Ogas

Maine jë, Iesu a qaja la itre sooce i Roma ka jeng la lue ime me lue ca i nyidrë, me athipi nyidrë hune la sinöe ne iaxösisi. Ngacama tha ka meköti kö la itre hna kuca koi Iesu, ngo tha hnei nyidrëti kö hna elëhni me të la ngazo hna kuca koi nyidrë. (1 Pet. 2:23) Tui Iesu, loi e tro sa nue la ngazo itre xan. (Kol. 3:13) Ame itre xaa ijin, kola icilekeu hnene la itre sipu sinee së ke, tha trotrohnine kö angatr la aqane mele së memine la itre ini hne së hna mejiune kow. Maine jë, angatr a silitrengathoi së, me ahmahmanyi së, me dreuthetrije la itre itusi së, me axouenyi së. Ngo tha tro kö sa lapa fë trengehni. Loi e tro pe sa sipo Iehova troa xatua angatr troa atre la nyipici. (Mat. 5:44, 45) Ame itre xaa ijin, jol koi së troa nue la ngazo i angatr ke, tha meköti kö la itre hna kuca koi së. Ngo maine tro sa lapa fë trengehni, tro hë sa akötr me hleuhleu. (Sal. 37:8) Ame la easa nue la ngazo i ketre, kolo lai a hape, tha tro kö sa elëhni pine la itre ewekë hna kuca.​—Efe. 4:31, 32. w21.04 8-9 par. 3-4

Hapeu, hna upetröneë la ketre sinee i epun? Drei la ketre akötr ka tru! Pane mekune jë la akötr ka eje thei Iehova ngöne lo kola trotriji Nyidrë hnene la itre angela! (Iudra 6) Ketre tune lo kola anyimua tha idrei hnei angetre Isaraela, nöj hnei Nyidrëti hna hnim. (Sal. 78:41) Atre hnyawa hi së laka, Iehova a akötr ngöne la kola nuetriji Nyidrë hnene la ketre sinee së. Celë hi matre, trotrohnine hi Nyidrë la easa akötr. Tro kö Nyidrëti a xatua së me akeukawane la hni së. Pane mekune jë la kola trotriji Iehova hnene la ketre nekönatr! Ame koi itre kem me thin, tha hnei nyidroti kö hna xatua angeice troa lapa ngöne la nyipici. Önine la ketre trejin: “Hace catre la meleng matre ame itre xaa ijin, eni a treij. Tha meköle hë ni e jidr.” Hnene la ketre trejine föe ka melëne fe la jole cili hna qaja ka hape: “Maine jë zöi eni ke, tha hnenge kö hna kuca hnyawa la hnëqang ne thin. Tha hnenge kö hna xatua angeice troa acatrene la ihnimi angeice koi Iehova.” w21.09 26 par. 1-2, 4

Itre xan a mekun laka, tha ijiji së kö troa hamë ini qa hnine la Tusi Hmitrötr ke, tha hne së hna sine la itre ini göi troa qejepengöne la hmi. Ngo loi e tro angatr a ithel. Celë hi lai hna kuca hnei Luka, ngöne lo angeic a cinyihane la tusi angeic. Hnei Luka hna “thele pengöne la itre ewekë.” Aja i angeic tro la itre ka e la tusi angeic a “jele nyipicine la itre hnei [angeic] hna inin” göi Iesu. (Luka 1:1-4) Hnene fe la itretre Iudra ne Berea hna nyitipu Luka. Ame la angatr a dreng la maca ka loi göi Iesu, hnei angatr hna sine thele la Itre Hna Cinyihan Qene Heberu, matre troa jelenyipicine la hna qaja. (Itre hu. 17:11) Ketre tui itre xane fe, loi e tro angatr a ithel me wang la eisapengönene la itre hna ini së memine la hna qaja hnei Tusi Hmitrötr. Loi e tro fe angatr a thele la itre ewekë ka traqa kowe la itre hlue i Iehova enehila. Celë hi ka troa thupë angatr qa ngöne la itre trengathoi. w21.05 3 par. 7-8

Hapeu, hetre trejine kö e hnine la ekalesia ka aja ixatua? Ame ngöne la macatre, hetre ijine laka, nyipiewekë tro sa cememine la itre trejin. Ame la itre xaa trejin, jole koi angatr la itre ijine feet e pune macatre ke, tha ka hmi kö la föi angatr. Ame pena itre xan, hace koi angatr la drai ne meci ne la ketre sinee i angatr. Ame la easa xomi ijine troa ceme angatr, easë hi lai a amamane laka, easa ‘hnehengazo angatr.’ (Fil. 2:20) Nyimutre la itre kepin matre easa mekun laka, easë caas nge pëkö sinee së. Ngo tha tro kö sa thëthëhmine laka, trotrohni së hi hnei Iehova. Tro kö Nyidrëti a upe la itre trejin troa ixatua. (Mat. 12:48-50) Ketre, loi e tro sa catre xatuane la itre trejin. Celë hi aqane tro sa amamane la hni ne ole së kowe la fami hna hamën hnei Iehova. Ngacama easa cile kowe la nöjei pengöne jol, ngo tha easë caasi kö. Tro palahi Iehova a ceme easë! w21.06 13 par. 18-20

