Aqane Troa Maca Ngöne La Hna Cainöj—Itre Ithuemacany Nyine Troa Fejan

“Wai ’ö kö memine la aqane ini.” (1 Tim. 4:16) Celë hi eamo i Paulo aposetolo ekö koi Timoteo, ngo koi së mina fe enehila, itre ka hekö hë cainöj, maine ka xötrei pena hi; nge kola upi së troa maca. Celë hi kepine matre hna kuca ngöne la Huliwa Ne Baselaia la ketre tane mekune ka hnyipixe nyine xatua së nge ka tro pë hë a mama lapa pe; drei la tan, “Aqane Troa Maca Ngöne La Hna Cainöj.” Ame ngöne la nöjei ijine tro sa kapa lai tane mekune cili, tro sa ce ithanatane la ca aqane huliwa ka nyipi ewekë; nge tro fe a hane qaja la itre xa aqane tro sa trongën. Nge kola troa thuecatre koi easë asë troa inine xome la aqane huliwa cili ngöne la treu. Nge e pune treu hë, tro sa ce ithanatane ngöne la ijine Icasikeu Ne La Huliwa, la eloine la hne së hna isa trongëne la aqane huliwa cili. Ame ngöne la treu celë, kola ithuecatre koi easë asë troa fejane la itre ithuemacany göne la itre atr ka pi porotrikë Tusi Hmitrötr.

Enyipiewekën: Maine easa ajane troa aeatrëne hnyawa la hnëqa së, tha tro kö sa cainöje hmekuje hi. Ngo nyipi ewekë fe tro sa bëeke hmaca kowe la itre ka pi porotrikë Tusi Hmitrötr, me ini angatr, ke aqane tro hi së lai a fi la itre itine ne la nyipici hne së hë hna jum. (Mat. 28:19, 20; 1 Kor. 3:6-9) Tro së lai a tro troa wange hmaca lai atr, me porotrikëne me angeice la itre ewekë hnei angeice hna hnehengazon, me sisedrëne lo porotrike së hnapan. Celë hi kepine matre, maine hetre atr hne së hna öhne ka pi porotrikë Tusi Hmitrötr, nyipi ewekë tro sa cinyanyine la itre ithuemacany ka qeje pengö i angeic.

Aqane Kuca:

• Mekune kö goeëne ka hape, itre ej asë kö e hnine la sine watrenge i nyipunie la ka nyipi ewekë göi troa fejane la itre mekun? Loi e troa mama hnyawa me fejane hnyawane la itre mekun; nge loi e tro pala hi a kuca lapaan. Celë hi matre, ame ju hi la nyipunie a ase wange hmaca la ketre atr, canga cinyanyine ju la itre ithuemacany göi angeic.

• Cinyanyine ju la itre ithuemacany göne lai atrekë hnalapa. Drei la ëje i angeic, nge nemene la hune tus i angeic, maine numero ne telefon, maine adresse mail pena? Nemene la ewekë hnei nyipunie hna öhne thei angeice me hnepe lapa i angeic?

• Cinyanyine ju la itre hnei nyipunie hna porotrikëne me angeic. Nemene la itre xötr hnei nyipunie hna ce e me angeic? Nemene la itre ini hnei angeice hna lapaune kow? Nemene la itre itus hnei nyipunie hna nue koi angeic? Fejane ju la hawa ne ce porotrik, memine la drai, memine la drai ne tro nyipunie a bëeke hmaca.

• Cinyanyine ju la hnei nyipunie hna mekune troa kuca ngöne la ijine bëeke hmaca. Kola troa porotrikë nemen? Eue la hnei nyipunie hna qaja ka hape, tro hmaca nyipunieti a bëek?

• Thupene e nöjei hna iwai hmaca, mekune kö fejane la itre ithuemacany göne lai atr. Pëkö engazone e tru catre la itre ithuemacany hnei nyipunie hna fejan.

Tupathe Ju Ngöne La Treu Celë:

• Ame la nyipunieti a troa fejane la itre ithuemacany, qaja ju kowe la sine tronge i nyipunie la itre mekune hnei nyipunie hna fejan.