Juun

Tha ka hmaloi kö la mele ne la sine föe ke, tha tru kö la hnei eahlo hna hetreny. Ngo ame pe, hnei eahlo hna kuiëne la lue pies ka co catr. Nge göi tha drenge fe së la kola mala. Ame pe, atre hnyawa hi Iesu la hnei eahlo hna kuiën, ene la lue neköi manie ka co catr ngöne la ijine cili. Eje hi, tha ijiji eahlo kö troa itöne la caa neköi sisi, ketre waco ka co thupene ngöne la ijine cili. Iesu a haine la hna kuca hnene la sine föe. Celë hi matre, hnei nyidrëti hna hëne la itretre drei nyidrë me qaja koi angatr ka hape: “Tru catre kö la hna kuiëne hnene la sine föe celë ka pë ewekë hnine la hnë kuië mani, hune la itre xan.” Thupene lai, öni nyidrë: “Hnei angatr asë hi [itre ka trenamo] hna kuiën qa ngöne la trengamo i angatr, ngo hnei eahlo pe hna hamëne la hnepe hnei eahlo hna hetreny, nge nyine mele i eahlo.” (Mar. 12:43, 44) Eje hi, hnei eahlo hna hamën asë la hnei eahlo hna hetrenyi ngöne la drai cili. Nge eahlo pë hë a catre mejiune kowe la ixatua i Iehova.​—Sal. 26:3. w21.04 6 par. 17-18

Ame lo Iesu e celë fen, hnei nyidrëti hna catre cainöj. Aja i nyidrëti tro la itre nyipi Keresiano a nyitipu nyidrë. (Ioane 4:35, 36) Eje hi, itretre drei Iesu a madrin troa cainöj ke, ce nyidrëti me angatr. (Luka 10:1, 5-11, 17) Ngo ame hë la kola othi Iesu me humuthi nyidrë, kola nanazije trootro la aja i angatr troa cainöj. (Ioane 16:32) Thupene la kola amele Iesu hmaca, hnei nyidrëti hna ithuecatr koi angatr troa wangatrune la huliwa ne cainöj. Ame hë la nyidrëti a elë hnengödrai, hnene la itretre dreng hna catre cainöj. Nge hnene la itre ithupëjia hna eetr me qaja la topik ne la drai. Iesu la ka xomiujine la huliwa ne cainöj ngöne lo hneijine la itre pane Keresiano, nge hnei Iehova hna amanathithine la huliwa cili. Celë hi lai ka mama ngöne lo Penetekos 33 ke, 3 000 lao atr ka xomi bapataiso. (Itre hu. 2:41) Nge kolo palahi a elë la etrune la itre ka xötrethenge Iesu. (Itre hu. 6:7) Ketre, hnei Iesu hna perofetan ka hape, ame ngöne la itre drai ne la pun, tro palakö a kapa la maca ka loi hnei itre xan.​—Ioane 14:12; Itre hu. 1:8. w21.05 14 par. 1-2

Mekune hi epun lo epuni a xötrei atre la nyipici? Ame koi epun, tro fe itre xan a hane madrin troa atre itre ej. Xecie koi epun laka, tro la itre ini cili a hamë mele ka loi me mejiune koi angatr. (Sal. 119:105) Celë hi matre, hnei epuni hna tro fë la itre ini cili kowe la itre sinee i epun. Ngo nemene la aqane ujë i angatr? Tha kapa kö angatr la nyipici. Tha tro kö sa sesëkötr e pëkö ka dreng la maca hne së hna tro fë. Ame ngöne lo hneijine i Iesu, hnene la itre atr hna nuetriji nyidrë, ngacama öhne hi angatr la nyidrëti a kuca la itre iamamanyikeu, jëne la mene i Akötresie. Eje hi, hnei Iesu hna amele Lazaro hmaca. Ame pe, hnene la itre tane i angetre Iudra hna icilekeu me Iesu, me thele troa humuthi nyidrë me Lazaro!​—Ioane 11:47, 48, 53; 12:9-11. w21.05 2 par. 1-2

Loi e tro sa sine la itre icasikeu. Itre ini hna hamën a ithuecatr koi së, nge itre icasikeu a aijijë së troa easenyi catr kowe la itre trejin. Eje hi, loi e tro sa nyisineene la itre trejin ka hamë ithuecatr. Tha kolo hmekuje kö la itre trejin ka ce xötr me easë, maine ka traqa pena qa ngöne la nöje së. Öni Tusi Hmitrötr, “thene la ite qate la inamacan.” (Iobu 12:12) Ijije fe tro la itre ka co a xatuane la itre ka tru. Ngacama tru catre kö Ionathana hui Dravita, ngo lue nyipi sinee nyidro. (1 Sam. 18:1) Hnei nyidroti hna ithuecatrekeu me catre nyihlue i Iehova, ngacama hna traqa la itre jol ka tru. (1 Sam. 23:16-18) Öni Irina, ketre trejin ka mele caas ngöne la nyipici: “Ame la itre trejin, tre, kösë itre kem me thine së me itre sipu trejin me easë. Jëne angatr, ijije hi tro Iehova a xatua së.” Eje hi, itre sinee së a ajane troa xatua së me ithuecatr koi së. Ngo nyipiewekë tro sa fe la hni së koi angatr. w21.06 10-11 par. 9-11

