Catre Köla Lapaune i Nyipunieti Koi Akötresie?
“Ngo, pane thele jë nyipunie la Baselaia i Akötresie”—MATAIO 6:33.
1, 2. Nemene la mekune hna axeciën hnene la ketre thupëtresij göne la huliwa i angeic, nge pine nemen?
Ajane catre la ketre thupëtresiji troa ixatua ngöne la ekalesia i angeic. Ame pe la hnepe engazon, tre, kola ajolë angeice troa sine la itre icasikeu hnene la huliwa i angeic. Nemen la aqane thele nyin angeic la jole cili? Angeic a ahmaloeëne pi la mele i angeic, me nuetrije la huliwa cili, me öhnyi ketre huliwa pena ha ka thaa isazikeu kö memine la itre huliwa ne keresiano. Enehila, nango co hë la thupe i angeic, thaa tune hmaca kö e cili lo, ngo ame pe, atreine hnyawa ha angeice thupëne la fami angeic me xatuane fe la ekalesia.
2 Trotrohnine kö nyipunie la kepin matre kola axecië mekune tune la hnene lai thupëtresij? Hapeu, tro kö epuni a hane xomi mekune tune lai, e traqa pi la ketre jole ka tuun? Nyine jeleloine la itre keresiano ka nyimutre ka ujë tune lai, tre, kola amamane hnene la aqane huliwa i angatr, laka, hetrenyi angatr la mejiune kowe la hna thingehnaeane hnei Iesu, hna hape: “Ngo, pane thele jë nyipunie la baselaia i Akötresie, me thina ka meköti anganyidrë ; nge troa hamëne fe koi nyipunie la nöjei ewekë cili.” (Mataio 6:33) Thaa hnei angatre kö hna qale kowe la fen matre troa mele xetietë, ngo hnei angatre pe hna mejiune koi Iehova.—Ite Edomë 3:23, 26.
3. Pineu matre itre xan a isa thel ka hape ma ka loi kö troa pane thele enehila la Baselaia i Akötresie?
3 Pine la ejolene la mele enehila, maine jë troa mekune hnene la itre xaa atr ka hape, ma tria kö la aqane mekune hnene la thupëtresiji celë. Ame enehila, caa götrane ne la fen a mele hnine la pë ewekë nge ketre götran a mele pipixenyë, ewekë hna thaa öhne pala kö qaane ekö. Nyimutre ene la itretre lapaane la itre nöje gaa puafala, angatr a sikusikune pala hi troa nango aloine pena la melei angatr. Ame pena ha ngöne ketre götran, ala nyimu ene angetre lapaane la itre nöje ka pipixenyë, a catre la aja i angatr troa cilaxome pala hi la aqane mele ka loi ; hnene laka thaa cile huti hmaca kö lo itre mo ne la fen, kola ketre pengöne la aqane trongene la itre huliwa, nge kolo pala hi a ngazo catr la aqane musi ne la itre maseta. Pine laka catrehnine pala ha la itre ejolene la mel, hnei itre xane hna isa thele ka hape, ‘ma ka loi jë pala kö troa thele panëne la Baselaia?’ Maine easa ajan troa sa la hnyinge celë, loi e tro sa pane ce wange la pengöne la lapa hnei Iesu hna ithanata kow.
“The luelue kö”
4, 5. Nemene la itre ceitun hna hamën hnei Iesu matre troa qeje pengöne la mekun, ene laka, thaa tro pi kö la itre hlue i Nyidrë a kukehnine menune la itre ka nyipi ewekë thatraqane la mel?
4 Iesu e Galilaia, nyidrëti a ithanata kowe la lapa ka ala nyimu qa ngöne itre götrane ne Isaraela. (Mataio 4:25) Ala xalaithe hi thei angatr la itre ka trene mo. Ame pena itre xan, tre, ka pë ewekë angatr. Iesu hmaca a thue catre koi angatr matre thaa tro kö a thele panëne la itre trenga mo e celë fen, ngo troa xawane pe la trenga mo ka sisitria catre pala kö, ene la trenga mo ne ua. (Mataio 6:19-21, 24) Öni nyidrë: “The kukehnine kö la mele i nyipunie, ene la hnei nyipunie hna troa xeni me ij, memine la ngönetei nyipunie, ene la nyine troa xetën. Hapeu, tha tru kö la mele hune la xen, me ngönetrei hune la ixetr? “—Mataio 6:25.
