Nyitipune Jë La Itre Angela Ka Mele Nyipici

1-2. (a) Nemene la eisapengöi easë me itre angela? (b) Nemene la ka ceitu the së me angatr?

AME la kepin matre Iehova a ee eö kowe la nyipici, ke aja i Nyidrë tro eö a hane sine la fami i Nyidrë, tune fe la itre milio lao angela ka mele nyipici. (Dan. 7:9, 10) Ame koi së, isapengöne kö së me angatr. Ka nyipici hi lai, ke hna pane xupi angatr, nge pine pë hë la itre atr. (Iobu 38:4, 7) Ketre, tru catre kö la mene i angatr hu së. Nge hnene laka, itre atr ka tha pexeje kö së, matre thatreine kö së wej la ehmitrötren me emekötine la itre angela.—Luka 9:26.

² Nyipici laka, isapengöi easë kö me itre angela, ngo ame ngöne la itre xaa götran, ceitu së hi me angatr. Ijiji easë hi troa hetrenyi la itre thiina i Iehova, me isa ië ewekë. Nge, isa hetre ëje së, me itre thiina së. Tui angatre mina fe, isa hetre hnëqa së qaathei Iehova. Nge hna xupi së fe memine la aja troa nyihluene la Atre Xup.—1 Pet. 1:12.

3. Nemene la ini hne së hna troa xome qaathene la itre angela?

³ Pine laka, ceitu së hi me itre angela, matre ijije hi tro sa xomi ini me tulu qaathei angatr. Ame ngöne la tane mekune celë, nyimutre la itre ini hne së hna troa xome qaathene la itre angela. Tro sa ce wange la aqane tro sa ipië tui angatr, me hnim la itre atr, me xomihni, me thupën matre tro pala hi a wië la ekalesia.

KA IPIË LA ITRE ANGELA

4. (a) Nemene la ka amamane ka hape, ka ipië la itre angela? (b) Pine nemene matre ka ipië angatr? (Salamo 89:7)

⁴ Ame la itre angela ka mele nyipici, ke ka ipië. Ngacama itre ka atrein, me ka hetre men, me inamacan, ngo angatre pala hi a trongëne la itre hna amekötin hnei Iehova. (Sal. 103:20) Ame la angatr a eatrëne la hnëqa i angatr, ke tha angatre kö a sipu selën, maine pi mama fë la mene i angatr. Madrine catre angatr troa huliwa koi Iehova, ngacama tha hna qaja kö la itre ëje i angatr.a (Gen. 32:24, 29; 2 It. Jo 19:35) Nge xele kö angatr ma troa hane atrunyi angatr. Pine nemene matre ka ipië la itre angela? Pine laka angatr a hnimi Iehova, me metrötrë Nyidrë.—E jë la Salamo 89:7.

5. Kola mama tune kaa la ipië ne la angela lo nyidrëti a ameköti Ioane? (Wange ju fe la foto.)

⁵ Tro sa ce wange la ketre hna melëne e hnine la Tusi Hmitrötr, ka amamane la ipië ne la itre angela. Ame lo macatre 96 M.K., hnei Ioane hna meköle goeëne la ketre angela laka, tha hna qaja kö la ëjen. (Hna Am. 1:1) Hna ketri Ioane hnene la hnei angeic hna öhn, matre hnei angeic hna sa iwatingöneca me thil qëmekene la angela. Ngo hnene lai angela hna canga sewe angeic me hape: “Eö a u? The tune kö lai! Ketre hlue hi ni tui eö, me tune la itre trejin me eö . . . Nyihlue i Akötresieti jë pe!” (Hna Am. 19:10) Hane petre hi la ketre aqane ipië! Tha hnene kö la angela hna thel troa selë nyidrë me pi mama. Ngo hnei nyidrëti pe hna canga upi Ioane troa thil koi Iehova. Nge tha hnei nyidrëti kö hna thaipië Ioane. Ngacama ka hekö hë nyidrë nyihlue i Iehova, nge ka tru kö la mene i nyidrë, ngo öni nyidrë, “ketre hlue hi ni tui eö.” Nyipici laka, hnei nyidrë hna ameköti Ioane, ngo ka menyike me ihnim la aqane sa i nyidrë. Öhne hi la angela laka, hna ketri Ioane hnene la hnei angeic hna meköle goeën.