Hnei Iesu hna qaja tulu ne la ketre hlu ka pë hni ne utipin. Hnene la joxu hna nue la gufa ne la hlu ke, thatreine kö angeic të lai gufa. Ngo hnene la hlue cili hna akalabusine la ketre hlu ka xomi gufa thei angeic, ngacama tha tru kö hune lo gufa i angeic thene la joxu. E cili, hnene la joxu hna akalabusi angeic. Hnene la aqane ujë ne la hlue hna hetre ethan koi angeic me koi itre xane fe. Hnei angeic hna akötrëne lo ketre hlu me ‘kuië angeic ngöne kalabus uti hë la troa të asë la gufa.’ Ketre, hnei angeic hna athixötrëne la itre ka goeë angeic. “Öhne ju hi lai hnene lo itre xa hlu, nge hace ju hi la itre hni angatr.” (Mat. 18:30, 31) Ketre tu së fe, hetre thangane koi itre xan la aqane ujë së. Maine xele kö së troa iloi me nue la ngazo hna kuca hnene la ketre atr, tro hë angeic a akötr. Ketre, tro fe hë sa athixötrëne la itre xaa trejin ka öhn. w21.06 22 par. 11-12

Satana a ajane tro sa kuca la itre huliwa ka sis. Ame ngöne lo hneijine i Noa, hnei Iehova hna öhne laka, “atraqate la ngazo i ate e celë fen.” E cili, hnei Nyidrëti “hna ijigöi fë la hnei nyidëti hna xupe la ate e celë fen, nge kola teije la hni nyidë.” (Gen. 6:5, 6, 11) Tune kaa enehila? Tha saze kö la itre atr! Eje hi, madrine catre Diabolo ngöne la kola kuca la itre huliwa ka sis hnene la itre trefën, me ngöne la kola ce lapa la lue föe maine lue trahmany! (Efe. 4:18, 19) Nge drei jë kö la madrine i Satana ngöne la angeic a upe la ketre hlue i Iehova troa kuca la ngazo. Ngo maine thatreine hë Iehova xomihnine elanyi la itre huliwa ka sis cili, tro hë Nyidrëti a amamane la aqane methinëne Nyidrë itre ej. Ame fene la musi Satana, “kete ate a musinëne la kete mate angazo nyëne kö,” me angazone fe la ihnadro. Nyimutre la itre atr ka akötrëne la itre öni, lo hnei Iehova hna upi së troa thupën. (Ate cai. 8:9; Gen. 1:28) Nemene la pun? Önine la itre ka inamacan ka hape, alanyimu la itre öni me itre feja ka troa paatre palua elany. w21.07 12 par. 13-14.

Itre xaa hlue i Akötresie a akötre palaha pine la ngazo hnei angatr hna kuca ekö. Ngacama hnei angatr hna ietra, ngo ame koi angatr, tha tro jë kö Iehova a nue la itre ngazo i angatr. Maine celë fe hi mekuna i epun, the hnehengazo menu kö. The thëthëhmine kö laka, Iehova a amamane la ihnimi nyipici Nyidrë kowe la itre hlue i Nyidrë. Celë hi ka troa xatua epun troa nyihlue i Iehova cememine la madrin me mekuthetheu ka wië. Eje hi, “madra ne la Neköi Nyidrë, Iesu, a ahmitrötrë së qa ngöne la nöjei ngazo së.” (1 Ioane 1:7) Ame la easa kucakuca pine la itre tria së, tha tro kö sa thëthëhmine laka, aja i Iehova troa nue la ngazo ne la itre ka ietra. Öni Dravita: “Atraqate la ihnimi nyidë koi angete qoue anganyidë, tune la edraië ne la ite hnengödrai hune la fene hnengödrai. Hnei nyidëti hna iananyine me eëshë la ngazo shë tune la enanyine kohië me kuë.”​—Sal. 103:11, 12. w21.11 5-6 par. 12-13

