Tro La Itre Xan a Xomi Ini Tune Kaa Qa Ngöne La Hna Goeë Nyipunie?
1. Nemene la itre ini hna xom hnene la itretre drei Iesu qa ngöne la hnei angatr hna goeë nyidrë?
1 Hnei Iesu hna qaja, ka hape: “Xomejë la nyine isilikeunge hui nyipunie me inine theng.” (Mat. 11:29, ith.) Kola mama hnyawa e celë, laka, thaa hnei Iesu hmekuje kö hna inine la itre xaa atr hnene la trenge ewekë i nyidrë, ngo hnene mina fe la hna amamai tulu ka lolo. Pane mekune jë së la itre ini hna xome hnene la itretre dreng qa ngöne la hna goeë Iesu. Ketre atr ka thiina ka loi nyidrë, me menyik me ihnim. (Mat. 8:1-3; Mar. 6:30-34) Eje thei nyidrë la hni ka ipië. (Ioane 13:2-5) Pine laka hnene la itretre dreng hna ce tro me Iesu troa cainöj, ene pe hnei angatre hna öhne laka, ketre atr ka catre huliwa nyidrë me ka maca troa inine la nyipici kowe la itre atr. (Luka 8:1; 21:37, 38) Troa ketr tune kaa la itre xaa atr hnene la hna goeë së e cainöj?
2. Tro la aqane heetre së me aqane ujë së ka lolo a ketr tune kaa la itre atr hne së hna cainöje kow?
2 Itre Atr Hna Cainöje Kow: Troa hetre thangane thene la itre atr ka drei së, la aqane heetre së cememine la qahmihmi, me itre thiina së ka loi, memine la aqane wanga atrunyi angatr hne së. (2 Kor. 6:3; Fil. 1:27) Angatr a goeëne la aqane xome lapaane së la Tusi Hmitrötr. Hetrenyi la itre xan ka hain, laka, easa drei angatre hnyawa e ithanata. Haawe, thaa tro pi kö sa thëthëhmin laka, ijije tro la aqane amamai tulu ka lolo së ngöne la itre götrane cili, a ea la itre atr kowe la maca ne la Baselaia.
3. Nemene la thangane la huliwa së kowe la itre trejine me easë?
3 Itre Trejine Me Easë: Pane mekune jë fe së la thangane la aqane huliwa së kowe la itre trejine me easë. Ka ixötrekeu la aqane catre së ngöne la huliwa ne cainöj. Tune la kola idrei la fao hnei fao, e tro sa hnëkëne hnyawa la aqane nyiqaane ithanata së, tro lai a xatuane la itre xaa trejin troa amacane la aqane tro angatr a cainöj. (Ite edomë 27:17) Maine hne së hna fejane hnyawa la ëje ne la itre atr ka hetre hni ka ajan me canga bëeke hmaca troa wai angatr, tre, tro hë lai a ukune la itre xan troa hane ujë tune lai. Maine tro sa catre xome hnyawa la huliwa ne cainöje së, haawe, tro hë lai a hetre thangane ka loi thene la itre trejine ka ce huliwa me easë.—2 Tim. 4:5.
4. Pine nemene matre loi e tro sa isa waipengöne hnyawa la tulu së o drai?
4 Tune kaa matre troa pane isa waipengöne hnyawa la aqane ujë së me aqane ithanata së o drai, memine la aqane troa ketr la itre xan hnene la tulu së? Tro ha amadrinë Iehova hnene la tulu ka lolo hne së hna amë, nge ijije hë tro sa qaja tui Paulo, ka hape: “Nyitupu ni jë nyipunie, tunge koi Keriso.”—1 Kor. 11:1.