5 Ame kowe la itre atr ka ala nyim ka drei Iesu, tre, ame la itre trengeewekë i nyidrë, maine jë thaa ijije kö troa trongëne itr’ej. Atre hi angatr, laka, e thaa catre kö angatre huliwa, eje hi lai laka, tro ha hetre thangane ka ngazo kowe la fami angatr. Loi pe, Iesu a amekunë angatr lo pengöi itre waco. Ngacama itr’ej a thele xen me hnë zae thatraqane la mele i nyudren, ngo ame pe, tre, Iehova a thupë nyudren. Iesu fe a amekunë angatr la aqane hamëne Iehova kowe la itre engeni ne hnitr, la emingömingöne itr’ej, laka, sisitria catre kö itr’eje hui Solomona joxu ngöne la lolo i nyidrë. Haawe, maine Iehova a thupëne la itre waco me itre engen, hapeu, thaa tro jë kö Nyidrëti a hane thupë së fe? (Mataio 6:26-30) Tune la aqane qaja i Iesu, nyipi ewekë catre kö la u së (mele së) hune la xen hne së hna xome thatraqane la mele së, nge ketre tune la ngönetrei së, laka, ka nyipi ewekë kö hune la itre ixetr hne së hna xome matre troa hetrëne la ngönetrei së. Ngo e hape easë hi a nue asë la trenge catre së göi troa xen me göi troa heetr, nge itre wamine pe hi thatraqane la huliwa i Iehova, eje hi lai laka, triane kö së la nyipi aliene la mel.—Ate Cainöj 12:13.
Aqane Waiewekë Ka Loi
6. (a) Nemene la itre hnëqa nyine troa xome hnene la itre Keresiano? (b) Drei la hna troa mejiune kow hnene la itre Keresiano?
6 Eje hi, thaa Iesu kö a ithuecatre kowe la itre ka drei nyidrë troa lapa menu, thaa tro kö a hane huliwa; tro pe hi a treqene tro Akötresie a hamën la itre ka nyipi ewekë thatraqane la itre fami angatr. Nga ame itre waco, nyipi ewekë tro itr’ej a thele xeni koi nyudren me kowe la itre neköi nyudreni fe. Qa ngöne lai, nyipi ewekë troa huliwa hnene la itretre drei nyidrë, maine angatr a ajan troa xen. Tro angatr a cilaxome catrën la itre hnëqa i angatr hnine la lapa ka ca hae. Ketre ame mina fe thupene lai, kola ithuecatre fe kowe la itre hlue keresiano troa catre huliwa nyipici kowe la itre maseta i angatr. (2 Thesalonika 3:10-12; 1 Timoteo 5:8; 1 Peteru 2:18) Hnei Paulo aposetolo hna huliwa e itre xaa ijine troa cai uma mano, matre nyine thele thupene la itre hnei nyidrëti hna ajan. (Itre Hu 18:1-4; 1 Thesalonika 2:9) Ngo eje hi laka, thaa hna mejiune kö hnene la itre keresiano cili kowe la itre huliwa i angatr e trön, kösë jëne troa mele xetietë. Ohea! Angatr a mejiu Iehova. Nemene hë la thangan? Angatr a mele tingeting, ewekë ka pë kö thene la itre xan. Hna qaja hnene la atre cinyihane la salamo, ka hape: “Ceitu i angete lapaune koi Iehova memine la wete Ziona, lo ka tha enij, ngo ka cile huti palua kö.”—Salamo 125:1.
7. Nemene la aqane wai ewekë ne la itre ka thaa catre mejiu Iehova kö?
7 E thaa catre kö la mejiunene la ketre atr koi Iehova, eje hi lai laka, troa ketrepengöne la aqane goeëne angeic la itre ewekë. Ala nyimu la itre atr ka xome la itre mo ne fen ceitu me ketre jëne troa mele xetietë. Celë hi matre itre keme me thine a ukune la itre nekö i angatr troa hna la mele ne thupëtresiji nyudren ngöne la itre ini ka tru, tre, angatr a mekune ka hape, ma celë hi la jëne troa hane hetrenyi elanyi la itre huliwa ka tru thupene catr. Ngazo pe, hetre ethane catr la aqane mekune cili, pine laka, nanazije trootro pi hi thei itre nekön lo aja kowe la nyipici, hnene laka, nyudreni pena ha a nyenyape thele mo.