Ngacama tha kapa kö la itre atr la maca hna tro fë hnei Iesu, ngo hnei nyidrëti hna madrin troa cainöj. Pine nemen? Pine laka ka sisitria catre koi Iesu tro la itre atr a atre la nyipici göne la Baselaia i Akötresie. Celë hi matre, hnei nyidrëti hna cainöj kowe la nöjei atr asë. Ketre, atre hi Iesu laka, tha tro kö angatr a dreng ngöne la xötrei, ngo tro angatr a kapa e thupen. Celë hi lai ka traqa kowe la itre jini nyidrë. Ame ngöne lo köni macatre nge sine ne cainöje Iesu, tha lapaune kö Iesu koi nyidrë. (Ioane 7:5) Ngo thupene la kola amele nyidrëti hmaca, itre Keresiano hë angatr. (Itre hu. 1:14) Eje hi, thatre kö së la itre ka troa kapa elanyi la nyipici. Ame itre xan, hmitre koi angatr troa kapa la maca. Ngo maine tro palahi sa madrin me loi thiina ngöne la hna cainöj, tro hë angatr a kepe së me “atrunyi Akötresie.” w21.05 18 par. 17-18

Ame lo Iesu e celë fen, hnei nyidrëti hna ahnith kowe la itretre drei nyidrë, la lue huliwa. Hnei nyidrëti hna upi angatr troa cainöjëne la maca ka loi ne la Baselaia, me amamai angatr la aqane troa kuca. (Luka 8:1) Hnei Iesu hna amamane koi angatr la aqane troa sa ngöne la kola kapa maine thipëne la maca ne la Baselaia. (Luka 9:2-5) Öni nyidrëti fe ka hape, tro angatr a cainöjëne la maca cili “nyine anyipicine kowe la nöjei nöj.” (Mat. 24:14; Itre hu. 1:8) Ketre, hnei nyidrëti hna upe la itretre drei nyidrë troa inine la itre atr troa trongëne la itre hnei nyidrëti hna amekötin. Öni Iesu ka hape, troa eatrëne la huliwa cili uti hë enehila, me “uti hë la troa nyipune la fene celë.” (Mat. 28:18-20) Hnei Iesu fe hna amamane koi Ioane laka, hnëqa ne la itretre drei nyidrë troa xatua itre xan troa atrepengöi Iehova hnyawa.​—Hna ama. 22:17. w21.07 2-3 par. 3-4

Ame enehila, nyimutre la itre atr ka pi tru me pi mama. Celë hi matre, ijije hi tro la ketre a wajahuje la itre xaa ka ce huliwa me angeic. Maine jë pena kola itronyi hnene la lue ekip. Pine laka, kola thele jëne la ketre ekip troa ngaane la ketre, haawe tha xou i angatr kö troa eatr hnei ketre me elo angazonyi. Maine pena, kola huliwa thoi hnene la ketre thöth matre tro angeice a lö ngöne la uma ne ini ka tru. Ame koi së itre Keresiano, itre aqane ujë lai ka ngazo, ke, “itre huliwa ne ngönetrei.” (Gal. 5:19-21) Hapeu, hne së kö hna hane pi mama e hnine la ekalesia? Celë hi la ketre hnyinge ka nyipiewekë koi së. Maine tro sa pi mama, tro hë sa thë la caasi e hnine la ekalesia. Celë hi matre, nyipiewekë tro sa inine la itre tulu ekö ka lolo ne la itre hlue i Iehova. Ngo tro sa pane ce ithanatane la aqane troa isa waipengö së. w21.07 14 par. 1-2

Ihnimi nyipici la ka upi së troa xatuane la itre ka akötr. Hnei Rutha hna xatua Naomi. Ketre tune fe, madrine catr la itre trejin troa xatuane la itre atrene la ekalesia ka hleuhleu me akötr. Hnene la ihnimi angatr matre angatr a ajane troa xatua itre xan. (Ite edomë 12:25; 24:10) Angatr a trongëne la eamo i Paulo aposetolo hna hape: “Hamëne [pi] la itre trenge ithanata ka keukawa kowe la itre ka hace hni, me xatuane la itre ka kucakuca, me xomihnine la nöjei atr asë.” (1 Thes. 5:14) Maine easa ajane troa xatuane la ketre trejin ka akötr, loi e tro sa pane drei angeice hnyawa me qaja amamane la ihnimi së koi angeic. E cili, tro Iehova a amanathithi së ke, easa xatuane la ketre hlue i Nyidrë. Kola qaja ngöne Ite Edomë 19:17 ka hape: “Ame la ate hnime la ate pë ewekë, te, kola pane hamëne koi Iehova; nge tro anganyidëti a të la huliwa i angeic.” w21.11 10 par. 11-12

