Ita Ne Thup göi 1 JULAI
Nyima 24 me 212 Qene Drehu
Hapeue La Melehmaca—Ka Mele Kö Thei Nyipunieti La Mejiune Cili?
“Tro ha mele hmaca.”—ITE HULIWA 24:15.
1. Pine nemen matre kola hëne la meci ka hape, ketre ithupëjia?
“AME ngöne la fene celë, tre, hetrenyi la lue ewekë hne së hna thatreine troa neën, ene la mec memine la troa hotr.” Celë hi trenge ewekë la hna cinyihane hnene la ketre atr ka hlemu ne Amerika ngöne lo macatre 1789, Benjamin Franklin la ëje i nyidrë. Ngo tru catre hnei atr ka thaa huliwa thoi ngöne la angatr a hamëne la itre hotre i angatr. Qa ngöne lai, mama hnyawa ju hi, laka, meci la hne së hna thatreine troa neën, ngo ame hotr, tre, hna sesëtrane pë hë hnei itre xan. Maine pëkö ixatua, thatreine jë kö tro la ketre e easë a neëne la mec. Pëkö atr ka atreine troa neëne lai. Thaa ka meji kö la Hua, ene lo hnen la nöjei ka meci asë, laka itre atr hne së hna hnime fe e cili hnin. (Ite Edomë 27:20) Ngo tro sa pane ce wange la ketre mekune ka troa akeukawane la itre hni së.
2, 3. (a) Ngacama nyimutre la itre ka mekune ka hape thatreine kö troa neën la mec, pine nemen matre qaja jë ka hape ijije hi troa neëne la mec? (b) Nemene la nyine tro sa ce wang ngöne la hna cinyihane celë?
2 Kola hamëne hnene la Wesi Ula i Iehova la mejiune kowe la melehmaca, ene la troa mejë hmaca kowe la mel. Thaa kolo kö lai a pu, pëkö ketre ewekë e celë fen me e koho hnengödrai ka troa sewe Iehova troa eatrëne me aejën la mejiune cili. Ngo ame koi itre xan, tre, thaa tro kö angatr a hane mec, celë hi ewekë lai hna thaa trotrohnine kö hnene la ka alanyim. Pine nemen? Pine laka kola troa mele pe la “ka ala nyimu atraqatr” qa ngöne la “akötr atraqatr,” laka calemi catre hë. (Hna Amamane 7:9, 10, 14) Thupene lai, tro hë angatr a mele pe cememine la mejiun kowe la mele ka epine palua. Haawe, ame koi angatr, tre, ijije hi troa ngaan la mec. Ketre, “Meci la . . . hna troa apaten.”—1 Korinito 15:26.
3 Nyipi ewekë troa xecie koi së la mejiune kowe la melehmaca tui Paulo aposetolo; hnei nyidrëti hna qaja ka hape: “Tro ha mele hmaca la nöjei ka meköt, me ka tha meköti kö.” (Ite Huliwa 24:15) Tro sa ce wange la köni hnying göne la melehmaca. Ame la hnapan, nemene la ka acatrene hnyawa la mejiune cili? Ame la hnaaluen, tre, tune kaa la aqane troa akeukawane la itre hni së isa ala caas hnene la mejiune kowe la melehmaca? Ame la hnaakönin, tre, nemene la thangane la mele cili kowe la aqane mele së enehila?