8. Nemene aqane tulu ewekë tro pala hi la keresiano a lapa xom?
8 Kola thele troa inamacane hnene la itre Keresiano, pine laka, angatr a atrehmekune ka hape, maine nyipici laka, ka hetre thangane ka loi ekö la ihaji i Iesu, haawe, troa lolo catre mina fe enehila. Nyipici, angatr a huliwa nyimu hawa thei maseta göi troa cilaxome la itre hnëqa hna ahnithe hnei Tusi Hmitrötr. Loi pe, thaa hnei angatre kö hna nue la huliwa manie troa athixötrë angatr, ene la troa thëthëhmine lo itre ewekë ngöne la götrane la ua, itre ewekë ka sisitria catre kö kowe la mel—Ate Cainöj 7:12.
“The kukehnine kö”
9. Tune kaa la aqane xatuane Iesu lo itre ka mejiune hnyawa koi Iehova?
9 Ngöne lo eamo i Iesu hune la wetr, nyidrëti a ithuecatre kowe la itretre dreng: “Qa ngöne lai, the kukehnine kö kola hape, tro sha xeni nemen? Nge, tro sha iji nemen? maine Tro sha xetë nemen? Ke ite wanaithihlë a thele la nöjei ewekë cili ; ngo ate kö la Tetetro i nyipunie e koho hnengödrai laka ijiji nyipunie la nöjei ewekë cili.” (Mataio 6:31, 32) Ithuecatre pi hë la itre trenge ewekë celë! E maine tru la mejiune së koi Iehova, tro pala hi Nyidrëti a lapa ezi së troa sajuë së ngöne la nöjei götrane la mele së. Ngo kolo pe a hane upi së fe hnene la itre trenge ewekë i Iesu, troa thele mekun. Itr’ej a amekunë së, laka, maine tro së a meci goeëne la itre mo ne fen, ceitunë hë la itre mekune së memine la “itre wanaithihlë”, laka thaa itre nyipi keresiano kö.
10. Ame la kola easenyi Iesu hnene la thupëtresij matre drenge la ihaji, tune kaa la aqane amamane i Iesu laka hnime catrëne kö angeice lo itre mo i angeic?
10 Ngöne la ketre ijin, hnene la ketre thupëtresiji ka trene mo hna hnyingë Iesu la nyine troa kuca matre tro angeic a hetrenyi la mele ka thaa ase palua kö. Iesu a pane amekunë angeice jë lo itre hna athipe hnene la Wathebo, nge ka mele pala kö ngöne la hneijine cili. Hnene la thupëtresiji hna qaja hnyawa koi Iesu, ka hape: “Ase hë ni trongëne la nöjei ewekë cili ; nge nemene pe kö la ka patre theng?” Ame koi itre xan, tre, ame la aqane sa i Iesu, ke kösë hace pala ha troa trongën. Öni nyidrë: “Maine aja i ‘ö troa meköt, troja itöne la ite ewekë i ‘ö, me hamëne kowe la ange pë ewekë, nge trojë fe ma xöte thenge ni.” (Mataio 19:16-21) Ame hna hmaca ju pe hi me tro hleuhleu lo thupëtresij. Thatreine kö angeice mekun, laka, tro angeic a nuetrije tune hi la, la trenge mo i angeic. Ngacama tru la ihnimi angeice koi Iehova, ngo sisitria catre pala kö la ihnimi angeic kowe la itre mo i angeic.
11, 12. (a) Nemene la itre trenge ewekë i Iesu ka upi së troa thele mekun göne lo itre mo ne ngönetrei? (b) Troa sewe së tune kaa hnene la itre mo, troa nyihlue i Iehova?
