Loi e Tro Asë Hi Së a Caas
1 Aija haine së la elolone la aqane xupe la ngönetrei së? (Sal. 139:14) Kola ce huliwa hnene la itre götrane asë ne la ngönetrei. Kola aceitunën hnene la Wesi Ula i Akötresie la ekalesia i Keresiano, memine la elolone la aqane caasin la itre götran ne la ngönetrei. Fene la He, ene Keriso, ame asë hi la itre atren la ekalesia, hna ‘itratraunekeune hnyawa, nge hna itöne hnyawa, hnene la nöjei enone itön’ asë.’ (Efe. 4:16a) Qa ngöne lai, thaa jole kö koi Iehova troa upe la itre atren la nöje i Nyidrë ka caas, matre troa kuca la itre ewekë ka lolo catr.
2 Ame la itre atren la itre ekalesia ekö ngöne lo hneijine i Iesu, angatr a huliwa “ce hni” ngöne la angatr a thel troa thupën la itre aja ne la itre xan, ngöne la götrane la ua me ngöne la götrane la ngönetrei. (Ite Huliwa 2:44-47) Jëne la ixatua i Iehova, hnei angatr hna caas troa qëmek, me cil kowe la itre iakötrë ka tru catr. (Ite Huliwa 4:24-31) Hnei angatr hna qaja trongën la maca ne Baselaia, ngöne la nöjei götran hnei angatr hna tro kow, me hane cainöjëne fe la maca ka loi ngöne la itre götran hna atre ngöne la ijine cili. (Kol. 1:23) Ame ngöne la hneijine së enehila, hna caasi mina fe la itre ekalesia i Keresiano troa hane cainöjën la maca ka loi ngöne la fene hnengödrai asë. Nemen la itre ewekë ka aijijë së troa caas ngöne la itre ewekë cili?
3 Hna Ketri Së Hnene La Ini Qaathei Akötresie: Hna acaasi së e cailo fen asë hnene la hmi së. Hna tune kaa matre kola hetrenyi la caasi the së asë? Hnene laka, easë a wangatrehmekun me kapa la jën hnei Iehova hna xom, matre troa hamën la “xeni ngöne la nyipi ijin” ngöne la götrane la ua. (Mat. 24:45) Easë mina fe a madrin la “itre atr nyine ahnahna” hna hamën kowe la ekalesia, matre troa hamën la ini. Nge hnene laka, easë a kapa cememin la ipië la itre hna amekötin hnei Iehova troa ithua së ngöne la ua, haawe, kola kökötr la trotrohnine së ngöne la Wesi Ula i Akötresie, nge kola upi së troa xom la tulu i Iesu me itretre drei Nyidrë. Loi e tro fe së a catre inin la Wesi Ula i Akötresie, me thele ielen troa “traqa kowe la ce hni ngöne la lapaun.” (Efe. 4:8, 11-13) Hapeu, epuni kö a hane kuca matre troa hetrenyi la caas ngöne la götrane la ua, hnene la troa e pala hi ngöne la nöjei drai la Tusi Hmitrötr?
4 Caas Hnene La Aqane Ce Mele Së Itre Keresiano: Kola aijijë së asë hnene la ihnim, troa acatren la aqane imelekeu së ngöne la itre icasikeu i Keresiano. Ame ngöne la itre ijine icasikeu cili, tre, easë a “imekunekeun.” (Heb. 10:24, 25) Kola aijijë së tro sa atrepengöne hnyawa la itre trejin me easë, thaa tro kö a hmaca ju hi ngöne la itre hna öhne hnei lue mek, ngo troa goeë angatr ceitune memine la aqane goeë angatr hnei Iehova, laka, ka sisitria catr angatr koi Nyidrë. (Hag. 2:7) Maine tro sa drenge hnyawa la angatr a qaja amaman la lapaune i angatr, eje hi lai, laka, tro ha kökötr e kuhu hni së la ihnim, nge troa acatrene mina fe la aqane caasi së me angatr. Hapeu, atre epuni kö hnene la itre atr, tune la ketre atr ka sin pala hi la itre icasikeu ne la ekalesia?
5 Itretre Ce Cainöje Me Easë: Ame la easë a ce tro fë la maca ka loi memine la itre trejin me easë, kolo lai a acaasi së troa kuca la aja i Akötresie. Atraqatr la ihnimi Paulo aposetolo kowe la itretre “ce huliwa me [nyidrë] ngöne la baselaia i Akötresie.” (Kol. 4:11) Maine tro së a iqajakeun la itre thangan ka lolo hne së hna kapa ngöne la hne së hna cainöje trootro, me ixatuanekeun la itre ejolen la huliwa cili, eje hi lai laka, ketre ixatua ka lolo lai koi së, matre tro së a kuca la hnëqa së itre Keresiano, me nyi ecatren la itre otren ka iacaasi së.—Kol. 3:14.
6 Kola Acaasi Së Hnene La Uati Hmitrötr: Maine tro sa isa kuca hnyawa la aja i Iehova, eje hi lai laka, tro hë Nyidrëti a amanathithi së jën la Uati Hmitrötre i Nyidrë. Ej a xatua së troa atreine elë hun la itre ihmönyinyi e hnine la ekalesia, me xatua së tro pala hi së a caas. (Sal. 133:1) Ej a upi së troa “xölehuj la ce hni qa thene la Ua ngöne la hna otene la iloi.” (Efe. 4:3) Loi e tro asë hi së isa ala caas a thel troa akökötren la caas e hnine la nöje i Akötresie, hnene la troa eën pala hi la itre wene ne la ua, ngöne la easë a ce mel memine la itre trejin me easë.—Gal. 5:22, 23.
7 Maine tro së a caas ngöne la aqane tro së a ce nyihlue i Akötresie, me ce huliwa fene la musi Keriso, haawe, troa hetre thangane lai, ngöne laka, “kola tru jë la ngönetrei matre adraiëne ngöne la ihnim.” (Efe. 4:16b) Ketre, kola atrunyi Iehova, ene la “Akötresie trene tingeting.”—Rom. 16:20.