Semitrepa

Ame koi itre xan, tha ijije kö la itre ini hna hamën hnei Iesu. Hetre itre xaa ewekë hnei angatr hna ajane qaathei Iesu. Ngo hnei Iesu hna thipetrije la sipo i angatr, ame hnei angatr hna nuetriji nyidrë. (Mat. 16:4) Nemene la hna qaja hnei Tusi Hmitrötr? Öni Isaia perofeta göne la Mesia: “Tha tro kö angeic’ a qaja catën, me ewekë draië, nge tha tro kö a denge la aqane ewekë i angeic’ e kuhu gojeny.” (Is. 42:1, 2) Ame lo Iesu a cainöj, tha hnei nyidrëti kö hna pi mama. Tha hnei nyidrëti kö hna xupe la itre uma ne hmi ka tru, maine pi mama ngöne la aqane heetr me aqane troa hë nyidrë. Ketre, ame lo kola thele troa humuthi Iesu ngöne la Hnaakootr Ka Tru, tha hnei nyidrëti kö hna pi mama me kuca la ketre iamamanyikeu qëmekei Herodra joxu. (Luka 23:8-11) Nyipici, hnei Iesu hna kuca la itre iamamanyikeu, ngo ame la ka sisitria koi nyidrë, tre, troa cainöjëne la maca ka loi. Öni nyidrë kowe la itretre dreng: “Kepine hi lai matre upi ni jë.”​—Mar. 1:38. w21.05 4 par. 9-10

Easa thele la itre atr “ka hmalahnine troa kapa la mele ka pë pun.” (Itre hu. 13:48) Eje hi, easa xatua angatr troa xötrethenge Iesu ngöne la easa ithuecatr koi angatr troa (1) trotrohnin, (2) kapa, me (3) trongëne la hnei angatr hna inin. (Kol. 2:6, 7; 1 Thes. 2:13) Ketre, ijije hi tro la itre atrene la ekalesia a xatuane la itre ka ini tus. Angatr a amamai tulu ka loi me hnime la itre ka ini tus me ikepe hnyawa ngöne la hna icasikeu. (Ioane 13:35) Loi e tro fe la ka hamë ini a nue traem me trengecatr, matre xatuane la ka ini tusi troa thipetrije la itre ini ka thoi me akeine la “itre itra etë atraqatr.” (2 Kor. 10:4, 5) Maine jë, itre treu ne tro la trejin a xatuane la ka ini tus troa kökötr ngöne la götrane u uti hë la troa xomi bapataiso. Ngo tha ka gufa kö la itre trengecatr ne lai trejin. w21.07 3 par. 6

Ame koi epun, ka nyipici kö la itre ini hna hamën hnene la Itretre Anyipici Iehova? Angatre kö a atrunyi Akötresie thenge la aja i Nyidrë? Atre hnyawa hi Paulo aposetolo laka, nyidrëti ngöne la nyipici. (1 Thes. 1:5) Tha hnene kö laka, nyidrëti a madrin nge lolo la itre ini hnei nyidrëti hna kapa. Ngo hnene pe laka, hnei nyidrëti hna inine la Trengewekë i Akötresie. Ame koi nyidrë, “qaathene la ua i Akötresie la nöjei hna cinyihan asë.” (2 Tim. 3:16) Nemene la hnei nyidrëti hna inin? Hnei nyidrëti hna öhne laka, Iesu la Mesia hna thingehnaean, lo hna methinën hnene la itre hene ne hmi angetre Iudra. Angatr a qaja ka hape, itre hlue i Akötresieti angatr, ngo tha mama kö ngöne la itre huliwa i angatr. (Tito 1:16) Ame Paulo, tha hnei nyidrëti kö hna iëne la itre ini nyine troa mejiun kow. Hnei nyidrë hna inine me trongën “la eamo i Akötresie.”​—Itre hu. 20:27. w21.10 18 par. 1-2

Nyipici, easa tran me fi, ngo Akötresieti kö la ka acian. (1 Kor. 3:6, 7) Iehova Akötresieti a wangatrune la mele ne la nöjei atr. Celë hi matre, Nyidrëti a aijijë së troa ce huliwa me Iesu ngöne la hna cainöj, qëmekene troa nyipune la fene celë ka ngazo. (Hag. 2:7) Eje hi, huliwa ne iamele la huliwa ne cainöj. Hna aceitunëne la fene celë memine la ketre he ka troa lö hnine la hnagejë. Ngacama ala xalaithe hi la itre ka mel, ngo hna amele angatr jëne la trengecatre ne la nöjei ka ithel. Ketre tune la easa cainöj. Thatre kö së la etrune la itre atr hna troa amelene qa ngöne la fene i Satana. Ngo Iehova a aijijë së troa hane thele angatr. Öni Andreas, ketre trejin e Bolivie: “Hnene la trengecatr ne la itre trejin, matre kola atre la nyipici me xomi bapataiso hnene la ketre atr.” Haawe, loi e tro sa madrin troa cainöj. E cili, tro Iehova a amanathithi së nge tro hë sa madrin troa catre cainöj. w21.05 19 par. 19-20

