La Wesi Ula Ne La Baselaia—Trotrohnine La Alien’ej
1 Ngöne la ceitune i nyidrë, ene lo atre traan, ke, hnei Iesu hna qaja ka hape ame la itre itine ka mala hune “la hnadro ka loi,” ke, hna aceitunëne memine “la ate denge la wesi ula, me trotrohnin.” (Mata. 13:23) Thupene la hna qatixenyëne hnyawa la itre ithuemacanyi ne la Baselaia, hapeu, hetrenyi fe kö the së la “trotrohnin?” Nemene hë la thangan’eje kowe la mele së? Hne së kö hna amë panëne la itre huliwa ne la Baselaia, nyine amamane ka hape trotrohnine hnyawa ha së la aliene la maca?
2 Nyipiewekë troa isa inine hnyawa la Tusi Hmitrötre e maine easë a ajane troa hetrenyi la nyipi atrehmekun. Loi e tro së a ami ijine matre troa pane mekune kowe la xeni ne ua hna hamën. Hna aceitunëne la troa saqe e La Tour de Garde memine la troa saqe xeni la ketre xeni ka hnyapa, nge ka loi thatraqane la ngönetrei. Hapeu, epuni kö a ami ijine troa pane e, me nyipiine la xeni ne ua? E pi tro fe së a hane kepe thangane ka loi, ke, loi e troa hetre aja ngöne la ua, ka tro lai a upi së troa trongën’ej. Ngo e maine tha catre kö së kowe la itre ewekë celë, kösë easë hi lai a xom’acone la itre manathithi hne së hna troa kapa qa ngöne la hna isa ini tus, ketre mina fe traeme së lai hna aluzin. Tha ka hmaloi kö e troa amë hutine la ketre porogarame ne ini. Maine nyipici laka troa hetre wangatrehmekune kowe la itre nyipi huliwa, ngo ame pe, ke, sisitria catre kö e troa hetrenyi la trengamo ngöne la ua.—Ite Edom. 3:13-18; Kol. 1:27.
3 Troa jilapa la itre mekune së göi Baselaia e hne së hna goeëne lapaane e nöjei drai la sine boroshür, ene Scrutons les Ecritures. Ame la angetre “hetre aja ewekë ngöne la u,” (NW) ke, hnei angatre hna xome la itre menetre ka hohopatre e nöjei drai troa e la mekene tus, memine la hna qejepengön. (Mata. 5:3) Nyimu mekene tusi ka qejepengöne la itre pengöne ka kösau ne la Baselaia. Ketre ceitun, ame lo 22 Nofeba, 1994, ke, kola fejane lo mekene tusi ngöne Mataio 13:4. Kola qejepengöne la mejiune ne la Baselaia, nge kola amekunë së la ethanyine la troa ce elo memine la itre sine së, maine itre ka lapa ezi së, itre ka tha hmi kö. Ame ngöne la itre Bethela ne fene hnengödrai asë, ke, 15 lao menetre hna hnëkëne thatraqane la troa ce wange la topike ne la drai, e nöjei hmakany, kolo lai a amamane hnyawaane la itre eloin, memine la enyipiewekëne la troa ce wange la topike ne la drai. Hapeu, eje fe kö thei epuni me fami epuni la hna majemine celë?
4 E tru la aja i epuni kowe la Baselaia, ke, tro fe a atraqatre la aja i epuni troa cainöjëne la maca ne la Baselaia koi itre xan. Hna aceitunëne la hna hamëne hnene La Tour de Garde, me Réveillez-vous! memine la ketre ewekë ka enijëne la mekune së, nge ka akökötren’eje hnene la itre mekune ka hnyipixe. Itr’ej’a xatua së troa hmek, me lapa mekune la enyipiewekëne la Baselaia kowe la fen. Itr’ej’a xatua së troa itre atr ne u, ka “hetenyi hë la mekuana i Keriso.” (1 Kor. 2:15, 16) Tro asë hi la itre ewekë celë a acatrene la mejiune së, me atrune la aja së troa cainöjëne la mejiune ne la Baselaia koi itre xan.—1 Pet. 3:15.
5 Ka sisitria catre la tro së isa alacasi a trotrohnine la aliene la maca ne la Baselaia. Baselaia la hnei Akötresieti hna hnëkëne nyine sajuëne la musi Nyidrë, me apatrene la ngazo, me hamëne la fene hnengödrai ka hnyipixe—ene la paradraiso. Hnei Iesu hna upi së troa amë panën’eje ngöne la mele së. Tro së a ceitu me itre mamoe matre troa mele fene la musi nyidrë. (Mata. 6:10, 33) Loi e tro epuni a catre trongëne la itre ewekë celë, drei la manathithi ka tru tro epuni a kapa ka tune lai.