Tune kaa la aqane tro sa hnëkë kowe la itre jol ka troa traqa elany? Loi e tro sa mejihnine la itre hne së hna hetreny, me wangatrune la aqane imelekeu së me Iehova. Maine tro sa thele troa atrepengöi Iehova hnyawa, tro ha xecie koi së laka, ijije hi tro Nyidrëti a thupë së ngöne la isi Gog atre Magog. Kola amaman hnene la xötr ne la topik së la kepine matre Dravita a mejiune kowe la ixatua i Iehova. Hnei angeice palahi hna lapaune koi Iehova, nge hnei Nyidrëti palahi hna xatua angeic. Ame lo Dravita a nekötrahmany, hnei angeic hna cile koi Goliatha, ketre sooce i angetre Filisiti ka hoea, me hape: “Tro Iehova a nue hmunë koi ni ngöne la drai celë.” (1 Sam. 17:46) Thupene lai, hnei Dravita hna huliwa koi Saulo joxu, nge hnei nyidrëti hna anyimua thele troa humuthi angeic. Ame pe, “eje kö Iehova thei” Dravita. (1 Sam. 18:12) Eje hi, hnei Dravita hna öhne la ixatua i Iehova, matre xecie koi angeic laka, tro kö Nyidrëti a xatua angeic ngöne la ijine jol. w22.01 6 par. 14-15

Ame Iehova, ka atreine xomihni aqeanyi Nyidrë. Tha ka kuca nyimenyimëne kö Nyidrëti la huliwa. Aja i Nyidrë troa amadrinë itre xan me atrune la ëje i Nyidrë. Tro sa ce wange lai ngöne la aqane hnëkëne Nyidrëti la ihnadro. Öni Tusi Hmitrötr ka hape, hnei Iehova hna “tuluth” la ihnadro, me “të la tepen’ eje” me “amë la etë nyine xomexöte ne ej.” (Iobu 38:5, 6) Hnei Nyidrëti hna xomi ijine troa kuca la huliwa i Nyidrë. (Gen. 1:10, 12) Pane mekune jë la madrinene la itre angela ngöne la kola mama trootro la emingömingöne la itre hna xup hnei Iehova! Hnei angatr hna “ce hë madin.” Kola hapeue lai? Nyimu macatre ne xupe Iehova la nöjei ewekë asë. Ngo ame la Nyidrëti a goeëne la thangane la huliwa i Nyidrë, öni Nyidrëti ka hape, ka “nyipi loi.”​—Gen. 1:31. w21.08 9 par. 6-7

Ame ngöne la ceitune i Iesu, hnene la ketre maseta hna hëne la itre hlue i nyidrëti qëmekene troa tro. Hnei nyidrëti hna isa hamë talan koi angatr, thenge la hnei angatr hna isa atrein. Hnei nyidrëti hna hamëne la faifi lao talan kowe la pane hlu, me lue talan kowe la ketre, nge ame la hnaakönin ke, hna hamëne hi la caas. Hnene la lue pane hlu hna catre huliwa matre akökötrene la itre talane i nyidro. Ngo ame la hnaakönin, pëkö hnei angeic hna kuca, matre hna helë angeic hnene la maseta. Tune la pane hlu, hnene la hnaaluen hna catre huliwa kowe la maseta. E cili, hnei angeice hna kapa la lue xaa talan. Madrine catre la maseta matre hnei nyidrëti hna amanathithi angeic. Hnei nyidrëti hna mejiune koi angeic me hamëne la itre xaa hnëqa! w21.08 21 par. 7; 22 par. 9-10

Iehova a catre xomihni aqeanyi ngöne la itre drai ne la pun. Tha aja i Nyidrëti kö troa paatre hnei ketre. (2 Pet. 3:9) Iehova a ajane tro la nöjei atr a ietra me axecië mekune hnyawa. Ngo hetre ifego la aqane xomihni aqeanyi Iehova. Ame la itre ka tha hane kö sajuëne la Baselaia i Akötresie, tro hë angatr a tui Farao ngöne la hneijine i Mose. Öni Iehova koi Farao: “Enehila tro ni a xejë la imenge me lepi ’ö me nöjei jini ’ö hnene la meci ka sholeshol; nge tro ha apatenyi ’ö qa ngöne la nöj. Nge ngöne hi lai hnenge hna acilë eö nyine amamane la menenge göi ’ö, nge mate hlemu la ëjeng’ e celë fen’ asë.” (Eso. 9:15, 16) Tro hë la nöjei nöj a atre laka, Iehova la nyipi Akötresie. (Ezek. 38:23) Ame la ijumejume hna qaja ngöne la topik enehila, tre, kola qaja la ijine kola troa apatrene palua la itre ka thipetrij la musi Iehova, tui Farao. w21.09 18-19 par. 17-18