Ame la aja ne la atre weje öni, tre, troa humuth la ketre öni. Celë hi matre, nyimutre la itre hnö hnei angeic hna huliwan, tune la hna qaja ngöne la tusi Iobu. (Iobu 18:8-10) Tune kaa? Angeic a pane goeëne la itre götran hna tro kow hnene la öni, me itre aja ne ej, me thele la aqane troa humuthe ej. Ame fe Satana, angeic a goeëne hnyawa la aqane ujë së, me itre hne së hna ajan, me itre götran hne së hna majemine tro kow. Thupene lai, angeic a asesëkötrë së me tra thethi së. Ngo Tusi Hmitrötr a amamane laka, ijije hi tro sa utretr qa ngön la itre hnö i Satana. Nge ej a ini së la aqane troa neëne itre ej. Hnei Satana hna huliwane la lue hnö, ene la pi tru me meciun. Jëne la lue thiina cili ka ngazo, angeic a tra thethine la itre atr. Hna aceitunë angeic memine la atre hnö ka thele tha. (Sal. 91:3) Ngo ijije hi tro sa utretr qa ngöne la itre hnö i angeic ke, Iehova a qaja amamane la itre nyinyithiina i angeic.​—2 Kor. 2:11. w21.06 14 par. 1-2

Ame la itre trejin qatr me qatre föe ke, ceitui angatre memine la itre wene etë ka melemel. Eje hi, ka tru alamekene catre angatr koi së. Öni Tusi Hmitrötr, “korona ka lolo la iqia.” (Ite edomë 20:29) Ngazo pe, tha canga öhnyi angatre kö hne së. Maine tro la itre xötr ka co a wangatrunyi angatr, tro hë nyudreni a öhne laka, sisitria catre kö la hnei angatr hna troa hamë së, hune la nöjei mo ne fen. Iehova a wangatrune la itre trejin qatr me qatre föe ka mele nyipici. Atrepengöi angatre hnyawa hi hnei Iehova, tune la itre thiina ka lolo i angatr. Iehova a madrin ngöne la itre trejin ka qatre hë a ce thawa memine la itre xötr ka co, la itre hnei angatr hna melën. (Iobu 12:12; Ite edomë 1:1-4) Ketre, tha sihngödri kö koi Iehova la aqane xomihni angatr. (Mal. 3:16) Eje hi, nyimutre la itre jol hnei angatr hna cile kow, ngo ka catre palahi la lapaune i angatr. Qaane lo ijine angatr a xötrei atre la nyipici, angatr a mejiune koi Iehova. Tru la ihnimi Iehova koi angatr ke, angatr palahi a cainöj me atrune la ëje i Nyidrë, ngacama “qatre hë” angatr.​—Sal. 92:12-15. w21.09 2 par. 2-3

Nyipiewekë tro palahi sa isa waipengö së hnyawa me hnyinge ka hape: ‘Hapeu eni kö a majemine goeëne la hna kuca hnei itre xan? Eni kö a kuca la itre ewekë göi troa pi mama? Eni kö a thel troa wajahuj la itre xaa trejin? Maine eni pena a kuca la hnenge hna atreine matre troa atrunyi Iehova?’ Tusi Hmitrötr a hmekë së ka hape, tha tro kö sa pi mama me goeëne la eisapengö së me itre xan. Pine nemen? Pine laka, tro hë sa pi tru me mekun laka, ka inamacane kö së hui itre xan. Maine pena, tro sa kucakuca me sipu wangaconyi së kö. (Rom. 12:3) Haawe, tha tro kö sa thëthëhmine laka, Iehova la ka eatrongë së koi Nyidrë. Tha Nyidrëti kö a goeëne la emingömingö së, me atreine së troa ithanata, maine pine laka, ketre atr ka hlemu së. Hnei Nyidrëti pe hna öhne la etrune la ihnimi së koi Nyidrë me aja së troa drengethenge Iesu.​—Ioane 6:44; 1 Kor. 1:26-31. w21.07 14-15 par. 3-4