Loi e tro la itre Keresiano trahmanyi a nyipiine la itre föe i angatr. (1 Pet. 3:7) Eje hi, loi e tro angatre a wangatrune me metrötrëne la föe. Tha tro kö la trahmanyi a upe la föe troa kuca la hna thatrein. Ketre, tha angeice kö a goeëne la eisapengönene la föe i angeic me itre xan. Nemene la ethane e tro angeice a kuca lai? Hanawange la hna melën hnei Rosa. Tha ka hmi kö la föi eahlo matre hnei nyidrëti hna majemine qaja la eisapengöne i Rosa me itre xaa föe me ithanata akökötrenyi koi eahlo. Ame koi Rosa, pëkö ka hnimi eahlo. Öni eahlo: “Eni a ajane troa qaja lapane koi ni ka hape, Iehova a hnimi ni.” Ame la Keresiano trahmanyi ke, ka nyipiine la föe. Atre hi angeic laka, tro lai a xatua nyidro lue trefën me acatrene la aqane imelekeu i nyidroti me Iehova. Ame la trahmanyi ka nyipiine la föe i angeic ke, angeic a hnime me qaja aloine la föe. w21.07 22 par. 7-8

Hapeu, epuni kö a kucakuca e tha traqa palakö la ewekë hnei epuni hna itöne jëne Ëternet? Ngo tune kaa e hetre nyipi kepin matre tha canga traqa kö la ewekë hna itön? Tha tro kö epuni lai a itreqe hnyawa? Ame ngöne Ite Edomë 13:11, kola qaja la enyipiewekëne troa lapa treqen. Kola hape: “Ame la itre mo hna canga xawan, tre, troa acon. Ngo ame la atre hetrenyi hnei iwanakoim, tre, troa amanan.” (MN) Nemene la ini koi së? Ame la atr ka inamacan, tre, tha kuca nyimenyimëne kö angeice la huliwa. Ame ngöne Ite Edomë 4:18 kola qaja ka hape: “Ame la jëne la ite ka meköti, te, tune la lai ka hadehadeu, kola lai trotro uti hë e hnaipajö.” Kolo lai a amamane laka, tha canga qaja asë kö Iehova la aja i Nyidrë kowe la nöje i Nyidrë. Ngo ijije fe tro sa xome la xötr celë göne la aqane kökötre la ketre Keresiano ngöne la nyipici. Eje hi, easa xomi ijine troa acatrene la aqane imelekeu së me Iehova. w21.08 8 par. 1, 3-4

Nyimutre la itre huliwa së ngöne la fene celë ka troa paatr. (Mat. 24:14; Luka 10:2; 1 Pet. 5:2) Ngo easa ajane troa kuca la hne së hna atrein ngöne la huliwa i Iehova. Alanyimu la itre ka thele troa akökötrene la huliwa ne cainöj. Itre xan a mekun troa xome la huliwa ne pionie, me huliwa ngöne la Bethela, me sine la Huliwa Ne Xupi Uma Ne Baselaia. Nge kola thele hnene la itre xaa trejin trahmanyi troa xome la hnëqa ne qatre thup me atre ixatua. (1 Tim. 3:1, 8) Drei la madrine i Iehova troa goeëne la itre trengecatr hna nue hnene la itre hlue i Nyidrë! (Sal. 110:3) Ngo hapeu, epuni a kucakuca pine laka, tha hnei epuni kö hna eatrëne la mekuna i epun ngöne la huliwa i Iehova? Maine eje hi, loi e tro epuni a fe la aliene hni epun koi Iehova. (Sal. 37:5-7) Loi e tro fe epuni a sipo ixatua kowe la itre trejin ka macaj, me trongëne la itre eamo hnei angatr hna hamën. E cili, tro hë epuni a eatrëne la mekuna i epun. w21.08 20 par. 1; 21 par. 4

Ame Ana perofeta föe ke, ketre sine föe eahlo ka 84 lao macatre, ngo “tha patre pi kö eahlo ngöne la uma ne hmi.” Celë hi matre, hnei Iehova hna amanathithi eahlo me aijijë eahlo troa öhnyi Iesu medreng. (Luka 2:36-38) Ame fe enehila, nyimutre la itre qatr me qatre föe ka amamai tulu kowe la itre xötr ka co. Maine tro sa xomi ijine troa porotrik me angatr, me drenge la angatr a qaja la itre manathith hna kapa ngöne la huliwa i Iehova, tro hë lai a hetre eloine koi së. Sisitria catre la itre trejin qatr me qatre föe kowe la organizasio. Hnei angatr hna öhne la aqane amanathithi angatr hnei Iehova, memine la nöje i Nyidrë. Ketre, hnei angatr hna xomi ini qa ngöne la itre tria i angatr. Loi e tro sa goeë angatr ceitu me “qeqe ne inamacan.” (Ite edomë 18:4) Haawe, maine tro sa xomi ijine troa atrepengöi angatre hnyawa, tro hë lai a acatrene la lapaune së. w21.09 3 par. 4; 4 par. 7-8; 5 par. 11, 13