Melehmaca—Thaa trengathoi Kö
4. Kola mama tune kaa laka ka nyipi ewekë catre la melehmaca ngöne la itre hnei Iehova hna ajane troa kuca?
4 Hetrenyi la itre ewekë ka aijijë së troa anyipicine laka hetre mele hmaca. Ame la hnapan, tre, ka nyipi ewekë catr la melehmaca ngöne la hnei Iehova hna ajan troa kuca. Mekune hi së lo Satana a ea la fen kowe la ngazo, memine la ethane ej, ene la mec. Qa ngöne lai, hnei Iesu hna qeje Satana ka hape: “Ate ihumuthi nyëne qa ngöne la qân.” (Ioane 8:44) Ngo hnei Iehova hna thingehnaeane laka tro la “föe” i Nyidrë maine organizasio hna aceitunëne me föe e koho hnengödrai, a hamëne la ketre “matran” ka troa athe la he ne la “une ekö,” me waja aficanyi Satana me apaatrenyi angeic epine palua. (Genese 3:1-6, 15; Hna Amamane 12:9, 10; 20:10) Pine laka hnei Iehova hna amamane trongëne la aja i Nyidrë memine la pengöne la matran, ene la Mesia, haawe, kola mama hnyawa laka, hetre hna troa kuca pala kö hnene la Matran, ngo thaa ene hmekuje kö la troa apaatrenyi Satana. Kola qaja hnene la Wesi Ula i Akötresie ka hape: “Nge mamapi la Hupuna i Akötesie, mate tro nyidëti a apatene la ite huliwa i diabolo.” (1 Ioane 3:8) Ame la meci ka xulu qa ngöne la ngazo i Adamu, tre, celë hi pane ewekë lai ngöne la itre huliwa i Satana, hnei Iehova hna troa apaatren jëne Iesu Keriso. Matre kola mama hnyawa laka, ka nyipi ewekë catr la mele hna hujën hnei Iesu memine la melehmaca.—Ite Huliwa 17:21; Roma 6:23.
5. Pine nemen matre tro ha atrune la ëje i Iehova hnene la melehmaca?
5 Catre thei Iehova la ajane troa atrune la atresiwa i Nyidrë ka hmitrötr. Hnei Satana hna jelengazone la ëje i Akötresie, nge hnei angeice fe hna silitrengathoi Nyidrë. Hnei angeic hna iaö Adamu me Eva, me hape, maine tro nyidroti xome la wene ne la sinöe hnei Akötresieti hna wathebo nyidroti troa xeni wen, ‘thaa tro jë kö nyidroti lai a mec.’ (Genese 2:16, 17; 3:4) Qaane ju hi lai, hnei Satana hna akökötrene la itre xaa trengathoi ka tune lai, tune la ini ka thoi laka, tro pe kö a mele la u ngöne la kola meci la atr. Ngo jëne la melehmaca, tro kö Iehova elanyi a amamane hnyawa la engazone la itre trengathoi cili. Tro Nyidrëti a anyipicine hutine laka Nyidrëti caasi hi la ka atreine troa Thepe së, me Amele së.
6, 7. fNemene la mekuna i Iehova göne la itre atr hna amelene hmaca?
6 Aja i Iehova troa eatrën la melehmaca ne la itre ka mec. Kola amamane hnyawa hnei Tusi Hmitrötr la itre aliene hni Iehova göne la melehmaca. Drei la itre trenge ewekë i Iobu, ketre atr ka mele nyipici, kola hape: “Maine meci hë la at, hape u, tro angeic’ a mele hmaca? Tro ni a teqene la ite drai asë ne la ishinge uti hë la troa ehnithi ni. Tro cilieti a könieti, nge tro ni a gemie koi cilie ; tro cilieti a fetesietine la huliwa ne la lue themie i cilie.” (Iobu 14:14, 15) Nemene la aliene la itre trenge ewekë celë?
7 Atre hi Iobu laka, ame la nyidrëti a mec, tre, hetre hnepe ijine tro nyidrëti a pane meköle itreqe. Nyidrëti a goeëne la ijine cili, ceitune me “ketre huliwa ka akötr,” nge ketre ijin hna thatreine troa neën, ngo tro pe a thepe nyidrë qa lai. Ame koi Iobu, tre, thaa luelue kö nyidrëti laka troa thepe nyidrëti elany qa ngöne la mec. Hnei Iobu hna atrehmekune laka tro kö a traqa elanyi la iamele koi nyidrë. Pine nemen? Pine laka atre hi nyidrëti la itre aliene hni me itre mekune ka eje ekuhu hni Iehova. Tro Iehova a “fetesietine (ajan)” troa öhne hmaca e mel la hlue i Nyidrë. Eje hi, hetre hni ne ajane i Akötresie troa amelene hmaca la itre atr ka meköt. Tro fe Iehova a aijijëne la itre xaa atr troa mele epine palua hnine la Paradraiso e celë fen. (Luka 23:43; Ioane 5:28, 29) Pine laka aja i Akötresieti la troa amelene hmaca la itre atr, drei ju hë la ka atreine troa sewe Nyidrë?