11 Hnene la ewekë cili hna upi Iesu troa qaja la ketre ithanata ka ketre pengöne celë: “Huliwa pi hë la tena mo troa lö kowe la baselaia ne hnengödrai . . . Uthithi la kamela troa lö kowe la hna kuje la jöm, ngo pepete pi hë la tena mo troa lö kowe la baselaia i Akötesie.” (Mataio 19:23, 24) Hapeu, Iesu kö a hape thaa ijije fe kö tro la itre trena mo troa hane lö kowe la Baselaia? Ohea, pine laka, nyidrëti a qaja hmaca jë, ka hape: “Ngo ateine Akötesie la nöjei ewekë asë.” (Mataio 19:25, 26) Nyipici, jëne la ixatua i Iehova, hetrenyi fe la itre trena mo ka hane sine lo itre keresiano hna iën. (1 Timoteo 6:17) Ngo eje hi laka, ngacama kola asesëkötrë së la aqane ithanata i Iesu e celë; ngo ame pe, ka hetre alien catr’ ej koi së: Nyidrëti a hmekë së.
12 E maine tro la ketre atr a piine la itre mo i angeice tune la aqane hniine la itre mo hnene lo thupëtresij, troa jole catre koi angeic troa hane nyihlue i Iehova cememine la hni ka pexej. Nge nyipici lai, thaa kowe hmekuje kö la atre trena mo hë, ngo kowe fe lo itre ka “ajane troa tena mo.” (1 Timoteo 6:9, 10) E hniine pala ha hnene la atr la itre mo ne fen, tre, thaa tro hë angeic a hane atrehmekune hnyawa laka, nyipi ewekë fe troa aejëne lo itre aja i angeic ngöne la götrane la ua.’ (Mataio 5:3) Ame la pune lai, thaa nyipi ajane hmaca kö angeic troa thele ixatua thei Iehova. (Deuteronomi 6:10-12) Tro pena ha angeic a thele matre ketrepengöne la aqane troa wanga atrunyi angeic hnine la ekalesia. (Iakobo 2:1-4) Tru hmaca pena ha la traeme hnei angeic hna xom thatraqane la itre mo i angeic, nge co pë hë la hna hane nyihlue i Iehova.
Eëne Jë La Aqane Wai Ewekë Ka Meköt
13. Nemene la aqane wai ewekë ka ngazo thene la angetre Laodikea?
13 Ngazo la aqane wai ewekë ne la ekalesia ne Laodikea ekö ngöne lo hneijine i Iesu; aqane wai ewekë ka ngazo göne la itre mo ne fen. Öni Iesu ka hape: “Öni eö: ‘Tena mo ni, nge hetre nyingë hë, nge pë fe kö kete ewekë ka pate theng;’ ngo tha’te kö eö laka hnëjinë hë eö, me ngazo, me pë ewekë, me timek, me tro xö;” Thaa hnene kö la itre trenga mo i angetre Laodikea, hna ee angatre kowe la pengöne ka hleuhleu cili. Hnene pe laka, hnei angatre hna mejiune kowe la itre trenga mo i angatr, ngo thaa mejiune pe koi Iehova. Nemenë hë la thangane koi angatr? Manoiaji hë angatr ngöne la götrane la ua, celë hi matre kola ‘hmitra’ angatre pi qa hnine la qe i Iesu.—Hna Amamane 3:14-17.
14. Pine nemene matre ijije troa qaja aloine la itre keresiano ne heberu hnei Paulo?
14 Ame pena ha ngöne ketre götran, hnei Paulo hna qaja aloine la itre keresiano ne Heberu, qa ngöne la aqane cile angatr kowe la ketre iangazo. Öni angeic: “Hnei nyipunie hna xomi hni madine la hna thöeëne la ite ewekë i nyipunie, nge ate hë nyipunie laka hetenyi hë nyipunie la tenge mo ka nyipi ewekë me cile hut.” (Heberu 10:34) Thaa nanazije menu kö la itre keresiano cili, pine la hna paatr la itre mo i angatr. Thaa paatre kö la madrine i angatr, pine laka, hnei angatr hna xöle huje hnyawa la trenge nyi angatr ka tru thupen, ene la “tenga mo ka nyipi ewekë me cile hut.” Tune la atre itö ngöne lo ceitune i Iesu, laka, angeic a salemënetrije pi la nöjei ewekë i angeic matre troa itöne la ca penina ka tru alameken; ketre tui angatre fe, catrë hë la mekune i angatr troa xölehuje catrëne la mejiune kowe la Baselaia, ngacama akötre catre koi angatr. (Mataio 13:45, 46) Drei la aqane ujë ka inamacan!
