Thangan La Itre Video Ka Anyipicin
1 “Hna nyiqaane goeëne hë hnene la nekö i nyiho trahmany la video, qaane lo nyën a nyiqaane tro. Nyën a anyimua goeën ej. Drei la elolon la troa hetrenyi la itre jiane huliwa ka troa akökötren la ihnimin la itre nekö së koi Iehova!” Nemene la video hna qaja hnene la keme me thin Keresiano celë? Ene hi lo video hna hape, Noé : il marchait avec Dieu. Hnene la ketre thin ka thaa temoë kö ka hetre nekön trahmany ka hane goeëne hë lo lai video ngöne la hnalapa ne la ketre atr, hna iupi fë kowe la Bethela la ketre manie nyine ahnahna, me hnyingën maine hetrenyi pala kö the së la itre xaa video thatraqai itre nekönatr. Hetre thangane catr kowe la itre nekönatr, me kowe mina fe la itre ka tru, la itre video hna kuca hnene la organizasio i Iehova.
2 Ngöne La Fami: Thupen la hna goeën hnene la ketre hnepe lapa, la video hna hape, La fermeté des Témoins de Jéhovah face à la persécution nazie, hnene la thin hna qaja ka hape: “Hnenge hna mekune pala hi ngöne la nöjei drai la aqane xatuan hnei Iehova la itre atr ka thaa nyipi kö matre troa xomihnin ahoean la itre akötr ka tru! Qa ngöne lai, eni a mekune hmaca la itre jol ka eje theng laka, ka pë pengön itre ej, hune la itre itupath hna melën hnene la itre xaa trejin. Hna xatuane la itre nekö hun troa trotrohnine hnyawa la enyipiewekëne la troa qale koi Iehova, hnene la hna ce goeëne me angatre la video celë. Thupene la hna ce goeën, me ce ithanatan me angatr la itre hna ce wang, haawe, hnei nyiho hna xatuan la itre nekö i nyiho jajiny, matre tro angatr a atreine cile kowe la itre itupath me iakötrë ka traqa koi angatr.”
3 Ngöne La Hna Ini: Ngöne la ketre rapor hna hamën hnene la ketre thöth Temoë, hnei angeic hna amaman, la ketre hnepe götran ne la video Fermeté kowe la itre sine ini angeic. Ame ngöne la qaan, hna qaja hnene lai ka hamë ini ka hape, ka xele angeic ma wang la Itretre Anyipici Iehova. Thupene la hna goeën lai video, öni angeic ka hape: “Saze hnyawa ha enehila la aqane mekuneng göne la Itretre Anyipici Iehova. Maine tro angatr elany a traqa troa fenafena la qëhnelö i eni, eni hi la a qaja koi epuni laka, tro ni a drei angatr me nyiqaan troa inin la Tusi Hmitrötr me angatr!” Hnauën laka, kola saze la aqane ujë i angeic koi së? Öni angeic ka hape, hnene laka, eje the së la “nyipi ihnim me inyipicikeu.”
4 Ngöne La Hna Cainöj Trootro: Hna cainöj hnene la ketre sör kowe la ketre föe ka luelue troa xom la itre itus, ngo hnei eahlo pe hna lapa fë la itre hnying göne la pengö së memin la itre ini hne së hna mejiune kow. Ene pe hna bëeke hmaca ju hnene la sör troa wang lai föe, nge hnei nyiidro hna xometrongën la video Les Témoins de Jéhovah : un nom, une organisation, nge hna ce goeën hnei sör memin lo lai föe me trahmanyi eahlo. Hna hai atraqatr hnene la lue trefën, nge nyidroti a ce kapa ju troa inin la Tusi Hmitrötr. Hetre thangan ka loi la hna anyipicin, ngöne laka, hnei nyidroti hna hane nyiqaan troa trongën la aja i Akötresie, ngöne la mele i nyidro.
5 Hane kö nyipunieti goeën me huliwan la itre video së, me thel troa kepe thangan ka loi qa ngön?