Tro Angatr’a Drenge Tune Ka, e Tha Bëeke Kö Së Troa Iwaihmaca?
1 “Tro angat’a denge tune ka nge pëkö ate cainöj?” (Roma 10:14). Nyipici, tro angatr’a drenge me trotrohnine tune ka la nyipi nine la nyipici, e tha hne së kö hna maca matre kuca hnyawaane la itre iwaihmaca? Nyipiewekë tro së a wange hmaca la nöjei atr hne së hna ce ithahnataane memin, la maca ne la Baselaia. Ame la treu celë, ke, ka loi la tro hmaca së a amexeje lo hne së hna ce wange lo traqa së hnapan, me amamane la itre xaa mekene tusi hna xome qa hnine la boroshüre lo hne së hna amë pe; tro la aqane kuca celë a thuejë së troa nyiqaane inine la Tusi Hmitrötre memine la ketre atr.
2 Maine hne së hna hamëne la boroshür “Quel est le but de la vie? — Comment le découvrir?”, ijije troa ce ithahnataane matre nyijëne troa inine la Tusi Hmitrötr. Amamane jë la icetröne la itus, nge hnyinge jë ka hape:
◼ “Maine ka xecie hnyawa koi nyipëti memine la fami nyipë troa öhne la tingetinge ngöne la itre drai ka calemi e celë fen, hapeu, ajai epuni kö troa hane ce mele ngöne la fene cili? [Nuepi lai atr troa sa, nge qaja jë la itre mekune ne la götrane 29 me 30.] Nyipici, ngacama alanyimu palakö la ka lueluëne la mele cili, loi pe, troa traqa e ketre drai. Ame koi Akötresie, atreine asë hi nyidrë, nge tro nyidrëti a aeatrëne la nöjei ewekë hnei nyidrëti hna thingehnaean.” E jë Isaia 32:17, 18 ngöne la paragarafe 2, maine e hnine la Tusi Hmitrötr. Thupene lai, qejepengöne jë ka hape ame ngöne la fene hnengödrai asë, hetre itre atr hë ka öhnyi loi ne la madrine memine la hni ka tingetinge hnei angatre hna kapa, qa ngöne la mejiune i angatre ka catre kowe la itre drai ka calemi. Ithahnatane jë së la itre mekune ne la Tusi Hmitrötre hna cinyihane ngöne la hnahage 7 ngöne la boroshür, götrane 25, nge loi e tro së a amamane kowe lai atr ka hape tro la etide ne la boroshür a akökötrene la atrehmekune i angeic. Hnëkëne jë së matre canga bëeke hmaca së troa sisedrëne la porotrik.
3 Ngöne la easë a iwaihmaca, nge maine hne së hna amë pe lo boroshüre “Dieu se soucie-t-il vraiment de nous? ”, ke, loi tro së a qaja ka hape:
◼ “Ame lo traqa hnapane ni, ke, hne so lo hna ithahnataane lo ca hnying, hna hape: Hetre Akötresieti kö ka kukehni së? Nge maine ejehi, ke, hapeu tro kö nyidrëti a apatrene la akötre me iangazo? [Nuepi la atr troa sa, nge qejepengöne jë la mekene 6 ne la boroshür.] Hnei Akötresie hna thingehnaeane ka hape tro nyidrë a nyihnane la fene ka ngazo celë hnene la fene ka hnyipixe, nge tro la itre ka menyike a mele tingeting. [E jë Salamo 37:11.] Ijiji së fe troa hane melëne la fene ka hnyipixe, e hetre lapaune së kowe la Tusi Hmitrötre me e tro së a trongëne la itre tulu ka meköti qa hnin.” Loi e tro së a qejepengöne koi itre xane la aqane hnëkëne la itre temoë matre atreine angatre troa inine la itre atr la Tusi Hmitrötr.
4 Ngöne la easë a wange hmaca la ketre atr ka kapa la boroshüre “Voici, je fais toutes choses nouvelles”, ke, loi fe tro së a pane amamane la iatr ngöne la icetrön, nge thupene lai, hnyingëne jë tune la:
◼ “Tune ka la aqane mekune i nyipë la mele ngöne la fene ka pë ethan? [Nue pi lai atr troa sa.] Ame la iatr hnei nyipëti hna goeën, ke, tha hna kuca kö nyine amingömingöne la icetröne la tusi ceitu me itre ewekë hi hna mekune hnei atr matre sija pi hi ngöne ipepa; pëkö, ame la hna amamane celë, ke, hna xom’eje qa hnine la itre hna thingehnaeane hnene la Tusi Hmitrötr. [E jë Hna amamane 21:4 me Salamo 37:11, 29.] Ame la ajang, ke, tro ni a qejepengöne koi nyipëti me fami nyipë, la aqane tro epuni a hane kapa la itre manathith.” Sisedrëne jë së la porotrik, me hnyingëne jë ka hape, ajane kö angatre troa ini Tusi Hmitrötr.
5 Ngöne la easë a öhne la itre atr ka hni ka ipië, ka thele la nyipici, ke, qanyi së amamane la ihnimi ka nyipici, ene la tro së a bëeke troa wai angatre hmaca matre xatua angatre troa trongëne la itre hnei angatre hna dreng. Tro së a amamane la itre nyipici ka hmitrötr, ene lo itre hna hamë së nyine amele së, me angatre fe itre ka drei së. — 1 Tim. 4:16.