KA QA NGÖNE ICETRÖN | HAPEU KA MELE LA ITRE ANGELA?
Ixatua Ne La Itre Angela
Hnene la itre angela ka nyihlue i Akötresie hna nyipiewekëne la huliwa ne la itre atr, me thele troa kuca la aja i Iehova. Ame lo Akötresie a xupe la atr, hnene la itre angela “hna ce nyima . . . me ce hë madine la nöjei nekö i Akötesie asëjëihë.” (Iobu 38:4, 7) Ame ngöne la mele ne la atr, hnene la itre angela hna “thuluëne” la itre hna perofetan ka troa traqa kowe la fen.—1 Peteru 1:11, 12.
Kola mama e hnine la Tusi Hmitrötr ka hape, hnene la itre angela hna xatuane la itre hlue i Akötresie troa kuca la aja i Nyidrë. (Salamo 34:7) Hanawang la itre xa hna melën:
Qëmekene tro Iehova a apatrenyi Sodoma me Gomora, hnene la lue angela hna xatua Lota me hnepe lapa i angeic troa kötr qa cili.—Genese 19:1, 15-26.
Ame ekö e Babulona, hna amekötine troa kuiëne la köni thöth ne Heberu ngöne la ihueë, nge hnei Akötresie hna “upe la angela i nyidë troa amelene la ite hlue i nyidë.”—Daniela 3:19-28.
Hnei Daniela hna lapa jidri ka pexej ngöne la hnaope i liona, nge mele kö angeic. Öni angeic, “hnei Akötesingö hna upe la angela i nyidë, me ahumune la ite qe ite liona.”—Daniela 6:16, 22.
Ijije tro epuni a kepe thangane la huliwa ne la itre angela
HNA XATUANE LA ITRE PANE KERESIANOHNENE LA ITRE ANGELA
Hnene la itre angela i Akötresie hna xatuane la itre pane keresiano matre troa eatrëne la aja i Iehova. Hanawang la itre xa hna melën:
Hnene la ketre angela hna fe la itre qëhnelö ne la kalabusi me upe la lue aposetolo, troa cainöje hmaca ngöne la ēnē.—Ite Huliwa 5:17-21.
Hnene la ketre angela hna upi Filipo, troa xome la gojenyi ne tro kowe la hnapapa, gojenyi ne tro Ierusalema me Gaza. Hna upi angeic troa cili thenge matre troa cainöje kowe la ketre atre Aithiope ka bëek qa hna atrunyi Akötresie e Ierusalema.—Ite Huliwa 8:26-33.
Ame hë la ijine Akötresieti a kapa la angetre ethen, hnene la ketre angela hna mama koi Konelio, tane isi angetre Roma, me upi angeic troa thei Peteru.—Ite Huliwa 10:3-5.
Ame la kola akalabusi Peteru, hna mama koi angeic la ketre angela, ka ee angeic kowe kuhu trön.—Ite Huliwa 12:1-11.
NEMENE LA AQANE XATUA EPUN HNENELA ITRE ANGELA?
Tha mama kö enehila la aqane upe Akötresie la itre angela troa xatuane la itre atr, tune ekö lo. Ngo, öni Iesu: “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj ; ame hna traqapi la pun.” (Mataio 24:14) Kola xatuane enehila la itretre drei Iesu hnene la itre angela.
Itre angela a ixatua tro fë la maca ka loi ngöne la fen asë
Kola mama jëne la tusi Hna Amamane ka hape, aja ne la itre angela troa xatuane la itre atr troa atrepengöi Iehova, me aja i Nyidrë kowe la fen. Öni Ioane aposetolo: “Hnenge hna goeëne la kete angela kola sheshë e caha nyipine la hnengödrai, thei nyidëti la maca ka loi ka tha ase palua kö troa cainöjëne koi angete lapa e celë fen, me nöjei nöj’ asëjëihë, me nöjei tribu, me ite qene hlapa, me nöjei ate ; nge kola qaja catën, Qouju e Akötesie, me hamë nyidëti la atrun, ke traqa ha la ijine hnyingëne hnei nyidë, nge thiliju koi nyidë ate xupe la hnengödrai, me fen, me hnagejë, me ite timi ka qeqe.” (Hna Amamane 14:6, 7) Nyimutre la itre hna melën enehila ka anyipicine laka, itre angela a sajuëne la huliwa ne cainöjëne la Baselaia ngöne la fen asë. Ame la kola ietra hnene la ketre atr, me bëeke hmaca koi iehova, hetre ‘madrine thene la nöjei angela i Akötresie.’—Luka 15:10.
Tune kaa ju hë elanyi e fenesi hë la huliwa ne cainöj? Ame e cili, tro la “ite ishi [ne la itre angela] ne hnengödrai” a ce xöle me Iesu Keriso, Joxu ne la itre joxu, troa “ishi ngöne la drai atraqate i Akötesie kapucatinasë” e Amagedo. (Hna Amamane 16:14-16; 19:14-16) Tro la itre angela a eatrëne la iameköti Akötresie ngöne la Iesu a “troa nyi thupene koi . . . angete tha denge thenge la maca ka loi ne la Joxu shë Iesu.”—2 Thesalonika 1:7, 8.
The ange luelue kö, itre angela a nyipiewekë epun. Angatr a wangatrune la mele ne la itre hlue i Akötresie. Jëne la itre angela, hnei Iehova palahi hna acatrene la lapaune ne la itre hlue i Nyidrë, me thupë angatr.—Heberu 1:14.
Matre, qa së isa ala cas troa ketre sipu axecië mekun. Tro kö së a kapa la maca ka loi hna tro fë e cailo fen? Ajane la Itretre Anyipici Iehova troa xatua epun troa kepe thangane la ixatua ne la itre angela.