8. Tune kaa la aqane “anyipicine” la mejiune së kowe la itre drai elany?
8 Kola acatrene la mejiune së thatraqane la itre drai elany, hnene la melehmaca i Iesu. Ame ngöne lo Paulo a cainöj e Atena, hnei nyidrëti hna qaja ka hape: “Hnei [Akötresieti] hna sa la drai ne troa hnyingën’ amekötine la fene hnene la ate hnei nyidëti hna acil ; nge hna anyipicine hnei nyidë kowe la nöjei ate asë, ngöne la hna amele nyidëti hmaca jë qa hna mec.” (Ite Huliwa 17:31) Kola hnyimasai Paulo hnene la itre xaa ka drei nyidrë, ngöne lo kola qeje melehmaca. Ngo ala xalaithe pi kö la itre xan ka hane lapaun. Maine jë hna ketr la hni angatr, ke, hetre nyine anyipicine la mejiune cili, ene la melehmaca. Ame ngöne la Iehova a amele Iesu hmaca qa hna mec, hnei Nyidrëti hna kuca la ketre iamamanyikeu ka tru. Hnei Nyidrëti hna thapa la Hupuna i Nyidrë qa ngöne la mec kowe la mel, matre thaa ceitune hmaca kö me ketre atr, ngo ceitune pena ha memine la ketre ua ka trene men. (1 Peteru 3:18) Ka draië catre hë Iesu thupene lo hna amele nyidrëti hmaca, hune lo nyidrëti e celë fen e nyipine la itre atr. Nge pë hë meci thei Iesu nge atraqatre la mene i nyidrë thupe i Iehova; ame hë enehila, tre, nyidrëti ngöne la ketre göhnë ka aijijë nyidrë troa xome la itre hnëqa ka sisitria qaathene la Tretretro i Nyidrë. Hna jëne Iesu matre Iehova a amelene asë pë hë la itre xaa ka mec, göi troa mele e koho hnengödrai maine e celë pena fen. Hnei Iesu hna ketre qaja ka hape: “Ini hi la mele hmaca memine fe la mel.” (Ioane 5:25; 11:25) Ame ngöne la Iehova a amelene hmaca la Hupuna i Nyidrë, tre, celë hi nyine acatrene hnyawa lo mejiune ne la nöjei atr asë ka mele nyipici koi Nyidrë, laka troa amele angatre hmaca elany.
9. Tune kaa la aqane amë amamane hnyawa hnei Tusi Hmitrötr la enyipicine la melehmaca?
9 Hna anyipicine la melehmaca hnene la itre atr ka sin me öhne la iamamanyikeu cili, nge hna cinyihane hnine la Wesi ula i Akötresie. Hna qeje pengöne hnyawa e hnine la Tusi Hmitrötr lo eitre lao atr hna amelene hmaca qa hna mec e celë fen. Hna kuca amamane la itre iamamanyikeu cili, ene pe kola öhne hnene la itre atr. Hnei Iesu hna amele Lazaro thupene la foa lao drai hnine la hua, nge ala nyimu la itre sinee ka öhne lai, ene la itre atrene la fami, me itre enehmu, me itre atr ka lapa ezi angeic. Mama catre hnyawa ha jëne la iamele hmaca cili laka hna upi Iesu hnei Akötresie, ene pe thatreine kö troa jelethoi nyidrë hnene la itre hene hmi ka ithupëjia me nyidrë. Hnei angatre pe hna thele troa humuthi Iesu, ngo thaa nyidrëti hmekuje kö ngo Lazaro fe! (Ioane 11:17-44, 53; 12:9-11) Nyipici, ijije hi tro sa mejiune laka tro kö a eatr elanyi la mejiun, ene la mele hmaca. Hnei Akötresie hna hamë së la itre cinyihan, ene la itre ewekë ka traqa ekö tune la itre iamele hmaca, göi troa akeukawane la itre hni së me göi troa acatrene la lapaune së.
Loi e Keukawa Me Tingetinge La Itre Hni Së Hnene La Mejiun Ne La Mele Hmaca
10. Nemene la ka troa xatua së matre troa akeukawane la itre hni së qa ngöne la itre aqane iamele hmaca ekö hna cinyihane hnine la Tusi Hmitrötr?