Hapeu, epuni kö a akötr pine laka, hna upetröneë la ketre sinee i epun? Nge tune kaa e ketre trejin ne la ekalesia a qaja la ketre ewekë, nge ka akötrë së catr? Ngo loi e tro sa catre xomihni. (Iako. 3:2) Itre atr ka tha pexeje kö së. Maine jë, thatre kö angatre la nyine troa qaja maine angatre penaqaja la itre trenge ewekë ka akötr. Loi e tro sa lapa mekun la eamo i Paulo aposetolo, lo kola hape: “The mano kö nyipunie ixomihnikeu me inualoinekeun, ngacama kola ngazo koi nyipunie.” (Kol. 3:13) Nyipiewekë tro sa xatuane la itre trejin ka hetre sinee hna upetröneë. Angatre a ajane tro sa hnimi angatr me hamë ithuecatr. (Heb. 10:24, 25) Itre xan a qaja ka hape, tha ithanata hë me angatr hnene la itre xaa trejin maine kolo pena iananyi me angatr. Celë hi matre, loi e tro sa thupëne la aqane ujë së. Ketre, loi e tro sa qaja aloin me ithuecatre kowe la itre thöth ka mele nyipici koi Iehova, ngacama hna upetröneë la kem me thine i nyudren. w21.09 29 par. 13-14; 30 par. 16

Hetre thangane catr e tro sa xomi ijine troa porotrik memine la itre trejin ka qatre hë. (Rom. 1:12) Tro la itre xötr ka co a öhne laka, Iehova a hnim me thupëne la itre hlue i Nyidrë ka mele nyipici. Nge tro la itre trejin ka qatre hë a öhne laka, easa wangatrunyi angatr. Ketre, madrin catre angatr troa qaja la itre manathith hnei angatre hna kapa qaathei Iehova. Nyipici laka, kola paatre la emingömingö së ngöne la easa qatre trootro. Ngo ame koi Iehova, mingöminge catre la itre ka mele nyipici koi Nyidrë, ngamaca tro ju hë la itre macatre. (1 Thes. 1:2, 3) Pine nemen? Pine laka, hnei angatr hna nue la uati hmitrötre i Iehova troa xatua angatr troa eënyine la itre thiina ka lolo. Haawe, maine tro sa atrepengöne hnyawa la itre trejin ka qatre hë, me wangatrunyi angatr, me xomi ini qaathei angatr, tro hë sa öhne laka, ka sisitria catre angatr! Nyipiewekë tro la itre xötr ka co a nyipiine la itre trejin qatr me qatre föe. Nge loi e tro fe la itre trejin ka qatre hë a hnim me wangatrune la itre xötr ka co. E cili, tro ha ihnimi me caasi la ekalesia. w21.09 7 par. 15-18

Loi e tro sa thupën matre tha tro kö a catr la aqane tro sa amekötine la itre xan. Ngo nyipiewekë troa hetre hni ne utipin tui Akötresie. (Efe. 2:4) Ame la troa utipin ke, tha tro hmekuje kö a qaja, ngo loi e tro fe a amamane ngöne la aqane ujë. Haawe, catre jë së utipine la itre ka aja ixatua e hnine la ekalesia me ngöne la fami së. Maine jë, tro sa kuci xen, maine xomi ijine troa ithuecatr kowe la ketre trejin ka bëeke koi Iehova. Ketre, ijije fe tro sa akeukawane la hni ne la itre atr jëne la maca ka loi. (Iobu 29:12, 13; Rom. 10:14, 15; Iako. 1:27) Eje hi, nyimutre la itre aqane tro sa utipine la itre xan. Ame la easa amamane la thiina cili, easë lai a amadrinë Iehova Keme së, Atre utipine la nöjei atr asë! w21.10 13 par. 20-22

Ame ngöne Salamo 23, Dravita a qaja la itre manathith ka tru ke, hnei angeic hna acatrene la aqane imelekeu i angeic me Iehova, Atre thupë mamoe. Hnei Iehova hna eatrongë Dravita “ngöne la ite gojenyi ka meköt,” me ceme angeic ngöne la itre ijine loi me ngazo. Atre hi Dravita laka, ngacama angeic “ngöne la hnënge haö ka cia loi,” ngo tro fe angeic a cile kowe la itre jol. Eje hi, hnei angeice hna “trongëne la hnathupe ne la ahnuene la mec,” me kucakuca, me isi me itre ithupëjia. Ngo pine laka, ce Dravita me Iehova, Atre thupë mamoe, matre tha hnei angeice kö hna “qouene la ngazo.” Nemene la aliene la hna hape, “tha tro kö a pate la kete loi thei” Dravita? Kola hape, catrecatre la lapaune i Dravita koi Iehova. Ame koi angeic, tha nyipiewekë kö troa hetre mo ka tru matre troa mele madrin. Hnei angeic hna mejihnine la itre hnei Iehova hna hamën. Ka sisitria catre kö koi angeic troa amanathithi angeic me thupë angeic hnei Iehova. Itre trengewekë i Dravita a xatua së troa atreine waiewekë göne la itre mo. w22.01 3-4 par. 5-7