Maine easa ajane troa ahnyipixene la aqane waiewekë së, loi e tro sa thith me inine me lapa mekun la Trengewekë i Akötresie. Loi e tro fe sa sipo trengecatr koi Iehova. E cili, tro la uati hmitrötr a xatua së matre tha tro kö sa goeëne la eisapengö së me itre xan. Ketre, tro Iehova a amamane laka, easa pi tru me meciun me xatua së troa thipetrij la lue thiina cili ka ngazo. (2 A. l. ite jo. 6:29, 30) Atre hi Iehova la itre aliene hni së. Öhne fe hi Nyidrëti laka, easa isi matre tha tro kö a ajojezi së hnene la fene i Satana me itre sipu aja së ka ngazo. Ketre, kola acatrene la ihnimi Iehova koi së ngöne la easa nue trengecatre matre troa thipetrije la itre ewekë cili ka ngazo. Tru la ihnimi Iehova koi së, tune la ketre thine memine la nekö i eahlo. (Is. 49:15) Drei la ketre mekun ka akeukawane la hni së laka, Iehova a hnimi së, la easa isine troa catre mele nyipici koi Nyidrë! w21.07 24-25 par. 17-19

Nyipiewekë tro sa wangatrune la itre hnëqa hna ahnithe koi së ngöne la huliwa i Iehova. E cili, tro hë sa madrin. Loi e tro “pala hi a tru hnei huliwa” së ngöne la hna cainöj me e hnine la ekalesia. Loi e tro fe sa hnëkë hnyawa matre hamë mekun ka ithuecatre kowe la itre trejin. (Itre hu. 18:5; Heb. 10:24, 25) Ketre, loi e tro sa wangatrune la itre hnëqa hna hamë së kowe la icasikeu e nyipine la wiik me metrötrëne la hawa. Tha tro kö sa wangacone la itre hnëqa cili. Loi e tro pe sa thele troa maca ngöne la huliwa i Iehova. (Ite edomë 22:29) Eje hi, maine tro sa catre huliwa i Akötresie, tro hë sa madrin. (Gal. 6:4) Ketre, tro hë sa ce madrine memine la itre xaa trejin ka kapa la ketre hnëqa hne së hna ajan.​—Gal. 5:26. w21.08 22 par. 11

Tha tro kö sa pi tru, ngo loi e troa nue Iehova troa ini së. Ame la kola tithi së hnei mec, ijije hi troa catre la itre none ka tru ne la wenethëhmi së me ajolë ej troa mano hnyawa. Ketre tu së fe, maine tro sa pi tru, tro hë sa calogitr nge tha tro hë sa kapa hnyawa la itre eamo qaathei Iehova. Ame la angetre Faresaio ekö ke, hnei angatr hna axetine la itre hni angatr. Tha hnei angatre kö hna wangatrune la itre hatren ka amamane laka, Iesu hnyawa hi la Nekö i Akötresie nge hetrenyi thei nyidrë la uati hmitrötr. (Ioane 12:37-40) Eje hi, tha ka loi kö la aqane ujë i angatr, matre kola sewe angatre troa kapa la mele ka pë pun. (Mat. 23:13, 33) Celë hi matre, loi e tro sa nue la Tusi Hmitrötr me uati hmitrötr troa saze la aqane ujë së me mekuna së! Haawe, tui Iakobo, loi e tro sa hetre hni ne ipië me nue Iehova troa ini së. E cili, tro hë sa maca troa hamë ini. w22.01 10 par. 7

Loi e tro sa catre thith me mejiune laka, tro la Keme së e hnengödrai a sa la itre thithi së. (Kol. 4:2) Ngacama, tha canga sa kö Iehova la itre thithi së, ngo tro kö Nyidrë a sa “ngöne la nyipi ijin.” (Heb. 4:16) Celë hi matre tha tro pi kö sa wesitr koi Iehova. Ame itre xan, nyimu macatre ne angatr a sipo Iehova troa nyipune la fene celë. Nge hnei Iesu hna upi së troa thithi thatraqane la Baselaia i Akötresie. (Mat. 6:10) Ngo tha tro pi kö sa nuetriji Akötresie pine laka, tha canga kapa kö Nyidrëti la sipo së! (Hab. 2:3; Mat. 24:44) Loi e tro palahi sa lapa treqe Iehova me catre thith. Tro kö Iehova a eatrëne la aja i Nyidrë ngöne la nyipi ijin, ene la “drai” me “hawa” hnei Nyidrëti hna sa.​—Mat. 24:36; 2 Pet. 3:15. w21.08 10 par. 10-11

