Julai

Ame la troa upetröneë la ketre atr ke, hna amekötine hnei Iehova. Nyine loi kowe la hna upetröneë me koi itre xane fe. Ijije hi tro sa qaja ka hape, tha ka loi kö la aqane axecië mekun ne la itre qatre thup. Ngo atre hi së laka, tha tro pi kö angatr a qaja la ngazo ne lai trejin. Ketre, thatre kö së la itre hnei angeice hna kuca. Loi e xecie koi së laka, hnene la itre qatre thup hna axecië mekun thenge la hna qaja hnei Tusi Hmitrötr me amekötine “koi Iehova.” (2 A. l. ite jo. 19:6) Nyipiewekë tro sa sajuëne la ihaji ne la itre qatre thup ngöne la kola upetröneë la ketre sinee së. Easë hi lai a xatua angeic troa canga bëeke koi Iehova. Celë hi lai hna kuca Elizabeth. Öni eahlo: “Hace catre koi ni la kola upetröneë la neköng. Ngo ame la angeic a bëeke hmaca koi Iehova, öni angeice ka hape, mekune ka loi la kola upetröneë angeic. Hetre ini hnei angeice hna xomi ini qa ngön. Xecie hnyawa koi ni laka, meköti la ihaji Iehova.” w21.09 28-29 par. 11-12

Pane mekune jë laka, epuni la sine föe. Maine jë, ajane fe eahlo troa hamën atrune koi Iehova, ngo hnei eahlo hi hna hamën la hnei eahlo hna hetreny. Atre hi Iesu laka, ka tru koi Iehova la ahnahna i eahlo. Eje hi, hetre ini ka tru nyine tro sa xom qa ngöne la hna melën celë, ka hape: tru la madrine i Iehova la easa hamën la hne së hna hetreny, me nyihlue i Nyidrë hnene la hni së ka pexej, me mekuna së ka pexej. (Mat. 22:37; Kol. 3:23) Nyidrëti a madrine la easa kuca asë la hne së hna atrein koi Nyidrë! Kola qaja la traeme së me trengecatre hne së hna nue matre troa cainöj me sine la itre icasikeu. Tune kaa la aqane tro sa trongëne la ini hna xom qa ngöne la hna melën celë? Maine tro sa amamane kowe la itre trejin laka, Iehova a madrine kowe la itre ahnahna hnei angatr hna kuca, tro hë lai a ithuecatre koi angatr. Maine jë, hetre ketre trejine qatre föe ka kucakuca pine laka, pëhë trengecatre i eahlo troa catre cainöj tune ekö. w21.04 6 par. 17, 19-20

Atre hnyawa hi Iehova la ijine ka loi tro Nyidrëti a apatrene la fene celë ka ngazo. Hnei Nyidrëti hna xomihni aqean matre aijijëne la itre milio lao atr troa hane atrun me nyihlue i Nyidrë. Celë hi matre, tru la hni ne ole i angatr koi Iehova. Hnei Nyidrëti hna aijijë angatr troa hane mel, me atrepengöi Nyidrë, me nue la mele i angatr koi Nyidrë. Eje hi, tro kö a traqa la ijine tro Iehova a amanathithi së ke, hne së hna catre mele nyipici uti hë la pun. E cili, tro ha mama koi së la itre eloin la aqane xomihni aqeane i Iehova! Ngacama nyimutre la itre jol me akötr qaathei Satana, ngo Iehova la “Akötresie ka madrin.” (1 Tim. 1:11) Ijije hi tro sa madrin me xomihni uti hë la tro Iehova a ahmitrötrëne la ëje i Nyidrë, me anyipicine la musi cile i Nyidrë, me apatrene la itre atr ka ngazo me nöjei akötr qa la fen. Haawe, loi e tro sa catre xomihni aqean. Tha tro kö sa thëthëhmine laka, kolo fe a xomihni aqean hnene la Keme së e hnengödrai. w21.07 13 par. 18-19

Nyimutre la itre kepin matre tha lapaune kö itre xan ekö koi Iesu. Ame koi angatr, nyidrëti hi la neköne lo atre tratrau sinöe. Nge hna hnaho nyidrëti e Nazareta, ketre neköi traon hna thatre. Qëmekene tro Nathaniela a xötrethenge Iesu, öni angeic ka hape: “Ke hetre atre ka loi fe ka troa xulu qa Nazareta?” Maine jë, angeic a mekun lo hna perofetan ngöne Mika 5:2 ka hape, troa xulu la Mesia qa Bethelema, ngo tha qa Nazareta kö. Hnei Isaia hna perofetan ka hape, tro la itre ithupëjia me Iesu a wangacone la itre ithuemacany göne la Mesia, tune la itre xötrapan me nöje i nyidrë. (Is. 53:8) Maine hnei angatre ju hna xomi ijine troa ithel, tro hë angatr a öhn laka, hna hnaho Iesu e Bethelema, nge ketre matra i Dravita joxu nyidrë. (Luka 2:4-7) Celë hi lai hna qaja ngöne Mika 5:2. Nga nemene la jol? Tha hnei angatre kö hna ithele hnyawa me xome la nöjei ithuemacany. Celë hi matre hnei angatr hna nuetriji Iesu. w21.05 2-3 par. 4-6

