Tro Fë Trongëne Jë La Itre Zonale Troa Ithuemacanyine La Nyipici
1 Ame ngöne la fene hnengödrai enehila, ke, hnene la itre pibilisite hna majane atrune, me itre hna thingehnaeane thoine hnene la politike, memine la itre mekune ka iathixötrë qangöne la nöjei nöj’asë, hna asihngödrine la itre nyipi ewekë. Ngo loi pe, La Tour de Garde me Réveillez-vous!, ke, lue zonale ka amamane hnyawane la nyipici ne la Baselaia i Akötresie, nge lu’eje hmekuje hi la ka amamane la gojenyine tro së a kapa madrine la nyipi manathith.
2 Ame ngöne la ketre nöj, thupene la hnene la ketre hene katru hna kapa madrine la itre zonale së, ke, hnei nyidrëti hna xatuane la itre trejine me easë, matre fe gojenyi angatre pi troa trofë trongëne la itre zonale së. Hanawange, öni nyidrëti ka hape: “Tru catre la madrinenge troa xatua epun, nge eni a wai hatrene laka La Tour de Garde la ketre zonale ka sisitria catr.” Ketre hnëqa katru la troa hamë ixatua kowe la itre xaa atr, ene la troa trofë trongëne la itre zonale celë, ke, celë hi gojenyine tro la nöjei atr a hetrenyi la atrehmekune me iamele. (Ioane 17:3) Hawe, tro së a amamane tune ka la itre zonale celë e treu mei? Ijije tro la itre mekune celë a xatua së.
3 Maine epuni a amamane la itre pane taane ne “La Tour de Garde” ne 15 mei, ke, qaja ju ka hape:
◼ “Eahuni a troa ithahnataane memine la nöjei atr, la itusi loi hna salemëne ngöne la fene hnengödrai. Hapeu, atre fe kö epun? [Nuepi troa sa] Eahuni a qaja la Tusi Hmitrötr. Hetre sipu kepine matre alanyimu la itre atr ka ajane troa itöne la Tusi Hmitrötr. Hanawange, kola meköle la kepine cili ngöne la tusi 1 Timoteo 3:16.” Thupene la hna e la xötr, e hetrenyi ngöne la ketre taane la ketre mekune ka ihmeku memine la xötre celë, ke, amamane ju, nge thelejëne jë troa hamëne lai zonal.
4 Maine thupene la hna xötrei ithahnata, tha tro pe a aqean, ke, ijije troa qaja ka hape:
◼ “Ma nyipëti fe a hane wangatrehmekune ngöne la itre macatre enehila, laka kola kökötre trootro la itre jole tro la nekönatr’a cile kow. Ame la nyipëti a hane goeën, ke, nemene la itre jole ka traqa kowe la itre nekönatre ngöne la götrane thei nyipë?” Nue pi troa sa. Amamane hnyawane jë la itre akötre hna melëne hnene la itre nekönatre ngöne la fene hnengödrai me ithahnataane ngöne la itre pane taane ne la Réveillez-vous! ne 8 mei, nge köjane ju la nyin qathene la Baselaia i Akötresie.
5 Ngöne la sine pepa nyine fejane la itre ëjene atr nyine tro së a wange, hetrenyi fe lo itre ka pi ithahnata, ngo tha traqa pe kowe la pune ka loi. Qangöne la hnepe hnei angatre lai hna sa, ke, ijije tro së a wangatrehmekune ka hape ma tha nyipiewekë hmaca kö troa wai angatr. Ngo ame pe, ke, hetre nyine tro kö së a kuca matre thuegojenyi ne la itre zonal. Maine hne së hna öhne la ketre taane ka troa ketr la ketre atr hne së hna atre, ke, the luelue kö troa vizitëne lai atr, nge hamëne pi lai zonal.
6 Huliwa ne cainöje trootro ngöne la nöjei ijin: Tro la ketre aqane huliwa ka loi celë a ahlëne la ajane la itre atr kowe la itre zonal. Ame itre xaa ijin, ke, hnene la icetröne la zonale hna nyijë së troa nyiqaane la porotrik. Hna majemine amë hnene la ketre sör, la itre zonale hune la biro i angeic, matre hnene fe la itre sine huliwa i angeice hna hane e itr’ej; celëhi matre tru la itre zonale hna hamën. Ame ngöne la treu celë, ke, loi e tro palahi a troxome trongën’itr’eje ngöne la itre gojenyi së ngöne la easë a itö, maine ngöne kar, maine ngöne la itre xaa götrane gaa hetre atr.
7 Hne së hna öhne qahnine la lue zonale La Tour de Garde me Réveillez-vous!, la itre nyine sa kowe la itre hnyinge ka iamele, ene la göi Iehova memine la hmi nyidrë. Easë a ajane troa huliwaane la itre zonale celë ngöne la nöjei götrane ne la cainöje trootro matre troa xatuane la nöjei atr troa atrepengöi “Iehova, Akötesieti ka nyipici.” — Sal. 31:5.