10 Epuni kö a ajane troa tingetinge la hni epuni ngöne la epuni a qëmeke kowe la mec? Ijije hi troa tingetinge hnyawa la itre hni së hnene la itre iamele hmaca hna cinyihan e hnine la Tusi Hmitrötr. Maine tro sa e itre ej, me sine thele itre ej, me mekune itre ej, haawe, tro ha ketre ewekë ka mele koi së la mejiun ne la melehmaca. (Roma 15:4) Thaa itre ifejicatre kö lai. Itre ewekë lai ka traqa hnyawa kowe la itre atr ka tu së hi, nge ka mele ekö ngöne la ketre hneijin, me ngöne la ketre götran; thaa hna sile kö la itre ewekë cili, ngo ka traqa hnyawa itre ej ekö. Tro sa pane goeëne la ketre ceitun; kolo pane iamele hmaca e hnine la Tusi Hmitrötr.
11, 12. (a) Nemene la ewekë ka ngazo catr ka traqa kowe la sine föe ne Sarepeta, nge tune kaa la pane ujë i eahlo? (b) Qejepengöne jë la aqane hamëne Iehova la mene koi Elia perofeta i Nyidrë matre troa nyinyin la jol ka traqa kowe la sine föe.
11 Pane mekune ju la aqane mama ekö la iamele hmaca. Itre hnepe wiike ne Elia perofeta hë thene la sine föe ne Sarepeta, nyidrëti a lapa ngöne la hnahage ka he koho. Ketre hneijine ka hleuhleu catr. Hna lepe la nöj hnene idreuthi matre qaqacile catre la dro, nge kolo mina fe a jiin. Nyimutre la itre ka mec. Ase hë Iehova hane upi Elia troa kuca la ketre iamamanyikeu ka qea catre pi hë matre troa amanathithine la sine föe pine la lapaune me ipië i eahlo. Eahlo hë a troa meci hnei mecijin memine la nekö i eahlo trahmany, caasi pe hi la hnepe göxeni nge pë hmaca ju kö ketre; e cili hnei Elia hna hamëne pi la ketre hnepe falawa me oel matre troa xatua nyidro jëne la ketre iamamanyikeu. Nge thupene jë hi lai, tre, kolo hmaca pena ha a traqa la ketre ewekë ka ngazo catre koi eahlo. Kola traqa nyimenyime la ketre meci kowe la nekö i eahlo, ene pe meci ju fe kö nyën. Ame hna latresi atraqatre la sine föe! Jole catre koi eahlo, ke meci hë la trahmanyi eahlo, nge eahlo caasi pë hë; nge ame enehila, tre, nekönatre hmaca fe hë. Ame ngöne la eahlo a hleuhleu, eahlo a upe zö Elia jë memine la Akötresi nyidrë ene Iehova! Nemene la hna troa kuca hnene la perofeta?
12 Thaa hnei Elia kö hna hajine la sine föe pine la hnei eahlo hna iupezö menu. Ngo nyidrëti a qaja ka hape: “Awe pi koi ni la nekö i nyipo.” Thupene la hna elë fë la nekönatr kowe la hnahage e koho, Elia a anyimua thithi jë me sipone matre troa mele hmaca la nekönatr. Ame la pun, tre, Iehova a drenge me kapa la thith! Pane mekune ju la madrine ka eje ngöne la lue meke i Elia ngöne la nyidrëti a öhne la kola mano hmaca la nekönatr. Nyën a fe la lue hune meke i nyën, nge lualai hë la lue meke i nyën nge goe hë ke, mele hmaca ha. Elia a xepe la nekönatr me uti fë kowe la thine i nyën me qaja ka hape: “Hana wang, melë hë la nekö i nyipo.” Kola elitrauje la madrine ne la sine föe. Öni eahlo ka hape: “Hnene hi lai ini a ate hmekune enehila laka ate i Akötesie cilie, nge nyipici la wesi ula i Iehova ngöne la qe i cilie.” (1 Ite Joxu 17:8-24) Kolo ha kökötre catr la lapaune i eahlo koi Iehova me kowe la itre ka nyitrenge ewekë i Nyidrë.
13. Pine nemen matre ame la iamamanyikeu hna kuca hnei Elia kowe la neköne la sine föe, tre nyine tro fe a hane atingetingene la itre hni së enehila?
