Aqane Troa Hetre Hni Ne Ole Kowe La Ahnahna Ka Tru Qaathei Akötresie
1. Pine nemene matre loi e tro sa hetre hni ne ole koi Iehova?
1 Hetrenyi la ketre ahnahna ka sisitria catr hune la nöjei ‘ahnahna ka loi’ hna hamëne hnei Iehova; kola qaja la thupene mel hna hamën hnene la Hupuna i Nyidrë. (Iako. 1:17) Nyimutre la itre manathithi hna kapa jëne ej, tune la troa senge la itre ngazo së. (Efe. 1:7) Celë hi kepin matre loi e tro pala hi sa hetre hni ne ole. Ame ngöne la hneijin ne la Drai Ne Amekunën, easë hi lai a xomi ijine troa mekune thele la ahnahna cili ka sisitria.
2. Tune kaa la aqane tro së isa ala caas, memine la hnepe lapa së a akökötrene la hni ne ole së kowe la thupene mel?
2 Aqane Tro Sa Akökötrene La Hni Ne Ole Së: Ame ngöne la itre wiik qëmekene troa atrune la Drai Ne Amekunën e drai 30 Maac, tre, hapeue matre tro sa akökötrene la hni ne ole ne la hnepe lapa së, hnene la hna xomi ijin ngöne la Hmi Ne La Hnepe Lapa troa wange hmaca la itre ithuemacany göne la thupene mel? Nge loi e tro sa ce e memine la hnepe lapa së la itre xötr ne la Tusi Hmitrötr thatraqane la Drai Ne Amekunën. Isa mekune jë së la itre thangane ka loi hne së hna kapa jëne la thupene mel, memine la thangane lai ngöne la aqane goeë Iehova hne së, me aqane sipu goeë së kö, me aqane goeë itre xaa atr, me aqane goeëne së la itre drai elany. Ketre, tro hë së a kepe eloin qa ngöne la hna catre thinge la itre nyima ka hnyipixe thatraqane la Drai Ne Amekunën, ene la lue nyima ka hnyipixe 8 me 109.—Sal. 77:12.
3. Tro sa amamane tune kaa la hni ne ole së?
3 Aqane Tro Sa Amamane La Hni Ne Ole Së: Kola uku së hnene la hni ne ole së kowe la thupene mel, troa qeje Iehova kowe la itre xan, memine la ihnimi ka tru i Nyidrë ngöne la Nyidrëti a upe la Hupuna i Nyidrë. (Sal. 145:2-7) Ame ngöne la itre treu Maac me Eiperem me Mei, hetrenyi la itre xaa fami ka amamane la hni ne ole i angatr hnene la hna ce thë hnyawa hnene la itre atrene matre tro la ketre a pionie ka ixatua. Maine thaa ijije kö troa xom la huliwa ne pionie, hapeu, ijije kö tro sa ‘anyipiewekëne la nöjei ijin’ hnene la hna akökötrene la aqane cainöje së? (Efe. 5:16) Tro mina fe la hni ne ole së a upi së troa xatuane la itre xan troa hane ce sine me easë la Drai Ne Amekunën. (Hna ama. 22:17) Nyiqaane fejane wengëne jë la itre atr hne së hna troa könën, tune lo itre vizit me itre hnainin, me itre sinee me itre sine huliwa memine lo itre atr ka lapa ezi së; nge thupene lai, catre jë troa xome la huliwa ka ketrepengön nyine ihë göi Drai Ne Amekunën.
4. Nemene la aqane tro sa huliwan inamacanën la hneijin ne la Drai Ne Amekunën?
4 Kola aijijë së ngöne la hneijin ne la Drai Ne Amekunën troa amamane koi Iehova la ejuine la hni ne ole së kowe la ahnahna hnei Nyidrëti hna hamëne kowe la nöjei atr asë. Epi tro sa huliwane hnyawa la ijine cili matre troa akökötrene me amamane la hni ne ole së kowe la thupene mel memine la nöjei “tenge nyi Keriso ka tha simana kö.”—Efe. 3:8.