Kola Sa Hnei Tusi Hmitrötr

Hetre kepine kö matre kola xupe la ihnadro?

Hna kuca hnyawane la ihnadro matre troa lapaane hnene la itre ka mel. Tru catre la tim, ke ketre ewekë lai ka sisitria thatraqane la itre ka mel. Ame la aqane nango aezine la ihnadro, me aqane emo ne ej, me kanothe eje la jö, tre hna kuca hi lai matre tha tro kö a catr la itre timi me hnagejë hnei lepany, maine qaqacile pena hnei hedredrei. Ame lo ewekë ka heetrëne la ihnadro, lo hna hape atmosphère, memine lo lai hna hape champ magnétique, tre lue ej a thupëne la ihnadro qa ngöne la idreuthine la jö. Nge easë fe a haine la aqane kuca, matre troa imelekeu la itre öni me itre feja. Celë hi kepine matre ala nyimu la itre atr ka mekune ka hape, hetre kepine matre kola xupe la ihnadro.—E jë la Isaia 45:18.

Ngo hapeu, hna hane kö kuca matre tro fe sa akötr, me goeëne la nöjei pengöne huliwa ka tha meköti kö?—E jë la Deuteronomi 32:4, 5.

Tro kö së elany a traqa kowe lai?

Hna xupe la ihnadro matre troa mele madrine hnene la itre atr ka lapaane ej, me imetrötrekeu, me hnim la Atre Xupi angatr. Celë hi kepine matre tru ju kö la hnëqa ne la atr hune la itre feja me itre öni. Atreine së troa trotrohnine la pengöne la Atre Xupi së, nge ijije hi tro sa öhne la eloine la itre thiina i Nyidrë, me nyitipu Nyidrëti mina fe.—E jë la Ate Cainöj 12:13; Mika 6:8.

Atreine hi la Atre Xupi së troa kuca casine la nöjei ewekë asë hnei Nyidrëti hna ahnithe koi së e celë fen. Celë hi kepine matre xeci hnyawa koi së laka, atreine kö Nyidrëti elanyi kuca matre tro hmaca kö a mele madrine la itre atr ka troa lapaan la ihnadro.—E jë la Salamo 37:11, 29; Isaia 55:11.