Itre Itus Ka Nyitrepene La Mel Me Huliwa Ne Cainöj Pepa Nyine Huliwan
4-10 MEI
ITRE TRENGAMO QA HNINE LA TUSI HMITRÖTR | GENESE 36-37
“Kola Zalu Koi Iosefa”
“Dengeju Nyipunie La Pung”
Öni Tusi Hmitrötr: “Öhnë hë la ite mama i angeice laka hna nekö hnimë angeice hnei keme i angate hune la ite mama i angeice asë, angat’ a methinë angeic, nge tha ithanata aloine me angeic.” (Genese 37:4) Trotrohnine hi së laka, hna zalu hnene la itre trejin me Iosefa, ngo ame la engazon, hnei angatr hna nue la thiina cili troa kökötr e kuhu hni angatr. (Ite Edomë 14:30; 27:4) Maine epuni a zalu pine la ketre atr hna wangatrun, mekune kö la itre trejin me Iosefa. Hnene la thiina cili hna uku angatr troa kuca la itre ewekë hnei angatr hna troa hace fë e thupen. Haawe, nyipiewekë tro sa trongëne la eamo celë, “Ce madrine jë memine la itre ka madrin.”—Roma 12:15.
Drenge hi Iosefa laka, kola methinë angeic hnene la itre trejin me angeic. Tune kaa e traqa ju angeic ixelë me angatr, tro jë kö angeic a amë acone la iheetr? Ma hnei angeice jë hna mekun troa kuca tun. Ngo, hetre kepine matre, hamëne jë Iakobo la iheetr koi Iosefa. Nyidrëti lai a amamane la ihnim, me madrine i nyidrë koi angeic. Nge ame pena Iosefa, aja i angeic troa amadrinëne la keme i angeic, matre tha hnei angeice kö hna amë acon la iheetr. Ka lolo catre la tulu i angeice koi së. Ngacama tha ka ië hna hnimi kö la Keme së e hnengödrai, ngo ame pe, hetre hlue i Nyidrë hnei Nyidrëti hna hnimi catrën. Ketre, aja i Nyidrë tro la itre keresiano a iananyi memine la fene celë ka ngazo. Tune la iheetre i Iosefa, itre thiina i angatr a aisapengönë angatr memine la itre xan. Celë hi ka aciane la izalukeu me imethinë. (1 Peteru 4:4) Ngo, tro kö la keresiano a juetrëne la sipu pengöi angeic? Waea, tui Iosefa, tha hnei angeice kö hna amë acone la iheetre i angeic.—Luka 11:33.
w14 1/8 13 ¶13
“Dengeju Nyipunie La Pung”
Qaathei Iehova la itre hna puj. Itre hna perofetane lai, nge Akötresieti a ajan tro Iosefa a qaja la aliene itre ej. Tro Iosefa a kuca la hnëqa ne la itre perofeta elany, ene la troa tro fë la itre maca me itre iameköti Akötresie kowe la nöje ka tha idrei.
Hnei Iosefa hna metrötrëne la itre trejin me angeic, me hape: “Dengeju nyipunie la pung.” Hnei angatr hna elëhni ngöne la angatr a trotrohnine la aliene la pu. Öni angatr: “ ‘Eö a troa joxu i eahun? nge tro eö a musinë eahun ?’ Ame hnei angate hna methinëne catë angeice pine la ite pu i angeice me ite tenge ewekë i angeic.” Casi palahi la aqane ujë ne la itre mama i Iosefa, ngöne la angeic a qaja la hnaaluene pu i angeic koi angatr me koi Iakobo. ‘Hnei keme i angeice hna wesitrë angeic, me hape, Kola hapeue lai ? Tro ni, me thine i ’ö, me itre mama i ’ö a thili koi eö ?’ Ngo, hnei Iakobo hna lapa mekune la ewekë celë: Ma Iehova jë a ithanata memine la nekönatr.—Genese 37:6, 8, 10, 11.
Tha Iosefa hmekuje kö la hnei Iehova hna upe troa tro fë maca hna xele ma dreng, nge jëne iaxösisi. Öni Iesu, lo Perofeta Ka Tru, kowe la itretre dreng ka hape: “E hnei angatr hna axösisi ni, tro fe angatr a hane axösisi nyipunie.” (Ioane 15:20) Hetre ini nyine tro la itre keresiano asë a xome qa ngöne la aqane lapaun me catre i Iosefa.
Troa Sine Thel La Itre Mekune Ka Sisitria
it-1 693
Edoma
(Eʹdom) [Ka madra], Angetre Edoma (Eʹdom·ites).