Trotrohnine hi la itre trejin ka hetre hni ne ipië laka, angatr a uti ipië trootro. Hanawang la tulu ne la itre atre thupëne la sirkoskripsio. Ame la kola traqa koi 70 lao macatre i angatr, kola sipo angatr troa saze hnëqa. Tha ka hmaloi kö ke, tru catre koi angatr la hnëqa cili. Ngo atre hi angatr laka, nyipiewekë troa nue la hnëqa cili kowe la itre xötr ka co. Angatr a nyitipune la itretre Levi. Ame la kola traqa koi 50 lao macatre i angatr, itretre Levi a nyipune la huliwa ngöne la uma ne heta. Tha hnëqa i angatre kö la ka hamë madrine koi angatr. Angatre pe a madrin troa xatuane la itre ka nyihnai angatr. (Num. 8:25, 26) Ketre tune enehila, ame la itre trejin ka xom ekö la huliwa ne atre thupëne la sirkoskripsio, tha angatre hmaca kö a iwai trootro ngöne la itre ekalesia. Ame pe, angatr a catre huliwa ngöne la ekalesia. w21.09 8-9 par. 3-4

Ame ngöne Luka 15:11-32, hnei Iesu hna qaja la ceitune la nekötrahmanyi ka paatr. Tha hnei angeice kö hna drengethenge la keme i angeic. Hnei angeic hna tro kowe la ketre nöj “gaa nany,” me kuca la itre huliwa ka sis. Ame hë la kola traqa la itre jol, hnei angeic hna pane waipengöi angeic. E cili, angeic a trotrohnine laka, lolo kö la mele i angeic ekö. Öni Iesu: ‘Öhne hë angeic la aqane menu i angeic.’ Hnei angeic hna mekun troa bëeke hmaca koi hnalapa me qeje menu kowe la keme i angeic. Trotrohnine hë angeic laka, ka ngazo la aqane axecië mekune i angeic. Matre loi e tro angeic a saze la aqane ujë i angeic! Hnei angeice hna pane ietra. Nyipiewekë la itre ini hna hamën ngöne la ceitune celë. Itre ej a xatuane la itre qatre thup troa atrepengöne hnyawa la itre Keresiano ka ietra. w21.10 5 par. 14-15

Nemene la ewekë tha hna tro kö a jumejum maine enienijën? Öni Paulo aposetolo: “Pine laka, tro hë së a kapa la Baselaia hna thatreine enienijën, loi e tro pala hi sa . . . kuca la huliwa ka hmitrötr thatraqai Akötresie, cememine la xou me hmengöhmengön, nge huliwa ka amadrinë nyidrë.” (Heb. 12:28) Thupene la ijumejume tixenuë, Baselaia i Akötresie hmekuje hi la ka troa lapa me mus. Tro ej a cile hut epine palua! (Sal. 110:5, 6; Dan. 2:44) Haawe, enehila hi la ijine troa axecië mekune hnyawa! Emele së hi lai! Loi e tro la itre atr a iën. Maine tro angatr a sajuëne la fene celë, tro ha apatrenyi angatre palua. Ngo maine tro angatr a sajuëne la Baselaia i Iehova, tro hë angatr a hetrenyi la mel ka pë pun. (Heb. 12:25) Jëne la huliwa ne cainöj, easa xatuane la itre atr troa axecië mekun. Epi tro palahi sa mekun lo hna qaja hnei Iesu, ka hape: “Tro ha cainöjëne la maca ka loi ne la Baselaia e cailo fen nyine anyipicine kowe la nöjei nöj; ame hna traqa pi la pun.”​—Mat. 24:14. w21.09 19 par. 18-20

Itre qatre thup fe, loi e tro epuni a ithuecatrene la itre trejin ka hetre sinee hna upetröneë. Hnëqa i epuni troa akeukawane la hni angatr ka akötr. (1 Thes. 5:14) Loi e tro epuni a xomi ijine qëmeken me e thupen la itre icasikeu matre troa ithanata me angatr. Ijije hi tro epuni hane wai angatr me ce thithi me angatr. Ketre, loi e tro epuni a ce cainöje me angatr maine könë angatre kowe la hmi ne fami epun. Celë hi aqane tro la itretre thupë mamoe a hnime la itre mamoe i Iehova ka akötr me aja ixatua. (1 Thes. 2:7, 8) Ame Iehova ke, “xele kö Nyidrë troa apatrene la ketre e nyipunie, ngo loi e tro pe nyipunieti asë a ietra.” (2 Pet. 3:9) Hnei Nyidrëti hna hamëne la thupene mel thatraqane la nöjei atr asë. Celë hi matre, ngacama kola tria hnene la ketre trejin, ngo nyipiewekë la mele i angeice koi Iehova. Ketre, Akötresieti ka tru ihnimine Iehova matre Nyidrëti a mejiune tro angatre a canga bëeke kowe la nyipici. Aja i Iehova tro angatr a ceitu memine lo neköne ka mejengön ngöne la ceitune i Iesu.​—Luka 15:11-32. w21.09 30-31 par. 17-19

