Troa Xome La Ita Ne Thup Celë e 02 Ogas Me Wiike Cili
Thele Jë Troa Acatrene La Ekalesia
“Eamojë nyipunie, me akeukawane ipitön.”—1 THES. 5:11.
1. Nemene la itre manathithi ka xulu qa ngöne la hna ketre atrene la ekalesia ne Keresiano, ngo nemene pala hi la itre jol hne së hna troa cile kow?
KETRE manathithi ka tru la troa ketre atrene la ekalesia i Keresiano. Nyipunieti a eköthe la ketre aqane imelekeu ka lolo me Iehova. Hnene laka nyipunie a mejiune kowe la Wesi Ula i Nyidrë, ene pe kola thupë epuni qa ngöne la itre ethanyine la ketre aqane mele ka thaa ihmeku kö memine la aqane mele ne la Keresiano. Kolo mina fe a lapa xötreithi nyipunie hnene la itre enehmu ka lolo ka ajane tro epuni a kuca la loi. Eje hi laka, nyimutre catr la itre manathith. Ngo nyimutre mina fe la itre pengöne jol hna cile kow hnene la itre xaa Keresiano. Maine jë itre xan a aja ixatua göi troa trotrohnine hnyawa la itre ewekë ka jui ne la Wesi Ula i Akötresie. Hetrenyi fe la itre xan ka wezipo maine ka lapa fë e kuhu hni angatr la itre mec, maine pena ka xeni pun la itre mekune ka ngazo hnei angatre hna axeciën. Nge ketre, easë asë hi a mele ngöne la ketre fene ka iananyi me Akötresie.
2. Tro sa ujë tune kaa kowe la itre trejine me easë ka cile kowe la itre jol, nge pine nemen?
2 Pëkö ka ajane easë troa akötre la itre Keresiano maine jipa ngöne la kola cile kowe la ketre jol. Hnei Paulo aposetolo hna aceitunëne la ekalesia memine la ketre ngönetrei, me hape “maine akötë hë la ketre hnepe ngönetei, ce aköte asë ite hnep’ ej.” (1 Kor. 12:12, 26) Ame ngöne la itre ijine cili, loi e tro sa catre troa xatuane la itre trejine me easë, itre trahmanyi me föe. Hetrenyi e hnine la Tusi Hmitrötr la itre edromë ka amamane la ixatua hna hamëne hnene la itre atrene la ekalesia kowe la itre atr ka cile kowe la itre jol. Ame ngöne la easa wange trongëne la itre edromë cili, pane thele jë së la aqane tro sa xatuane la itre trejine ka melëne la itre ewekë celë. Tro sa xatuane tune kaa la itre trejine me easë ngöne la götrane la ua, me hane acatrene fe la ekalesia i Iehova?
“Nyidroti a Thei Angeic”
3, 4. Nemene la aqane xatua Apolo hnei Akula me Perisila?
3 Ame lo kola lapa hnei Apolo e Efeso, tre, ketre atr ka catre cainöje hë angeic. Kola qaja ngöne la tusi Ite Huliwa, ka hape: “Keukawa ha la hni angeic, ame hnei angeice hna ewekë me inine hnyawa la ite ewekë göi Iesu, kola wangate hmekune hmekuje hi la bapataiso i Ioane.” Maine jë ame la kepine matre thatre kö Apolo la pengöne la bapataiso “kowe la atesiwa i Tetetro, me Hupuna, me Uati Hmitöt,” tre, hnene laka hna cainöje koi angeic qëmekene lo Penetekos 33 M.K, hnene lo itre hlue i Ioane Atre Bapataiso maine pena hnene lo itre hlue i Iesu. Ngacama ketre atr ka catre cainöj Apolo, ngo hetrenyi la itre xaa ini ka sisitria hnei angeice hna thaa trotrohnin. Troa xatua angeice tune kaa hnene la hna casi memine la itre hlue i Akötresie?—Ite hu. 1:4, 5; 18:25; Mat. 28:19.