Edoma la hnaaluene ëje hna hamëne koi Esau, lo fini Iakobo. (Gen. 36:1) Hna ati ëje i angeic tun, ke, hnei angeic hna salemëne la edrö ne nekön haetra göi ca trepe xen ka madra. (Gen. 25:30-34) Nge, ame la angeic a mala, ka oma [casi hi la hnëewekë “ka madra” ngöne la qene Heberu] (Gen. 25:25), ketre, ame ngöne la götrane hnei Esau me itre matra i angeic hna lapan, hetre itre atr ka oma.
it-1 964
Thup
Ame la kola thupë öni hnene la itretre thup, angatr a ithupë thenge la itre hna amekötine e hnine la wathebo. Kola anyipicine kowe la atrekë önine laka, tro angeic a ithuan. Nge, maine troa atrekënö la ketre öni, tro angeic a nyithupen. Ngo, tha zöi atre thupe kö la nöjei jol ka traqa kowe la hna axö öni. Önine la wathebo, maine traqa ju thapa la ketre öni hnene la ketre öni ka ses, tha zöi angeice kö. Tro angeic a pane anyipicine kowe la atrekë önine jëne la ngönetrei ne la öni hna hej. Thupene lai, ijij tro la atrekë önine a nue la ngazo ne la atre thup.
Celë hi aqane kuca ngöne la kola ahnith la ketre ewekë koi ketre, maine e hnine la fami. Hnëqa ne la ka tru troa thupëne la itre jini angeic. Ame ngöne Genese 37:18-30, easa trotrohnine la xou ka ej thei Reubena lo itre trejin me angeic a thel troa humuthi Iosefa. Öni angeic: ‘Tha tro kö sha humuthi nyën.’ . . . ‘Tha tro kö sha anenine la madra. . . . the ketri nyën kö.’ Aja i Reubena troa amele Iosefa me bëeke sai angeic koi kem. Ame la Reubena a öhne laka, patre pë hë Iosefa, hnei angeic hna xou me “kuie zezene la ite ixete i angeic,” me hape: “Patë hë la thöth ; nge tro pë hë ni ië?” E patre pë hë Iosefa, atre hi angeic laka, troa upezö angeic. Hnene la itre trejin me angeic hna kuca matre troa mekun laka, hna humuthi Iosefa hnene la ketre öni ka ses. Nge tha tro kö a upezö Reubena. Hnei angatr hna trapine la iheetre i Iosefa ngöne la madra i nani. Hnei angatr hna amamane la iheetre i Iosefa koi Iakobo, keme i angatr, me keme ne la lapa. Ame la nyidrëti a öhne la iheetre i Iosefa ka si madra, me trotrohnine laka, hna humuthi angeic, hnei nyidrëti hna nue la ngazo i Reubena.—Gen. 37:31-33.
11-17 MEI
Troa Sine Thel La Itre Mekune Ka Sisitria
it-2 445
Onana
(Oʹnan) [kola hape “nyiqaane hnaho; trengecatr”].
Hnaaluene nekö i Iudra, hna hnahon hnene la nekö i Sua, atre Kanana. (Gen. 38:2-4; 1 A. l. ite jo. 2:3) Hnei Iehova hna humuthi Era, mama i Onana pine la itre ewekë ka ngazo hnei angeic hna kuca. Pine laka, meci hë Era, nge pëkö nekö i angeic, hnei Iudra hna upi Onana troa xomi Tamara, föi Era. Maine tro Onana me Tamara a hnaho trahmany, tro angeic a matra i Era, ngo tha Onana kö. Nge, angeic la ka troa kapa la edrö ne neköne haetra. Ngo, e pëkö nekö i nyidro, Onana pë hë la ka troa kapa la edrö. Ame la Onana a ce meköl me Tamara, angeic a “nenge hnadro eë” la zane i angeic. Tha Onana kö a huliwane menune la gaa hmitrötre i angeic, ke, kola qaja ka hape, kolo ijine angeic a ‘ce meköle memine la föe ne la mama i angeic’ la angeic a nuan ezine la zane i angeic. Onana a thupatëne la ijine kola ce meköl me Tamara, matre tha tro kö a nuane la zan koi eahlo. Hna humuthi Onana fe hnei Iehova, nge pëkö nekö i angeic. Tha hna humuthi angeice kö hnene la hna huliwane menune la gaa hmitrötr, ngo hnene laka, hnei angeic hna tha idrei koi kem. Ketre, hnei angeic hna piine menune la ifekë ewekën, me thaipiëne la itre hna amekötin hnei Iehova göne la faipoipo.—Gen. 38:6-10; 46:12; Num. 26:19.
w04 15/1 30 ¶4-5
Itre Hnyinge Ne La Itre Ka e
Tha ka loi kö la hnei Iudra hna kuca, ke, tha hnei nyidrëti kö hna hamë Tamara koi Sala, nekö i nyidrë, tune lo hnei nyidrëti hna sisiny. Hnei nyidrëti fe hna ce meköle memine la ketre föe, nge mekuna i nyidrë laka, föe ne gojeny. Huliwa lai ka isa tro memine la aja i Akötresie laka, tro hi a ce meköl trefën la trahmanyi me föe ka faipoipo. (Genese 2:24) Ngo, tha hnei Iudra kö hna ce meköl memine la ketre föe ne gojeny. Thatre kö nyidrë, ngo hnei nyidrë hna nyihna i Sala, me xome la föe i Era, matre hetre sipu matra i angatr.
