Hna Fejane La Itre Zonale Së Matre Troa Ketr La Ka Ala Nyim
1. Tune kaa la aqane nyitipu Paulo aposetolo hnene la hlue ka nyipici me ka inamacan?
1 Hnei Paulo hna xome la nöjei pengöne aqane troa tro fë la maca ka loi, matre troa ketr “la nöjei ate asë;” ketre tune mina fe, kola xome hnene la hlue ka nyipici me ka inamacan la itre zonale së, matre troa ketr la itre atr ka isapengöne aqane mel, me aqane hmi. (1 Kor. 9:22, 23) Hawe, tro hë sa huliwane hnyawa la itre zonal La Tour de Garde me Réveillez-vous !, e hne së hna pane mekune hnyawa la itre aja ka eje thene la itre atr, me wange la ka ihmeku me angatr.
2. Hna fejane la zonal Réveillez-vous ! thatraqai drei?
2 Réveillez-vous !: Ame la zonale celë, tre, hna fejane thatraqane la itre atr ka tune lo itre hna cainöje kow hnei Paulo, ene lo “angete Athenia.” (Ite hu. 17:22) Tha hna inine kö la itre atr cili ngöne la hmi Keresiano, celë hi matre tha nyipi trotrohnine hnyawa kö angatr la itre Hna Cinyihan. Ketre tune mina fe, hna fejane la zonal Réveillez-vous ! thatraqane la itre atr ka thatre hnyawa kö la Tusi Hmitrötr. Maine jë thatre kö angatr la itre ini i Keriso, maine pena tha mejiune kö angatre kowe la hmi, maine pena tha öhne kö angatr la enyipiewekëne la Tusi Hmitrötr. Ame la pane aja hna thele troa eatrën hnene la zonal Réveillez-vous !, tre, ene la troa akökötrene e kuhu hni ne la itre atr, la mekune celë ene laka ka mele la nyipi Akötresie. Ketre, eje fe a thele troa acatrenene la lapaune i angatr kowe la Tusi Hmitrötr, me xatua angatr troa trotrohnine hnyawa laka, ka isapengöne kö la Itretre Anyipicine i Iehova memine la itre xa hmi.
3. Hna fejane koi drei la lue hna cinyihan ne La Tour de Garde?
3 La Tour de Garde: Ame la La Tour de Garde koi nöjei atr, tre, hna fejane thatraqane la itre ka metrötrë Akötresie memine la itre Hna Cinyihan. Hetrenyi angatr la wangatrehmekun qa hnine la Tusi Hmitrötr, ngo tha nyipi trotrohnine hnyawa kö angatr la itre ini hnene eje hna hamën. Ceitui angatr memine lo itre atr hnei Paulo hna ithanata kow me hëne ka hape, itre ka “qoue Akötesie.” (Ite hu. 13:14-16) Ame La Tour de Garde nyine troa ce ithanatane ngöne la ini ne la Ita Ne Thup, tre, hna pane fejane ej thatraqane la Itretre Anyipicine i Iehova. Hnei Paulo hna cinyihane la itre tusi nyidrë thatraqane la itre atr ka atre hnyawa ha la itre Hna Cinyihan, me ka hetrenyi la nyipi wangatrehmekun ne la nyipici. (1 Kor. 1:1, 2) Ketre tune mina fe, hna cinyihane la zonal cili kowe la itre atr ka sine hë la itre icasikeu së, nge ka atre fe hë la itre hnëewekë hna majemine xome hnene la Itretre Anyipicine i Iehova.
4. Pine nemene matre nyipi ewekë tro sa atre hnyawa la aliene la itre zonal hne së hna troa xom ngöne la hna cainöje trotro?
4 Maine nyipici laka, easa troa tro fë asë la lue zonal, ngo tro hi sa xome la cas ngöne la easa troa ithanatane la itre alien. Qa ngöne lai, loi e tro sa e asë lue ej matre troa atre hnyawa la itre mekun hnene lue eje hna qatreng. Eje hi lai laka, tro hë sa atreine ithanatane hnyawa la itre mekune ka troa ketr la hni ne la itre atr.