4 Hnene la lue trefëne Keresiano, Akula me Perisila hna drei Apolo a ithanata catr hnine la sunago, ene pe hnei nyidro hna thei angeic me ini angeice hnyawa. (E jë la Ite Huliwa 18:24-26.) Celë hi ketre ewekë ka lolo hna kuca. Nyipici laka hnei Akula me Perisila hna ithanata amenyikenyi koi Apolo me thele troa xatua angeic; thaa hnei nyidroti kö hna wanga aconyi angeic me xöjetriji angeice pena. Ame hi la ewekë hnei angeice hna thatre, tre, ene la aqane trongene la pane ekalesia ne Keresiano. Drei la hni ne ole i Apolo kowe lo lue sine tronge i angeic ka hnyipixe, ka ce thawa me angeice lo lai itre ithuemacany ka sisitria catr. Pine laka atre hnyawa ha Apolo la itre ithuemacanyi cili, ene pe hnei angeice hna “xatuan’ atrun” lo itre trejine me angeic qaa Akaia, me hamë angatr la ketre nyine anyipicine ka trene men.—Ite hu. 18:27, 28.
5. Nemene la ixatua hna hamëne cememine la ihnim hnene la itre thauzan lao itretre cainöjëne la Baselaia, nge nemene la thangane lai?
5 Ame hnine la ekalesia i Keresiano enehila, nyimutre la itre atr ka hetre hni ne ole kowe la itre trejine ka xatua angatr troa trotrohnine la Tusi Hmitrötr. Nyimutre la itre aqane imelekeu ka lolo hna eköthe me hna acatrene hnene la itre hnainin memine lo itre ka hamë ini koi angatr. Nyimutre la itre treu ne ce porotrike memine la itre atr, matre troa xatua angatr troa trotrohnine la nyipici. Ngo eje thene la itretre cainöjëne la Baselaia la ajan troa huujëne la itre ewekë cili, ke, atrehmekune hi angatr laka nyine mele lai kowe la itre atr. (Ioane 17:3) Nge drei la ketre manathithi ka tru troa goeëne la itre atr a xölehuje la nyipici me mele thenge ej, me hane huliwane la mele i angatr matre troa kuca la aja i Iehova!
“Hna Qaja Aloinyi Angeic”
6, 7. (a) Pine nemene matre Paulo a ië Timoteo troa sine tronge i nyidrë ngöne la huliwa ne mesinare? (b) Hnei Timoteo hna kökötre tune kaa?
6 Ame ngöne lo hnaaluene tronge i Paulo me Sila ceitune me itre mesinare ngöne la traon e Lusetara, hnei nyidro hna öhne e cili la ketre thöth, Timoteo la ëjen, nge maine jë truedre lao macatre i nyën. “Hna qaja aloinyi angeice hnei ange tejin’ e Lusetara me Ikonio.” Ame Eunike thine i Timoteo me Lois qaaqa i angeic, tre, lue Keresiano nyidro ka sa xepu hë, ngo ame pëhë la keme i angeic, tre, thaa ka hmi kö. (2 Tim. 1:5) Maine jë ame ngöne lo lue macatre ka ase hë, hnei Paulo hna atre la hnepe lapa cili ngöne lo nyidrëti a xötrei traqa ngöne la traone cili. Ngo kolo ha wanga atrunyi Timoteo enehila hnei Paulo aposetolo, ke, ketre thöthi angeic ka ketre pengöne kö. Haawe, hna kapa hnene la lapa ne la itre qatre thup, laka, tro Timoteo a ce tro me Paulo matre troa xatua nyidrë ngöne la huliwa ne mesinare.—E jë la Ite Huliwa 16:1-3.
7 Nyimutre la itre ini hna kapa hnei Timoteo qaathene la sine tronge i angeic ka tru catre kö hui angeic. Pine laka kökötre catre Timoteo ngöne la götrane la ua, ene pe hnei Paulo hna upi angeic troa wange trongëne la itre ekalesia me nyi trenge ewekë i nyidrë. Maine nyipici laka Timoteo la ketre thöthi ka lapa hnö, nge ka thatrepengöne hnyawa pala kö la mel, ngo hnene la hnei angeice hna ce tro me Paulo ngöne la 15 lao macatre, ene pe kökötre hnyawa ha angeic nge angeice fe hë la ketre atre thup ka sisitria.—Fil. 2:19-22; 1 Tim. 1:3.
8, 9. Nemene la nyine troa kuca hnene la itre atrene la ekalesia matre troa ithuecatre kowe la itre thöth? Hamëne jë la ketre ceitun.