Tune la hna perofetan hnei Isaia, ijije hi tro la itre hlue i Iehova a xome la “zane thi ne la nöjei nöj.” (Is. 60:5, 16) Jëne la hna atreine kuca me itre talan ne la itre atr ka kapa la nyipici, easa cainöj ngöne la 240 lao nöj, me ujëne la itre itus ngöne la 1 000 lao qene hlapa. Ame ngöne la itre drai ne la pun, kola jumejume la nöjei nöj. Matre, nyipiewekë tro la itre atr a iën. Hapeu, tro kö a sajuëne la Baselaia i Akötresie, maine mejiune kowe la itre musi ne la fen? Enehila hi la ijine troa axecië mekune hnyawa. Itre hlue i Iehova a trongëne la itre wathebo i mus, ngo tha angatre kö a sine la kuci politik. (Rom. 13:1-7) Atre hi angatr laka, Baselaia i Akötresie hmekuje hi la ka troa apatrene la nöjei akötr, nge tha qaa kö celë fene la Baselaia cili.​—Ioane 18:36, 37. w21.09 17-18 par. 13-14

Maine ketre sinee i epuni a nuetriji Iehova, nyipiewekë tro epuni a acatrene la lapaune i epun, me itre atrene la fami epun. Tune kaa? Loi e tro sa sipo trengecatre koi Iehova jëne la hna e me lapa mekun la hna qaja hnei Tusi Hmitrötr, me sine la itre icasikeu. Hanawang la hna melën hnei Joanna. Hna upetröneë la kem me trejin me angeic jajiny. Öni angeic: “Tingeting me lolo la hning ngöne la eni a e la itre hna melën hnei Abigaila, Esetera, Iobu, Iosefa, me Iesu. Kola hamë trengecatre koi ni me xatua ni troa lapa mekun la itre ewekë ka loi. Hnenge fe hna öhne la itre nyima ngöne la site së ka aegöcatrenyi ni.” Ame ngöne la easa thith, loi e troa qaja koi Iehova la itre aliene së me itre akötre së. Loi e tro fe sa sipo Iehova troa xatua së matre atreine waiewekë tui Nyidrë, me “köjane koi [së] la jëne qâ [së] troa trongën.” (Sal. 32:6-8) Maine jë jole koi së troa qaja la itre aliene hni së koi Iehova. Ngo trotrohnine hi Nyidrëti la akötr ka eje the së. Iehova a ithuecatre koi së troa nenge la itre aliene hni së koi Nyidrë.​—Eso. 34:6; Sal. 62:7. w21.09 28 par. 9-10

Thupen la Penetekos 32 M.K., hnei Peteru, Iakobo, me Ioane hna meköl goeëne la ketre ewekë ka ketrepengön. Ame lo angatr hune la Wetr e Heremona, hnei Iesu hna saze me ketrepengön. Kola “hudrume la qëmeke i nyidrë tune la jö, nge ame la itre iheetre i nyidrë, tre kola hudrum tune la lai.” (Mat. 17:1-4) Hnei Iehova hna qaja kowe la itre aposetolo ka hape: “Hane hi la Nekönge hniminang, eni a madri nyën. Drei nyëne ju.” Hnene la itre aposetolo hna drengethenge Iesu ngöne la mele i angatr. Nge loi e tro sa nyitipu angatr. Tru la hni ne ole së koi Iehova ke, hnei Nyidrëti hna hnimi së, me hamë së la itre eamo ka lolo jëne Iesu Keriso, “he ne la ekalesia.” (Efe. 5:23) Tui Peteru aposetolo me Iakobo me Ioane, loi e tro sa drengethenge Iesu. E cili tro sa kapa la itre manathith ka nyimutre nge ka epine palua. w21.12 22 par. 1; 27 par. 19

Hnei Paulo aposetolo hna qaja kowe la angetre Korinito troa upetröneë la ketre Keresiano ke, kolo ha kapa la ngazo i angeic hnene la itre xaa trejin! (1 Kor. 5:1, 2, 13) Thupene lai, hnei Paulo hna dreng ka hape, hnene lo Keresiano hna upetröneë hna ietra qa ngöne la huliwa i angeic ka sis. Ngacama ka hetre ethane la aqane ujë i angeic kowe la ekalesia, ngo hnei Paulo hna qaja kowe la itre qatre thup ka hape, tha tro kö a “hamëne la itre ithanata ka catr.” Öni nyidrëti pe: “Nue hnyawane pi la ngazo i angeic, nge akeukawanyi angeice jë.” Pine nemen? Öni nyidrëti hmaca: “Wanga heti angeice jë hnei hleuhleu.” Eje hi, hnei Paulo hna utipine lai Keresiano ka ietra. Tha aja i nyidrëti kö tro angeic a hleuhleu, me sewe angeic troa bëeke koi Akötresie. (2 Kor. 2:5-8, 11) Tui Iehova, itre qatre thup a hnim me utipine la itre trejin. Ngo maine ka nyipiewekë, angatr a hajin. Nge maine ijij, angatr a utipin. Celë hi matre, ame la itre qatre thup a amekötin la ketre trejin, loi e tro angatr a tuluth la aqane troa utipi angeic. Tha tro kö a wangacone la ngazo hna kuca. w21.10 11-12 par. 12-15

