Huliwa Ka Sisitria Catr
1. Nemene la itre ewekë hna upi së troa huujën hnene la ejuine la hni ne ole së kowe la huliwa ne cainöj?
1 Pine nemen matre kolo pala hi a ithuecatre koi së troa nue la traeme së me trenge catre së me itre mo së, thatraqane la huliwa ne cainöj? Pine laka pëkö ketre huliwa ka sisitria hune la huliwa cili! Maine tro sa mekune hnyawa la itre thangane la huliwa cili, tro ha kökötre e kuhu hni së la aja troa catre xome pala hi la huliwa cili; ketre huliwa hna thaa tro hmaca kö a kuca elany.—Ite hu. 20:24.
2. Kola xatua së tune kaa hnene la huliwa ne cainöj troa ahmitrötrëne la atresiwa i Iehova ka sisitria?
2 Ka Ahmitrötrëne La Atresiwa i Iehova: Kola wanga atrune hnene la huliwa ne cainöj, laka, tro la Baselaia i Iehova hna cilën hnei Keriso Iesu, a nyihnane la nöjei musi ne la itre atr me nyinyine asë la itre jole ka eje ngöne la fene hnengödrai. (Mat. 6:9, 10) Kola atrunyi Iehova hnene laka Nyidrëti hmekuje hi la ka ijij troa thepe së qa ngöne la ngazo me mec. (Is. 25:8; 33:24) Pine laka easa xome la atresiwa i Nyidrë, maine jë tro la itre xaa atr a atrunyi Nyidrë hnene la hna goeëne la aqane ujë së ka lolo me aqane catre së. (1 Pet. 2:12) Drei la madrine së troa ahlemune e cailo fen la atresiwa i Iehova, ene la Joxu Ka Pucatin Asë!—Sal. 83:18.
3. Nemene la itre manathithi hna troa hetrenyi hnene la itre atr ka kapa la maca ne la Baselaia?
3 Ka Hamë Mel: “Tha ajane kö [Iehova] tro kete at a hnëjin, loi pe tro angat’ asëjëihë a ietra.” (2 Pet. 3:9) Ngo maine pëkö atr ka ini angatr, tro angatr a atre tune kaa la mekuna i Iehova göne la thiina ka meköt maine ka thaa meköti kö? (Iona 4:11; Rom. 10:13-15) Ame la kola kapa la maca ka loi hnene la itre atr, kola lolo la mele i angatr, ke angatr a nuetrije la itre huliwa ka ngazo hna majemine kuca. (Mika 4:1-4) Ketre, hetrenyi fe angatr la mejiun, ene la troa kapa la mele ka thaa ase palua kö. Jëne iamele koi së memine la itre atr ka drei së, ene la troa catre cainöj me hamë ini. (1 Tim. 4:16) Drei la ketre manathithi ka tru hna hamë së troa hane xome la huliwa ka sisitria celë!
4. Pine nemene matre loi e tro sa catre xome la huliwa ne cainöjëne la Baselaia me inine la itre atr?
4 Easenyi hë tro la akötr atraqatr a nyipune la fene celë ka thaa meköti kö. Tro ha mele la itre atr ka isi göli Iehova. Haawe, huliwa ka sisitria catr nge ka hetre thangan la huliwa hna kuca enehila, ene la troa cainöj me inine la itre atr. Epi tro sa catre amë panën ej ngöne la mele së!—Mat. 6:33.