Pine nemene matre loi e tro palahi sa madrin troa cainöj me inine la itre atr, ngacama hna tithi së hnei mec nge pëhë trengecatre së? Pine laka, easa kuca la hnëqa së. Pane mekune jë la ka traqa koi Dravita joxu me itre sooce i angeic, ngöne la angatr a amelene la itre atrene la hnepe lapa i angatr me xome hmaca la itre mo i angatr hna atrekënö hnei angetre Amaleka. Kucakuca catre la itre sooce i Dravita, matre tha hnei angatre kö hna isi. Hna upi angatre pe troa thupëne la itre ewekë. Thupene la Dravita a ngaan la angetre Amaleka, hnei angeic hna thawa ceitun la itre mo kowe la itre sooc. (1 Sam. 30:21-25) Celë fe hi hne së hna kuca ngöne la huliwa ne cainöj. Tru la madrinene la itre trejin ngöne la kola thapa la ketre atr qa ngöne la fene celë ka ngazo, me xatua angeic troa trongëne la gojenyi ne mel. Öhne hi Iehova la itre trengecatre së me itre aliene hni së, nge Nyidrëti a amanathithin. Ketre, easa madrine troa sine la huliwa ne iamele hna kuca e cailo fen. (Ioane 14:12) Haawe, catre pi së ke, tro palahi Akötresieti a amanathithi së! w21.10 28 par. 15-17

Ame la easa uti ipië trootro, easa mekun laka, thatreine hë së huliwa koi Iehova tune ekö ke, pëhë trengecatre së. Ame pe, ijije hi tro sa huliwane la inamacane së matre troa xatuane la itre xötr ka co troa xome la itre xaa hnëqa e hnine la ekalesia. Nyipiewekë tro la itre trejin ka qatre hë a hetre hni ne ipië ngöne la angatr a xatuane la itre xötr ka co. Ame la atr ka hetre hni ne ipië ke, ame koi angeic, ka sisitria kö la itre xan hui angeic. (Fil. 2:3, 4) Ame la itre trejin ka qatre hë nge ka hetrenyi la thiina cili, atre hi angatr laka, nyimutre la itre aqane troa huliwa nge ka ihmeku memine la itre trepene meköt. Tha angatre kö a upe la itre xan troa huliwa tui angatr ekö. (Ate cai. 7:10) Nyipici laka, tru catre la itre ini hnei angatr hna troa hamën kowe la itre xötr ka co. Ngo tha tro kö a thëthëhmine laka, “kola saze la pengöne la fene celë,” matre tro fe a saze la itre xaa ewekë.​—1 Kor. 7:31. w21.09 8 par. 1, 3

Ngo ame Iehova, tha tro kö Nyidrëti a upe la itre hlue i Nyidrë troa kuca la itre huliwa cili ke, Akötresie ka hmitrötre Nyidrë. Celë hi lai hna sija hune la korona gool hna amë hune la itrapetre ne la atre huuje ka tru. Kola hape, “Hmitrötr koi Iehova.” (Eso. 28:36-38) Kolo lai a amekunëne la angetre Isaraela laka, Akötresie ka hmitrötre Iehova. Ngo tune kaa kowe la itre ka tha öhne kö la hna sija cili? Tha nyipiewekë kö troa öhne lo lai hna sija ke, hna anyimua e la Wathebo kowe la itre trahmany, itre föe me itre nekönatr. (Deu. 31:9-12) Maine easë ju ngöne la ijine cili, tro fe sa hane dreng la kola qaja ka hape: “Iehova ni Akötesi nyipunie, . . . hmitöteju nyipunie, ke hmitöte ni.” “Tro nyipunie a ite ka hmitöte koi ni; ke hmitöte ni Iehova.”​—Lev. 11:44, 45; 20:7, 26. w21.12 3 par. 6-7

Ame itre xan, angatr a hnehengazo. Maine jë, angatr a mel ngöne la itre nöj laka, kola elë la thupene mo. Matre, jole koi angatr troa hetrenyi la ka ijij. Ame pena itre xan, hna meci la atr ka huliwa thatraqane la fami. Maine tro sa acatrene la lapaune së, tha tro kö sa hnehengazo menu. Eje hi, hnei Iehova hna thingehnaean ka hape, maine tro sa amë panëne la itre huliwa i Nyidrë, tro hë Nyidrëti a hamë së la ka ijij. (Mat. 6:32, 33) Hnei Iehova palahi hna eatrëne la itre hnei Nyidrëti hna qaja. (Deu. 8:4, 15, 16; Sal. 37:25) Ketre, Nyidrëti a nyihnyawane la mele ne la itre waco me itre iengen. Haawe, the luelu kö së laka, tro fe Nyidrëti a hamë së la itre nyine xen me heetr. (Mat. 6:26-30; Fil. 4:6, 7) Ame la itre kem me thin, angatr a hnime la itre nekö i angatr, matre angatr a thupë nyudren. Ketre tune fe, Iehova a hnimi së matre Nyidrëti a hamë së la ka ijij. w21.12 17 par. 4-5; 18 par. 8

