Ajane Kö Nyipunie Troa Atre Hnyawa La Tusi Hmitrötr?

Pine Nemen Matre Nyipi Ewekë Troa e La Tusi Hmitrötr?

THAA ceitune kö la Tusi Hmitrötr memin la itre xaa itus, ej a qatreng e hnin ej la ketre ini ka ihnim qaathei Akötresie. (1 Thesalonika 2:13) Maine tro nyipunie a trongën la hnei Tusi Hmitrötr hna inin, tro hë nyipunie a kapa la itre manathith ka tru. Tro hë lai a kökötr la ihnimi nyipunie koi Akötresie, nge iasenyi catre hë nyipunie me Nyidrë, Atre hamën la “nöjei ahnahna ka loi asë, memine la ite hna hamën gufan ka lolo asë.” (Iakobo 1:17) Tro fe nyipunieti a atre la aqan troa easenyi Nyidrë jën la thith. E traqa pena ha la ijine hleuhleu atreine hi troa öhn hnei nyipunie la aqan ixatua qaathei Akötresie. Maine tro nyipunie a melën la itre hna amekötin hnei Akötresie hnin la Tusi Hmitrötr, haawe tro hë Nyidrëti a hane hamën koi nyipunie la mel ka thaa ase palua kö.​—Roma 6:23.

Hetreny hnin la Tusi Hmitrötr la itre trenge nyipici nyine thue lai kowe la itre hni së. Maca pi hi la itre atr ka kapa la atrehmekun qa hnin la Tusi Hmitrötr, hna ahmacanyi angatr qa ngön la itre mekun ka thoi ka lapa xom la mel ne la nöjei ka ala nyim. Hanawang la ketre ceitun, ame la easë a atre la nyipici göi pengö së thupen la mec, haawe thaa xouene pi hi së lo itre ka mec, pine laka, easë a atre laka, thatreine hmaca kö angatr troa akötrë së, nge ketre, tingetingë hë la hni së ke, thaa kolo kö a akötr la itre sinee së me itre enehmu së ka meci hë. (Ezekiela 18:4) Keukawa ha la hni ne la itre atr ka meci sineen hnene la ini hna hamën qa hnin la Tusi Hmitrötr göi mele hmaca. (Ioane 11:25) Qa ngön la nyipici göi itre angela ka ngazo, hmeke hë së, atre hë së la engazon la kuci haze, trotrohnine fe hë së la kepin matre tru catr la itre jol enehila ngone la fen.

Kola amaman hnene la itre trepene meköt hnin la Tusi Hmitrötr, la aqane tro së a mel matre hetre thangan ka loi kowe la mel ne la ngönetrei. Hanawang la ketre ceitun, tro sa egöcatr pala hi e hna “hmek,” ene la troa thupën lo itre ewekë hne së hna majemin melën. (1 Timoteo 3:2) Atreine hë së neën la itre jol ka troa traqa kowe la mele së, e hne së hna ‘nyihnyawa së kö qa ngön la nöjei ka sisi asë ne la ngönetei memin la [“ua,” MN].’ (2 Korinito 7:1) Maine tro mina fe së a trongën la itre eamo i Akötresie e hnin la Tusi Hmitrötr, haawe, tro ha hetre thangan ka loi kowe la faipoipo së, nge ketre tro fe së a hane atrein thupën la mele së.​—1 Korinito 6:18.

Troa hetre madrine së, e hne së hna xötrethenge la Wesi Ula i Akötresie. Kola xatua së hnene la atrehmekun troa hetrenyi la tingeting e kuhu hni së memin la mejihni, nge ej a hamë së fe la mejiun. Ej a xatua së fe troa eënyin la itre thiina ka lolo, tune la ihnimi ipitö, me ihnim, me madrin, me lapaun. (Galatia 5:22, 23; Efeso 4:24, 32) Itre thiina lai ka xatua së troa itre trefën ka mele ka loi, trahmany maine föe, kem maine thin, nekön trahmany maine jajinyi fe ka lolo.

Nyipunieti kö a hane thel matre troa atre la pengön la mel ngöne la itre drai elany? Kola amaman koi së hnene la itre hna perofetan hnin la Tusi Hmitrötr laka, easë a melën enehila la ketre hneijin ka nyipi ewekë catr kowe la mele ne la atr. Thaa itre ej hmekuje kö a qaja la pengön la fen enehila, ngo itre eje fe a amaman laka easenyi hë matre aparadraisone jë Akötresieti la ihnadro.​—Hna Amamane 21:3, 4.