Ceitune hi la easa eatr memine la kola akötrë së. Hanawang la ketre ceitun. Pane mekune jë laka, easa thupe salatr, nge xöje ju hi la hene wanakoime së. Eje hi, easa akötr ngo canga tro hi lai a meu. Nge canga thëthëhmine hë së lo lai hna xöj. Ketre tune la kola akötrë së. Maine jë, tro la ketre sinee së a ithanata akökötrenyi koi së. Ngo pine laka, tha hnei angeice kö hna thë, matre tha jole kö troa nue la ngazo i angeic. Ngo tune kaa e tru la hna xöji së? E cili, tro sa wai droketre matre troa can me pelethe hnei pasema. Maine tro palahi sa ketr lai ka akötre së, tro hë lai a sa trenge pi. Ketre tune fe, maine tro palahi sa mekun la ngazo hna kuca koi së, tro hë së lai a akötre catre hmaca kö. Celë hi matre, loi e tro sa trongëne la eamo ngöne la xötr ne la topik së. w21.12 12 par. 15

Pane mekune jë laka, ketre qatre thup a goeëne la aqane heetr ne la ketre trejin. Loi e tro la qatre thup a hnying ka hape, ‘Angeice kö a ena la ketre wathebo e hnine la Tusi Hmitrötr?’ Pine laka, tha aja i nyidrëti kö troa hamëne la sipu mekuna i nyidrë, matre nyidrëti a hnyingëne la mekuna ne la ketre qatre thup maine ketre trejine pena ka macaj. E cili, angatr a ce wang la itre eamo hna hamëne hnei Paulo aposetolo göne la aqane troa heetr. (1 Tim. 2:9, 10) Hnei Paulo hna hamëne la itre trepene meköt göne la aqane troa heetr. Öni nyidrëti ka hape, loi e tro la itre Keresiano a heetre hnyawa cememine la metrötr me atreine tulu ewekë. Tha hnei Paulo kö hna ami wathebo göne la aqane troa heetr. Atre hi nyidrëti laka, isa qanyi së kö iëne la aqane tro sa heetr, ngo thenge palahi la hna qaja hnei Tusi Hmitrötr. Haawe, loi e tro la itre qatre thup a pane wang laka, ketre trejin a heetre hnyawa cememine la metrötr me atreine tulu ewekë. Tha tro kö sa thëthëhmine laka, ame la lue trejin ke, isapengöne kö la aqane axecië mekune i nyidro, ngo ka loi asë hi. Haawe, tha tro kö sa musinëne la itre xaa trejin troa kapa la aqane waiewekë së göne la loi memine la ngazo. w22.02 16 par. 9-10

Nyimutre la itre kepin matre loi e tro sa amamane la ihnimi nyipici së koi itre xan. Kola qaja ngöne Ite Edomë ka hape: “The tro kö a pate thei ’ö la ihnimi me nyipici. . . . tro [hë] eö a hete ihnimi me manathithi ka loi xajawa i Akötesie me at.” Eje hi, “ame la ate ka ihnim, te, kola thina ka loi koi angeice kö.” Nge “ame la ate xöte thenge la meköti me ihnim, te, tro angeic’ a öhne la mel.” (Ite edomë 3:3, 4; 11:17; 21:21) Itre xötre celë a amamane la köni kepin matre nyipiewekë tro sa amamane la ihnimi nyipici së koi itre xan. Ame la hnapan ke, tro Iehova a wangatrunyi së. Ame la hnaaluen ke, tro lai a hetre eloine koi së, tune la troa hetre nyipi sinee. Nge ame la hnaakönin ke, tro sa kapa la itre manathith elany, tune la mele ka pë pun. Eje hi, nyipiewekë tro sa trongëne la eamo i Iehova, hna hape: “Amekötine hnyawa ju, ihnimekeuneju, me iutipine keun.” w21.11 8 par. 1-2