Hetrenyi fe e hnine la Tusi Hmitrötr la itre tulu ka lolo, tui Iobu. Nyipici laka, ka xoue Akötresie nyidrë. Ngo ame pe, tha ka pexeje kö nyidrë. Hnei nyidrëti fe hna hane ithanata menu ngöne la itre ijine jol. E cili, hnei Elihu me Iehova hna ithanata meköti koi Iobu. Tune kaa la aqane ujë i Iobu? Hnei nyidrëti hna hetre hni ne ipië me kapa madrin la eamo. Öni nyidrë: “[Hnenge hna ithanata], nge pëkö trotrohnin . . . Celë hi matre, eni a qeje menu kowe la itre hnenge hna qaja, me ietra ngöne la xaxau me hnatresij.” (Iobu 42:3-6, 12-17) Hnei Iobu hna kapa la eamo hna hamën hnei Elihu, ngacama ketre xötr ka co Elihu. (Iobu 32:6, 7) Maine jë, easa mekun laka, tha ka nyipiewekë kö troa hamë eamo koi së, maine pena, ketre trejin ka co la ka hamën la eamo. E cili, loi e tro sa hetre hni ne ipië matre kapa la eamo. Ngo nyipiewekë tro sa eënyine la itre thiina i Iehova, me catre cainöj me inine la itre atr. w22.02 11 par. 8; 12 par. 12

Ame la hnëqa ne la nöjei Keresiano, tre, troa thele tingeting me hnime la itre atrene la ekalesia, matre pëkö ka troa lapa caas me pë sinee. Jëne la itre hne së hna qaja me kuca, ijije hi tro sa ithuecatr kowe la itre trejin! Nemene la nyine tro sa kuca matre troa amamane la ihnimi së kowe la itre trejin ka mele caas ngöne la nyipici? Troa nyisineene la itre ka xötrei traqa ngöne la ekalesia. Loi e tro sa kapa hnyawa la itre ka ini tus, me itre fami ka nyipi traqa, me itre trejin ka xötrei xomi bapataiso. (Rom. 15:7) Ame la hne së hna ajan, tre, troa nyisinee i angatr. Celë hi matre, loi e tro sa wangatrunyi angatr. Tha tro kö sa thele troa pi atre la mele i angatr. Loi e tro pe sa metrötrë angatr, me thele troa trotrohnine la itre jol ka traqa koi angatr. Ame itre xan, jole koi angatr troa fe la hni angatr. E cili, tha tro kö sa musinë angatr troa sa la itre hnyinge së. Loi e tro pe sa hnying me drei angatre hnyawa. Maine jë, tro sa hnyingë angatr la aqane atre angatre la nyipici. w21.06 11 par. 13-14

Tru la madrine së ke, easa nyihlue i Iehova ngöne la hna “ca axö mamoe” fene la musi ne la “ca atre thup”! Önine la itus, Organizasio Ka Kuca La Aja i Iehova, ngöne la götrane 153, ka hape: “Hnene laka, hetre eloin hnei epun hna kapa qa ngön, haawe, qa i epun troa thele matre tro palahi a hetrenyi la cas hnine la lapa cili.” Nyipiewekë tro sa “goeëne la itre trejine tune la aqane goeë angatre hnei Iehova.” Eje hi, itre “nekönatr” së ka sisitria catre koi Iehova. Hapeu, celë kö lai aqane goeëne së la itre trejin? Öhne hi Iehova la easa thele troa xatua angatr nge Nyidrëti a madrin. (Mat. 10:42) Atraqatr la ihnimi së kowe la itre trejin. Celë hi matre, easa ‘isine matre tha tro kö sa amë la ketre ewekë ka troa akeinyi angatr.’ (Rom. 14:13) Loi e tro palahi sa amamane kowe la itre trejin laka, ka sisitria kö angatr hui easë. Loi e tro fe sa nue la itre ngazo i angatr. Ketre, tha tro pi kö sa nue la ketre atr maine ewekë troa athixötrë së. Ngo loi e tro pe sa “thele la itre ewekë ne tingeting, me itre ewekë nyine thuecatrene la itre xan.”​—Rom. 14:19. w21.06 24 par. 16-17