Hnene la itre hlue i Iehova ekö hna cainöj kowe la itre atr ka xelene la maca. Tui Noa, “atre cainöjëne la meköt” koi nyimu macatre. (2 Pet. 2:5) Eje hi, aja i Noa tro la itre atr a kapa la maca, ngo tha celë kö la ka traqa. Hnei Akötresieti hna upi Noa troa cane la aka, me hape: “Tro eö a lö hnine la aka, eö, me ite nekö i ’ö, me ifënekö i ’ö, me ite föe ne la ite nekö i ’ö ce me eö.” (Gen. 6:18) Pine laka, tru catre la aka matre Noa a mejiune laka, nyimutre la itre atr ka troa drei angeic. (Gen. 6:15) Ngo pëkö ka drenge la maca hnei angeic hna tro fë. (Gen. 7:7) Hapeu, ka gufa kö koi Iehova la itre trengecatre hna kuca hnei Noa? Ohea! Ame koi Nyidrë, hnei Noa hna eatrëne hnyawa la hnëqa i angeic.​—Gen. 6:22. w21.10 26 par. 10-11

Pane mekune jë la akötre i Rutha! Eje hi, hnei Rutha lo hna kuca la hnei angeic hna atrein matre troa xatua Naomi. Hnei angeice hna ce treije me eahlo me akeukawane la hni eahlo. Nyimutre la itre drai ne trongëne nyidro la itre gojeny. Ame pe, hnei Naomi hna qaja ka hape: “Ase hë Iehova ahmacanyi ni nge pë hë alien.” Tha hnei Naomi kö hna qaja la aqane xatua eahlo hnei Rutha! Ame pe, hnei Rutha palahi hna ce lapa me Naomi. (Rutha 1:3-18) Maine jë, troa ithanata akökötrenyi koi së hnene la ketre trejine föe ka cile kowe la itre jol. Ngo tha tro kö sa dreng akötrëne la hna qaja. Loi e tro pe sa xomihni aqeanyi me sipo Iehova troa xatua së matre atreine akeukawane la hni angeic. (Ite edomë 17:17) Maine jë, tro la ketre trejine föe ka cile kowe la itre jol a thipëne la ixatua së. Ngo tro la ihnimi nyipici a upi së troa xatua angeic.​—Gal. 6:2. w21.11 11 par. 17-19

Kola hapeu la troa hmitrötr? Ame la hnaewekë “hmitrötr” me “ehmitrötren” ngöne la Tusi Hmitrötr ke, kola qaja la pengöne la ketre atr maine ketre ewekë ka wië ngöne la nöjei götran. Kola wië ngöne la itre mekun, ngöne la aqane ujë me aqane hmi. Nge hna amë thatraqane la huliwa i Akötresie. Eje hi, easa hmitrötr ngöne la easa thupëne la aqane mele së, me atrunyi Iehova thenge la aja i Nyidrë, me acatrene la aqane imelekeu së me Nyidrë. Drei la ketre manathith ka tru la troa easenyi koi Iehova, Akötresie ka hmitrötr. Easa madrine la kola mama ngöne la Tusi Hmitrötr, la ehmitrötre i Nyidrë! Ame Iehova ke, Akötresie ka wië ngöne la nöjei götran. Celë hi lai hna qaja hnene la itre serafi, itre angela ka cil xötreithe la therone i Iehova. Öni angatr: “Hmitöt, hmitöt, hmitöt, Iehova ne sabaoth.” (Is. 6:3) Nyipiewekë troa hmitrötr la itre angela, matre troa acatrene la aqane imelekeu i angatr me Iehova. w21.12 3 par. 4-5

Itre nekötrahmany me neköjajiny a ajane troa mele ka loi. Celë hi matre, itre porofesör me itre sinee i nyudren ka tha hmi kö a upi nyudren troa ini aqeany. Ngo tro lai a xome la traeme i nyudren. Ame pena la itre kem me thin me itre trejin ne la ekalesia, angatr a ithuecatr koi nyudren troa catre huliwa koi Iehova. Nemene la ka troa xatua nyudren troa axecië mekun hnyawa? Loi e tro nyudreni a e me lapa mekun la tusi Efeso 5:15-17. Thupene lai, loi e troa isa hnying ka hape: ‘Nemene la “aja i Iehova”? Nemene la aqane tro ni a amadrinë Nyidrë? Nge tune kaa la aqane tro ni a huliwane hnyawa la traemeng?’ Tha tro kö sa thëthëhmine laka, “ngazo la itre drai,” nge easenyi hë matre troa apatrene la fene celë hna musinën hnei Satana. w22.01 27 par. 5