Maine easa öhne laka, kola nanazije la lapaune së ngöne la easa cile kowe la ketre jol, tha tro kö sa hnehengazo menu. Loi e tro pe sa acatrene la lapaune së. Loi e tro sa thith me xëwe koi Iehova ngöne la itre ijine akötr. Tha tro kö sa thëthëhmine laka, Iehova a upe la itre sinee së me itre trejin troa xatua së. Haawe, maine tro sa acatrene enehila la lapaune së koi Iehova ngöne la itre jol, tro fe hë sa cile catr me atreine xomihnine la itre jol elany. Hnei Iesu hna qaja kowe la itretre drei nyidrë ka hape, kola nanazije la lapaune i angatr. Ame pe, xecie koi nyidrë laka, jëne la ixatua i Iehova, tro kö angatr a atreine cile kowe la itre jol. (Ioane 14:1; 16:33) Ketre, atre hi Iesu laka, hnene la lapaun matre alanyimu la itre ka troa mele pe qa ngöne la akötr atraqatr. (Hna ama. 7:9, 14) Tro fe epuni a sine la ka alanyimu atraqatr, e tro epuni a acatrene la lapaun i epun enehila!​—Heb. 10:39. w21.11 25 par. 18-19

Tha tro kö Iehova a kuca la ketre iamamanyikeu. Ngo xecie koi së laka, tro kö Nyidrëti a xatuane me thupëne la itre ka mejiune koi Nyidrë. Calemi hë la ijine troa tupathe la lapaune së koi Iehova. Hapeu, xecie kö koi së laka, tro Iehova a thupëne la nöje i Nyidrë ngöne la isi Gog atre Magog, ene la itre nöj hna acasin? Maine jë, tro sa mekun laka, kola troa humuthi së nge pëkö jë ne kötre së. Ngo loi e xecie koi së laka, tro kö Iehova a amele së. Ketre, tro la itre musi a goeë së ceitu me itre mamoe hna nuaxöj, nge pëkö atre thupën. (Ezek. 38:10-12) Pëkö jiane isi së nge thatreine kö së isi. Celë hi matre, kola mekune hnene la itre nöj laka tha jole kö troa lepi së. Ame pe, tha itre ka lapaune kö angatr koi Akötresie. Tha öhne kö angatr la trongene isi ne la itre angela ka lapa xötreithe la nöje i Akötresie. E cili, tro ha asesëkötrë angatr ngöne la kola traqa la trongene isi Iehova matre amele së!​—Hna ama. 19:11, 14, 15. w22.01 6 par. 12-13

Iehova a hnim asë la nöjei trejin. Celë hi matre, loi e tro fe sa hnimi angatr. Eje hi, loi e tro sa thupë angatr. Maine hne së hna akötrëne la ketre trejin, tha tro kö sa wangahmalohmaloeëne la hne së hna kuca me hape, loi e tro angeic a inine troa nue la ngazo itre xan. Hnauëne laka, canga dreng akötrëne hi angatr la hna kuca? Maine jë, angatr a sipu wangaconyi angatre kö pine la nöje i angatr, me aqane mele i angatr ekö. Ame itre xan, angatr a xötrei atre la nyipici, matre thatreine palakö angatr troa xomihni. Celë hi matre, loi e tro sa thele tingeting. Ame pe, loi e tro fe angeic a wangatrehmekun laka, ketre thiina lai ka ngazo, nge nyine troa saze. E cili, tro ha lolo la mele i angeic, nge ketre tui itre xane fe. w21.06 21 par. 7

Öhne hi Iesu la itre aliene hni së. Ame la easa kucakuca, hapeu, tha aja së kö troa hane xatua së hnene la ketre sinee ka melëne fe la jole cili? Celë hi lai hna kuca hnei Iesu koi së. Atre hi nyidrëti la pengön ne la atr ka kucakuca me aja ixatua. Trotrohni së hi hnei nyidrë, nge tro kö nyidrëti a xatua së “ngöne la nyipi ijin.” (Heb. 4:15, 16) Eje hi, hnei Iesu lo hna kapa la ixatua ne la angela ngöne la gatran e Gethesemane. Haawe, loi e tro fe sa kapa la ixatua qaathei Iehova jëne la itre itusi së, me video, me cainöj, me itre qatre thup maine itre xaa trejin ka macaj. (Luka 22:39-44) Tro Iehova a hamë së “la tingeting” me aegöcatrenyi së. Nyidrëti a sa la itre thithi së me hamë së la “tingetinge hna thatreine trotrohnine hnei atr.”​—Fil. 4:6, 7. w22.01 18-19 par. 17-19

Ka meköti palahi la itre jë i Iehova. Ngo jole koi së troa mejiune kowe la itre ka elemeken la organizasio i Nyidrë. Thatreine kö tro sa mejiun koi Iehova nge tha mejiune pe së kowe la itre hnei Nyidrëti hna acil me mejiune kow. Ame enehila, Iehova a xomiujine la organizasio i Nyidrë e celë fen jëne “la hlue ka nyipici me ka inamacan.” (Mat. 24:45) Tune ekö, Iehova a upe la hlue cili troa xomiujine la nöje i Nyidrë e cailo fen me hamëne la itre hna amekötin kowe la itre qatre thup. Nge angatre pë hë a trongëne la itre hna amekötin cili e hnine la itre ekalesia. Celë hi matre, maine tro sa mejiune kowe la itre hna amekötin hnene la organizasio Iehova me itre qatre thup, tro hë sa amamane laka, easa mejiune koi Iehova. w22.02 4 par. 7-8