Ixatua Jë Matre Troa Trotrohnin La Tusi Hmitrötr

Maine jë ase fe hë nyipunie tupath troa e la Tusi Hmitrötr, ngo jole catr e troa trotrohnin. Maine jë thaa öhne kö nyipunie la itre mekun e hnin la Tusi Hmitrötr, ka sa la itre hnyinge i nyipunie. Maine eje hi, thaa tro kö së a sesew, ke thaa nyipunie hmekuje kö la ka tune lai. Nyipi ewekë tro asë hi së a thele ixatua, matre troa trotrohnin la Wesi Ula i Akötresie. Kola hamën gufan la ini qa hnin la Tusi Hmitrötr kowe la itre atr, hnene la Itretre Anyipici i Iehova ngöne la 235 lao nöj. Ka tru mina fe la madrine i angatr, troa hane xatua nyipunie.

Ka lolo catr e troa inine trongën la Tusi Hmitrötr, nge troa nyiqaan hnene la itre ini nyine trepen. (Heberu 6:1) Maine tro nyipunie a sisedrën lai ini, haawe tro hë nyipunieti a atrein troa xom la “xeni” ene la itre trenge nyipici ka jui. (Heberu 5:14) Draië kö la mus ne la Tusi Hmitrötr, hun la nöjei mekun asë. Kola xatua së fe hnene la itre itus ka qejepengön la Tusi Hmitrötr, tun la boroshür hna hape, Nemene La Hnei Akötresieti Hna Thele The Së? troa trotrohnin la itre mekun qa hnin la Tusi Hmitrötr, ngöne la nöjei taane mekun asë.

Ajane Kö Nyipunie Troa Ami Ijin Ngöne La Nöjei Wiik Troa Trotrohnin La Tusi Hmitrötr?

Atreine hi troa ce wang matre troa inin la Tusi Hmitrötr ngöne la ijin me hnë ka ijij koi nyipunie. Nyimutre la itre atr ka inin la Tusi Hmitrötr ngöne kö la hnalapa i angatr. Ame itre xan, angatr a ini tus jëne telefon. Ame la ini tus hna troa hamën, tre thaa ceitune kö memin cahu lo aqane hamë ini ngöne itre uma ne ini, laka, nyimutre la itre hnainin e hnin la uma, ngo kola hamën ngöne la ijin ka ijij, thenge la hna atrein hnene la atr me hmekui angeic, nge loi fe e troa atre la pengöi angeic thenge la aqane hetru angeic. Pëkö itupath, nge ketre thatreine jë kö troa xom menun pala ha la traeme i nyipunie. Tro ha sa la itre hnyinge i nyipunie jën la Tusi Hmitrötr, nge tro fe nyipunie a hane atre la aqane troa lapa qal koi Akötresie.

Ame la ini tus celë, hna hamën gufan. (Mataio 10:8) Nge hna kuca ej thatraqan la itre atr ne la nöjei hmi asë me kowe la itre atr ka thaa hane kö hmi ngo ka hetre hni ne ajane pe troa akökötren la atrehmekune i angatr ngöne la Wesi Ula i Akötresie.

Drei la ka ijij troa hane sin la ini tus? Nyipunie me hnepe lapa i nyipunie asë. Itre sinee hnei nyipunie hna mekun troa hane hën matre troa hane sin la ini tus. Ngo maine thaa ajane kö nyipunie tro itre xan a hane sin la ini tus, qanyi nyipunieti kö.

Nyimutre la itre atr ka xom la caa hawa ngöne la nöjei wiik matre troa inin la Tusi Hmitrötr. E atreine hi tro nyipunie a ami traem ngöne la nöjei wiik, nyimutre, maine co hi, haawe, ijij tro la Itretre Anyipici Iehova a xatua nyipunie.

Kola Könë Nyipunie Troa Atrepengön

Eahuni a könë nyipunie troa hane wang la Itretre Anyipici i Iehova. Ame la ketre aqane tro nyipunie a kuca, tre, ene la troa hane cinyany koi hun jën cahu ketre hune tus. Tro pë hë eahun a wang matre tro la ketre e eahun a traqa troa inin me nyipunie la Tusi Hmitrötr.

□ Iupi fë jë la ketre boroshür, Nemene La Hnei Akötresieti Hna Thele The Së? Qaja ju la qene hlapa.

□ Eni a sipon troa hane inin la Tusi Hmitrötr.

Maine pëkö hna qaja, ke, troa xom la itre mekene tus ngöne hi lo Lifu Bible​—The Bible Society in the South Pacific.