Eu la ijine Iakobo a ketre atre drei Iesu? Thupene la kola amele Iesu hmaca, “nyidrëti a mama koi Iakobo, me kowe la itre xa aposetolo.” (1 Kor. 15:7) Celë hi lai ka upi Iakobo troa saze la mele i angeic. Ketre, ce Iakobo memine la itre xaa aposetolo ngöne lo angatr a kapa la uati hmitrötr ngöne la ketre uma e Ierusalema. (Itre hu. 1:13, 14) Thupene lai, hna hane ië Iakobo troa sine la Lapa Ne Xomi Meköti ngöne lo hneijine la itre pane Keresiano. (Itre hu. 15:6, 13-22; Gal. 2:9) Qëmekene la macatre 62 M.K., hnei Iakobo hna cinyihane la ketre tusi thatraqane la itre Keresiano hna iën. Eje hi, ngacama easa mejiune troa mel e koho hnengödrai maine e celë fen, ngo ka nyipiewekë palahi la tusi cili enehila. (Iako. 1:1) Hnei Flavius Josèphe, ketre atre inamacan ekö, hna qaja ka hape, hnei Anan, ketre atre huuj nge nekö i Anne, hna amekötine troa humuthi Iakobo. Ngo hnei Iakobo hna mele nyipici koi Iehova uti hë la pune la mele i angeic e celë fen. w22.01 8 par. 3; 9 par. 5

Hetre ini hna hamën ngöne la topik ne la drai celë. Eje hi, tha tro kö sa mekun laka, tro Iehova a thepe së qa ngöne la nöjei jol me itupath. Tui Iesu, loi e tro sa catre mele nyipici ngacama kola thele troa humuthi së. (Mat. 16:24, 25) Ame pe, atre hi së laka, tha tro kö Iehova a nue së kowe la itre itupath me itre jol hne së hna thatreine xomihnin. (1 Kor. 10:13) Ame la hnaaluene ini, tre, ijije hi troa akötrë së ngacama pëkö ngazo hne së hna kuca. (1 Pet. 2:19, 20) Nyipici, itre ka icilekeu a akötrë së ke, tha easë kö a sine la fen. Easë pe a trongëne la hna qaja hnei Tusi Hmitrötr. (Ioane 17:14; 1 Pet. 4:15, 16) Ame Iesu, atre hi nyidrëti la kepin matre tha Iehova kö a thepe nyidrëti qa ngöne la itre akötr. Ngo ame la itre xaa trejin, tha trotrohnine kö angatr la kola traqa itrai la itre jol. (Hab. 1:3) Ame pe, ka ihnim me ka atreine xomihni aqeane Akötresie. Atre hi Iehova laka, tha kolo kö a nanazije la lapaune i angatr. Ngo angatre pe a aja ixatua qaathei Nyidrë.​—2 Kor. 1:3, 4. w21.04 11 par. 9-10

Tro Iehova a kapa la hmi së, e tro sa atrunyi Nyidrë cememine la ihnim me metrötr. Eje hi, tru la ihnimi së koi Iehova, matre easa ajane troa atrunyi Nyidrë me hamën la ka sisitria koi Nyidrë. Ame la ketre aqane troa atrunyi Nyidrë ke, ene la troa thith. Tusi Hmitrötr a aceitunëne la itre thithi së memine la sinöe ka pui loi hna dreuth hune la ita ne huuj me ngöne la uma ne hmi. Iehova a madrine la kola dreuthe la itre sinöe ka pui loi. Ketre tune fe, Iehova a madrine la itre thithi së, ngacama easa qaja la itre hnaewekë ka hmaloi troa trotrohnin. (Ite edomë 15:8; Deu. 33:10) Aja i Iehova tro sa qaja la ihnimi së me hni ne ole së koi Nyidrë ngöne la thith. Nyidrëti fe a ajane tro sa qaja la itre jol hne së hna cile kow me itre aja ne la hni së. Qëmekene tro sa thith, loi e tro sa pane mekun la nyine tro sa qaja. E cili, tro ha “pui loi” la itre thithi së koi Iehova. w22.03 20 par. 2; 21 par. 7

