Mec La Pun Koi Së Asë

PANE mekune jë la epuni a goeëne la ketre film ka amamane la ketre atr ka elo miuzik, nge ka hlemu. Maine jë epuni a ajane troa drei angeic e elo. Kola amamane lo ijine angeic a nekönatr, memine la aqane inin angeic troa elone la nöjei nyine kuci miuzik. Itre hawa hna xome hnei angeic matre maca troa elo miuzik. Thupene lai, kola amamane la angeic a elo, memine la itre nöj hnei angeic hna tro kow uti hë la angeic a hlemu e cailo fen. Tro ju pë hë la film, utihë la kola amamane la angeic a qatre trootro me mec.

Tha ifejicatre kö la hna amamane ngöne la film celë. Ngo, kolo pe a amamane la mele ne la ketre atr ka meci hë enehila. Ka elo miuzike ju hë, maine ka inamacan, maine ka kuci elo, maine ketre atr ka hlemu, ngo meci la pun koi angatr asë. Nyipici laka, nyimutre la itre ewekë hna atreine kuca hnene la atr. Ngo, maine tha qatre trootro ju angeic, me mec, nyimutre catre pala kö la itre ewekë hnei angeic hna troa kuca.

Eje hi laka, hace catr la hni së, e tro sa lapa mekun la pun ka troa traqa koi së. (Ate Cainöj 9:5) Kuca ju hë së la nöjei pengöne ewekë, ngo tro pala hi sa qatre trootro me mec. Ketre, maine tha hmeke kö së, canga tro hi sa eatr ngöne loto, nge maine jë troa thupatë la mele së, maine pena troa tithi së hnene la ketre mec ka pë nyin. Tune la hna qaja hnei Tusi Hmitrötr, ‘ceitu së me wene lepany ka mama enehila, nge ka troa canga patr.’—Iakobo 4:14.

Alanyimu la itre atr ka mekune ka hape, loi e tro pe sa ‘xeni me ij, ke ka tro asë hi sa meci elany.’ (1 Korinito 15:32) Ame koi angatr, pine laka, pëkö aliene la mel, nge ka hmaca të hi, haawe, pëkö mejiun kowe la itre drai elany. Ame la kola traqa la itre jol ka tru koi së, tro sa hnying ka hape, ‘Eje jë kö la mel? Nemene la pun koi së?’ Drei la ka troa sa la lue hnyinge celë?

Alanyimu enehila la itre ka mejiun kowe la itre ka kuci sias. Hnei angatr, me itre droketre hna öhne la itre ewekë ka aijijëne la atr troa mel aqeany. Nge, hetre itre xan ka ithel matre troa qea catr la hna mel. Hune ju hë angatr, maine tha eatre kö la aja i angatr, ngo casi pala hi la itre hnying: Pine nemene matre easa qatre trootro me mec? Tro kö a apatrene la mec elany? Ame ngöne la tane mekun ka troa xulu, tro sa ce ithanatane la itre mekune cili, me sa la hnying hna hape: Hapeu, mele së hi la?