8 Ame la itre thöth trahmanyi me föe e hnine la ekalesia, tre, hetrenyi nyudreni la atrein. Maine troa ithuecatre kowe la itre thöthi cili me thupë nyudreni hnyawa hnene la itre trejine ka maca ngöne la götrane la ua, haawe, tro fe hë nyudreni a thele troa maca me hane kapa la itre hnëqa ka tru e hnine la nöje i Iehova. Pane wange hnyawa ju e hnine la ekalesia i epun! Hapeu, hetrenyi kö la itre thöthi ka ijije troa nue la mele i angatr tui Timoteo? Maine tro epuni a xatuane me ithuecatre koi nyudren, eje hi lai laka, tro hë nyudreni a pionie me huliwa hnine Bethela me hane mesinare, maine pena troa itretre thup ka iwai trootro. Nemene la nyine tro epuni a kuca, matre troa xatua nyudreni troa eatrëne la itre aja cili?
9 Kola mekune hmaca hnei Martin, ketre trejine ka huliwa hnine Bethela ngöne la 20 lao macatre, la aqane wanga atrunyi angeice ekö hnene la ketre atre thupëne la sirkoskripsio ngöne lo nyidroti petre kö a ce cainöje trootro, lo 30 lao macatre qëmeken. Hnene la atre thup hna qaja koi angeic cememine la madrin la huliwa hnei nyidrëti hna kuca hnine la Bethela ngöne lo nyidrëti a thöth. Hnei nyidrëti hna ithuecatre koi Martin troa wanga atrune la enyipiewekëne la troa nue la mele i angeic kowe la organizasio i Iehova, me xome la huliwa cili. Kola atrehmekune hnei Martin laka, hnene la porotrike cili hna xatua angeice troa xomi mekun e thupen. Drei la ka atre la thangane ka loi hnei epuni hna troa kuca kowe la itre thöth, hnene la hna ithuecatre koi nyudren troa eköthe me thele troa eatrëne la itre aja i nyudreni ngöne la götrane la ua?
“Haji Angete Hni Ka Ewë”
10. Nemene la aliene hni Epaferodito, nge pine nemen?
10 Hnei Epaferodito hna trongëne la itre gojenyi ka jol qaa Filipi a tro Roma eë, matre troa wai Paulo, lo hna akalabusine pine la lapaune i nyidrë. Ceitui angeice me ketre maca i angetre Filipi. Thaa angeice hmekuje kö a traqa fë kemeji ne la aposetolo, ngo kolo mina fe a mekune troa ce lapa me Paulo me xatua nyidrë ngöne la ijine cili ka jole catr. Ngo “maine meci hë” Epaferodito e Roma hnei wezipo. Eje thei Epaferodito la hni ka ewë, ke, angeic a mekune laka, thaa eatrëne ju kö angeic la hnëqa hna ahnithe koi angeic.—Fil. 2:25-27.
11. (a) Pine nemene matre thaa sesëkötre kö së, laka, hetre itre xan e hnine la ekalesia ka lapa fë mec e kuhu hni angatr? (b) Nemene la ithuecatre hnei Paulo hna hamëne nyine troa xatua Epaferodito?
11 Ame enehila, nyimutre la nöjei pengöne ewekë ka ukune la itre atr troa lapa fë e kuhu hni angatr la ketre mec. Kola mama ngöne la rapor hna hamëne hnene la Organisation mondiale de la santé, laka, 1 koi 5 la itre atr ne la fen asë hna hane tithe hë e itre xaa ijin hnene la meci cili. Kolo mina fe a hane ketr la nöje i Iehova. Hnene laka jole kowe la ketre atr troa sajuëne la itre aja ne la hnepe lapa i angeic, me troa tithi angeice hnei mec, me troa kucakuca pine la itre hnepe ngazo, ene pe canga tro hi angeic a luelue me thë fë hni. Nemene la nyine troa kuca hnei angetre Filipi matre troa xatua Epaferodito? Hnei Paulo hna cinyihan, ka hape: “Kepe angeice jë nyipunie göi Joxu, memine la madin’ asë; nge nyipi ewekëne ju la ite ka tui angeic; ke maine meci hë angeice fë la huliwa i Keriso, nge tha hnö mele kö angeic, mate troa hna i nyipunie ka pate troa xatua ni.”—Fil. 2:29, 30.
