Aqane Troa Inine La Itre Atr Ka Xötrei Atre La Nyipici Troa Cainöj
1. Tune kaa nyipunieti kö ngöne lo nyipunieti a xötrei xome la huliwa ne cainöj?
1 Hapeu, mekune pala hi nyipunieti lo ijine nyipunieti a xötrei xome la huliwa ne cainöj ngöne la itre hnalapa trootro? Maine jë ka xou catre nyipunieti ekö. Maine hnei nyipunieti hna ce cainöj memine la atre hamë ini koi nyipunie maine ketre atre cainöje pena, eje hi laka, tro ha atraqatr la madrine i nyipunie troa kapa la ixatua qaathei angeic. Ame enehila, maca ha nyipunie troa cainöj, nge ijiji nyipunieti hë troa hane xatuane me inine la itre atr ka xötrei atre la nyipici troa hane cainöj.
2. Nemene la nyine troa inine hnene la itre ka xötrei cainöj?
2 Nyipi ewekë troa inine hnene la itre ka xötrei cainöj la aqane troa nyiqaane la porotrik memine la ketre atrene la hnalapa, me xome la Tusi Hmitrötr me iwai hmaca, me nyiqaane me xomiujine la itre ini Tusi Hmitrötr. Loi e tro mina fe angatr a inine la itre xaa aqane cainöj, tune la troa cainöj e cahu gojeny memine la troa wange la itre atr ngöne la hnei angatre hna huliwa. Loi e tro nyipunieti a xatua angatr troa maca ngöne la itre götrane cili, hnene la hna amamai tulu ka lolo me hane hamëne koi angatr la itre mekune nyine ixatua.
3. Tro nyipunieti a xatuane tune kaa la itre xaa atr hnene la tulu i nyipunie?
3 Ini Angatre Jë Hnene La Tulu i Nyipunie: Hnei Iesu hna amamane kowe la itretre drei nyidrë la aqane troa cainöj. (Luka 8:1; 1 Pet. 2:21) Ame ngöne la nyipunieti a isa pui memine la ketre atr ka xötrei cainöj, loi e tro nyipunieti a hnëkëne hnyawa la ketre aqane nyiqaane ithanata ka hmaloi hi troa qaja, nge ijiji angeice troa nyitipun; maine jë tro nyipunieti a xome la ketre aqane nyiqaane ithanata ka eje e hnine la itre itusi së. Thupene lai, fenafena jë la pane qëhnelö me hnaaluen matre tro la atre cainöj a drenge la hnei nyipunieti hna qaja. Maine ase hë nyipunieti ithanata ngöne la ketre qëhnelö, ijije hi tro nyipunieti a hnyingëne la mekuna i angeic la kepine matre kola hetre thangane ka loi la aqane nyiqaane ithanata i nyipunie. Tro hë angeice a öhne la enyipiewekëne la troa ce huliwa memine la itre xan ngöne la hna cainöj, nge tro ha hmaloi koi angeice troa kapa la itre mekune nyine ixatua hna hamën thupene la hnei angeice hna kuca la aqane nyiqaane ithanata i angeic.
4. Thupene la hnei nyipunieti hna drenge la aqane nyiqaane ithanata ne la ketre atr ka xötrei cainöj, tune kaa la aqane tro nyipunieti a xatua angeic?
4 Hamëne Jë La Itre Mekune Nyine Ixatua: Hnei Iesu mina fe hna hamëne kowe la itretre drei nyidrë la itre hna amekötin göne la aqane troa cainöj. (Mat. 10:5-14) Ijije fe tro nyipunieti a ujë tune lai matre troa xatuane la ketre atr ka xötrei cainöj. Maine angeice pena la ka troa ithanata, loi e tro nyipunieti a drenge hnyawa. Nge thupene la epon a nue lai atr, qaja aloinyi angeice jë cememine la hni ka nyipici, ngacama hetre itre xaa ewekë nyine amacane ngöne la aqane nyiqaane ithanata i angeic. Qëmekene troa hamë angeice la ketre mekune nyine ixatua, maine jë loi e troa pane goeëne maine tro jë kö angeice a amacane la trenge ewekë i angeic ngöne la ketre hnalapa. Maine jë hnene hi laka angeic a xou. Ketre, loi e troa lapa mekune laka, thaa ceitun asë kö la itre hna atreine kuca hnene la itretre cainöj, nge ame e itre xaa ijin, thaa caa aqane kuca kö.—1 Kor. 12:4-7.
5. Nemene la nyine tro nyipunieti a qaja ngöne la nyipunieti a thele troa hamë mekune nyine ixatua?
5 Ame e itre xaa ijin, tro la ka xötrei cainöj a sipone koi nyipunie la itre xaa mekune nyine ixatua. Ngo maine thaa sipo ixatua kö angeic, thele jë troa xatua angeic. Tune kaa la aqane troa ujë tune lai cememine la thiina ka menyik? Hetrenyi la itre xaa trejine ka maca ka nango isa hnyinge, ka hape, “Ijije kö tro ni a hamë eö la ketre mekune nyine ixatua?” maine pena, “Tune kaa la mekuna i eö, ka loi hi lai?” Hanawange la ketre aqane troa ithanata, “Ame lo eni a xötrei cainöj, tre, ketre itupathi koi ni . . . , ngo hnenge hna öhne laka ketre ixatua lai koi ni. . . . ” Ame itre xaa ijin, ka lolo catre la troa ce wange la itus Comment raisonner. Loi e tro nyipunieti a thupëne matre thaa tro kö a tru menu pala ha hnei mekune nyine ixatua; maine jë tro hi a xatua angeice ngöne la caa götrane hi ne la aqane nyiqaane ithanata i angeic.
6. Ame ngöne la huliwa ne cainöj, nemene la aliene la hna hape, ‘idrei la fao hnei fao’?
6 Idrei Kö La Fao Hnei Fao: Hnei Paulo hna ithuecatre koi Timoteo ketre atre cainöj ka maca, troa catre ini me thele pala hi troa kökötre ngöne la götrane la ua. (1 Tim. 4:13, 15) Ngacama nyimu macatre ne nyipunieti ha cainöj, ngo loi e tro pala hi nyipunieti a thele troa maca ngöne la aqane troa cainöje trootro. Ngacama thaa ka maca hnyawa pala kö nyipunie troa hane cainöj, ngo catre jë troa xomi ini qaathene la itre trejine ka ce cainöj me nyipunie, ene mina fe lo itre ka thaa maca hnyawa petre kö; ketre, loi e troa hmekën troa canga hane xatuane la itre ka xötrei cainöj cememine la thiina ka menyik matre tro angatr a itre hlue ka maca troa cainöjëne la maca ka loi.—Ite edomë 27:17.