Inine Jë La Itre Nekönatr Jëne La Sit Ëternet Së
1. Nemene la kepine matre kuca jë lo götrane ne la sit ëternet së hna hape “Enfants”?
1 Hna kuca la sit ëternet së, jw.org, thatraqane la nöjei atr. Ame ngöne la sit ëternete së qene wiwi, hetrenyi lo götrane hna hape “Enfants” (troa tro koi La Bible et vous > Enfants), nyine xatuane la itre nekönatr me itre keme me thine i nyudren troa cas, me easenyi fe koi Iehova. (Deu. 6:6, 7) Nemene la aqane tro sa huliwane lai götrane cili ne la sit së, göi troa inine la itre nekönatr?
2. Nemene la itre mekune ka ijije nyine troa ce inine memine la itre nekönatr?
2 Itre Ini Hmekui Nyudren: Isapengöne kö la itre nekönatr. (1 Kor. 13:11) Qa ngöne lai, nemene jë la itre mekune ka ijije troa ce ithanatane me nyudren? Nemene jë la hna canga pi atre hnene la nekönatr? Nemene la etrune la itre ithuemacany hnei nyëne hna atreine troa kapa? Ije hawa ne ini? Ame la itre nekönatr, laka, tha köni macatre petre kö, tre hane kö lo lai itre hnepe ini ka co, ngöne la götrane hna hape “Comptines bibliques.” Ame göi itre ka nango tru hë, hane hi lo lai itre ini ngöne la götrane hna hape “Enseignez vos enfants.” Hane fe kö cahu itre xa aqane troa huliwane la sit ëternet së.
3. Nemene la aqane tro la keme me thin a huliwane hnyawane la itre ini me itre qa hna hnëkëne ngöne la götrane hna hape, “Pour le culte familial”?
3 “Pour le culte familial”: Ame la itre qa hne së hna öhne e cili, tre göi troa xatuane la itre he ne hnepe lapa troa atre la nyine inine memine la itre nekö i angatr. Huje ju e cili hmekune lo hna hape, Télécharger matre troa e lo “Guide des parents” ka qeje pengöne la aqane troa ce ithanatane me ha nekönatr la itre ini me ce kuca me nyudreni lo itre qa. Xome jë lo itre iatr nyine nyi han, göi troa inine la itre nekönatre ka co. Xatuane jë la itre nekönatre ka tru troa fejane la itre mekune ngöne la itre götrane hna hnëkëne kö, nyine nyi alien. Nyimu nyine kuca, ngo casi hi la ini maine edromë qa hnine la Tusi Hmitrötr hna ce ithanatan, matre thue qan asë hi la itre nekönatr, ngöne lai ijine hmi ne la hnepe lapa.
4. Nemene la hne së hna öhne ngöne lo götrane hna hape, “Deviens l’ami de Jéhovah”?
4 “Deviens l’ami de Jéhovah”: Ame la itre video, me nyima, me qa hne së hna öhne e cili, tre göi troa xatua keme me thine troa inine koi itre nekönatr la Wesi Ula i Akötresie. (Deu. 31:12) Hetre ini pala hi nyine tro sa xome qa ngöne la itre hnepe video ka mama e cili. Hetrenyi fe la itre qa, ka tune la troa ithel ka acatrene catrëne la enyipiewekëne la itre ini cili. Pi tro catre la itre nekönatr a nyima, celë hi kepine matre hna kuca la itre nyima nyine xatua angatr troa inine la itre nyima ne hmi.
5. Pine nemene matre loi e tro la itre keme me thin a sipo ixatua koi Iehova, göi troa inine la nyipici koi itre nekönatr?
5 Itre keme me thine fe, aja i Iehova tro nyipunie a aeatrëne hnyawa la hnëqa i nyipunie. Qa ngöne lai, sipone jë koi Nyidrë troa xatua nyipunie troa inine la nyipici kowe la itre nekö i nyipunie. (A. ame. 13:8) Ijije hi tro nyipunie a ‘ainamacanëne la itre nekö i nyipunie kowe la mele hnene la lapaune koi Keriso Iesu,’ jëne la ixatua i Iehova.—2 Tim. 3:15; Ite edomë 4:1-4.