12. Nemene la ewekë ka troa akeukawane la hni ne la atre thë fë hni?
12 Loi e tro mina fe sa ithuecatre kowe la itre trejine me easë ka kucakuca me ka lapa fë meci e kuhu hni angatr. Ijije tro sa qaja koi angatr la itre ewekë ka lolo hnei angatre hna kuca ngöne la huliwa i Iehova. Maine jë hnei angatre hna saze la mele i angatr matre troa itre Keresiano, maine troa xome pena la huliwa ne cainöj ngöne la drai ka pexej. Atrehmekune hnyawa hi së la etrune la trenge catre hnei angatr hna kuca, nge ijije tro sa akeukawane la hni angatr me qaja, ka hape, madrine catre fe Iehova. Ngacama thaa ijije hë kowe la itre xaa trejine ka mele nyipici troa kuca lo itre ewekë hnei angatre hna kuca ha ekö, hnene laka qatre hë angatr maine ka wezipo pena, ngo ame pe loi e tro pala hi sa wanga atrunyi angatr me metrötrë angatr, ke, nyimutre la itre macatre ne angatr a huliwa koi Iehova. Ngacama isa pengöne kö la itre jol ka eje thene la itre tejin, ngo Iehova a upe la itre hlue i Nyidrëti asë ka mele nyipici troa: “Haji angete hni ka ewë, xatuane la ite ka kucakuca, xomi hnine ahoeane la nöjei ate asëjëihë.”—1 Thes. 5:14.
“[Troa] Qeje Loi Angeic, Me Aupunyi Angeic”
13, 14. (a) Nemene la ketre huliwa ka tru hna kuca hnene la ekalesia ne Korinito, nge pine nemen? (b) Nemene la thangane la hna upetröne eë la ketre atr?
13 Hnene lo pane ekalesia ne Korinito hna cile kowe la ketre jol; hetrenyi la ketre trahmany ka thaa ietrane kö la ngazo i angeic. Kola apuingazone la ekalesia hnene la aqane ujë i angeic, nge kolo mina fe a athixötrëne la itre atr ka thaa hmi kö. Haawe, hnei Paulo hna amekötine hnyawa, laka, loi e troa upetröne eë la atr cili qa hnine la ekalesia.—1 Kor. 5:1, 7, 11-13.
14 Hetre thangane ka loi la iameköti cili. Pëhë ewekë ka ajojezine la ekalesia, nge atrehmekune hë lo la atr ka kuca la ngazo la sipu ngazo i angeic me ietra. Hnene laka kola mama hnyawa la aqane ietra i angeic, ene pe hnei Paulo hna cinyihane ngöne la hnaaluene tusi nyidrë kowe la ekalesia cili, laka, loi e tro angatr a kepe angeice hmaca. Ngo thaa celë hmekuje kö la nyine troa kuca. Hnei Paulo mina fe hna upe la ekalesia troa “qeje loi angeic, me aupunyi angeic, wanga ulumeju la ate ka tune lai hnene la hleuhleu ka nyipi atraqat.”—E jë la 2 Korinito 2:5-8.
15. Tro sa goeëne tune kaa la itre atr ka ietra nge hna kapa hmaca e hnine la ekalesia?
15 Nemene la hna ini së hnene la edromë celë? Easa hleuhleu ngöne la kola upetröne eë la itre atr. Maine jë hnei angatre hna adrone la atresiwa i Akötresie me jele ngazone la ekalesia. Maine jë hnei angatre fe hna ngazo koi së isa ala cas. Ngo maine troa wange hmaca la pengöne la ketre atr ka ietra hnene la itre qatre thup thenge la ixatua qaathei Iehova, nge thupene lai kola kepe angeice hmaca hnine la ekalesia, haawe, kolo lai a amamane laka, ase hë Iehova nue la ngazo i angeic. (Mat. 18:17-20) Hapeu, thaa kolo kö lai a uku së troa nyitipu Nyidrë? Eje hi laka maine tro sa calogitr nge thaa hane kö së nue la ngazo i angeic, haawe, easë hi lai a icilekeu me Iehova. Maine easa ajane troa sajuëne la tingetinge me caasi e hnine la ekalesia i Akötresie me hane kepe së hnei Nyidrë, haawe, loi e tro sa ‘acatrene la ihnimi së’ kowe la itre atr ka ietra nge hna kapa hmaca.—Mat. 6:14, 15; Luka 15:7.