15. Tune kaa la aqane thele panëne la Baselaia hnene la ketre keresiano föe ne Liberia?
15 Alanyimu enehila la itre keresiano ka eëne la aqane ujë cili ka inamacan. Ame e liberia, hna aijijëne la ketre thöth keresiano föe troa hane ini ngöne itre hna ini ka tru lo hna hape Universite. Ame ngöne la nöje cili, tre, celë hi la ketre jëne troa hetrenyi la ketre mele ka loi elany. Ngo ame pe, ame la trejine föe, tre ka pionie angeic; ka cainöje eahlo ngöne la drai ka pexej. Nge hna hë angeice hë troa hane xome sinën la huliwa ne pionie hut. Angeic a iëne jë troa amë panëne la Baselaia me xome la huliwa ne pionie hut. Köni treu i angeic petre hi ngöne la götrane hna ami angeice ngön, nge angeice fe hë a nyiqaane la 21 lao etid. Nyimutre la itre föe ka tui angeic, ka thipëne la itre mo ne fen, tre angatr a catre thele troa amë panën la Baselaia ngöne la mele i angatr. Tune kaa la aqane cilaxome angatre la aqane mekune cili ka inamacan, e hnine la ketre fene ka nyenyape thele me aja mo ne ngönetrei? Hnei angatre hna eëne la itre xaa thiina ka lolo. Tro sa pane ce ithanatane la itre xane itr’ej.
16, 17. (a) Troa xatua së tune kaa hnene la tro qahmihmi troa mejiune koi Iehova? (b) Pine nemen matre nyipi ewekë tro sa akökötrene la mejiune së kowe la itre hna thingehnaeane hnei Akötresie?
16 Tro qahmihmi. Öni Tusi Hmitrötr: “Lapaune ju koi Iehova hnene la hni’ö ka pexej, ngo the lapa qale kowe la hnei ‘ö hna trotrohnin. Mekune ju koi nyidë ngöne la nöjei goje i ‘ö asë, nge tro pena nyidëti a amekötine la ite jë i’ö. The pi inamacane kö ngöne la mekune i ‘ö.” (Ite Edomë 3:5-7) Ame itre xaa ijin, kösë lolo la aqane ujë hna sajuëne hnei fen. (Ieremia 17:9) Ngo ame la nyipi keresiano ka hni ka menyik, tre, angeic a nue Iehova troa eatrongë angeic. (Salamo 48:14) ‘Ngöne asë hi la nöjei jë i angeic’, maine itre huliwa ne la ekalesia, maine göi ini, maine göi huliwa i maseta, maine göi nyine madrin me ketre ewekë ju kö, angeic pala hi a thele la itre ihaji Iehova cememine la hni ka ipië me tro qahmihmi.—Salamo 73:24.
17 Mejiune kowe la itre hna thingehnaeane hnei Iehova: Öni Paulo: “Ke ijije la ate tro koi Akötesie troa kapa, ka hape, eje kö nyidë, nge nyidëti la ate nyi june koi angete thele catë nyidë.” (Heberu 11:6) Maine easë a luelue laka Iehova a troa eatrën la itre hnei Nyidrëti hna thingehnaean, haawe, canga tro hi së lai a ‘huliwan’atrune la fen.’ (1 Corinito 7:31) Ngo maine ka catre la lapaune së, haawe, ketre tro fe hë a catre la mekune the së troa pane thele la Baselaia. Nge troa eköthe tune kaa la lapaune ka catre cili? Hnene la hna easenyi pala hi koi Iehova jëne la itre thithi qa kuhu hni, me hna isa inine pala hi la Tusi Hmitrötr. (Salamo 1:1-3; Filipi 4:6, 7; Iakobo 4:8) Ijije tro sa thithi tui Davita joxu, me hape: “Iehova fe, hnenge hna lapau cilie ; öning, Cilieti la Akötesingö.’ Ataqate la loi cilie!”—Salamo 31:14, 19.