Maine tro sa trongëne la itre eamo hna hamën hnei Tusi Hmitrötr me organizasio i Iehova, tro hë sa nyitipune la itre thiina i Keriso, me atrepengöi Iehova hnyawa. Hnei Iesu hna aceitunëne la maca ne la Baselaia memine la itre itine feja ka cia ngöne la hni ne la itre atr. Tune kaa? Öni nyidrë: “Kola fetra me tru trootro la itre qitr, nge thatre pe [la atre eëny] la aqane trongen. Nge hnadro a aciane xanëne la xen, pa i zin, thupene lai, kola eng, ame hna macaje pi la qitr.” (Mar. 4:27, 28) Ame la atr ka kapa la maca ne la Baselaia, angeic a kökötr ngöne la nyipici tune la ketre feja ka cia. Celë hi hne së hna öhne thene la itre ka ini tus. Angatr a saze la aqane mele i angatr, matre troa easenyi trootro koi Iehova. (Efe. 4:22-24) Ngo tha tro kö sa thëthëhmine laka, Iehova la ka aciane la itine feja e kuhu hni ne la atr. w21.08 8-9 par. 4-5

Ame la atr ka madrine “la hna goeëne hnei lue mek” ke, angeic a mejihnine la hna hetreny. Ngo ame la atr ka thele “la hna ajane hnene la hni” ke, angeic a piine la ketre ewekë hna thatreine troa kapa. Nemene la ini koi së? Maine easa ajane troa madrin, loi e tro sa mejihnine la hne së hna hetreny, me thele la itre ewekë hne së hna atreine troa kapa. Hapeu, ijije kö tro sa mejihnine la hna hetreny? Ame koi itre xan, tha ijiji angatre kö. Ngacama hetre hnëqa i angatre hë, ngo angatre palahi a thele troa eatrëne la itre xaa mekuna i angatr. Ame pe, ijije hi tro sa madrine “la hna goeëne hnei lue mek.” Tune kaa? Pane inine jë la ceitune hna hamën hnei Iesu göne la itre talan, ngöne Mataio 25:14-30. Nge goeëne ju la aqane tro ej a xatua epun troa akökötrene la madrine i epun. w21.08 21 par. 5-6

Iehova a hnime la itre “ate hna hutra hnyija me ka ipië la u.” Celë hi matre, tha itre qatre thup hmekuje kö la ka troa xatua angatr, ngo easë mina fe. Loi e tro sa wangatrunyi angatr. Iehova a ajane tro sa amamane koi angatr laka, Nyidrëti a hnimi angatr. (Ite edomë 19:17) Ketre, loi e tro sa hetre hni ne ipië. Tha tro kö sa pi mama, wanga tro angatr a piine la mele së. Ngo loi e tro pe sa kuca la itre hne së hna atrein, matre troa xatua angatr. (1 Pet. 4:10, 11) Nyimutre la itre ini hne së hna xom qa ngöne la aqane wangatrune Iesu la itretre drei nyidrë. Nyipici laka, nyidrëti la ketre atr ka tru e celë fen, ngo ‘meköti palahi nyidrë me ipië.’ (Mat. 11:28-30) Jëne la itre ceitune ka hmaloi troa trotrohnin, hnei Iesu hna ketr la hni ne la itre atr ka hetre hni ne ipië.​—Luka 10:21. w21.07 23 par. 11-12

Loi e tro sa ithanata memine la itre trejin ka qatre hë. Maine jë, ngazo hë la lue alameke i angatr, maine jole pena koi angatr troa nango tro. Maine pena, thatreine hë angatre ithanata catr. Ame pe, aja i angatr palahi troa catre huliwa, nge ka “hlemu loi” angatr koi Iehova. (Ate cai. 7:1) Haawe, loi e tro palahi sa lapa mekun la kepin matre Iehova a wangatrunyi angatr. Loi e tro fe sa nyitipu Elisaia. Hnei angeic hna ce lapa me Elia uti hë la drai tixenuë ne ce nyidro. Akönia qaja Elisaia koi Elia ka hape: “Tha tro kö ni a nue” nyipë. (2 Ite jo. 2:2, 4, 6) Ame la easa porotrik memine la itre trejin ka qatre hë, easë hi lai a amamane la ihnimi së koi angatr. (Ite edomë 1:5; 20:5; 1 Tim. 5:1, 2) Hnyingë angatre jë ka hape: “Ame lo epuni a thöth, nemene la ka amamane laka, epuni ngöne la nyipici?” “Nemene la ka acatrene la aqane imelekeu i epun me Iehova?” “Ame koi epun, nemene la nyine troa kuca matre tro palahi a madrin ngöne la huliwa i Iehova?” (1 Tim. 6:6-8) Thupene lai, drenge hnyawa jë la angatr a qaja la mele i angatr. w21.09 5 par. 14; 7 par. 15

Ame la easa kuca la hne së hna atrein matre troa cainöj me inine la itre atr, easë hi lai a amamane la ihnimi së koi Akötresie. (1 Ioane 5:3) Maine jë, hnene la ihnimi së koi Iehova matre easa cainöj ngöne la itre hnalapa trootro. Hapeu, ka hmaloi kö ngöne la xötrei? Waea. Hnei easë asë hi hna xou. Ame pe, easa drengethenge ke, hnei Iesu hna ahnithe koi së la huliwa cili. Maine jë, tha jole hë koi së enehila troa cainöje trootro. Ngo tune kaa göi troa ini tusi me ketre atr? Maine jë, easa xou. Ngo loi e tro sa sipo Iehova troa xatua së matre tha tro kö sa xou me nyiqane ini tus memine la ketre atr. E cili, tro hë Nyidrëti a acatrene la aja së troa cainöj me inine la itre atr. w21.07 3 par. 7

