Xome Jë La Itre Video Matre Troa Hamë Ini
1. Nemene la aqane inine Iehova la itre hlue i Nyidrëti ekö jëne la itre ewekë ka mama, nge nemene la thangane itre ej?
1 Hnei Iehova hna jëne la itre ewekë hna meköle goeën, memine la itre pu, matre troa hamën la itre ithuemacanyi ka tru. Pane meku Ezekiela jë së memine lo ewekë hnei angeic hna meköle goeën, ene lo ikariota i Iehova e koho hnengödrai. (Ezek. 1:1-28) Pane mekune jë fe së la pengö i Daniela, thupene lo hnei angeic hna kapa jëne la pu la itre hna perofetan thatraqane lo itre mus ka troa tro wengë. (Dan. 7:1-15, 28) Nge tune kaa Ioane aposetolo memine lo itre ewekë ka iaxoueny hna amamane koi angeic; kolo itre “hatren” ka troa traqa ngöne la “drai i Joxu”? (Hna Ama. 1:1, MN, 10,) Hnei Iehova hna inine la köni hlue i Nyidrë jëne la itre ceitun ka mama cil nge ka hetre emelen, ene pe thatreine kö tro angatr a thëthëhmine itre ej.
2. Nemene la itre jia ne huliwa nyine tro sa xome matre troa inine la nyipici ne la Tusi Hmitrötr?
2 Ame enehila, tre, ijije hi tro sa inine me ketr la hni ne la itre atr nge thaa tro kö angatr a thëthëhmine la itre ini, e hne së hna xome la itre kaset video troa hane amamai angatr. Jëne la itre topik ka nyimutre nge ka isa pengön, kola acatren la lapaune së kowe la Tusi Hmitrötr, me kowe la organizasio i Iehova, me kowe la itre trepene meköti ka eatrongën la mele ne la keresiano. Tro sa ce wange la aqane troa xome la itre xaa video, matre troa inine la itre atr.
3. Nemene la ixatua hne së hna kapa matre troa eatrongën la hnainin kowe la organizasio?
3 Ngöne La Huliwa Ne Cainöj: Ase fe kö epuni ithanatane memine la ka etid me epun, laka, lapa ka caa hae la itre trejine keresiano e cailo fen? Amama i angeice jë lo video hna hape, Toute la communauté des frères. Maine jë troa pane hamë angeic troa goeëne caasin qëmekene troa etid, maine pena troa ce goeëne pena ngöne la ijine kola etid. Thupene lai, ce ithanatane jë la itre hnying ka eje hnine la Huliwa Ne Baselaia ne Julai 2003.
4. Nemene la itre jiane huliwa ka lolo kowe la itre thöth temoë, nyine tro angatr a xom matre troa cainöj ngöne la hna ini?
4 Itre thöthi fe, maine hna nue ngöne uma ne ini epun troa hane amaman la itre video, tune kaa matre sipone hnei epuni kowe la atre ini troa goeën hnene la uma ne ini la itre video celë, La fermeté des Témoins de Jéhovah face à la persécution nazie maine Fidèles dans les épreuves—Les Témoins de Jéhovah en Union soviétique ? Maine tro epuni a hnëkëne thenge la itre hnying ka eje hnine la Huliwa Ne Baselaia ne Juun 2001 me Febuare 2003, haawe, ijije hi troa eköthe hnyawa la itre hnying me nyitrepene hnene itre ej la porotrike elanyi memine la uma ne ini.
5. Nemene la nyine troa xome hnene la itre keme me thin ngöne la angatr a ini tusi ne la fami?
5 Memine La Fami Me Itre Sinee: Itre keme me thin, ma itre ka tru hë la itre nekö i epun, qaane lo kola xötrei amamane ekö lo kaset Les jeunes s’interrogent . . . Comment se faire de vrais amis ? Tune kaa matre pane ce wange hmaca me ce ithanatane me angatr ngöne la kola ini tusi ne la fami? Ijije hi troa ce ithanatane hnyawa hmaca jëne la itre hnying ka eje hnine la Huliwa Ne Baselaia ne Eiperem 2002.
6. Nemene la itre xaa ijine ka ijije koi së troa huliwan la itre kaset video së?
6 Itre Xaa Ijine Ka Ijij: Tune kaa la aqane troa xome hnyawa la itre xaa kaset video së? Maine troa hane amamane la caas maine luetre kowe la ketre atr hne së hna wange lapaan, hapeu, tro jë kö lai a xatua angeic troa kökötr ngöne la ua? Ijije kö tro sa hane amamane la itre kaset video së ngöne la itre uma thatraqane la itre qatr? Hapeue la aliene itre ej, tro jë kö a hane xatuane la itre sinee ka thaa hmi kö, me itre ka lapa ezi së maine itre sine huliwa së pena matre tro angatr a hane wanga aloine la Itretre Anyipici Iehova? Ka lolo catr la itre kaset video së, tre, itre ewekë ka mama cil, nyine ini koi së nge ka hetre thangane catr. Xome jë itre ej matre troa hamë ini.