Aqane Troa Kepe Thangane La Itre Trengene Itus Ne La Uma Ne Baselaia

Pi tro fe kö nyipunieti a hane atre la itre xa ithuemacany qa hnine la Tusi Hmitrötr ka troa akökötrene la atrehmekune i nyipunie? Hapeu, pi tro fe kö nyipunieti a trotrohnine hnyawa la ketre xötr, maine pengöne la ketre atr maine ketre götran, maine ketre ewekë kö hna qaja hnene la Tusi Hmitrötr? Ase fe kö nyipunieti mekune ka hape, nemene la aqane tro la Wesi Ula i Akötresieti a xatua nyipunie ngöne la kola traqa koi nyipunieti la ketre jol? Maine eje hi lai, haawe huliwane jë la trengene itus ne la Uma Ne Baselaia.

Hnë qatrenge la itre jia ne ithel. Maine jë ame ngöne la qene hlapa i nyipunie, hetre itre sine itusi ne la Itretre Anyipici Iehova, tha hna ujëne kö. Ame ngöne la trengene itus ne la Uma Ne Baselaia, hetrenyi asë hi la itre itusi ka hnyipixe, me nöjei pengöne Tusi Hmitrötr, me dictionnaire, me itre xa jia ne ithele kö. Pëkö ka troa thingi jë i nyipunieti troa huliwane itre ej, qëmeken, maine thupene la itre icasikeu. Maine hetre ordinatöre fe e cili, ijije hi tro nyipunieti a huliwane lo logiciel hna hape Watchtower Library. Ame ngöne lai logiciel cili tre, hetrenyi la nöjei itus, celë hi matre tha jole kö troa thele la ketre mekun, maine ketre hnaithanata, maine ketre xötre ne la Tusi Hmitrötr.

Nyipi ewekë catre kowe la itre hna inine hnene la Mel Me Huliwa Ne Ini Ne Cainöj Pepa Nyine Huliwan. Maine ketre hna inine fe hë nyipunie, troa nyipi ewekë catre koi nyipunie la trengene itus ne la Uma Ne Baselaia, göi troa hnëkëne la itre hnëqa. Ketre hnëqa ne la atre thupëne la ini la troa waipengöne hnyawa la trengene itus ne la Uma Ne Baselaia. Qa i nyidrë troa wange la aqane troa xeene hnyawa la itre itusi ngöne la trengen, me troa nyixane hnene la itre itusi hna hnyipi kapa. Qanyi nyidrë maine lo trejine ka ini Tusi Hmitrötr me nyipunie, troa amamane la aqane troa thele la ketre mekune hnei nyipunieti hna ajan. Ngo tha tro kö a xome trön eë la itre itusi koi hnalapa qa hnine la Uma Ne Baselaia. Nge eje hi laka, tro sa thupën, wanga angazone pi me sija menune itre ej.

Önine la Tusi Hmitrötr ka hape, maine easa ajane tro sa “ate Akötesie” hnyawa, nyipi ewekë tro sa thele Nyidrë “kösë tenga mo hna juetën.” (Ite Edomë 2:​1-5) Tro la trengene itus ne la Uma Ne Baselaia a xatua nyipunie.

• Nemene la hne së hna troa öhne ngöne la trengene itus ne la Uma Ne Baselaia?

• Drei la ka ijije troa xatua nyipunie troa huliwane hnyawa la itre itus?