Ame ekö, itre maseta a ati hatrene la itre hlue i angatr hnei fao hna dreuth. Ketre tune fe enehila, tro la itre musi a upe la itre atr troa amamane ngöne la aqane ujë i angatr laka, angatr a sajuëne la itre ka mus. Hapeu, tro kö sa kapa la hatrene cili me sajuëne la itre musi atr? Ame la itre ka thipëne la hatrene cili, tro angatr a cile kowe la itre jol ka tru. Önine la tusi Hna Amamane ka hape: “E pëkö hatren, thatreine kö tro ketre a itö maine salem.” (Hna ama. 13:17) Ame pe, atre hi së la mekuna i Akötresie göne la itre ka kapa la hatrene cili. (Hna ama. 14:9, 10) Celë hi matre, easa cinyihane ngöne la ime së ka hape: “Ate i Iehova ha ni.” (Is. 44:5) Haawe, catre jë së mele nyipici koi Iehova enehila. Tro hë Iehova a madrin laka, itre hlue i Nyidrëti së! w21.09 18 par. 15-16

Loi e tro sa sipo ixatua kowe la itre xaa trejin, matre troa catre cainöj. Hnei Paulo aposetolo hna ini Timoteo la aqane troa cainöj me inine la itre atr. Nge hnei nyidrë hna ithuecatr koi Timoteo troa hane xatua itre xan. (1 Kor. 4:17) Haawe, tui Timoteo, loi e tro sa sipo ixatua kowe la itre trejine la ekalesia. Ketre, nyipiewekë fe tro sa sipo ixatua koi Iehova ngöne la thith. Qëmekene tro sa cainöj, loi e tro sa pane thith. Maine easa ajane troa hetre thangane la huliwa ne cainöj, loi e tro sa sipone la uati hmitrötr. (Sal. 127:1; Luka 11:13) Ame la easa thith, loi e tro sa qaja hnyawa la mekuna së koi Iehova. Maine jë, tro sa sipo Nyidrë troa eatrongë së kowe la itre atr ka hetre hni ne aja. Ketre, tro fe sa xomi ijine troa ini tusi caas. Öni Tusi Hmitrötr: “Isa tupathe [jë] la aja i Akötresie laka, ka lolo, nge ka iamadrinë, nge ka pexej.” (Rom. 12:2) Maine tro sa ini tusi caas, tro hë sa atrepengöi Akötresieti hnyawa. Nge ame hë la easa qeje Akötresieti kowe la itre atr, tro ha mama koi angatr laka, easa mejiune koi Nyidrë me kowe la itre ini Nyidrë. w21.05 18 par. 14-16

Tune kaa e tha kökötre kö la ka ini tus, ngacama hne së hna nue trengecatr matre troa hnëkë hnyawa me thithi sai angeic? Tune kaa e tha hne së kö hna hane xatuane la ketre atr troa xomi bapataiso? Hapeu, tro kö sa mekun laka, tha hnei Iehova kö hna amanathithine la huliwa ne cainöje së? Iehova a wangatrune la itre trengecatre së me aqane xomihni së. Ngacama tha kapa kö itre xan la maca hne së hna tro fë, ngo ame la ka sisitria koi Iehova ke, ene la ihnimi së me aqane hnëkë së kowe la huliwa ne cainöj. Celë hi lai hna qaja hnei Paulo, lo kola hape: “Ka meköti pala hi Akötresie, matre thatreine kö nyidrëti thëthëhmine la itre huliwa i nyipunie, me ihnim hnei nyipunieti hna amamane kowe la ëje i nyidrë, ene lo itre huliwa i nyipunie ekö me enehila kowe la ange ka hmitrötr.” (Heb. 6:10) Eje hi, tha sihngödri kö koi Iehova la itre trengecatre së me ihnimi së, ngacama tha kapa kö la itre atr, la maca hne së hna tro fë. Haawe, tha tro kö sa thëthëhmine lo hnei Paulo hna qaja ngöne la topik ne la drai celë. w21.10 25 par. 4-6

