KA QA NGÖNE ICETRÖN | HAPEU KA MELE LA ITRE ANGELA?
Pengöne La Itre Angela
Ajane kö epun troa atre la pengöne la itre angela? Itre drei angatr? Ka xulu angatr qa ka? Nge nemene la huliwa i angatr? Wesi Ula i Akötresie hmekuje hi la ka sa la itre hnying celë. (2 Timoteo 3:16) Nemene la hna qaja hnei Tusi Hmitrötr?
Ame Akötresie tre, ketre ua Nyidrë, ketre tune mina fe la itre angela, pëkö “sine ijöne me ite june” i angatr. Itre u angatr ka ce mele me Akötresie e hnengödrai.—Luka 24:39; Mataio18:10; Ioane 4:24.
Ame itre xa ijin, kola xome la pengöi atr hnene la itre angela matre troa eatrëne la itre hnëqa i angatr qaathei Akötresie. E ase hë angatr la huliwa i angatr e celë fen, angatr a xome hmaca la sipu pengöi angatr.—Angete Amekötin 6:11-23; 13:15-20.
Ngacama, ame e hnine la Tusi Hmitrötr, hna amamai angatr ceitu me itre trahmany, nge angatr a xome la pengöi trahmany göi troa eatrëne la hnëqa i angatr, ngo ame pe, pëkö angela trahmanyi maine angela föe pena thei angatr. Matre pëkö faipoipo nge pëkö hnaho thei angatr. Nge, tha hna xupi angatre kö tune la atr, ene la troa pane medreng, me nekönatr, me thupëtresij. Hnei Iehova hna xupe meköti angatr angela, celë hi matre hë angatre jë hnei Tusi Hmitrötr ka hape, “ite nekö i Akötesie.”—Iobu 1:6; Salamo 148:2, 5.
Öni Tusi Hmitrötr, hetre “ite hna ewekë ite ate, me ite angela.” Kolo lai a hape, hetre qene hlapa ne la itre angela, me aqane ithanata i angatr. Maine nyipici laka, hnei Akötresie hna upi angatr troa ithanata kowe la itre atr, ngo tha hnei Nyidrëti kö hna upi së troa thil me thithi koi angatr.—1 Korinito 13:1; Hna Amamane 22:8, 9.
Itre miriad lao miriad la itre angela, maine jë itre miliar angatr.a—Daniela 7:10; Hna Amamane 5:11.
“Ite ka mene ngöne la cat” la itre angela: Sisitria kö la mene i angatr memine la inamacane i angatr hune la itre atr. The qaja kö la enyimenyime i angatr troa tro qa ngöne la ketre götran kowe la ketre götran, nge thatreine kö troa mekun hnene la atr.—Salamo 103:20; Daniela 9:20-23.
Ngacama, ka catr me ka inamacan angatr, ngo hetre ifego i angatr.—Mataio 24:36; 1 Peteru 1:12.
Hna xupi angatr cememine la itre thiina i Akötresie, memine la sipu pengöi angatre kö, nge hetrenyi fe thei angatr la atreine troa ië ewekë. Matre tune la atr, ijiji angatr troa ketre sipu iëne troa kuca la loi maine ngazo. Ngazo pe, hetre itre xan e angatr ka iëne troa pi tru koi Akötresie.—Iuda 6.
a Ame la ca miriad tre, 10 000. Matre, ame la 1 miriad lao 1 miriad tre, 100 millio. Haawe, itre hadredr lao milio la itre angela, maine jë itre miliar!