6. Tro sa nyitipune tune kaa la aqane ipië ne la itre angela?

⁶ Tro sa nyitipune tune kaa la aqane ipië ne la itre angela? Ame la easa kuca la itre huliwa hna ahnith koi së, ke tha tro pi kö sa sipu selë së me thele troa pi mama. (1 Kor. 4:7) Ngacama ka hekö hë së nyihlue i Iehova, maine tru la itre hnëqa së, ngo tha tro pi kö sa mekun ka hape, ka sisitria kö së hu itre xan. Maine tru ju hë la itre hnëqa së, ngo loi e tro pala hi së ujë tune la itre ka co. (Luka 9:48) Tune la itre angela, loi e tro sa nyihlue i itre xan, nge tha tro kö a pi mama.

7. Tune kaa la aqane tro sa ipië la easa hajin maine amekötin la ketre atr?

⁷ Loi e tro fe sa ipië la easa hamë ihaji maine iameköti, ngacama ketre trejine ju hë maine nekö së pena. Ame itre xaa ijin, ke ka catre pi hë la iameköti. Ngo tune kaa la aqane tro sa hamëne la ihaji, nge tha tro kö a akötrëne la atr tune la aqane kuca ne la angela koi Ioane? Maine tro sa mekun ka hape, ka sisitria kö la atr hu së, tro së lai a nyitrepene la itre eamo së hnei Tusi Hmitrötr, me hamën cememine la metrötr me ihnim.—Kol. 4:6.

ITRE ANGELA A HNIM LA ITRE ATR

8. (a) Nemene la aqane amamane Luka 15:10, la ihnimi ne la itre angela kowe la itre atr? (b) Nemene la ixatua hna hamën hnene la itre angela ngöne la huliwa ne cainöj? (Wange ju fe la .)

⁸ Itre angela a wangatrune la itre atr. Nge tru la ihnimi angatr kowe la itre atr. Tru la madrin ne la itre angela la kola bëeke hmaca la ketre neköi mamoe koi Iehova, maine ketre a saze aqane ujë matre nyihlue i Nyidrë. (E jë la Luka 15:10.) Ketre, angatr a catre xatuane la huliwa ne cainöj. (Hna Am. 14:6) Ngacama tha angatre kö a cainöj meköt kowe la itre atr, ngo angatr a eatrongëne la itre trejin kowe la itre atr ka ajan troa atre Iehova. Thatre kö së ka hape, angatre kö la ka eatrongë së kowe la ketre atr. Ngo ame pe, atre hi së laka, hnei Iehova pala hi hna huliwane la uati hmitrötr matre xatuane la itre atr, me iujine la itre hlue i Nyidrë. (It. Hu. 16:6, 7) Nge, hnei Nyidrëti hna majemine up la itre angela troa xatua së la easa cainöj. Matre xecie koi së laka, ame la easa cainöjëne la maca ka loi, ke itre angela pala hi a xatua së.—Wange ju la hna eköhagen “Hna Drenge La Itre Thithi Angatr.”b

9. Tro sa nyitipune tune kaa la ihnim ne la itre angela kowe la itre atr?

⁹ Tro sa nyitipune tune kaa la ihnim ne la itre angela kowe la itre atr? Ame la easa dreng laka, ase hë kapa hmaca la ketre trejin hna up, madrine jë së, tune la itre angela. Kepe angeice hnyawa ju, nge amamane jë la ihnimi easë koi angeic. (Luka 15:4-7; 2 Kor. 2:6-8) Easë mina fe a nyitipune la itre angela, la easa catre cainöj. (A. Cai. 11:6) Tune la aqane xatua së hnei angatr ngöne la huliwa ne cainöj, loi e tro fe sa xatuane la itre trejine ngöne la huliwa cili. Tro sa tune kaa? Hëne jë la ketre trejin ka xötrei cainöj troa ce cainöj me epun. Maine pena, xatuane jë la ketre trejin ka qatre hë maine ka adikape, matre troa hane sine la huliwa ne cainöj.