Easa madrin pine laka, Itretre Anyipici Iehova së! Easa madrin troa xatuane la ketre atr ka “hmalahnine troa kapa la mele ka pë pun.” (Itre hu. 13:48) Caasi hi la mekuna së me Iesu, ngöne lo kola bëeke hnene la itretre drei nyidrë qa hna cainöj. Öni Tusi Hmitrötr: “Hnene la uati hmitrötr hna amadrinë nyidrëti catr.” (Luka 10:1, 17, 21) Öni Paulo aposetolo koi Timoteo: “Wai eö kö, me itre ini hnei eö hna hamën. . . . Nge tro hë eö a amele eö, me itre ka drei eö.” (1 Tim. 4:16) Ame la huliwa ne cainöj ke, jëne mel kowe la nöjei atr. Celë hi matre, easa thupëne la aqane ujë së, wanga troa hetre ethan kowe la ëje i Akötresie me kowe la maca hne së hna tro fë. (Fil. 1:27) Ketre, qëmekene troa cainöj, easa pane hnëkë me sipo Iehova troa amanathithine la itre trengecatre së. Aqane tro hi së lai a ‘thupëne la aqane hamë ini së.’ w21.10 24 par. 1-2

Ame la hna hape, “itre thiina ka hnyipixe,” ke kola qaja la itre mekun me aqane ujë i Iehova. Ame la Keresiano ka thele troa hetrenyi la itre thiina cili, ke angeice a amamane ngöne la mele i angeic la itre thiina i Iehova. Angeic a nue la uati hmitrötr troa xomiujine la itre mekun me aliene hni angeic me itre hnei angeice hna kuca. Angeice fe a hnimi Iehova memine la nöje i Nyidrë. (Mat. 22:36-39) Ketre, angeic a madrin ngacama angeic a cile kowe la itre jol. (Iako. 1:2-4) Angeice fe a thele tingetinge me itre xan. (Mat. 5:9) Angeic a xomihni aqean me thiina ka loi me itre xan. (Kol. 3:13) Angeic a hniin me kuca la itre ewekë ka loi. (Luka 6:35) Angeice fe a amamane ngöne la itre hnei angeice hna kuca laka, tru la lapaune i angeice koi Iehova. (Iako. 2:18) Nge angeice a hmitr troa elëhni ngöne la kola akötrë angeic, me catre xomihni ngöne la kola tupathi angeic. (1 Kor. 9:25, 27; Tito 3:2) Maine easa ajane tro heetrëne la itre thiina ka hnyipixe, loi e tro sa eënyine asë la itre thiina hna qaja ngöne Galatia 5:22, 23 me ngöne la itre xaa xötr ne la Tusi Hmitrötr. w22.03 8-9 par. 3-4

Tha tro hmekuje kö la itre qatre thup a cainöj ngöne la itre hnalapa trootro. Loi e tro fe angatr a cainöj e nöjei ijin. (Efe. 6:14, 15) Tui Paulo, nyipiewekë tro la itre qatre thup a xomi ijin matre troa hamë ini koi itre xan, tune la itretre ixatua. (1 Pet. 5:1, 2) Tha tro kö la itre qatre thup a nue asë la traeme i angatr kowe la itre huliwa ne la ekalesia, nge pëhë traem kowe la huliwa ne cainöj. (Mat. 28:19, 20) Maine jë, tro angatr a pane thith me thipëne la itre xaa hnëqa e hnine la ekalesia, matre hetre ijine kowe la itre xaa huliwa ka sisitria, tune la hmi ne la fami, me cainöj, me inine la itre nekönatr ngöne la huliwa cili. Trotrohnine hi Iehova laka, aja i angatr troa atreine tulu ewekë. w22.03 27 par. 4, 7; 28 par. 8

Hapeu, hnei epuni kö hna xou troa nyihlue i Iehova ngöne la xötrei? Maine jë, jole koi epuni troa cainöje trootro. Nge epuni a xou troa qanangazo epuni hnene la itre fami me itre sinee i epun. Maine eje hi, canga trotrohnine hi epuni la hna melën hnene la ka ini tusi. Atre fe hi Iesu laka, troa traqa la jole cili. Celë hi matre, hnei nyidrëti hna ithuecatr kowe la itretre dreng ka hape, tha tro kö a nue la jole cili troa sewe angatr troa nyihlue i Iehova. (Mat. 10:16, 17, 27) Ketre, loi e tro sa amamane kowe la ka ini tus la aqane troa cainöj. Ame lo Iesu a upe la itretre dreng troa cainöj, hnei angatr hna xou. Ngo hnei Iesu hna amamane koi angatr la nyine troa qaja, memine la itre atr ne angatr hna troa cainöje kow. (Mat. 10:5-7) Tro sa nyitipu Iesu tune kaa? Loi e tro sa amamane kowe la ka ini tus la itre atr nyine tro angeic a cainöje kow. Maine jë, hetre atr hnei angeic hna mekun troa xatuane jëne la Tusi Hmitrötr. Loi e tro sa xatua angeic troa hnëkëne la nyine troa qaja. w21.06 6 par. 15-16