Ame ngöne la isi Amagedo, tha hnëqa së kö troa iëne la itre ka ijij troa kapa maine tha kapa la utipin me ihnimi Iehova. (Mat. 25:34, 41, 46) Hapeu, tro kö sa mejiun kowe la itre hna amekötin hnei Iehova, maine tro pena sa nuetrij itre ej ke, tha celë kö mekuna së? Haawe, enehila hi la ijine troa acatrene la mejiune së koi Iehova, matre tro sa hane kuca tun elany. Pane mekune jë la madrine së elany. Ame ngöne la fene ka hnyipixe, tro ha paatre la itre hmi ka thoi, me itre ka salem, me itre he ne politik ka qanangazon la itre atr. Ketre, pëhë sine mec, nge tha tro hmaca kö sa qatre trootro me mec. Tro fe a othe me umë Satana koi 1 000 lao macatre. Eje hi, paatre hë la itre ethane qa ngöne la nöjei huliwa i angeic ka ngazo. (Hna ama. 20:2, 3) Drei la ketre manathithi ka tru troa mejiun me trongën la itre hna amekötin hnei Iehova! w22.02 6-7 par. 16-17

Hnei Iesu hna ithuecatre kowe la itre atr troa iloi. Hnei Iesu hna qaja koi angatr ka hape, maine tro angatr a thele tingeting memine la trejin me angatr, tro Iehova a kapa la hmi angatr. (Mat. 5:23, 24) Ketre, hnei Iesu hna xatuane la itre aposetolo ngöne lo angatr a iwesitrë göi troa atre ka hape, drei la ka tru e angatr. (Luka 9:46-48; 22:24-27) Maine easa troa thele tingeting me itre xan, tha tro kö sa thele iwesitrë me angatr. Loi e tro pe sa iloi me ithuecatre kowe la itre trejin troa hane iloi me itre xan. (Fil. 4:2, 3; Iako. 3:17, 18) Ketre, nyipiewekë tro sa isa hnying ka hape: ‘Eni kö a thele tingeting me itre xan, ngamaca tha ka hmaloi kö koi ni? Ame la kola akötrë ni hnene la ketre trejin, eni kö a lapa fë trengehni? Eni kö a thele troa canga iloi me angeic maine treqene pena tro angeic a qeje menu koi ni?’ w22.03 10 par. 10-11

Hna perofetan ekö e hnine la Tusi Hmitrötr ka hape, tro la nöje i Iehova a “hujë angate xane kö” ngöne la huliwa i Nyidrë me xötrethenge Iesu. (Sal. 110:3) Celë fe hi lai ka traqa enehila. Ame e nöjei macatre, nyimutre la itre hawa ne cainöj ne la itre hlue i Iehova. Angatr a nue la traeme i angatr me itre mo thatraqane la huliwa cili. Angatr a itö ithuecatrekeu me itö ixatua me acatrene la lapaunene la itre trejin koi Iehova. Ketre, itre trejin ka trene hnëqa a nue la traeme i angatr matre troa hnëkëne hnyawa la itre icasikeu matre inine la ekalesia. Pine nemen? Pine laka, angatr a hnimi Iehova me itre xan. (Mat. 22:37-39) Iesu la ketre tulu ka lolo. Hnei nyidrëti hna amë panëne la aja ne la itre xan, nge pine pë hë la itre aja i nyidrë. Celë hi matre, loi e tro sa catre nyitipu nyidrë. (Rom. 15:1-3) E cili, tro hë sa kepe thangane ka loi. w22.02 20 par. 1-2

Ame ekö e Isaraela, ka eënyi la itre atr. Nge kola nyithupene la itre ka huliwa e hej. Maine tha tro kö la maseta a nyithupei angatr, kösë angeice hi lai a cipane la manie thatraqane la fami angatr. Öni Iehova kowe la angetre Isaraela, ka hape: “Pë ewekë angeic, nge angeic’ a nyipine lai [thupe i angeic].” (Deu. 24:14, 15; Mat. 20:8) Ame enehila, tha kolo kö a nyithupene la itre ka huliwa e hej. Angatr a kapa la thupei angatr thupene la lue wiik maine caa treu ne huliwa. Ngo ka nyipiewekë palahi la hna qaja ngöne Levitiko 19:13. Ame la itre xaa maseta, tha nyithupene hnyawa kö angatr la itre ka huliwa. Atre hi la itre maseta laka, tro palahi angatr a huliwa ngacama tha tru kö la thupei angatr. Ame pe, kösë itre maseta a ‘meköle fë la june la atre huliwa’ i angatr. Ngo ame la itre Keresiano, angatr a huliwa nyipici kowe la itre ka huliwa koi angeic. w21.12 10 par. 9-10