10. Nemene la hna ini së hnene la tulu i Sara?

¹⁰ Tune kaa e tha ijiji easë kö troa kuca la hne së hna ajan koi Iehova? Tro kö la itre angela a xatua së ngöne la huliwa ne cainöj. Tro sa pane ce ithanatan la pengöi Sara,c ketre trejin föe qa Inde. Thupene la 20 lao macatre ne pionie eahlo, hnei eahlo hna wezipo. Ame e cili, thatreine hë eahlo mejë qa ngöne ili. Ame lo xötrei, ke hleuhleu catre eahlo. Ngo hnei eahlo hna e Tusi Hmitrötr lapa, me kapa la ixatua me ihnim qaathene la trejin ke, madrine hmaca jë hi eahlo. Eje hi laka, loi e tro eahlo a thele la itre xaa aqane cainöj. Pine laka, thatreine kö eahlo lapa troa cinyanyi tus, matre eahlo pe hi a cainöj jëne telefon. Hnei eahlo hna hëne hmaca lo itre atr hnei eahlo hna porotrik memin. Nge hnene la itre atr cili hna hamëne la itre numero ne la itre xaa atr ka ajan troa ini Tusi Hmitrötr. Ame la thangan ke, tha qea ju kö, nge traqa koi 70 lao atr ka ini Tus me eahlo. Ngo tru pala ha, matre hnei eahlo hna hamëne la itre xan kowe la itre xaa trejin ne la ekalesia. Nge alanyimu hë thei angatr ka sine la itre icasikeu. Madrine catre la itre angela troa ce huliwa memine la itre trejin ka tui Sara, ka kuca la hnei angatr hna atrein ngöne la huliwa ne cainöj!

KA XOMIHNI LA ITRE ANGELA

11. Pine nemene matre itre tulu ne xomihni la itre angela ka mele nyipici?

¹¹ Itre tulu ne xomihni la itre angela ka mele nyipici. Ekö hë angatr goeën la itre huliwa ka tha meköti kö, memine la ngazo. Öhne hi angatr la Satana me itre xaa angela ka ce huliwa me angatr, a icilekeu me Iehova. (Gen. 3:1; 6:1, 2; Iud. 6) Tusi Hmitrötr a qaja ka hape, hnene la ketre angela ka mele nyipici hna isi memine la ketre dremoni ka catr. (Dan. 10:13) Qane lo ijine i Adramu me Eva, itre angela a öhne laka, ala xalaithe pe hi la itre atr ka iëne la hmi ka wië. Ngo, angatr pala hi a catr nyihlue i Iehova ngöne la madrin. Xecie koi angatr laka, tro kö a traqa la ijin tro Nyidrëti a apatrene la itre ewekë ka tha meköti kö.

12. Nemene la ka troa xatua së troa xomihni?

¹² Tro sa nyitipune tune kaa la xomihni ne la itre angela? Maine jë easa öhne la itre huliwa ka tha meköti kö, maine kola icilekeu me easë. Ngo tune la itre angela, ka xecie koi së laka, tro kö Iehova a apatrene la ngazo. Celë hi matre, “catre pi së kuca la loi.” (Gal. 6:9) Ketre, aja i Iehova troa xatua së troa xomihni. (1 Kor. 10:13) Sipo Nyidrëti jë la uati hmitrötr. Tro ej a xatua së troa xomihni me madrin. (Gal. 5:22; Kol. 1:11) Maine troa icilekeu me easë, catre jë mejiune koi Iehova, nge the xou kö, ke tro kö Nyidrë a xatua së me aegöcatrenyi së.—Heb. 13:6.