Ketre, tha hna kuci ngazo kö hnei Tamara, nge tha hna xome ceitu kö la lue fini angeic me lue neköne gojeny. Ame lo Boaza, atre Bethelema, a xomi Rutha, atre Moaba, hnene la itre qatre ne Bethelema hna qaja aloinyi Farez, nekö i Tamara. Öni angatr koi Boaza: “Tro la lapa i nyipëti a tune la lapa i Farez, lo hnei Tamara hna hnahone göi Iuda, qa ngöne la ite matra tro Iehova a hamëne koi nyipë qa ngöne la jajinyi celë.” (Rutha 4:12) Ketre xötrapane i Iesu Keriso lae Farez.—Mataio 1:1-3; Luka 3:23-33.
18-24 MEI
Troa Sine Thel La Itre Mekune Ka Sisitria
w09 15/11 28 ¶14
Ka Hetre Metrötr La Itre Hlue i Akötresie
14 Ame ekö, hnene la itre keme me thine ka xoue Akötresie hna inine la itre nekönatr troa hetre metrötr e kuhu hnalapa. Ame ngöne Genese 22:7, easa öhne la aqane imetrötrë Aberahama me Isaaka, nekö i nyidrë. Kola mama hnyawa ngöne la tulu i Iosefa laka, hna ini angeice hnyawa hnei keme me thin. Ame la angeic e hnine la kalabus, hnei angeic hna loi thiina kowe la itre xaa hna akalabusin. (Gen. 40:8, 14) Kola mama ngöne la aqane ithanata i angeic koi Farao laka, hna ini angeic la aqane troa ithanata kowe la itre joxu.—Gen. 41:16, 33, 34.
25-31 MEI
ITRE TRENGAMO QA HNINE LA TUSI HMITRÖTR | GENESE 42-43
“Iosefa a Xomihni”
it-2 50 ¶4
Iosefa
Hnene la itre ewekë ka traqa, matre kola mekun hnene la itre trejin me Iosefa laka, Akötresie a nyithupene koi angatr, ke, hnei angatr hna salemë Iosefa ekö. Hnei angatr hna qaja amamane la ngazo i angatr qëmekei Iosefa, ngo tha wangatrehmekunyi angeice kö. Kola ketri Iosefa ngöne la angeic a drei angatr a ietra, ame hnei angeic hna trotriji angatr me treij. Ame la angeic a bëeke hmaca, hnei angeic hna othi Simeona utihë la tro angatr a bëeke fë la jini angatr.—Gen. 42:21-24.
Troa Sine Thel La Itre Mekune Ka Sisitria
it-2 835
Reubena
Kola mama la itre xaa thiina ka lolo thei Reubena ngöne la angeic a sawa la 9 lao trejin me angeic troa humuthi Iosefa. Hnei Reubena hna upi angatr troa kuië Iosefa e hnine la ketre hnaop, matre tro pë hë angeic a bëeke thupen troa xomi Iosefa qaa kuhu hni. (Gen. 37:18-30) Thupene la 20 lao macatre, hnene la itre trejin cili hna uti a tro Aigupito, nge hna upezö angatr ka hape, itretre alamekëne la nöj. Ame koi angatr, kola upezö angatr, ke, hnei angatr hna qanangazo Iosefa ekö. Reubena a amekunë angatr laka, tha hnei angeice kö hna ce xöle me angatr troa humuthi Iosefa. (Gen. 42:9-14, 21, 22) Ketre, ame lo Iakobo a cipa Beniamina troa ce tro memine la itre mama i angeic ngöne la hnaaluene tronge i angatr a tro Aigupito, Reubena la ka nue la lue nekö i angeic nyine nyihnai Beniamina. Öni angeic: “Tro nyipëti a humuthe la lue neköng’ e tha tro kö ni a tro sai nyëne [Beniamina] hmaca koi nyipë.”—Gen. 42:37.
w04 15/1 29 ¶1
Itre Mekun Ka Sisitria Ne La Tusi Genese—II
43:32—Pine nemene matre ka sis kowe la angetre Aigupito troa ce xen memine la angetre Heberu? Maine jë, hnene la hna xele ma wang la hmi maine hane ngönetrei. Ketre, methi angetre Aigupito la itretre thupë mamoe. (Genese 46:34) Pine nemen? Maine jë, ame la itretre thup, hna wangacone ngöne la nöj Aigupito. Maine pena, tha tru kö hnei lapa nyine eëny, matre angetre Aigupito a methinëne la itre ka thele götran hnë axö mamoe.