13 Maine tro sa mekune thele lai itre iamamanyikeu cili, haawe, tro ha akeukawane hnyawa la itre hni së. Drei la kola mama hnyawa laka atreine hi Iehova troa ngaane la mec! Pane mekune jë së la ijine kola troa amelene hmaca elanyi la itre ka mec; kola troa madrine tune la sine föe hnene la itre atr itre thauzane la etrun! Nge drei jë kö la etrune la madrine e koho hnengödrai, pine laka, Iehova a madrine troa upe la Hupuna i Nyidrë troa amelene hmaca la itre atr e cailo fen. (Ioane 5:28, 29) Hapeu, hna hane kö thapa la ketre sinee i nyipunie hnei mec? Drei la elolone troa atre laka atreine hi Iehova amelene hmaca la itre atr qa hna mec, nge tro Nyidrëti elanyi a eatrëne lai!
Mejiune i Epun Me Aqane Mele i Epuni Enehila
14. Tune kaa la aqane ketr la mele i epuni hnene la mejiune kowe la melehmaca?
14 Nemene la aqane ketr la mele i epuni enehila, hnene la mejiune kowe la melehmaca? Ijije hi tro la mejiune cili a hamëne la trenge catre koi epun, ngöne la epuni a qëmeke kowe la itre iaxösisi, me itre jol, me itre icilekeu, maine ketre hulö pena. Satana a ajan tro epuni a xouene la mec, matre tro epuni a nue pi hi la aqane mele nyipici epun nge troa kapa pena ha la itre xaa hna thingehnaean ka iamenu göi mele ka loi, ngo ka gufa pe. Mekune kö lo hna qaja hnei Satana koi Iehova, kola hape: “Ite ewekë asë hna hetenyi hnene la ate tro angeic’ a hamëne hnane la mele i angeic.” (Iobu 2:4) Ame la Satana a qaja la trenge ewekë celë, tre, angeice hi lai a sili trengathoi së asë, epuni fe. Nyipici kö ka hape, ame la kola traqa la ketre hulö koi epun, tre, tro hë epuni a tro triji Akötresie? Maine tro epuni a wanga atrune hnyawa la mejiune kowe la melehmaca, ijiji epuni hi troa catre kuca la aja ne la Tretretro i epuni e koho hnengodrai.
15. Tune kaa la aqane tro la itre trenge ewekë i Iesu hna cinyihane ngöne Mataio 10:28 a atingetingëne la itre hni së qëmekene la itre hulö?
15 Hnei Iesu hna qaja ka hape: “The qou kö e angete humuthe la ngönetei ngo tha’ teine kö troa humuthe la u fe; loi e troa qoue anganyidë ate ateine troa ahnëjinëne la ngönetei memine la u e gena.” (Mataio 10:28) Thaa tro kö sa xoue Satana maine itre hlue i angeice pena, ene lo itre atr. Nyipici, ame itre xan, tre, maine jë atreine hi angatr troa akötrë së, uti fe hë la humuthi së. Ngo ame la ewekë ka ngazo catr hnei angatr hna atreine troa kuca, tre, tro hë lai a paatr e ketre ijin. Ame Iehova, tre, atreine hi Nyidrë, nge tro kö Nyidrëti elanyi a apaatrene la nöjei ngazo hna kuca kowe la itre hlue i Nyidrë ka mele nyipici, nge goi tro fe a amele angatre hmaca. Iehova hmekuje hi la nyine tro sa xouen, me thili kow, me metrötrën. Nyidrëti hmekuje hi la ka atreine troa hamëne hmaca la mel memine la nöjei hna ahnithe thatraqane la mele elany; nge atreine hi tro Nyidrëti a apaatrene la ngönetrei memine la u hnine la Gehena. Eloine pe, thaa aja i Iehova kö la mele cili koi së. (2 Peteru 3:9) Pine la mejiune kowe la melehmaca, haawe, ame së itre hlue i Akötresie, ka xecie hnyawa koi së laka pëkö hne së hna troa xouen. Maine tro sa mele nyipici koi Iehova, eje hi lai laka, tro sa hetrenyi la mele ka thaa ase palua kö, nge pëkö hnei Satana me itre hlue i angeic hna atreine troa kuca matre troa sawa la ewekë cili.—Salamo 118:6; Heberu 13:6.
