Les Témoins de Jéhovah : organisés pour proclamer la bonne nouvelle
Kola e enehila la 100 lao macatre ne ce huliwa la Itretre Anyipicine i Iehova göi troa cainöjëne la maca ka loi e cailo fen. Pëkö ketre huliwa ka sisitria ka tune lai, laka, kola qaja la maca cili ngöne la itre qene hlapa ka nyimutre, itre hadredre la etrun. Kola e la 230 nge sin la etrune la itre nöje hna cainöje ngön. (Mat. 24:14) Ngo pine nemene matre ka nyipi ewekë catre la huliwa cili? Nge tune ka la aqane trongene la huliwa cili e cailo fene hnengödrai? Kola sa hnene la video hna hape, Les Témoins de Jéhovah : organisés pour proclamer la bonne nouvelle, la itre hnyinge celë, me hamëne la itre igötranene ka nyimutre ne la itre huliwa e cailo fen. Thupene la hnei epuni hna goeëne la video, wange ju la itre hnyinge celë.
Tune ka la aqane akökötrene hnene la video celë la trotrohnine së memine la hni ne ole së kowe la (1) trenge catre hna kuca hnene la organizasio i Iehova matre troa cainöjëne la maca ka loi? (2 Tim. 4:2) (2) itre fami ne Bethela e cailo fen? (3) ini hna hamëne kowe la itre mesinare me itre qatre thup? (2 Tim. 2:2) (4) enyipiewekëne la troa nyiqane ngöne la nöjei drai troa goeëne la topik ne la drai, me hnëkëne la itre icasikeu ngöne la nöjei wiik? (Ite hu. 17:11) (5) itre manathith hne së hna kapa qa ngöne la hna sine la itre icasikeu i Keresiano? (Heb. 10:24, 25) (6) itre manathithi hne së hna troa kapa ngöne la kola acile elanyi la Paradraiso e celë fen? (Is. 11:9) (7) manathithi ka tru troa sine la huliwa ne menue laka, kolo pala hi a kökötre trootro?—Ioane 4:35.
Ketre jia ne huliwa ka lolo la video celë kowe la itre atr ka ajane troa atre la huliwa hna kuca e cailo fen hnene la Itretre Anyipicine i Iehova. (8) Eue la ijine tro nyipunieti a amamane la video kowe la itre ka ini Tusi Hmitrötr me nyipunie, me itre sinee maine itre xa atr pena? (9) Nemene la aqane ujë ka loi hnei nyipunieti hna öhne ngöne la kola amamane la video celë?
Ame la easa mekune hnyawa la itre ewekë hnei Iehova hna kuca enehila, tre, easa ce thawa la mekune ne la atre cinyihane la salamo, kola hape: “Iehova Akötesingöti fe, nyimute la nöjei huliwa i cilie nyine haine hnei cilieti hna kuca, me ite mekune i cilie koi hun ; tha nune qaja zizine koi cilie.” (Sal. 40:5) Epi tro sa xome hnyawa la video celë matre troa xatuane la itre xa atr troa akökötrene la hni ne ole i angatr koi Iehova me kowe la organizasio i Nyidrë!