Porogaram Ne La Fami—Topik Ne La Drai
1 Kola catre thele ngöne la nöjei drai hnene la itre keme me thin ka ihnim, troa hnëkëne la itre göxeni ka lolo thatraqane la itre nekö i angatr. Ngo ka nyipi ewekë catre kö troa hamëne koi angatr la xeni ngöne la götrane la ua hna xome qa hnine la Tusi Hmitrötr. (Mat. 4:4) Ame la ketre aqane tro epuni a xatuane la itre nekö i epun troa hetrenyi la ajan troa xome la göxeni ne la ua me troa “kököt . . . mate mel,” tre, ene la troa ami ijine ngöne la nöjei drai troa ce wang hnene la fami la topik ne la drai. (1 Pet. 2:2) Ame ngöne la porogarame ne la fami i epun, eu la tro epuni a ce wange la topik ne la drai?
2 Ngöne Lo Itre Ijine Ce Xen: Maine tro epuni a nyiqaane la drai me ce wange la topik, tro ha xatua epuni memine la fami i epun troa lapa meku Iehova ngöne la drai ka pexej. (Sal. 16:8) Hnene la ketre thine hna mekune troa e me ithanatane memine la nekö i eahlo trahmany la topik me itre mekunen, ngöne la eahlo a iji tri me ce thithi me angeic qëmekene troa tro troa ini. Celë hi ka acatrene la lapaune i angeic matre thaa tro kö a pi isi pi nöj, nge troa thipetrije la itre itupathi troa kuci ngazo, nge troa catre cainöj kowe la itre sine ini me itre ka ini angatr. Ngacama angeice hmekuje hi la temoë ngöne la uma ne ini i angeic, ngo thaa hnei angeice kö hna xou.
3 Maine thaa ijije kö troa ithanatane la topik ngöne la hmakany, maine jë ce wange ju pena memine la fami matre troa kuca e heji lapa ngöne lo ijine kola xeni hej. Ame itre xan, tre, angatre fe a hane ithanatane ngöne la heji cili la itre ewekë hna melën hnene la itre trejine ngöne la hna cainöje trootro, me itre xaa mekun hna xome qa ngöne la hna ketre e la Tusi Hmitrötre ngöne la ijine cili. Nyimutre la itre ka mekune hmaca lo itre ijine angatr a xeni hej me ce thawa la itre xaa hnepe hawa ka lolo troa porotrik.
4 E Jidr: Ame kowe la itre xaa fami, tre, ame la traem ka sisitria troa e la topik ne la drai, ke ngöne lo qëmekene troa meköl e jidr. Ka lolo mina fe la ijine cili, ke ijije hi troa ce thith. Pine laka kola drenge o drai hnene la itre nekönatr la epuni a qeje Iehova me thithi koi Nyidrë, haawe, ame hë koi angatr ke ka mele Nyidrë ngacama thaa öhnyi Nyidrëti kö hne së.
5 Epi tro Iehova a amanathithin la trenge catr hnei epuni hna kuca matre troa inine me acatren la nyipici thene la itre nekö i epun, ngöne la epuni a wange hnyawa pala hi la topik ne la drai hna hape, Examinons les Écritures chaque jour.