ITRE ANGELA A ISINE TRO PALA HI A WIË LA EKALESIA

13. Nemene la huliwa ka tru hna kuca hnene la itre angela ngöne la itre drai ne la pun? (Mataio 13:47-49)

¹³ Ame ngöne la itre drai ne la pun, hetre huliwa ka tru hnei Iehova hna ahnithe kowe la itre angela. (E jë la Mataio 13:47-49.) Kola ea la itre milio lao atr hnene la huliwa ne cainöj. Ame la itre xan, angatr a saze aqane mel matre troa nyihlue i Iehova, nge ame itre xan, ke tha sisedrëne kö angatre la ini Tus. Ame la huliwa ne la itre angela, ke troa ‘aisane la itre atr ka ngazo me itre atr ka meköt.’ Angatr a thupëne matre tro pala hi a wië la ekalesia. Tha kolo kö lai a hape, ame la itre ka nue la ini Tus ekö, ke tha ijiji angatre hmaca kö troa xom hmaca la ini Tus, maine tro pala hi a lolo la ekalesia. Ngo ka xecie koi së laka, itre angela a thupëne matre tro pala hi a wië la itre ekalesia.

14-15. Tro sa nyitipune tune kaa la aqane thupëne la itre angela la ehmitrötrene la ekalesia? (Wange ju fe la itre foto.)

¹⁴ Tro sa nyitipune tune kaa la aqane thupëne la itre angela la ehmitrötrene la ekalesia? Loi e tro së isa ala cas a thupën, matre tha tro kö a lö hnine la ekalesia hnene la itre ini ka thoi me itre huliwa ka sis. Loi e tro sa pane thupëne la hni së. Matre nyipiewekë tro sa iëne hnyawane la itre sinatronge së, me nuetrije la itre iajojezi qa ngöne la fen. (Sal. 101:3) Ketre, loi e tro fe sa xatuane la itre trejine me easë troa mele nyipici koi Iehova. Nemene la nyine tro sa kuca, e atre hi easë ka hape, hetre ngazo hna kuca hnene la ketre trejin? Pine laka tru la ihnimi së koi angeic, loi e tro sa ithuecatr koi angeic troa wange la itre qatre thup. Maine tha kuca kö angeic, qanyi easë wang la itre qatre thup. Aja i easë troa canga xatuane la itre trejin ka wezipo!—Iako. 5:14, 15.

¹⁵ Ame pe, hnene la itre xaa trejin hna kuca la itre ngazo ka tru, matre hna upi angatr qa ngöne la ekalesia. Easa trongëne la hna qaja hnei Tusi Hmitrötr laka, ‘tha tro hmaca kö nyipunie a nyi sinee’ i angatr.d (1 Kor. 5:9-13) Kola upe la ketre trejin, matre tro pala hi a wië la ekalesia. Nge easë hi lai a hnimi angatr la easa tha ce tro me angatr. Kolo hi lai a xatua angatr troa trotrohnine laka, loi e tro angatr a canga bëeke koi Iehova. Nge ame hë la angatr a bëek, ke tru la madrine së, tui Iehova me itre angela.—Luka 15:7.

16. Nemene la itre thiina ne la itre angela hnei eö hna pi nyitipun?

¹⁶ Ketre manathith ka tru la troa atrepengöne la itre angela, me ce huliwa me angatr! Nyitipune jë la ipië i angatr, me ihnimi angatr kowe la itre atr, memine la aqane xomihni angatr, me aqane thupëne angatr matre tro pala hi a wië la ekalesia. E tro sa nyitipune la itre angela, tro hë së lai a sine la fami Iehova uti hë epine palua.