Iesu a pi ij ke, tru palaha la itre akötre i nyidrë. Tha hnei Iesu kö hna hmahma troa fe la aliene hni nyidrë. Loi e tro sa nyitipu nyidrë. Maine jë, tha majemine kö së fe la itre aliene hni së koi itre xan. Ngo ame itre xaa ijin, nyipiewekë tro sa sipo ixatua koi angatr. Maine jë hna tithi së hnei mec maine pena easa uti ipië trootro. E cili, loi e tro sa sipone kowe la ketre sinee troa komisio, maine tro sai së koi droketre. Nge maine easa hnehengazo, loi e tro sa sipo ixatua kowe la itre qatre thup maine itre trejin ka macaj, matre troa drei së me ithuecatre koi së jëne “la tenge ewekë ka loi.” (Ite edomë 12:25) Tha tro kö sa thëthëhmine laka, tru la ihnimi ne la itre trejin koi së, nge aja i angatr troa xatua së ngöne ‘la itre ijine akötr.’ (Ite edomë 17:17) Ngo tha öhne kö angatr la itre aliene hni së. Celë hi matre, loi e tro sa qaja itre ej koi angatr. w21.04 11-12 par. 11-12

Tha ka hmaloi kö koi së la kola saze la mele së. Ame la itre xaa trejin, nyimutre la itre macatre ne angatr a huliwa koi Iehova ngöne la drai ka pexej. Ame pe, hna saze la huliwa i angatr. Ame pena itre xan, hnei angatre hna nue la huliwa i angatr ngöne la ekalesia ke, qatre hë angatr. E cili, angatr a hleuhleu me akötr. Maine tro sa goeëne la itre ewekë tui Iehova, tro hë sa canga kapa la itre ewekë ka saze ngöne la mele së. Eje hi, Iehova a kuca la itre ewekë ka tru enehila, nge easa ce huliwa me Nyidrë. (1 Kor. 3:9) Nyipici, thatreine kö troa saze la ihnimi Nyidrëti koi së. Celë hi matre, maine kola saze la ketre ewekë ngöne la organizasio i Iehova, tha tro kö sa hnyingëne thele la kepin. Ketre, tha tro kö sa mekune “la ite drai hnapan,” ngo loi e tro pe sa sipo Iehova troa goeëne la eloine la itre ewekë ka saze. (Ate cai. 7:10) Loi e tro sa lapa mekun la itre ewekë ka loi. Celë hi ka xatua së troa madrin me mele nyipici. w22.03 17 par. 11-12

Drei la ka kapa la ihnimi nyipici Iehova? Tusi Hmitrötr a qaja ka hape, nyimutre la itre ewekë hne së hna hnime maine ajan, tune la “troa pi eëny,” me “waina me wakacu,” maine troa “inin,” me “atrehmekun,” me “inamacan.” (2 A. l. ite jo. 26:10; Ite edomë 12:1; 21:17; 29:3) Ngo ame la ihnimi nyipici ke, thatraqane hmekuje hi la itre atr, ngo tha kowe kö la itre ewekë. Ame pe, tha Iehova kö a amamane la thiina cili kowe la nöjei atr asë. Nyidrëti hi a amamane kowe la itre ka easenyi koi Nyidrë me hnimi Nyidrë. Eje hi, ka nyipici Iehova kowe la itre sinee i Nyidrë, nge pëkö ka atreine thapa la ihnimi Nyidrëti koi angatr. Tru la itre manathithi hnei angatr hna troa kapa elany. Iehova a hnime la nöjei atr asë. Öni Iesu koi Nikodemo: “Atraqatre la ihnimi Akötresie kowe la fen, matre hnei nyidrëti hna upe la Nekö hnimina i nyidrë ka cas, matre tha tro kö a meci la atre amamane la lapaune i angeic kowe la Nekön, ngo tro pe a hetrenyi la mele ka pë pun.”​—Ioane 3:1, 16; Mat. 5:44, 45. w21.11 2 par. 3; 3 par. 6-7

Nyipici, tha ka hmaloi kö la mele së ngöne la fene celë. Nge tro palakö a traqa la itre jol ka tru. (Mat. 24:21) Eje hi, easa lapa treqene la ijine kola troa apatrene palua la itre jol cili! (Is. 65:16, 17) Celë hi matre, nyipiewekë tro sa xomihni aqean. Pine nemen? Öni Iesu: “Pine la hnei nyipunieti hna cile hut, tro hë nyipunieti a mel.” (Luka 21:19) Haawe, tro sa ce wang la hna kuca hnei itre xan matre troa cile catr ngöne la itre jol. Celë hi ka troa xatua së troa xomihni aqean. Drei la tulu ka sisitria göne la troa xomihni aqean? Iehova Akötresie. Eje hi, easa mel ngöne la fen hna musinën hnei Diabolo, matre nyimutre la itre jol ka traqa. Maine ju, ijije hi tro Iehova a apatrene la itre jol cili. Ngo Nyidrëti a treqene la nyipi ijin. (Rom. 9:22) Eje hi, Iehova palahi a xomihni aqean. w21.07 8 par. 2-4