Hnei Iesu hna hnime la itretre drei nyidrë me thiina ka loi, ngacama isapengöi angatr nge isa aqane hetru angatr. Celë hi matre, tha ceitu kö la itre hnëqa hna ahnithe koi angatr me itre hnei angatre hna kuca ngöne la hna cainöj. Ame pe, hnei Iesu hna wangatrune la itre trengecatre i angatr. Celë hi lai ka mama ngöne la ceitun ne la itre talan. Hnene la maseta hna ahnithe kowe la itre hlue la huliwa “thenge la hna isa atrein.” Nge hnene la lue hlue hna catre huliwa. Ngacama tru catre kö la trengecatre hna nue hnei ketre, ngo hnene la maseta hna qaja aloinyi nyidroti asë me hape: “Ka lolo catr, hlue ka loi me ka nyipici!” (Mat. 25:14-23) Iesu mina fe a thiina ka loi me hnimi së. Atre hi nyidrëti la itre ewekë ka traqa ngöne la mele së me itre hne së hna atreine kuca. Nge nyidrëti a madrine la itre trengecatr hne së hna isa nue kowe la huliwa i Iehova. Loi e tro sa goeëne la itre xan ceitu me aqane goeë angatr hnei Iesu. w21.07 23 par. 12-14

Ame la ketre ijin, hnei Nabala hna ithanata akökötrenyi koi Dravita. Nge tha hnei angeice kö hna hamë xen koi Dravita me itre sooce i nyidrë. E cili, hnei Dravita hna elëhni me thele troa humuthi Nabala me itre hlue i angeic. Eloine pe, hnei Abigaila, föe i Nabala, hna sewe Dravita troa humuthi angeic. (1 Sam. 25:9-22, 32-35) Hnei Dravita hna elëhni me mekun troa humuthi Nabala me itre hlue i angeic. Hnei angeice fe hna mekun troa humuthe lo atr ka atrekënö mamoe. Ame pe, ketre atr ka loi thiina Dravita. Ngo hnauëne laka, catr la aqane amekötine nyidrë lo ka atrekënö mamoe? Ke ame lo ijine cili, kola huliwa la mekuthetheu i Dravita. Eje hi, maine tro palahi sa waigele itre xan me qaja angazo angatr ke, kolo lai a hape, ka nanazije la lapaune së. w21.10 12 par. 17-18; 13 par. 20

Kola amaman hnene la itre trengewekë hne la topik ne la drai laka, ijije hi tro sa nyitipu Iehova, Akötresie ka hmitrötr. Celë hi matre, nyipiewekë tro sa hmitrötr ngöne la aqane ujë së. Ngo tha ka hmaloi kö ke, itre atr ka tha pexeje kö së. Hnei Peteru aposetolo fe hna tria, ngo kola mama ngöne la mele i nyidrë laka, ijije hi tro sa hmitrötr. . Alanyimu la ka mekun laka, ame la atr ka hmitrötr ke, kola mama ngöne la aqane heetre i angeic, nge tha ka dredrehnyima kö nge ka lapa thaup. Ngo tha eje kö lai. Eje hi, Iehova la “Akötresie ka madrin.” (1 Tim. 1:11) Tusi Hmitrötr a qaja ka hape, ka “manathith” me madrin la itre hlue i Nyidrë. (Sal. 144:15) Ketre, hnei Iesu hna amekötin la itre ka aisapengönë angatr me itre xan ngöne la aqane heetr, me kuca la loi göi troa pi mama. (Mat. 6:1; Mar. 12:38) Ame easë itre Keresiano, easa thel e hnine la Tusi Hmitrötr, la aqane tro sa hmitrötr tui Iehova. Atre hi së laka, tha tro kö Iehova a hamëne la ketre wathebo hne së hna thatreine troa trongën. w21.12 2 par. 1, 3

Ketre ahnahna ka tru qaathei Iehova la troa atrunyi Nyidrë. Easa amamane la ihnimi së koi Iehova ngöne la easa “trongëne la itre hna amekötin hnei nyidrë.” (1 Ioane 5:3) Jëne Iesu, Iehova a upi së troa inine la itre atr me bapataiso angatr. (Mat. 28:19) Ketre, hnei Nyidrëti mina fe hna upi së troa ihnimikeu. (Ioane 13:35) Tro kö Iehova a kapa ngöne la lapa i Nyidrë la itre ka idrengethenge. (Sal. 15:1, 2) Celë hi matre, loi e tro sa hnime la itre xan. Ihnim la thiina ka sisitria i Iehova. (1 Ioane 4:8) Hnei Iehova hna hnimi së ngacama thatre Nyidrëti petre kö së. (1 Ioane 4:9, 10) Nge easa nyitipu Nyidrë ngöne la easa hnime la itre xan. (Efe. 5:1) Ame la ketre nyine tro sa kuca, tre, troa xatua angatr troa atre Iehova e ijine petre kö. (Mat. 9:36-38) Easë hi lai a aijijë angatr troa hane sine la lapa i Nyidrë. w21.08 5-6 par. 13-14