18, 19. (a) Tune kaa la aqane acatrene la mejiune së koi Iehova hnene la aqane catre xome së la huliwa i Nyidrë? (b) Pine nemene matre nyipi ewekë kowe la keresiano troa huujën la mele i angeic?
18 Troa Catre ngöne la huliwa i Iehova: Paulo a iakeune la lue mekun, ene la troa catre nyihlue i Iehova memine la troa mejiune kowe la itre hna thingehnaeane hnei Nyidrë; öni angeic: “Nge eëhuni a ajane tro nyipunie a isa amamane la akötre hnine mate mekune catëne la mejiune uti hë la pun.” (Heberu 6:11) Maine tro pala hi sa catre troa nyihlue i Iehova, tro hë Nyidrëti a xatua së. Nge e drenge mina ha së elanyi la ixatua cili, haawe, kolo fe hi a catre trootro fe la mejiune së, ene pe ‘cile huti së nge tha enienije kö.’ (1 Korinito 15:58) Tro ha ahmadradrane la lapaune së me acatrene la mejiune së.—Efeso 3:16-19.
19 Hetre aja ne troa huuj: Hna nue hnei Paulo la ketre huliwa ka tru hnei angeice hna troa cilën, matre troa xötrethenge Iesu. Nge ngacama hetrenyi la itre hnepe jole hnei angeic hna cile kow, ngo ame pe, tre, ka lolo la aqane ië ewekë i angeic. (1 Korinito 4:11-13) Thaa Iehova kö a thingehnaeane la ketre mele ka pipixenyë catre kowe la itre hlue i Nyidrë enehila; Ohea, tro pe angatr’a qëmeke kowe la itre jole ka isa pengön. Maine tro sa ahmaloeëne me huujën la mele së, easë hi lai a amamane laka, easë a catre troa nyihlue i Iehova.—1 Timoteo 6:6-8.
20. Pine nemene matre nyipi ewekë la xomihni ahoeany kowe la atre ka amë panëne la Baselaia ne hnengödrai?
20 Xomihni ahoeany: Hnei Iakobo, ketre atre dreng hna ithuecatr kowe la itre sine huliwa i angeic keresiano, me hape: “Qa ngöne lai, ange tejine fe, xomi hnine ju uti hë traqa la Joxu.” (Iakobo 5:7) Thaa ka hmaloi kö troa xomihni ahoeany ngöne la fene celë ka ajan troa tro nyimenyime la itre ewekë. Ngo Paulo a upi së troa “xötrethenge angat’angete hetenyi la nöjei hna thinge hnaean, thenge la lapaune me xomi hnin.” (Heberu 6:12) Haawe, loi e hetre hni ne ajane së troa treqe Iehova. Ame lo mele ka pë pune ngöne la Paradaiso e celë fen, hapeu, thaa celë kö ewekë lai ka sisitria hne së hna treqen?
21. (a) Nemene la hne së hna amaman, e tro sa thele panëne la Baselaia? (b) Nemene la hne së hna troa ithanatane ngöne la ita ne thup ka troa xulu?
21 Nyipici, ka inamacan la eamo i Iesu göne lo troa pane thele la Baselaia. E tro sa kuca thenge lai, easë hi lai a amamane laka, nyipici la mejiune së koi Iehova, nge celë hmekuje hi aqane mele ka sisitria nge ka pëkö ethan kowe la keresiano. Ngo, Iesu fe a haji së troa catre “pane thele la . . . thina ka meköti [Akötresie].” Tro pë hë së a ce wange ngöne la ini ka calemi, la kepine matre nyipi ewekë catre la ithuecatre cili kowe la hnedrai së enehila.
Ijiji epuni kö troa qeje pengön?
• Nemene la aqane wai ewekë ka inamacan hnei Iesu hna hamë së, göne la itre mo ne ngönetrei?
• Nemene la ini nyine tro sa xome qa ngöne lo ceitune hna hamën hnei Iesu göne la kamela me ulane la jöm (nyilan)?
• Nemene la itre thiina ne keresiano ka troa xatua së troa pane thele pala hi la Baselaia i Akötresie?