Hapeu, hna hane kö akötrë epun hnene la ketre trejin? Pane mekune jë la tulu i Iosefa ngöne lo kola qanangazo angeic hnene la itre sipu trejin me angeic. Hnei angeice palahi hna catre nyihlue i Iehova. Celë hi matre, hnei Iehova hna amanathithine la aqane xomihni aqeanyi Iosefa me lapa treqe Nyidrë. Hnei Iosefa hna nue la ngazo ne la itre trejin me angeic, me kepe manathith qaathei Iehova. (Gen. 45:5) Tui Iosefa, maine tro sa easenyi catre koi Iehova, tro hë Nyidrëti a akeukawane la hni së me nyinyin la jole së. (Sal. 7:17; 73:28) Maine hna akötrë së me kuca la ketre ewekë ka tha meköti kö, tha tro kö sa thëthëhmine laka, tha nanyi kö Iehova “koi angete thë fë hni.” (Sal. 34:18) Iehova a hnimi së ke, hne së hna atreine xomihni aqean, me nue koi Nyidrëti la itre ehnefe së. (Sal. 55:22) Eje hi, Iehova la Atre Amekötine la ihnadro, nge pëkö ewekë ka sihngödri koi Nyidrë. (1 Pet. 3:12) Hapeu, tro kö sa lapa treqe Iehova ngöne la kola akötrë së? w21.08 11 par. 14; 12 par. 16

Loi e tro sa nue la mele së koi Iehova, matre hetre mele ka loi. Matre nyipiewekë troa iëne hnyawa la itre ewekë nyine troa amë panëne ngöne la mele së. Pane mekune jë laka, easa ajane troa kuca la lue huliwa. Pine laka, easa ajane troa huliwane hnyawa la traeme së, matre easa iëne hnyawa la nyine tro sa pane kuca. Celë hi lai ka mama ngöne lo ijine Iesu a tro troa wai Maria me Maretha. Eje hi, madrine catre Maretha troa kepe Iesu, matre hnei angeic hna kuci xeni hnyawa. Ngo ame Maria, hnei angeic hna lapa ezi Iesu, me dreng la itre ini hnei nyidrëti hna hamën. Tha ka ngazo kö la mekuna i Maretha, ngo hnei Maria hna “iëne la götrane ka sisitria.” (Luka 10:38-42, ithuemacany) Maine jë, thëthëhmine hë Maria la hnei angeic hna xen ngöne la ijine cili, ngo tha thëthëhmine kö angeic la itre ini hna hamën hnei Iesu. Tui Maria, easa wangatrune la itre ijine easa huliwa koi Iehova. w22.01 27 par. 5-6

Nyipici laka, hnei Ahaba hna hetre hni ne ipië qëmekei Iehova. Ngo kola mama e thupen laka, tha hnei nyidrëti kö hna nyipi ietra. Eje hi, tha hnei Ahaba kö hna apatrene la hmi Baala qa ngöne la nöj me acile hmaca la hmi Iehova. Thupene la meci Ahaba, hnei Iehova hna qaja la mekuna i Nyidrë göne la joxu cili. Öni Iehu perofeta i Akötresie ka hape, ketre “ate ka ngazo.” (2 A. l. ite jo. 19:1, 2) Eje hi, maine hnei Ahaba ju hna nyipi ietra, tha tro kö Iehu a qaja ka hape, ketre atr ka ngazo angeic nge ka methinë Iehova. Nyipici, hnei Ahaba hna ietra, ngo tha hnei angeice kö hna nyipi ietra. Nemene la ini hne së hna xom qa ngöne la tulu i Ahaba? Ame lo Elia a qaja ka hape, troa humuthe la hnepe lapa i Ahaba ke, hnei hna kapa me hetre hni ne ipië. Ngo kola mama e thupen laka, tha hnei angeice kö hna nyipi ietra. Eje hi, ame la troa nyipi ietra ke, tha ene hmekuje kö la troa qaja, ngo hetre nyine tro fe sa kuca. w21.10 3 par. 4-5, 7-8