16. Tune kaa la aqane ketr la itre ewekë hne së hna pane amë, hnene la aqane trotrohnine së la melehmaca?
16 Maine ka mele the së la mejiune kowe la melehmaca, ijije hi troa saze la aqane wange së la mel. Easë a atrehmekune laka ‘easë a mel maine mec, te ite ate i Iehova së.’ (Roma 14:7, 8) Hetrenyi la itre nyine tro sa pane kuca, celë hi matre easë a trongëne la eamo i Paulo, kola hape: “The ce thina kö nyipunie memine la fene hnengödrai ; ngo loi e ujë nyipunie hnene la kola ahnyipixene la ite hni nyipunie, mate ate nyipunie la aja i Akötesia ka loi, me nyine amadin, me ka meköt.” (Roma 12:2) Nyimutre la itre atr ka nyinyape thele la nöjei aja, itre aja ne ngönetrei, nge paatre kö thei angatre la xömihni. Pine laka angatr a mekune ka hape ka xoxopatre hi la mel, haawe, kola ae trootro la mejiun, nge kola catre nyinyape thele la itre madrin, nge maine ka hmi angatr, thaa ka ihmeku kö eje memine la “aja ka pexeje i Akötresie.”
17, 18. (a) Tune kaa la aqane qaja hnene la Wesu Ula i Iehova la exoxopatrene la mele ne la atr, ngo nemene la hnei Akötresieti hna thele the së? (b) Pine nemen matre easë a ajane troa atrunyi Iehova e nöjei drai?
17 Nyipici laka, ka xoxopatre la mel. “Hna weje catë hun, ame hna sheshëpi hun,” maine jë ngöne la 70 maine 80 lao macatre. (Salamo 90:10) Kola traqa la itre atr me paatre tune la ihaö, tune la iahnu, me tune la hna mano. (Salamo 103:15; 144:3, 4) Ngo thaa hnei Akötresieti kö hna mekune tro hi së a tru trootro ngöne la itre hnepe macatre, me kapa la inamacan, me atrepengöne la aqane mel; thupene lai kola melëne la itre xaa hnepe macatre, kola uti ipië trootro la mel, me wezipo me mec. Hnei Iehova hna xupe la itre atr cememine la ajane troa mele epine palua. Kola ahnithe koi së hnei Tusi Hmitrötr ka hape: “E kuhu hni angatre la mekune kowe la itre drai ka thaa ase palua kö, MN”. (Ate Cainöj 3:11) Hapeu, ka iaxösisi kö Akötresie, matre Nyidrëti a hamë së la aja cili nge thupene lai thaa nue kö Nyidrëti matre tro sa kepe eloin? Ohea, ke, “Akötesieti la ihnim.” (1 Ioane 4:8) Nyidrëti a troa xome la melehmaca matre ijije fe kowe la itre atr ka meci troa hane mele epine palua.
18 Qa ngöne laka hetre mejiune së kowe la melehmaca, haawe, ijije hi tro sa mele xetietë elany. Thaa tro kö sa hnehengazo menu, me thele troa aejëne asë enehila la itre mekuna së. Thaa tro kö sa “huliwan’ atrun” me lö hnine menune pala ha la fene celë ka troa canga paatr. (1 Korinito 7:29-31; 1 Ioane 2:17) Thaa ceitu së kö memine lo itre atr ka pëkö mejiun, eje the së la ahnahna cili ka lolo catr: Atre hi së laka maine tro sa mele nyipici koi Iehova Akötresie, tro ha thatrehmekune me epine palua la itre macatre ne tro sa atrunyi Nyidrë me öhnyi manathithine la mel. Qa ngöne lai, loi e tro sa atrunyi Iehova ngöne la nöjei drai, Nyidrë Atre acatrene hnyawa la mejiun kowe la melehmaca!
Tune Kaa La Aqane Troa Sa?
• Nemene la nyine tro sa mekune hnyawa ngöne la kola qeje mejiune kowe la melehmaca?
• Nemene la itre ewekë ka anyipicine hnyawa la mejiune së kowe la melehmaca?
• Tune kaa la aqane troa akeukawane la itre hni epuni jëne la mejiun ne la melehmaca?
• Nemene la aqane troa ketr la mele i epun hnene la mejiun ne la melehmaca?