Itre Hnyinge Ne La Itre Ka e
Dravita kö a sasaithi tulu la angeic a qaja ngöne Salamo 61:8 ka hape, “Tro ni a atrune la [ëje] i cilie epine palua”?
Waea. Ame la hnei Dravita hna qaja ke, ka nyipici hi, nge tha angeice kö lai a sasaithi tulu.
Hane hi la itre xaa hna qaja hnei Dravita ka ihmeku memine la Salamo 61:8. Öni angeic: “Tune lai tro ni a atrune la [ëje] i cilie epine palua, mate trongënejë ni la ite [hnenge hna sisiny] o drai.” ‘Iehova Akötresing, eni a atrunyi nyipë hnene la hning ka pexej. Nge ajang troa atrune la ëje i nyipë uti hë epine palua.’ “Tro ni a qaja aloine la [ëje] i cilie epin’ epine palua.”—Sal. 61:8; 86:12; 145:1, 2.
Tha Dravita kö e celë a sasaithi tulu, me qaja ka hape, tha tro fe kö angeic a hane mec. Atre hnyawa hi angeic la hnei Iehova hna amekötine laka, mec a traqa pine la ngazo. Nge pine laka, atr ka ngazo angeic, tro fe angeic a hane mec. (Gen. 3:3, 17-19; Sal. 51:4, 5) Ketre, atre hnyawa hi angeic ka hape, meci hë la itre xaa hlue i Iehova tui Aberahama, Isaaka, me Iakobo, nge celë fe hi pun koi angeic. (Sal. 37:25; 39:4) Matre ame la hnei angeic hna qaja ngöne Salamo 61:8 ke, kolo hi a amamane la trenge aja i angeic troa atrunyi Akötresie utihë epine palua, utihë la angeic a mec.—2 Sam. 7:12.
Ame la itre xaa Salamo hna cinyanyine hnei Dravita, ke kola qaja la hnei angeic hna melëne ekö. Celë hi ka mama ngöne la itre ithuemacanyi ne la Tusi Hmitrötr ngöne Salamo mekene 18, me mekene 51 me 52. Ame ngöne Salamo 23, Dravita a aceitunë Iehova me ketre atre thupë mamoe ka eatrongën, me akeukawane me thupëne la itre mamoe i angeic. Ka tui Dravita ekö, ketre atre thupë mamoe. Matre ame la aja i angeic, ke troa nyihlue i Akötresie ngöne la ‘nöjei drai’ ne la mele i angeic.—Sal. 23:6.
Tha tro kö sa thëthëhmine laka, uati hmitrötre i Iehova la ka xatua Dravita troa cinyanyine la itre tusi angeic. Ame ngöne la itre xaa tusi angeic ke, hetre hna perofetan ka troa eatr elany, tune la Salamo 110. Angeic e cili a qaja la ketre Joxu ka troa ‘lapa ngöne la götrane maca i Akötresie’ e hnengödrai, me kapa la men atraqatr. Nemene la hnëqa i nyidrë? Tro nyidrëti a musinëne la itre ithupëjia me Akötresie me ‘amekötine la nöjei nöj.’ Dravita la ketre xötrapane ne la Mesia ka troa musi qa hnengödrai me “ate huje epine palua.” (Sal. 110:1-6) Hnei Iesu e thupen hna anyipicine laka, kola qeje nyidrë ngöne Salamo 110, nge easenyi catre hë tro nyidrëti a eatrën asë la hna qaja.—Mat. 22:41-45.
Eje hi, uati hmitrötr la ka xatua Dravita troa qaja la itre ewekë ka traqa ngöne la hneijine i angeic me ngöne fe la itre drai elany. Ame elany, troa amele angeic hmaca, nge tro hë angeic a atrunyi Iehova utihë epine palua. Celë hi lai ka xatua së troa trotrohnine la hna qaja ngöne Salamo 37:10, 11, 29. Itre xötre celë a qaja la aqane mel ne la angetre Isaraela ekö, memine la aqane mele i easë elanyi ngöne la fene ka hnyipixe, e ase hë Iehova eatrën la itre hna thingehnaean.—Wange ju la paragaraf 8 ne la tane mekun hna hape, “Tro Hë Eö a Ce Me Eni Ngöne La Paradraiso.”
Haawe, ame ngöne Salamo 61:8 me ngöne la itre xaa xötr ke, kola qaja la trenge aja i Dravita troa atrunyi Iehova uti hë la angeic a mec. Kolo fe a qaja la hnei Dravita hna troa kuca elany, la Iehova a amele angeic hmaca.