Ame lo 2015, hna traqa la ketre sa e Népal. Önine la itre xan ka hape: “Kösë samek la kola kei la itre magazë me itre uma ka hekö.” “Kola xou me nyenyape hmohmo la itre atr.” Öni itre xan: “Lue menetre hi, ngo ame koi ni, kösë qea palaha.” Ame enehila, tha ketre traone kö maine ketre nöj la hna jumejum, ngo nöjei nöj asë. Hnei Hagai perofeta hna qaja ka hape: “Dei la hna ulatine hnei Iehova ne sabaoth, ka hape, A casi pe hi, tha hmite kö, nge tro ni a jumejume la hnengödrai memine la fen.” (Hag. 2:6) Isapengöne kö la hna perofetan hnei Hagai memine la ketre sa. Itre sa a jumejume la nöj me akeine la nöjei uma. Ngo ame la hna perofetan hnei Hagai ke, ka hetre thangane fe ka loi kowe la nöj. Öni Iehova: “Tro ni a jumejume la nöjei nöj’ asë, nge tro ha traqa la nöjei ewekë lo hna ajane hnei nöjei nöj’ asë; nge tro ni a atiqane la uma ce hnei lolo.” w21.09 14 par. 1-3

Maine easa ajane troa nyisineene la ketre atr, loi e tro sa ithanata me angeic e nöjei drai. Celë fe hi aqane tro sa acatrene la aqane imelekeu së me Iehova. Ame la easa qaja koi Iehova la itre mekuna së, me itre aliene hni së, me itre hne së hna hnehengazon, easë hi lai a amamane laka, easa mejiune koi Nyidrë. Ketre, xecie hnyawa koi së laka, tru la ihnimi Nyidrëti koi së. (Sal. 94:17-19; 1 Ioane 5:14, 15) Nyipiewekë fe troa cememine la itre trejin. Ame angatr ke, itre ahnahna qaathei Iehova. (Iako. 1:17) Eje hi, Iehova a wangatrune la itre hlue i Nyidrë. Celë hi matre, hnei Nyidrëti hna aijijë së troa sine la lapa ka cahae i Nyidrë ka ihnim “o ijin’ asë.” (Ite edomë 17:17) Ame ngöne la tusi Paulo aposetolo koi angetre Kolose, hnei nyidrëti hna qaja ka hape, hna “akeukawanyi” nyidrë hnene la itre xaa trejin. (Kol. 4:10, 11) Ketre, hna xatua Iesu hnene la itre sinee i nyidrë, itre angela me itre atr. (Luka 22:43) Tha hnene kö laka, easa sipo ixatua kowe la ketre trejin ka macaj, matre easa kucakuca. Loi e tro sa fe la hni së koi angeic ke, tro lai a hetre thangane ka loi. w21.04 24-25 par. 14-16

Nemene la nyine tro sa kuca e kola athixötrë së me akötrë së hnene la aqane ujë ne la ketre trejin? Loi e tro palahi sa thele tingeting. Loi e tro sa fe la hni së koi Iehova, me sipo Nyidrë troa amanathithine lai trejin. Ketre, tro fe sa sipo Iehova troa xatua së matre öhne la itre thiina ka lolo thene lai trejin. (Luka 6:28) Maine thatreine kö së thëthëhmine la ngazo hna kuca, loi e tro sa pane mekun la aqane troa ce ithanata me angeic. Nge tro fe sa mekun laka, tha hnei angeice kö hna thë troa akötrë së. (Mat. 5:23, 24) Ame hë la easa ce ithanata, loi e troa nue angeic troa pane qeje mekun. Ngo tune kaa e tha aja i angeice kö troa iloi? ‘Tha tro kö sa mano troa xomihni’ angeic. Loi e tro sa xomihni aqeany. (Kol. 3:13) Maine tro palahi sa lapa fë trengehni, tro ha thë la aqane imelekeu së me Iehova. Haawe, tha tro pi kö sa nue la ketre atr maine ewekë troa athixötrë së. Aqane tro hi së lai a amamane laka, sisitria kö Iehova hune la itre xaa ewekë.​—Sal. 119:165. w21.06 23 par. 15