Hnene la ihnimi Iesu koi Iehova matre hnei nyidrëti hna nue la mele i nyidrë kowe la Keme i nyidrë me koi easë fe. (Ioane 14:31) Hnei Iesu fe hna amamane la ihnimi nyidrë kowe la itre atr, lo nyidrëti e celë fen. Eje hi, hnei Iesu hna hnim me utipine la itre atr ngacama hnei angatr hna icilekeu me nyidrë. Hnei nyidrëti fe hna ini angatr la Baselaia i Akötresie. (Luka 4:43, 44) Ketre, ngacama hnei Iesu hna akötr nge hna humuthi nyidrë, ngo hnei nyidrëti hna amamane la ihnimi nyidrë koi Iehova me kowe la itre atr. E cili, ijije hi tro la nöjei atr a hetrenyi la mel ka pë pun. Hnene la ihnimi së koi Iehova matre hne së hna nue la mele së koi Nyidrë me xomi bapataiso. Celë hi matre, tui Iesu loi e tro sa amamane la ihnimi së koi Iehova ngöne la aqane ujë së kowe la itre atr. Öni Ioane aposetolo: “Ame la ka tha hnime la trejin me angeic, lo hnei angeic hna öhn, thatreine kö troa hnimi Akötresie, lo hna tha öhn.”​—1 Ioane 4:20. w22.03 10 par. 8-9

Nyipici laka, easa ajane troa xomi traeme koi Iehova. Ngazo pe, hetre itre ewekë ka troa ajolë së, matre pëhë traeme së thatraqane la huliwa i Akötresie. Eje hi, kola qaja la easa huliwa koi maseta, maine thatraqane la fami, me itre xaa huliwa ju kö. E cili, pëhë traeme së troa thith, me ini Tus, me lapa mekun ej. Hetre ketre ewekë ka troa xome la traeme së. Eje hi laka, tha ketre ewekë ka ngazo kö, ngo maine tha thupëne kö së, tro hë sa aluzine menun la traeme së koi Iehova. Kola qaja la itre nyine iamadrinë. Nyipici laka, nyipiewekë troa xomi ijine mano me kuca la itre nyine iamadrinë. Ngo loi e tro sa thupëne la traeme hne së hna nue kowe la itre huliwa cili, wanga troa xome la traeme së kowe la huliwa i Akötresie.​—Ite edomë 25:27; 1 Tim. 4:8. w22.01 26 par. 2-3

Hnei Iehova hna amekötin koi angetre Isaraela troa hnime la itre xan. Ngo tha tro hmekuje kö angatr a hnime la atre Isaraela. Loi e tro fe angatr a hnime la itre trenyiwa ka ce mel me angatr. Celë hi lai hna qaja ngöne Levitiko 19:33, 34. Nyipiewekë tro la angetre Isaraela a nyipiine me “hnime” la itre trenyiwa, “tune la ate ne la nöje” i angatr. Eje hi, tha tro kö la angetre Isaraela a menuën asë la hlapa i angatr. Ngo loi e troa nue thatraqane la itre trenyiwa me itre ka pë ewekë. (Lev. 19:9, 10) Ame fe enehila, ka nyipiewekë koi së la hna qaja ngöne Levitiko 19:33, 34. (Luka 10:30-37) Nyipici, alanyimu la itre trenyiwa ngöne la nöje së. Maine jë, hetre itre xan ka lapa ezine la hnalapa së. Celë hi matre, loi e tro sa metrötrëne me nyipi angatr. w21.12 12 par. 16

Loi e tro sa nue Iehova troa eatrongë së enehila. E cili, tro ha xecie koi së laka, tro palahi Nyidrëti a xatua së elany. Easa amamane la lapaune së koi Iehova, ngöne la easa sipo drai ne mano matre troa sine la ketre asabele, maine saze la traeme ne huliwa koi maseta, matre sine la itre icasikeu me cainöj. Ngo tune kaa e xele kö maseta, nge kola upi së qa ngöne la hna huliwa? Hapeu, xecie kö koi së laka, tro palahi Iehova a ceme easë, me hamën la ka ijij thatraqane la mele së? (Heb. 13:5) Nyimutre la itre trejin ka huliwa i Iehova ngöne la drai ka pexej. Ijije hi tro angatr a qaja la aqane xatua angatr hnei Iehova. Eje hi, Akötresie ka nyipici Iehova. Ce easë me Iehova, matre tha tro pi kö sa xouene la itre jol ka troa traqa elany. Maine tro palahi sa amë panëne la aja i Iehova ngöne la mele së, tha tro jë kö Nyidrëti a nuaxöji së. w22.01 7 par. 16-17

Nemene la ka troa tupathe la lapaune së? Pane mekune jë laka, hna upetröneë la ketre sinee së. Ijije hi tro sa mekun laka, tha hnei itre qatre thup kö hna xom asë la itre ithuemacanyi me axecië mekun thenge la mekuna i Iehova. Nemene la ka troa xatua së e cili? Nemene la ka troa xatua së troa canga kapa la hna amekötin hnei itre qatre thup ngöne la kola upetröneë la sinee së? Tha tro kö sa thëthëhmine laka, ame la kola upetröneë la ketre Keresiano ke, hna amekötine lai hnei Iehova. Nge nyine loi kowe la ekalesia me koi angeic. Maine tro palahi angeic a lapa ngöne la ekalesia, tro hë angeic a ajojezine la itre xaa trejin. (Gal. 5:9) Tro angeic a wangahmalohmaloeëne la ngazo i angeic. Nge tha tro kö angeic a saze la aqane mekun me aqane ujë i angeic. Ketre, celë hi ka troa xatua angeice troa bëeke koi Iehova. (Ate cai. 8:11) Celë hi matre, loi e tro sa mejiune kowe la itre qatre thup, ngöne la kola upetröneë la ketre Keresiano. Angatr a thele troa eatrëne hnyawa la hnëqa i angatr. w22.02 5-6 par. 13-14