Ame Isaia ke, ketre perofeta angeic. Nge hna hëne la föe i angeic ka hape, “perofeta föe” matre hetre hnëqa i eahlo fe. (Is. 8:1-4) Hnei nyidroti palahi hna amë panëne la huliwa i Iehova ngöne la mele i nyidro. Itre trefën ka xötrei faipoipo, nyipiewekë fe tro epon a amë panëne la huliwa i Iehova ngöne la mele i epon, tui Isaia perofeta me föe i angeic. Loi e tro epon a ce inine la itre hna perofetan hnei Tusi Hmitrötr, matre acatrene la lapaune i epon koi Iehova laka, ka eatr palahi la itre hnei Nyidrëti hna qaja. (Tito 1:2) Ketre, jëne la ixatua i epun, kola eatr la itre xaa hna perofetan, tune la hna perofetan hnei Iesu. Eje hi, easa catre cainöjëne la maca ka loi e cailo fen ngöne la ijine la pun. Itre ka xötrei faipoipo, maine xecie koi epun laka, tro palahi a eatr la itre hna qaja hnei Tusi Hmitrötr, tro hë epuni a catre huliwa koi Iehova. w21.11 16 par. 9-10

Iesu a hnehengazo Maria ke, meci hë Iosefa, föi eahlo. Tru la ihnimi Iesu koi Maria, matre hnei nyidrë hna ahnithi eahlo koi Ioane. Xecie koi nyidrë laka, tro Ioane a xatua Maria troa catre nyihlue i Iehova. Hnei Ioane hna hnimi Maria me thupë eahlo kösë sipu thine i angeic. Drei la etrune la ihnimi Iesu kowe la föe ka nyihnyawane la mele i nyidrë qaane lo kola hnaho nyidrë uti hë la nyidrëti a mec! Nemene la ini hne së hna xom qa ngöne la itre trengewekë i Iesu? Nyipici laka, catrecatre kö la aqane imelekeu së memine la itre trejin hune la itre sipu sinee së. Maine jë kola icilekeu me nuetriji së hnene la itre fami së. Ngo hnei Iesu hna thingehnaean laka, maine tro sa lapa qale catre koi Iehova memine la organizasio i Nyidrë, tro hë sa kepe manathith ka tru laka, “100 hmaca kö” hune la itre ewekë ka paatr. Celë hi ka mama ngöne la aqane hnimi së hnene la itre trejin. Angatr a hnimi së ceitu me itre nekön, itre thin, me itre kem. (Mar. 10:29, 30) Eje hi, hnene la lapaun me ihnimi së koi Iehova me kowe la itre trejin, matre easa caasi e hnine la lapa i Iehova. Drei la ketre manathith ka tru koi së!​—Kol. 3:14; 1 Pet. 2:17. w21.04 9-11 par. 7-8

Ihnimi nyipici a upi së troa kuca la hna atreine matre xatuane la itre xan. Tune ekö, easa amamane la ihnimi nyipici së kowe la itre xaa trejin, ngacama isa nöje së kö. Ame itre xaa trejin, angatr a saen troa ixatua ngöne la ketre nöj hna lepe hnei hulö. Itre xan a ithingë matre troa xatuane la ketre trejin ka hetre jol göi manie. Tune la itre Keresiano ne Makedonia ekö, itre trejin enehila a kuca la hnei angatr hna atrein, matre sajuëne la itre ka aja ixatua, nge “goi sasaithe fe la hnei angatr hna hetreny.” (2 Kor. 8:3) Loi e tro la itre qatre thup a goeëne hnyawa la itre hna kuca hnene la itre trejin, me olene la aqane xatuane angatr la itre xan. Maine tro la itre qatre thup a qaja aloin me hamë ithuecatre i angatr ngöne la nyipi ijin, tro hë lai a thue aja koi angatr tro palahi a catre kuca la loi.​—Is. 32:1, 2. w21.11 11 par. 14; 12 par. 21

Easë asë hi a aja eamo. Ame itre xaa ijin, easë la ka sipo ixatua kowe la ketre atr hne së hna metrötrën. Ngo ijije fe tro la ketre trejin a hamë eamo koi së ke, easa nyiqane “kei.” (Gal. 6:1) Nge maine hne së hna kuca la ketre ewekë ka ngazo, tro hë lai a eamo së me ameköti së. Ame pe, loi e tro palahi sa dreng me kapa la itre eamo ke, ka hetre eloine koi së nge kola thupëne la mele së! (Ite edomë 6:23) Ame la xötr ka nyi tane la tane mekun celë ke, kola ithuecatre koi së troa ‘drenge la trengewekë ne la itre ka inamacan.’ Eje hi, pëkö atr e celë fen ka atre la nöjei ewekë asë; ame itre xan, angatr a atre la itre ewekë hne së hna thatre. (Ite edomë 12:15) Celë hi matre, loi e tro sa hetre hni ne ipië me drenge la itre eamo hna hamën koi së. Nge pine laka, hetre itre hne së hna thatreine kuca, nyipiewekë tro sa sipo ixatua koi itre xan, matre eatrëne la itre hne së hna mekun. Hnei Solomona joxu hna cinyihane ka hape: “Kola acaten’ [la itre mekun] hnene la itete ithanata ka ala nyimu.”​—Ite edomë 15:22. w22.02 8 par. 1-2