“Nyipi Ewekë Angeice Koi Ni”
16. Pine nemene matre thaa madrine kö Paulo koi Mareko?
16 Hetrenyi la ketre edromë e hnine la Tusi Hmitrötr ka amaman, ka hape, thaa tro pi kö sa akökötrene e kuhu hni së la itre mekune ka ngazo göne la itre atr ka akötrë së. Drei la ketre ceitun, hna hace atraqatre la hni Paulo pine la aqane ujë i Ioane Mareko. Hna tune kaa lai? Ame lo Paulo me Banaba a nyiqaane lo pane tronge i nyidro ceitu me itre mesinare, hnei Mareko hna ce tro me nyidro matre troa ixatua. Ngo ame ju hi la ketre ijin, thatre kö së la kepine matre Ioane Mareko a nuetrije la lue sine tronge i angeic, me hmaca kowe la hnalapa i angeic. Thaa madrine kö Paulo kowe la mekune cili hna xom, ene pe ame la kola eköthe hmaca lo hnaaluene tronge i nyidrë, tre, hnei Banaba me Paulo hna iwesitrë göi Mareko maine tro angeic a ce tro hmaca me nyidro. Hnene lo ewekë ka traqa ngöne lo pane tronge i nyidro, ene pe xele kö Paulo matre tro Mareko a ce tro hmaca me nyidro.—E jë la Ite Huliwa 13:1-5, 13; 15:37, 38.
17, 18. Easa atre tune kaa laka ase hë nyinyine la jol ka eje thei Paulo me Mareko, nge nemene la ini koi së?
17 Eje hi laka, thaa hnei Mareko kö hna dreng akötrëne me nanazije pine la hna alapa angeice hnei Paulo; ngo hnei angeice pe hna catre troa ce xome me Banaba la huliwa ne mesinare ngöne la ketre teritoar. (Ite hu. 15:39) Kola mama hnyawa ngöne la trenge ewekë hnei Paulo hna cinyihane göi angeic ngöne la itre macatre thupen, laka, ketre atr ka mele nyipici angeic me hna mejiune kow. Paulo hë enehila ngöne la kalabusi e Roma, nge nyidrëti a cinyanyi koi Timoteo troa wai nyidrë. Hnei nyidrëti mina fe hna qaja ngöne la tusi cili, ka hape: “Thei Mareko jë, nge ce tro jë nyipo e kolemi koi ni; ke nyipi ewekë angeice koi ni thatraqane la huliwa.” (2 Tim. 4:11) Eje hi, ame koi Paulo, tre, macaje hnyawa ha Mareko ngöne la götrane la ua.
18 Hetrenyi la ketre ini hne së hna xom qa ngöne lai edromë cili. Hnei Mareko hna eëne la itre thiina ka aijijë angeice troa ketre mesinare ka lolo. Thaa hna athixötrë angeice kö hnene lo hna pane alapa angeice pe hnei Paulo. Lue ka macaje asë hi nyidro ngöne la götrane la ua, nge thaa qea ju kö la hnei nyidroti hna iwesitrë. Eje hi, hnei Paulo hna atrehmekune e thupen, laka, ketre ixatua ka sisitria catre angeice koi nyidrë. Haawe, maine kola cile kowe la itre jol hnene la itre trejin nge kola tro la itre drai, ame la ewekë nyine tro angatr a kuca, tre, ene la troa catre xatuane la itre xaa atr troa kökötre ngöne la götrane la ua. Nyipi ewekë tro sa wanga aloine la itre trejin, ke, celë hi aqane ujë ka troa acatrene la ekalesia.
Ekalesia Me Epun
19. Tro la nöjei atrene la ekalesia ne Keresiano a itö ixatua tune kaa?
19 Ame ngöne la “nöjei ijine [celë] ka aköt,” epuni a ajane la ixatua ne la itre trejine me epun e hnine la ekalesia, nge ketre tui angatre mina fe. (2 Tim. 3:1) Nyipici laka ame itre xaa ijin thatre kö la itre Keresiano angatr isa ala cas, la aqane troa elë hune la itre jol; ngo ame Iehova, tre, atre hnyawa hi Nyidrë. Nge ijije tro Nyidrëti a upe la ketre atrene la ekalesia, me epuni fe, troa xatuane la itre xan troa xome la nyipi gojeny. (Is. 30:20, 21; 32:1, 2) Haawe, catre pi së troa trongëne la ithuecatre hna hamëne hnei Paulo! Catre pi troa “eamo . . . me akeukawane ipitön, tune lo hnei nyipunie hna kuca.”—1 Thes. 5:11.
Tro Nyipunieti a Sa Tune Kaa?
• Pine nemene matre nyipi ewekë troa akeukawane la itre xaa atr e hnine la ekalesia ne Keresiano?
• Hetrenyi la itre pengöne jol ka ijij tro epuni a xatuane la itre xan troa elë hun, nemen?
• Pine nemene matre easa ajane la ixatua ne la itre trejine e hnine la ekalesia?