Loi e tro la itre qatre thup a xomihni aqeany me loi thiina, e tha kapa kö la ketre trejin la eamo hna nyitrepene hnene la Tusi Hmitrötr. Ketre, tha tro kö angatr a elëhni, e tha trongëne kö la ketre trejin la eamo hna hamën. Haawe, loi e tro la qatre thup a thith koi Iehova, me sipo Nyidrëti troa amanathithine la trejin ka kapa la eamo. Nge loi fe troa xatua angeice troa trotrohnine la kepin, matre hna hamë eamo koi angeic, me xatua angeic troa trongëne ej. Loi e troa nue ijine koi angeice troa mekun la hna ce ithanatan. Ngo e tro la qatre thup a xomihni aqeany me loi thiina, tha tro kö la trejin a goeëne la aqane hamëne nyidrëti la eamo, ngo tro pe angeic a trongëne ej. Eje hi, loi e tro palahi a nyitrepene la itre eamo hnene la Tusi Hmitrötr. Ame la aja së ke, ene la troa hamë eamo ka lolo, nge ka “amadinëne la hni.”​—Ite edomë 27:9. w22.02 18 par. 17; 19 par. 19

Maine jë, hne së hna sipo Iehova troa xatua së troa xomihnine la ketre jol maine xomehnöthe la ketre aja ka ngazo. Ame itre xaa ijin, easa mekun laka, tha canga sa kö Iehova la itre thithi së. Pine nemen? Atre hi Nyidrëti laka, aqane tro hi së lai a amamane la lapaune së. (Heb. 11:6) Ngo aja i Nyidrëti fe tro sa mel thenge la itre thithi së me kuca la aja i Nyidrë. (1 Ioane 3:22) Maine easa ajane troa xomehnöthe la itre aja së ka ngazo, loi e tro sa xomihni aqeanyi me mel thenge la itre thithi së. Hnei Iesu hna amamane laka, tha tro kö Iehova a canga sa la itre thithi së. Öni nyidrë: “Sipo jë the mano kö, nge tro ha hamëne koi nyipunie; thele jë the mano kö, nge tro hë nyipunieti a öhn; fenafena jë the mano kö, nge tro ha thawa koi nyipunie. Ke tro ha kapa hnei atre sipo, nge tro ha öhne hnei atre thel, nge ame koi atre fenafena, tro ha thawa koi angeic.”​—Mat. 7:7, 8. w21.08 8 par. 1; 10 par. 9-10

Loi e tro palahi sa ini tus matre acatrene la lapaune së kowe la Atre Xup. (Ios. 1:8) Maine jë, tro sa lapa mekun la itre ithuemacany hna hamën hnei Tusi Hmitrötr göne la itre ewekë ka traqa ekö. Loi e tro fe sa lapa mekun la itre hna perofetan. Ketre, ngacama alanyimu la itre ka cinyihane la Tusi Hmitrötr, ngo caasi hi la itre mekun hna qaja. Hapeu, tha kolo kö lai a acatrene la lapaune së koi Iehova, Atre Xup ka tru ihnimin? (2 Tim. 3:14; 2 Pet. 1:21) Ame la easa inine la Tusi Hmitrötr, loi e tro sa wangatrune la itre eamo. Eje hi, qaane ekö Tusi Hmitrötr a hmekë së ka hape, ame la itre ka hni koi manie, tre, tro angatr a “akötr.” (1 Tim. 6:9, 10; Ite edomë 28:20; Mat. 6:24) Hapeu, ka nyipiewekë kö la eamo celë enehila? Önine la ketre itus: “Tha ka madrine kö la itre ka hni koi manie nge angatr a hnehengazo. Ngacama angatre hi a aja manie, ngo angatr a akötr nge kola tithi angatr hnei mec.” Eje hi, ka nyipiewekë catre la eamo hna hamën hnei Tusi Hmitrötr göi manie. Maine jë, hetre itre xaa trepene meköti ka xatua epun. Maine tro palahi sa wangatrune la itre ahnahna cili qaathei Iehova, Atre Xupi së ka tru ihnimin, haawe, tro hë sa trongëne itre ej, nge tro hë sa madrin.​—Is. 48:17, 18. w21.08 17-18 par. 12-13