Ame la atr ka ietra ke, tha angeice hmekuje kö a qaja la ngazo i angeic, ngo angeice fe a saze la itre mekun me aqane ujë i angeic. Eje hi, angeic a nuetrije la ngazo hna kuca me trongëne la itre trepene meköti Iehova. (Ezek. 33:14-16) Ngo ame la ka sisitria catre kowe la atr ka ietra ke, troa acatrene hmaca la aqane imelekeu i angeic me Iehova. Ngo tune kaa e ketre sinee së la ka tria hnene la? Maine tro sa juetrëne la ngazo i angeic, tro ha hetre ethane koi angeic. Pine nemen? Pine laka, pëkö ewekë ka sihngödri koi Iehova. (Ite edomë 5:21, 22) Ketre, loi e tro epuni a amexeje koi angeic ka hape, aja ne la itre qatre thup troa xatua angeic. Ngo maine tha aja i angeice kö troa wang la itre qatre thup, loi e tro epuni a thuemacanyi angatr. w21.10 7 par. 19-21

Nyipiewekë tro sa nyitipu Iesu me nyipiine la itre xan. Tusi Hmitrötr a qaja ka hape, hnei Iesu hna “xome la pengö i hlu.” (Fil. 2:7) Eje hi, ame la hlu ke, angeice a thele la itre nyine tro angeic a kuca matre troa amadrinëne la maseta. Ketre tu së fe, easa nyihlue i Iehova memine la itre trejin. Celë hi matre, easa kuca la itre hne së hna atrein matre troa amadrinë angatr. Nyipiewekë tro sa isa hnying ka hape: ‘Hapeu, eni kö a ajane troa nue la traem me trengecatreng matre troa xatua itre xan? Hapeu, eni kö a canga saen troa hane nyidrawane la Uma Ne Baselaia me ngöne ijine asabele?’ Maine jë hetre nyine tro palakö sa saze, ngo pëkö aja me trengecatre së göne lai. Celë hi matre, nyipiewekë tro sa fe la aliene hni së koi Iehova. Loi e tro sa sipo Nyidrë matre “hetre aja me trengecatre [së] troa kuca.”​—Fil. 2:13. w22.02 22-23 par. 9-11

Hnei Iesu hna thiina ka menyik me loi hni koi itre xan ngöne la itre ijine jol. (Mat. 11:29, 30) Ame la ketre föe ne Kanana a sipo iele Iesu troa aloine la meci ne la nekö i eahlo, hnei nyidrëti hna pane thipetrije la sipo i eahlo. Ngo pine laka, hnei eahlo hna catre lapaun, matre hnei Iesu hna loi hni me aloine la meci ne la nekö i eahlo. (Mat. 15:22-28) Eje hi, ka loi hni Iesu, ame pe, nyidrëti fe a amekötin la itre hnei nyidrëti hna hnim. Ame lo Peteru a sewe Iesu troa kuca la aja i Iehova, hnei Iesu hna ameköti angeic qëmekene la itre xaa aposetolo. (Mar. 8:32, 33) Tha Iesu kö a thele troa thaipië Peteru. Nyidrëti pe a ini angeic me hmekëne la itre xaa aposetolo matre tha tro kö angatr a pi mama. Maine jë, hnei Peteru hna hmahma, ngo ame pe, nyine loi koi angeic. Ame la troa loi hni ke, ene la troa ithanata meköti kowe la itre hne së hna hnim. Tui Iesu, loi e tro sa nyitrepene la itre eamo hnene la Tusi Hmitrötr. w22.03 11 par. 12-13

Troa ole me atrunyi Iehova. (Sal. 34:1) Easa atrunyi Iehova ngöne la easa qaja koi itre xan la itre thiina i Nyidrë me itre hnei Nyidrëti hna kuca. Ngo tro sa kuca lai, e hetre hni ne ole së koi Iehova. Celë hi matre, loi e tro sa lapa mekun la ihnimi Nyidrë me itre hnei Nyidrëti hna kuca koi së. Jëne la huliwa ne cainöj, ijije hi tro sa tro fë koi Akötresie la itre “huuj ne iatruny, ene la wene ne la itre ineqë së.” Tune la easa thith, nyipiewekë tro sa pane lapa mekun la itre nyine tro sa qaja kowe la itre atr hne së hna cainöje kow. Easa ajane troa hamëne la ka sisitria ngöne la easa tro fë “la itre huuj ne iatruny.” Celë hi matre, easa madrin troa qaja koi itre xan la itre ini qaathei Iehova. w22.03 21 par. 8