj e hnaipajö maine e jidr pena ke, ajane la itre atr troa porotrik ngöne la itre ijine cili. w21.05 15 par. 5, 7

Hapeu, hna traqa fe la jole celë enehila? Eje hi. Ame enehila, itre xan a wesitr kowe la itre Temoë Iehova pine laka, tha hane kö së atrune la ijine hnaho me Noël ke, lue feete lai tha hna nyitrepene kö hnei Tusi Hmitrötr. Ketre, tha easë kö a sine la itre huliwa i nöj, me itre hna majemine kuca ngöne la itre ijine hnë mec, ka tha ihmeku kö memine la Tusi Hmitrötr. Maine jë, angatr a mekun laka, celë hi aja i Akötresie. Ngo tha tro kö Akötresieti a kapa la hmi angatr, e tro angatr a wangatrune la itre qenenöj hune la itre hna qaja hnei Tusi Hmitrötr. (Mar. 7:8, 9) Nemene la nyine tro sa kuca matre tha tro kö sa nuetriji Iesu? Loi e tro sa acatrene la ihnimi së kowe la itre wathebo me itre trepene meköti Iehova. (Sal. 119:97, 113, 163-165) Maine tro sa catre hnimi Iehova, tro hë sa thipetrije la itre hna majemine ka tha ihmeku kö memine la Tusi Hmitrötr, me amë panëne la aja i Nyidrë. w21.05 6 par. 15-16

Tune kaa la aqane tro sa trongëne la eamo i Paulo? Loi e tro sa acatrene la lapaune së, me inine la Tusi Hmitrötr, me catre thith, me cainöj. (2 Tim. 4:4) Maine ka catrecatre la lapaune së, tha tro kö a ajojezi së hnene la itre trengathoi hna sile göne la itre hlue i Iehova. (Is. 28:16) Ketre, loi e tro sa acatrene la ihnimi së koi Iehova, me kowe la Trengewekë i Nyidrë, me kowe fe la itre trejin. E cili, tha tro kö sa nue la itre ka trotrije la nyipici troa athixötrë së. Ame ngöne la hneijine la itre pane Keresiano, alanyimu la itre ka nuetriji Iesu. Ngo hetre itre xane fe ka catre lapaune koi Iesu me xötrethenge nyidrë, tune la ketre atrene la Hnaakootr Ka Tru i angetre Iudra, memine “la itretre huuj.” (Itre hu. 6:7; Mat. 27:57-60; Mar. 15:43) Ame fe enehila, itre milio la itre atr ka hane xötrethenge Iesu. Pine nemen? Pine laka, hnei angatr hna inine me hniin la itre nyipici qa hnine la Tusi Hmitrötr. Kola qaja e hnine la Tusi Hmitrötr: “Atraqate la tingetinge koi angete hnine la wathebo i cilie, nge pëkö nyine athixöte koi angat.”​—Sal. 119:165. w21.05 13 par. 20-21

Atre hi Paulo aposetolo laka, tha hnene kö la sipu trengecatre i nyidrë matre nyidrëti a catre cainöj. Ngo hnene la trengecatre qaathei Iehova. Jëne la uati hmitrötre i Iehova, hnei Paulo hna catre cainöj ngacama hna qanangazo nyidrë me akalabusi nyidrë. Ngacama ketre nekötrahmanyi Timoteo, ngo hnei angeice fe hna sipo ixatua koi Iehova göne la huliwa ne cainöj. Hnei Timoteo hna ce tro me Paulo ngöne la huliwa ne mesinare. Nge hnei Paulo hna upi Timoteo troa wang la itre ekalesia me ithuecatre koi angatr. (1 Kor. 4:17) Ame itre xaa ijin, Timoteo a mekun laka, thatreine kö angeic troa eatrëne la hnëqa cili. Ngo öni Paulo: “The nue ketre kö troa wangaconyi eö pine hi laka, thöth eö.” (1 Tim. 4:12) Ketre, hetre ka ithinyi fe ngöne la ngönetrei Timoteo, ene la “itre sine meci ka traqa lapa.” (1 Tim. 5:23) Ame pe, xecie koi Timoteo laka, jëne la ixatua ne la uati hmitrötr, tro hë angeic a catre cainöj me huliwa kowe la itre trejin.​—2 Tim. 1:7. w21.05 21 par. 6-7

Ame ngöne Iakobo 1:19, hetre ketre trepene meköt hna hamëne kowe la itre ka hamë eamo. Öni Iakobo: “Nyipiewekë troa saqe dreng, me hmitre ithanata, me hmitre elëhni.” Maine jë, ketre qatre thup a mekun laka, atre asë hi nyidrëti la jol ka traqa, ngo hapeu, nyipici kö lai? Kola qaja ngöne Ite Edomë 18:13 ka hape: “Ame la ate sa kowe la ewekë nge tha pane ate, te, angeic’ a hmo me hmahma.” Nyipiewekë tro sa tro troa wang lai trejin matre atre la jol hnei angeic hna melën. Ngo loi e troa pane dreng qëmekene troa ithanata. Maine ju, tro la qatre thup a hnyingëne ka hape, “Nemene la ka traqa koi nyipo?” “Nemene la aqane tro ni a xatua nyipo?” Maine tro la itre qatre thup a pane xomi ijine troa ithel me hnying, tro hë angatre lai a atreine xatuane me ithuecatre kowe la itre trejin. Maine easa ajane troa hamë eamo ka loi, tha tro hmekuje kö sa e la itre xaa xötre ne la Tusi Hmitrötr, maine qeje mekune pena. Loi e troa mama kowe la itre trejin laka, easa wangatrunyi angatr, easa trotrohni angatr, nge easa ajane troa xatua angatr. w22.02 17 par. 14-15