Itre qatr me qatre föe, tha thëthëhmine kö Iehova la itre hnei epuni hna kuca ekö ngöne la huliwa i Nyidrë. Mekun palahi Iehova la epuni a catre cainöjëne la maca ka loi. Ketre, hnei epuni hna xomihnine la itre jol ka tru, me itre akötr. Hnei epuni fe hna cilëgöline la nyipici, me xome la itre hnëqa ka tru, me inine la itre xan. Hnei epuni hna idrengethenge ngöne la kola saze la aqane trongëne la huliwa ne la organizasio i Iehova. Ketre, hnei epuni hna ithuecatr kowe la itre ka huliwa i Iehova ngöne la drai ka pexej. Eje hi, Iehova a hnimi epun ke, hnei epuni palahi hna mele nyipici koi Nyidrë. Tha tro kö Nyidrëti a “hna tije la ite ka hmitöte i nyidë”! (Sal. 37:28) Öni Iehova: “Tro ni a xepe trongëne uti hë qia ha.” (Is. 46:4) Haawe, the mekune kö laka, epuni a uti ipië trootro matre tha nyipiewekë hë epun. Hetre hnëqa i epun palahi e hnine la organizasio i Iehova! w21.09 3 par. 4

Iehova a utipi së ke, Akötresieti ka inamacane Nyidrë.Öni Tusi Hmitrötr: “Ame la inamacan qaa hnengödrai” ke, “ka tiqa hnei utipin me huliwa ka loi.” (Iako. 3:17) Ketre Kem ka ihnimi Iehova, matre Nyidrëti a utipine la itre nekö i Nyidrë. Atre hi Nyidrëti la ka loi koi angatr. (Is. 49:15) Ngacama itre atr ka tha pexeje kö angatr, ngo hetre mejiune i angatr koi elany. Celë hi lai aqane amamane Iehova la inamacane i Nyidrë. Ame pe, hetre ifegone la utipine i Iehova. Jëne la inamacan, Nyidrëti a tuluthe la aqane utipine Nyidrë la itre atr. Pane mekune jë la ketre hlue i Iehova ka kuca lapane la ewekë ka ngazo. Nemene la nyine tro sa kuca? Öni Paulo jëne la uati hmitrötr: “Tha tro hmaca kö nyipunie a nyi sineene” la atr cili. (1 Kor. 5:11) Kola upetröneë la itre trejin ka tha ietra kö, wanga troa hetre ethane kowe la ekalesia. Eje hi, Iehova a ajane troa thupëne la itre trejin ka mele nyipici. w21.10 9-10 par. 7-8

Troa kuië ahnahna thatraqane la huliwa ne cainöj. Ame lo angetre Isaraela a sine la itre feet e nöjei macatre ke, hetre ahnahna palahi hnei angatr hna traqa fë. (Deu. 16:16) Angatre hi lai a amamane la hni ne ole i angatr kowe la itre hna acil hnei Iehova. Tune kaa la aqane tro sa amamane la ihnimi së me hni ne ole së koi Iehova, göne la itre ewekë hnei Nyidrë hna hamën? Maine ijij, loi e tro sa kuië ahnahna kowe la ekalesia me kowe la huliwa ne cainöj e cailo fen. Öni Paulo aposetolo: “Maine nyipici laka, hna canga ajan, ngo tro ha kapa hnyawa e hna hamën thenge la hna hetreny, ngo tha thenge kö la pë.” (2 Kor. 8:4, 12) Eje hi, Iehova a wangatrune la nöjei ahnahna hne së hna kuiën ngacama tha ka tru kö.​—Mar. 12:42-44. w22.03 24 par. 13

Thatreine kö la itre qatre thup troa apatrene la itre jole ne la itre trejin. Ame pe, Iehova a ajane tro la itre qatre thup a kuca la hnei angatr hna atrein, matre troa ithuecatr me thupëne la itre mamoe i Nyidrë. Tune kaa la aqane tro la itre qatre thup a xatuane la itre xan, ngacama tru hnei huliwa i angatr? Loi e troa xötrethengene la tulu i Paulo. Hnei Paulo hna qaja aloine la itre trejin me hamë ithuecatre koi angatr. Loi e tro la itre qatre thup a nyitipune la tulu i Paulo me hnime la itre trejin e hnine la ekalesia. (1 Thes. 2:7) Hnei Paulo fe hna qaja kowe la itre trejin ka hape, nyidrëti a hnimi angatr, nge ketre tui Iehova fe. (2 Kor. 2:4; Efe. 2:4, 5) Hnei Paulo hna nyisineene la itre trejin me ce tro me angatr. Ketre, hnei Paulo hna mejiune koi angatr. Hnei nyidrëti hna qaja koi angatr la itre hnei nyidrëti hna xouen me itre tria i nyidrë. (2 Kor. 7:5; 1 Tim. 1:15) Ame pe, tha hnei Paulo kö hna wangatrune la itre jol. Hnei nyidrëti pe hna catre xatuane la itre trejin. w22.03 28 par. 9-10